Marku 15

Jesu masoni ka Pilato

(Matewu 27:1-2,11-14; Luka 23:1-5,13-25; Johani 18:28-38)

1Ni mixo, vaphaxeli va hombe va to tshangana ve maha txikungo kumweko ni madhota ni vabhali ni dotshe Dibanza. Sekoko, va di sungile Jesu, va to mteka ve tsula veya mningela ka Pilato.

2Pilato a mu wotisile ku khene: “Ngawe Mfumeli wa Vajudha kani?” Jesu a mu xamute a txi khene: “U womba tona.” 3Vaphaxeli va hombe va txi mu lumbeta timhaka to tala. 4Pilato a to engeta e mu wotisa a txi khene: “Khu xamuli txilo kani? Hinga pfa timhaka ta tingi ati va ku mangalelako ngu tona!”

5Aniko Jesu kha xamula txilo ahawa koza Pilato e xamala.

Jesu e konelwa kudawa

(Matewu 27:15-26; Luka 23:13-25; Johani 18:38b--19:16)

6Kambe ngu mbimo ya M'buso Pilato a ti tolovela kuthukunyula txibotxhwa tximwetxo, atxi va nga txi mkombela. 7Se a ti ti ho wammweyo, awu ditina dakwe a dhanwako ku i Bharabhasi, a nga ti seketwe kumweko ni vale va nga wusa m'bango, va txi daya m'thu hagari ka dona dizunga dile. 8Se dibutho da vathu va to kwela veya banzani veya khata kukombela ka Pilato ti to e maha ati a tolovelako ku va mahela. 9Pilato a wotisile a txi khene: “Mi lava ti to ni mi thukunyulela Mfumeli wa Vajudha kani?” 10Nguko a ti tiziva ta ku vaphaxeli va hombe va mu ningete ngu livengo. 11Vaphaxeli va hombe va to kujetela dibutho ti to ve kombela kuthukunyulwa Bharabhasi. 12Pilato a to engeta kambe a txi womba kwawe, a txi khene: “Ni na maha txani kasi ngu wu mi m'dhanako ku i Mfumeli wa Vajudha kani?”

13Vona va to kwangula va txi kha vona: “Mu bethele ha txihambanoni!”

14Pilato a to khene kwawe: “Kasi ngubiha muni a nga kumaha kani?” Aniko vona va to tamarisa kukwangula va txi kha vona: “Mu bethele ha txihambanoni!”

15Sekoko Pilato, ngu kulava kutsakisa dibutho, a to thukunyula Bharabhasi se, msana ka kuva a di rumete kukwapela Jesu, a to mningela kasiku eya bethelwa ha txihambanoni.

Masotxhwa ma txi poyilela Jesu

(Matewu 27:27-31; Johani 19:2-3)

16Masotxhwa ma to mteka me mu yisa digumani, nyumbani ka wukoma ahawa va nga ya tshanganisa wotshe mtxawa. 17Msana keto, va to mu ambeka nguwo ya disilika do bhilivila, ve luka tshimbo ya mipa, ve yi gemeka ha msungo kwakwe. 18Sekoko, va to khata ku mlosa, va txi kha vona:

“Xewe, Mfumeli wa Vajudha!” 19Se va txi mu peka ha msungo ngu msengele, ve mu thurela lure, na va txi khizama va txi mu khozela. 20Msana ka kuva va di mu tseketsete, va to mu thavisa nguwo yile yo bhilivila, ve mu ambeka syambalo sakwe. Sekoko va to mteka kasi kuya mu bethela ha txihambanoni.

Kubethelwa ka Jesu

(Matewu 27:32-44; Luka 23:26-43; Johani 19:17-27)

21 # Wona ni ka: Var. 16:13. Se ve mana m'thu wokari, Simoni wa Kirene, tate wa Alexandre ni Rufo, a nga txi pinda a txi wuya ngu thembweni; ve mu kurumeta kupakata txihambano txa Jesu. 22Se va to mu yisa ka wukhalo wu wu dhanwako ku i Golgota, ati ti wombako ku “Wukhalo wa Txikwakwa.” 23Va to mninga vhinya yo patwa ni mira, kambe ene kha yi sela. 24#Wona ni ka: Mas. 22:18. Ngu msana va to mu bethela ha txihambanoni, ve abanela syambalo sakwe vona ngu txawe, va di thangile ngu kuxaxuva tixolo kasi kuwona atxi txi no lumba mmwani ni mmwani. 25I ti txikhati txa wuraru, mbimo yi va nga mu bethela ha txihambanoni. 26Ku ti ni m'bhalo wo komba mnandu wakwe, wu nga ti bhatwe ti taku: “Mfumeli wa Vajudha.”

27Kumweko nayo si bethetwe sigevenga simbidi, tximwetxo ngu didhawa da txinene, tximwani ngu didhawa da txibhabha kwakwe. 28[Ngu hawa ku nga tatiseka ati ti nga bhalwa taku: “A batwe kumweko ni sindaka-milayo.”]

29 # Wona ni ka: Mas. 22:7; 109:25; Mar. 14:58; Joh. 2:19. Ava va nga txi pinda va ti ti mu ruketela, va txi zinginika misungo yawe, va txi kha vona: “Ha! Awe u khundumusako Dithepele, u txi di aketa ngu masiku mararu. 30Ti hanyise upune, u txhika ngu ha txihambanoni!”

31Vaphaxeli va hombe ni vabhali, va ti ti mu xowokisela ni vona, va txi kha vona: “A hanyisile vamwani, se ene kha sikoti ku ti hanyisa apune! 32Ene i ku Mesiya, Mfumeli wa Israyeli, a na txhike konakuwa ngu ha txihambanoni, kasiku hi na ti wona, hi txi kholwa.” Hambi ni vale va nga ti bethetwe nayo, va to mu ruketela ni vona.

Kufa ka Jesu

(Matewu 27:45-56; Luka 23:44-49; Johani 19:28-30)

33Se ku di hokile txikhati txa wutxhanu ni tximwetxo, ku to phuma txidema ka dotshe ditiko kala ka txikhati txa wutxhanu ni mune. 34Sekoko ngu txikhati txa wutxhanu ni mune, Jesu a to huwelela ngu dipswi da hombe, a txi khene: “Eloyi, Eloyi, lama sabaktani,” ati ti wombako ku: “Txizimu txangu, Txizimu txangu, u ni lekete txani?”

35Vamwanyani ka vale va nga ti ti ho konaho, mbimo yi va nga mu engisa, va to womba va txi kha vona: “Engisani, ene a dhana Elija.”

36 # Wona ni ka: Mas. 69:21. Mmweyo wa vona a to tutuma eya beta txiponja amu ka vhinagre, e txi zomeka ahawa ka litshava, e mninga kasiku e sela, na a txi khene: “Lekani, hi na nga wona mwendo Elija a nata a ta mu txhikisa.” 37Aniko Jesu a to peka huwa ngu dipswi da hombe, a txi ningela muhefemulo wakwe.

38Se nguwo ya Dithepele yi to vharuka ngu hagari, kukhukhela txitimwi kala hahatshi. 39Se nduna ya dizana, yile yi nga ti emile masoni kwakwe, ngako yi di woni ti a nga fisa tona, yi to diwuka yi txi kha yona: “Ngu ditshuri awuwa m'thu i ti Mwanana wa Txizimu!”

40Va ti ti ho kambe vavasikati va nga txi wonetela va di kule; hagari ka vona a ti ti ho Mariya wa Magdhala ni Mariya, mame wa Jakobe wam'dotho, ni Joseti ni Salome. 41Avava ngu vale va nga txi mu londisela ni ku mu thumela, mbimo yi ene a nga ti Galileya; ku ti ni vamwanyani vavasikati vavangi, va nga ti kwete kumweko nayo veya Jerusalema.

Kukelelwa ka Jesu

(Matewu 27:57-61; Luka 23:50-56; Johani 19:38-42)

42Mbimo yi ditambo di nga txi ya kuswani, ka ditshiku da kulongisela, ati ti wombako ditshiku di di gametwako ngu Sabbata, 43Josefa wa Arimateya, i nga ti didhota da nduma ka Dibanza, awuwa nene a nga txi rinzela Mfumo wa Txizimu, a to tsanisa mbilu e tsula ka Pilato eya kombela txirumbi txa Jesu 44Pilato a to xamala ngu kuengisa ti to Jesu se a fite. 45Konaho a to rumela kudhana nduna yile ya dizana, e yi wotisa ti taku a fite kale kani. Se ngako a di zivisilwe ngu nduna ya dizana, Pilato a to rumela ti to txirumbi txi na ningelwe ka Josefa. 46Sekoko, Josefa, msana ka kuva a di xavile dilasoro, a to thavisa mmidi wa Jesu ha txihambanoni, e wu phutela ngu dona, e wu veka diyivani, di nga ti ketwe ha dirigwini; se e wumbuluta txiwindi, a txi khubhunyeta ngu txona diyiva. 47Mariya wa Magdhala ni Mariya, mame wa Joseti, va to wonisisa ahawa va nga mu kelela kona.

Currently Selected:

Marku 15: BEC2016

Highlight

Copy