Mitengo 10
10
Kukhukhela mmangoni ka Sinayi kala Mowabhi
(10:1--20:29)
Mipundu ya silivhela
1 Mkoma a to womba kambe ka Mosi, a txi khene:
2“Maha mipundu yimbidi ya silivhela; u yi maha ngu silivhela yo tshulwa; u na ramba ngu yona msengeletano, kasi kumaha txiziviso txo khukha ha wugoveloni. 3Sekoko mbimo yile yi no vetwa ngu wumbidi wa yona, wotshe msengeletano wu na tshangana hafuhi kwako, ha txikeni ka ditenda da msengeletano. 4Se ngako ku txi vetwa mpundu wumwewo dwe, va na sengeletana kwako vathangeli, i ku misungo ya va magumi a mazana, a va ka Israyeli. 5Sekoko ngako mipundu yi txi vetwa ngu mtamo, ava va ku ka magovelo a wutxani, ngu vona va no khukha kukhata. 6Se mi txi veta da wumbidi, ava va nga gova didhawa da wulambwe, va na khukha ni vona; ngako mi txi veta ngu mtamo, magovelo ma na khukha. 7Kambe i ti kuveta ko dhana msengeletano dwe, mavetelo ma nava o hambana. 8Se vaphaxeli vale i ku vanana va Aroni, ngu vona va no veta mipundu;
atxiya, txi na va txileleto txanu, ni ka tiveleko tanu, wu na va mlayo wanu ka yotshe mbimo. 9Se ngako ditikoni kwanu mlala e lava ku mi lwisa, mi na veta mipundu yo mi xomisa, mi na alakanywa masoni ka Mkoma, Txizimu txanu, a na mi hulukisa manzani ka valala vanu. 10Atiya, ti maheni hambi ka masiku a mibuso yanu ya kutsaka, kukhatani ka mtxima mi na veta mipundu, mbimo yi mi ningelako miphaxo yanu ya kuhiswa ni ya kubonga, kasi ku Txizimu txi mi alakanya. Nguko ngani Mkoma, Txizimu txanu.”
Va ka Israyeli va txi khukha kona Sinayi
11Se ka dilembe da wumbidi, ka mtxima wa wumbidi, ngu ditshiku da magumi mambidi, ku to maheka ti to direfu di khukha txitimwi ka nyumba ya msengeletano. 12Se vanana va ka Israyeli va to khukha kona Sinayi, madingano ni mipfhuka yawe ya txiwulani, se direfu di to va thangela, di txi ya ema txiwulani ka Parani.
13Ngu kumaha keto, va to khata dipfhumba dawe ngu kulaya ka Mkoma, ngako a nga leleta ka Mosi. 14Nguko kukhata ku to khukha m'jeke wa dizumbo da vanana va ka Judha, madingano ni mabutho awe a tiyimbi; se ka dibutho dawe da yimbi, ku ti ti ni Nasoni, mwana Aminadhabhe. 15Ngu masoni ka dibutho da yimbi ya vanana va ka Isakari, ku ti ti ni Nathaniyele, mwana Zuwari. 16Se ka dibutho da yimbi ya lihunzu la vanana va ka Zebhuloni, ku ti ti ni Eliyabhe, mwana Heloni.
17Sekoko nyumba yi to tshungunulwa, se vanana va ka Gerisoni ni vanana va ka Merari, ve kukha va ti rwate nyumba.
18Msana keto, ku to khukha m'jeke ngu wugoveloni ka va ka Rubheni, ngu mabutho awe a tiyimbi; se txitimwi ka dibutho dawe da yimbi, ku ti ti ni Elizuri, mwana Sedhewuri. 19Se ka dibutho da yimbi ya lihunzu la vanana va ka Simiyoni, ku ti ti ni Salumiyeli, mwana Zurisadhayi. 20Se ka dibutho da yimbi ya lihunzu la vanana va ka Gadhi, ku ti ti ni Eliyasafe, mwana Dheweli.
21Sekoko va ka Kohati va to khukha, va di rwate nyumba yo sawuleka; se vamwani va to gula nyumba, vona va txi ngadi va txita.
22Msana keto, ku to khukha m'jeke ngu wugoveloni ka vanana va ka Efrayime, madingano ni mabutho awe a tiyimbi; se ka dibutho dawe da yimbi, ku ti ti ni Elisama, mwana Amiyudhe. 23Se ka dibutho da yimbi ya lihunzu la vanana va ka Manasi, ku ti ti ni Gamaliyeli, mwana Pedhazuri. 24Se ka dibutho da yimbi ya lihunzu la vanana va ka Bhenjamini, ku ti ti ni Abhidhani, mwana Gidhiyoni.
25Sekoko ku to khukha m'jeke ngu wugoveloni ka vanana va ka Dhani, madingano ni mabutho awe a yimbi; se ka dibutho dawe da yimbi, ku ti ti ni Ayezeri, mwana Amixadhayi. 26Se ka dibutho da yimbi ya lihunzu la vanana va ka Aseri, ku ti ti ni Pagiyeli, mwana Okrani. 27Se ka dibutho da yimbi ya lihunzu la vanana va ka Naftali, ku ti ti ni Ayira, mwana Enani. 28Ayiya ngu yona milayo ya matsimbilelo a vanana va ka Israyeli, madingano ni mabutho awe a tiyimbi, mbimo yile va nga khukha.
Mosi e dhana Hobhabhe kutsula navo
29Sekoko Mosi a to khene ka Hobhabhe, mwana Reweli, mmidhiyani, tate wa Mosi ngu ka msikati wakwe:
“Athu hiya ka wukhalo wule Mkoma a nga khene: Ni na mi ninga; a hi tsule hotshe, athu hi na kuxayisa kha kwati; nguko Mkoma a thembisile kumaha wunene ka Israyeli.”
30 # Wona ni ka: Eks. 18:27. Kambe Hobhabhe a to khene kwakwe:
“Kha ni na mbi tsula; aniko, ni na tsula ka maxaka angu, ditikoni kwathu.”
31Se Mosi a to khene: Awe u nga hi leke; nguko wa tiziva taku hi zumbile txiwulani; awe u na va maso athu. 32Se ngako awe u txi tsula ni nathu, ati ta tinene Mkoma a no ti maha kwathu, nanathu hi na ku mahela.
Txizimu txi thangela vathu
33Ngu kumaha keto, va to khukha ngu mmangoni ka Mkoma, ve tsimbila masiku mararu; se dibhokiso da txitumelelano txa Mkoma, di to thangela masoni kwawe masiku mararu, kasi ku va lavela wukhalo wo humula ka wona. 34Direfu da Mkoma di ti ti txitimwi kwawe ni mitsikari, kukhukhani kwawe ngu wugoveloni.
35 # Wona ni ka: Mas. 68:1. Mbimo yi koko dibhokiso di nga ti khukha, Mosi a ti ti khene: “Wuka Mkoma, valala vako va na hangalaswe, ni va va ku vengako, va na thave masoni kwako.” 36Ni mbimo yi dibhokiso di nga rulwa, Mosi a ti ti khene: “Wuya Mkoma, ka magumi a mazana amangi, a ka Israyeli.”
Currently Selected:
Mitengo 10: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.