Mika 7
7
Kusina ka Israyeli
1Dikhombo kwangu! Nguko no nga tile ta kuhaphwa ka mihando ya malanga, ku nga va vo roletela msana ka kuhaphwa ka mauvha: Kha ku na txizangwa txa mauvha o dingana kudyiwa, hambi makuwu o navelwa ngu mbilu yangu. 2Vathu vavanene va nyamalate ha mafuni, kambe kuwalo ni wammweyo wo lulama hagari ka vathu; votshe va ti longisela kutheketa mnoha; mmwani ni mmwani a riyela mwanawe ngu likoka. 3Manza awe ma ti ningetetela kumaha wubihi; maxonga ma wotisela, se mlamuli a tutumela hakhelo, ni wa hombe a womba-womba ngu kunavela ka mbilu yakwe, ngu kumaha keto, vona votshe mba khulumeteli. 4Wa txukwana kwawe a fana ni mpa; wo lulama a pinda ni mndonga wa mipa; di tshuketile ditshiku da kutsayiswa ka vawoneleli vako, kutile kuendelwa kwako; konkuwa ku nava ni pfilu-pfilu.
5Mi nga kholweni ka mngana, hambi kuthemba mthangeli wanu; tsivela wule a otelako hakhana kwako, bundamisa txisofu txako. 6#Wona ni ka: Mat. 10:35-36; Luk. 12:53. Nguko mfana a txhipisa tate wakwe, mwanana wa dihorana a wukela mwamwakwe, mamanyani a wukela masale wakwe, valala va m'thu ngu va nyumba yawe.
7Ani koko, ni verela ka Mkoma; ni na verela ka Txizimu txa kuhanyiswa kwangu; Txizimu txangu txi na ni engisa.
Txizimu txa hanyisa vathu va txona
8Awe mlala wangu wa txisikati, u nga tsakele dikhombo dangu; hambi ngako ani ni di wite, ni na wuka; ngako ni txi zumba txidemani, Mkoma a na va liwoningo langu. 9Ni na xaniswa ngu kuhenya ka Mkoma, nguko ni mu onhete, kala kuza e lamula mhaka yangu, e ni mahela madingano angu, ene a na ni wuyisa kuwonekelani, se ani ni na wona kululama kwakwe. 10Se mlala wangu wa txisikati a na ti wona eto, se a na fenengetwa ngu pfilu-pfilu, awu a ku khene: Ahayi Mkoma, Txizimu txako kani? Maso angu ma na mu wona a txi kadetelwa, kufana ni madhaka a tiruwani.
11Ka ditshiku di u no aketa maguma ako, kedo ditshiku, txi na va txi di ngadi kule txileleto. 12Ka dona ditshiku dile va nata kwako, kukhukhela Asiriya kala ka madhoropa a mtamo, ni kukhukhela makhokholani kala mnamboni, ni kukhukhela lineneni kala ka limwani linene, ni ka mmango kala ka wumwani mmango. 13Kambe ditiko diya di na hasamulwa, ngu mhaka ya vaaki va dona, ni mhaka ya mihando ya mithumo yawe.
Mkombelo wo kombela wumbilu wa Txizimu
14Dyisa vathu vako ngu ndonga yako, i ku mtxhambi wa thomba yako wu zumbako wokha txitingani, hagari ka ditiko do nona; wu na dyiselwe Bhasani ni Gileyadhi, kufana ni masiku a kale. 15Ani ni na va komba sixamaliso, kufana ni masiku a kuhuma kwako ngu ditikoni ka Egipta. 16Matiko ma na ti wona me wa tingana, ngu mhaka ya mtamo wakwe wotshe; va na veka dianza ha txisofu, ni tinzeve tawe ti na vhaleka. 17Va na danzela lithulu ku nga minyoka; va na huma ngu makhokholani, kufana ni sihari so tsimbila ngu dibindi na va txi dhudhumela; va nata ka Mkoma, Txizimu txathu, ngu kudhudhumela, na va txi kuthava.
18I mani wo fana ni nawe, u divalelako wubihi u divala ni wueyisi wa miboti ya thomba yako kani? Mkoma kha veki kupandiseka kwakwe yotshe mbimo, nguko a tsakiswa ngu wumbilu amu ka wunene. 19A na tshumela u hi pfela wusiwana, a na lovisa sihambunyeto sathu, kambe a na rinza sotshe sionho sathu txizivani ka linene. 20Jakobe a na mninga kuthemba, se Abrahamu a na mninga wunene wule a nga xambanya ka vatate vathu, kukhukhela ka masiku a kale.
Currently Selected:
Mika 7: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.