Mitengo 12
12
Kutsayiswa ka Miriyamu
1Se Aroni ni Miriyamu va to khata kulenga Mosi, ngu mhaka ya wamsikati wa ka Kuxe, a nga ti tekani ni Mosi; ngu kule a nga ti tekile wamsikati wa ka Kuxe. 2Va to womba-womba va txi kha vona:
“Kasi Mkoma a to womba-womba ngu Mosi ekha kani?” Ina kha womba-womba ngu ngathu nathu kani?
Se Mkoma a to engisa. 3Se Masoni ka Mkoma kuwonekile ti to Mosi i ti m'thu wo dikha ngutu kupinda votshe vathu ha mafuni.
4Koneko, ngu txikuluveta, a to dhana Mosi, ni Aroni, ni Miriyamu, a txi khene:
“Humani anu vavararu mi txiya ditendani da msengeletano!”
Konako va to huma ngu wuraru wawe ve tsula. 5Sekoko Mkoma a to txhika ngu ka phande ya direfu, a txi ta ema ha txikeni ka ditenda; msana keto, a to dhana Aroni ni Miriyamu, se va to huma ngu wumbidi wawe. 6Se a txi khene:
“Konkuwa engisani mapswi angu; ngako ku ti ni mprofeti, ani Mkoma, ni na ti wonekisa kwakwe ngu txiwoniso, ni womba-womba nayo ngu mloro. 7#Wona ni ka: Vaheb. 3:2. Kambe kha ni mahi eto ka Mosi txithumi txangu; a thembekile amu nyumbani kwangu kotshe. 8Ene no womba-womba nayo ngu txisofu, ni ti kombisa, na i si nga kusisalani; kambe ene wa so maha ngu kuwona wutumbu wa Mkoma; ngu kutxani koko mi nga mbi thava kulenga txithumi txangu Mosi kani?”
9Kuhenya ka Mkoma ku to kukumuka ngutu, e khukha e tsula. 10Mbimosi direfu di nga khukha txitimwi ka ditenda, koneko Miriyamu mmidi wakwe wu to basa ngu tshekela, wu txi fanana ni hunguva. Aroni a to wona Miriyamu ti to ana ni tshekela. 11Se Aroni a to gela Mosi a txi khene:
“Ayiwe, nyamne wangu! U nga hi vekele txiviti ngu mhaka ya txionho txi hi nga va natxo txa wuphukuphuku, txa kwa mbi ziva ta tinene ta Mkoma. 12Maalakanyo angu ni ti kombela tito, Miriyamu a nga fane ni mwanana wo huma ngu mndani ka mame wakwe a di fite, awule nyama yokari yakwe yi nga sina!”
13Se Mosi a to dila ka Mkoma, a txi khene:
Txizimu txangu, “na ku kombela ti to u mninga kukalamuka Miriyamu!”
14 # Wona ni ka: Mit. 5:2-3. Se Mkoma a to khene ka Mosi:
“Ku nga ti tate wakwe a txi mthurela khoheni, ina kha na mbi va ni tingana mndani ka mtxhanu wa masiku ni mambidi kani? A na khotelwa mtxhanu wa masiku ni mambidi hahanze ka wugovelo; se msana keto, a na wuyiswa kambe.”
15Ngu kumaha keto, Miriyamu a to khotelwa mtxhanu wa masiku ni mambidi, hahanze ka wugovelo, vathu kha va nga khukha kala Miriyamu e wuya.
16Kambe msana keto, vathu va to khukha ngu Hazerote; va txi ya zima matenda awe Parani.
Currently Selected:
Mitengo 12: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.