Mitengo 17
17
Ndonga ya Aroni
1Sekoko Mkoma a to womba-womba ka Mosi, a txi khene: 2Gela vanana va ka Israyeli va txi ku nehela tindonga, ngu nyumba yimwani ni yimwani, tiza ti tshangana digumi da tindonga ni timbidi, a ti ti no huma ngu ka votshe vathangeli, madingano ni tinyumba ta vatate vawe; u na bhala ditina da m'thu ni m'thu ka ndonga yakwe. 3Kambe u na bhala ditina da Aroni ka ndonga ya ka Levhi, nguko mthangeli wa nyumba ni nyumba ya vatate a na va ni ndonga yimweyo. 4U na ti veka amu ditendani ka msengeletano masoni ka txitumelelano, aha ni tshanganako kona ni nanu. 5Se ku na maheka taku, ndonga ya wamwamna wule ni no va ni di yi sawute, yi na thunga; ngu toneto, ni na heta kungungurukela ka vanana va ka Israyeli kwangu, a kule va nga mi ngungurukelela ngu kona.
6Mosi koko a to xawutela ka vanana va ka Israyeli; se votshe vahombe vawe va to mninga ndonga, ni wihi wa hombe ndonga yimweyo, madingano ni tinyumba ta vatate vawe; ku to tshangana digumi da tindonga ni timbidi, ndonga ya Aroni yi di hagari ka tona. 7Se Mosi a to veka tindonga masoni ka Mkoma, amu ditendani ka txitumelelano.
8 # Wona ni ka: Vaheb. 9:4. Mosi a to wulela ditendani ka txitumelelano, ngu ditshiku do gameta, a to ya wona ndonga ya Aroni yi di thungile yi tshumela yi humisa ni siluva, i ku nyumba ya ka Levhi, yi di velekile ni mihando yo vitwa. 9Ngu msana keto, Mosi a to teka totshe tindonga masoni ka Mkoma, e ti neha ka vanana va ka Israyeli; ngako va di ti woni votshe, mmwani ni mmwani a to teka ndonga yakwe.
10Sekoko Mkoma a to khene ka Mosi:
Tshumeta ndonga ya Aroni masoni ka txitumelelano, yi na xayiswa kona, ti to yi na maha txialakanyiso ka vanana va vo kaneta; kasi kufuvisa sisolo hagari kwawe ngu kuhetiseka ti to va siswi vefa.
11Se Mosi a to maha madingano ni kuleleta ka Mkoma.
12Vanana va ka Israyeli va to gela Mosi va txi kha vona:
Athu hi fite hi txi lova, hotshethu hi na lova! 13Awu ni wu a tshuketako Nyumbani ka Mkoma, ofa. Ina kha hi na mbi guma hotshethu ngu kufa kani?
Currently Selected:
Mitengo 17: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.