Mitengo 14
14
Kutereka ka vathu
1Sekoko votshe va msengeletano va to khukha ve guleta mapswi awe, va txi dila ka wona wusiku wule. 2Votshe vanana va ka Israyeli va to ngungurukela ve wukela Mosi ni Aroni, va txi kha vona:
“I ti txhuko kuva hi di fete ditikoni ka Egipta! Mwendo hi di fete txiwulani muwa! 3Ni kambe ngu kutxani ene Mkoma a txi hi yisa ka ditikodo, hi na ya guma ngu kudawelwa ngu matxhari hi ya ningela vasikati vathu ni vanana vathu, ve mahwa tikhumbi kani? I si nga tshuko hi tshumela hi txi ya Egipta kani?”
4Ka mhakeyo va to wombawombisana mmwani ni mmwani, va txi kha vona:
“A hi sawuleni mthangeli wa yimbi, hi tshumela hi tsula Egipta.”
5Sekoko masoni ka wotshe msengeletano wa vanana va ka Israyeli, Mosi ni Aroni va to khizama, va txi wa hahatshi ngu tikhohe tawe. 6Se Joxuwa, mwana Nune, ni Kalebhi, mwana Jefoni, va to vharulela simaha sawe, nguko mbamwevo va vale va nga ti tsute kuya xola ditiko. 7Se va to womba ka wotshe msengeletano wa vanana va ka Israyeli, va txi kha vona:
“Ditikodo hi ngaya hi txi ya di xola ndinene, da mafu o nona ngutu.” 8Ku ngako Mkoma a txi tsaka ngu ngathu, Ene a na hi maha hi wulela ka ditiko a nga hi ninga, i ku ditiko di khulungako masi ni wulombe. 9#Wona ni ka: Vaheb. 3:16. Mi nga ti lambiseni mi wukela Mkoma, kambe mi nga thaveni vathu va ditiko diya, nguko vona va na va kudya kwathu; kha ku nga ho amu va no ya sisala kona, nguko Mkoma ana ni nathu; mi nga thave.
10Sekoko wotshe msengeletano wu txi lava ku va balisela ngu marigwi; konaho, ku to humelela kuphatima ka Mkoma, ku txi ta fenengeta ditenda da msengeletano, masoni ka votshe vanana va ka Israyeli.
Mosi e kombelela vathu
11 Mkoma a ti khene ka Mosi:
“Vathu vava, va na ni nyenya kala yihi mbimo kani? Kala yihi mbimo va si ni thembi kani? Hambi ku va nga wona sixamaliso si ni nga va mahela kambe ni kambe kani? 12Kukhukhela konkuwa, ni na va limata ngu mtungu, ni txi va hetisa; msana kwawe, ni na maha limwani lixaka ngu ngawe, ni mfumo wa hombe, wa mtamo kupinda vona.”
13Se Mosi a to khene ka Mkoma:
Vaegipta va ti zivile ti to ngu mtamo wako, u mahile ti to vathu vava ve huma hagari kwawe, u va tisa hawa. 14Se vona va na womba ka vaaki va diya ditiko, nguko vona va engisile ti to awe Mkoma, u zumba hagari ka vava vathu, ni ti to awe wa kombisa khohe yako, ni direfu dako di zumba txitimwi kwawe, ni yimwani mhaka ta ziwa ti to ni mitshikari wa thangela masoni kwawe ngu direfu, ni wusiku kambe waho ngu kutura ka mndilo. 15Se ku nga ti awe u txi va daya vathu vava nga m'thu mmweyo, vathu va yimwani mifumo ava va nga engisa nduma yako, va na kha vona: 16“Mkoma Txizimu, a tandekile ku wuleta vathu vakwe ka ditiko diya a nga ti xambanyile ti to a na va ninga; se a va lovisile amu txiwulani.” 17Ngu mhaka yeto, na ku kombela tito, awe Mkoma, u kombisa wuhombe wa mtamo wako, nga ha u nga womba ku khawe: 18#Wona ni ka: Eks. 20:5-6; 34:6-7; Dhewut. 5:9-10; 7:9. “Mkoma wa timisela kambe a tate ngu wumbilu; wa divalela sionho ni sihambunyeto; hambiko vaonhi kha va leki, ve zumba ku nga kha va na mnandu; ene wa tshumetela sionho sa vatate txitimwi ka vanana vawe kala ka liveleko la wuraru ni la wumune. 19Divalela vathu vava ka sionho sawe ngu wuhombe wa wumbilu wako, nga ha u nga va divalela kukhukhela Egipta, kala hawa.”
20“Se Mkoma a to khene:
Ani ni na va divalela, madingano ni txikombelo txako. 21Nga ha ni hanyako, ni kuphatima ka Mkoma ku na tata mafu otshe. 22Kambe votshe vathu ava va nga wona kuphatima kwangu, ni sixamaliso si ni nga si maha kona Egipta, ni mu txiwulani, va nga ni duka digumi da sikhati; kambe vathu vava kha va engisi dipswi dangu, 23ngu mhaka ya eto, ava vathu, lambi, kha va na mbi di wona ditiko di ni nga xambanya ka vatate vawe ti to ni na va ninga, lambi ni wammweyo wa va va nga ni kanyisa a no wona ditikodo. 24#Wona ni ka: Jox. 14:9-12. Kambe Kalebhi, txithumi txangu, awu a ku ni moya wo hambana ni vamwani va nga mninga mtamo. Ni kambe a ni engisile ngu kuhetiseka. Ene ni na mmaha a txi wulela ditikoni mule, a na va ka dona, ni liveleko lakwe li na di fuma. 25Se Vaamaleki ni Vakanana va akile ngu mkovani. Mangwana anu tshumelani mi txi tsula txiwulani, ngu didhawa da Linene lo Bhilivila.”
Txizimu txa tsayisa vathu
26Msana keto, Mkoma a to womba-womba ka Mosi ni ka Aroni, a txi khene:
27“Kasi ngu yihi mbimo ni no gwita kutimisela ngu msengeletano wuwa wo biha nga tiya kani? Va na ngungurukela kala mbimo muni kani? Ani ni pfite kusura ka vanana va ka Israyeli, ava va ni mahelako gujeguje tinzeveni kwangu. 28U na va zivisa ti to nga ha ni hanyako, ngani Mkoma ni wombako, ni na mi mahela nga kuwomba kwanu, tinzeveni kwangu. 29Aniko, sirumbi sanu si na sala amu txiwulani, kukhukhela ka magumi mambidi a malembe ni kuya masoni, ava va nga ni ngungurukelela. 30Lambi, kha mi na mbi wulela ka ditiko di ni nga xambanya ti to mi aka ka dona; hahanze ka Kalebhi mwana Jefoni, ni Joxuwa, mwana wa Nuni. 31Aniko vanana vanu, avale mi ku khanu va na ya tekwa ve maha tikhumbi, ngu vona ni no va maha ve wulela; se va na ya ziva ditikodo anu mi ngadi lamba. 32Kambe i di anu, sirumbi sanu si na sala amu txiwulani. 33#Wona ni ka: Mith. 7:36. Se vanana vanu va na maha va nyampepe amu txiwulani, mune wa magumi a malembe, nava txi rwala mnandu wa kwa mbi thembeka kwanu, kala sirumbi sanu si guma txiwulani. 34Nga ha mi nga heta mune wa magumi a masiku ngu kuxola ditiko, konkuwa mi na heta kambe mune wa magumi a malembe; nguko dilembe dimwedo di dingana ditshiku, kasi mi tiziva tito, kuhambana kwangu ni nanu nga kutxani! 35#Wona ni ka: Vaheb. 3:16-19. Ngani Mkoma ni wombako, ni na mahisa tonti ka msengeletano wu wo biha, awu wu tshanganako, kasi ku ni sola ni ku ni wukela. Votshe va na guma txiwulani ngu kufa.
36Ti di mahisileto, vavamna ava Mosi a nga ti ti va rumile kuya xola ditiko, ava va nga neha m'biko wa mahungu o dhukisela, ve kujetela msengeletano kungungurukela masoni ka Mkoma, ngu moya wo kanyisa ditiko; 37ava va nga neha m'biko wo biha ni kukanyisa ditiko, va to fa ngu tshiku masoni ka Mkoma.” 38Kambe Joxuwa, mwana Nune, ni Kalebhi, mwna Jefoni, ava va nga ti tsute kuya xola ditiko, va to sala ve hanya!
Va ka Israyeli ve xulwa
(Dhewuteronome 1:41-46)
39Se Mosi a to xawutela otshe mahungu awa ka vanana va ka Israyeli; sekoko vathu va to xomuleka ngutu. 40Ni mixo ngutu, Vaisrayeli va to kwela veya mmangoni, va txi ya kha vona:
“Ngathu vava! Hi lava kukwela hi tsula ka wukhalowo Mkoma a nga wu womba; nguko kha ditshuri athu hi onhile.” 41Aniko Mosi a to khene:
“Ngu kutxani mi funya Mlayo wa Mkoma kani? Lambi, kha mi na mbi humelela! 42Mi nga kweleni, nguko Mkoma khangaho hagari kwanu; valala vanu va na ya mi xula. 43Nguko Vaamaleki ni Vakanana va masoni kwanu; anu mi na fuletelwa ngu matxhari awe, nguko anu mi tshuralete Mkoma; se nene Mkoma kha na mbi va ni nanu.”
44Hambi keto, ngu txitsikivi ni kanu, va to lamba ve kwela txitimwi ka mmango. Dibhokiso da txitumelelano txa Mkoma di ti sate ni Mosi, dibhokiso di sa nga khukha wugoveloni. 45Sekoko, Vaamaleki, ni Vakanana, ava va nga ti akile mmangoni, va to relela ve ta lwa ni Vaisrayeli, ve va xula, ve va tutumisa kala ve hoka Herma.
Currently Selected:
Mitengo 14: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.