Mitengo 2
2
Sileleto ka tihunzu dizumboni
1Se Mkoma a to womba ka Mosi ni ka Aroni, a txi khene:
2“Vanana va ka Israyeli va na zumba mmwani ni mmwani hafuhi ka m'jeke wakwe, hahatshi ka sikombiso sa tinyumba ta vatate vawe. Va na zumba ngu kurandela Dithepele da Msengeletano, ka mpfhuka wu wu no tsaniswa.
3Avava, ngu vona va no zumba ngu wutxani: Ngu didhawa da wutxani ku na zumba mabutho a ka Judha ni m'jeke wawe. Mthangeli ku nava Nasoni, mwana Aminadhabhe. 4Se dibutho dakwe da yimbi, ni va va nga balwa kwawe: I ti ti 74.600. 5Hafuhi kwakwe ku na zumba vanana va ka Israyeli, mthangeli wawe i nava Nathaniyele, mwana Zuwari. 6Se dibutho dakwe da yimbi: I ti ti 54.400, va nga balwa. 7Msana keto, lihunzu la Zebhuloni; ni Eliabhe, mwana Eloni. 8Se dibutho dakwe da yimbi, ni votshe va va nga balwa: I ti ti 57.400, va nga balwa. 9Avale va nga balwa va dizumbo da ka Judha, ngu mabutho awe a yimbi, votshe mtengo wa 108.400, evo ngu vona va dizumbo di di no khata kukhukha.
10Wulambwe, va na va va di hahatshi ka m'jeke wa dizumbo da ka Rubheni, ngu mabutho a yimbi, mthangeli wa vanana va ka Rubheni: Elizuri, mwana Sedhewuri. 11Se dibutho dakwe da yimbi ni vale va nga balwa: I ti ti 46.500, va nga balwa. 12Hafuhi kwakwe ku na zumba lihunzu la Simiyoni, mthangeli wa kona i ku Salamiyeli, mwana Surisadhayi. 13Se dibutho dakwe da yimbi ni vale va nga balwa: I ti ti 59.300. 14Ngu msana, lihunzu la Gadhi ni Eliyazafi, mwana Dheweli, a na va mthangeli wa vanana va Ghadi. 15Dibutho dakwe da yimbi: 45.650, va nga balwa. 16Avale va nga balwa va dizumbo da ka Rubheni ngu mabutho a yimbi, mtengo wawe 151.450, evo ngu vona va no khukha ngu dikhati da wumbidi.
17Sekoko, ngako Ditenda da Msengeletano di txi khukha, dizumbo da va ka Levhi di na va di di hagari ka mamwani mazumbo. Ati va nga zumbisa tona va na tsimbilisa toneto, dibutho ni dibutho ni m'jeke wa dona.
18M'jeke wa dizumbo da ka Efrayime, wu na va wu ti mswa-ditambo, ngu mabutho awe. Mthangeli wawe i Elisama, mwana Amiyudhe. 19Mabutho a mtengo wa vavamna va yimbi yakwe ni va va nga balwa i 40.500, va nga balwa. 20Hafuhi ka lihunzu la ka Manasi, mthangeli wa lihunzu la vanana va ka Manasi i Gamaliyeli. 21Dibutho dakwe da yimbi, 32.200, ava va nga balwa. 22Ngu didhawa ka Efrayime ku na zumba mabutho ya Benjamin, mthangeli i Abhidhani, mwana Gidhiyoni. 23Dibutho dakwe da yimbi, 35.400, va nga balwa. 24Avale va nga balwa, va dizumbo da Efrayime ngu mabutho awe mba mtengo wa 108.100, da va va nga balwa. Evo ngu vale va no khukha dizumboni ngu dikhati da wuraru.
25Ngu didhawa da wuphemba ku na zumba mabutho a ka Dhani ni m'jeke wawe. Mthangeli wawe i Ayezeri, mwana Amixadhayi. 26Dibutho dakwe da yimbi ni vale va nga balwa 62.700. 27Didhawani kwakwe ku na zumba matenda a Aseri, mthangeli wawe i Pajiyeli, mwana Okrani. 28Dibutho dakwe da yimbi 45.500, va nga balwa. 29Ngu didhawa da lihunzu la ka Naftali i Ahira, mwana Enani, a no va mthangeli wawe. 30Dibutho dakwe da yimbi, 53.400, va nga balwa. 31Avale va nga balwa va dizumbo da ka Dhani, votshe mba mtengo wa 157.600. Evo va na khukha dizumboni ngu ka dikhati do gwitisa va txi londetela m'jeke wawe.”
32Kupata votshe vanana va ka Israyeli, ava va nga balelwa ngu tinyumba tawe ni mabutho awe a tiyimbi, mba mtengo wa 603.550. 33Ngu mhaka yeto, Valevhi kha va balwa hambi kubhalelwa kumweko ni vamwani vanana va ka Israyeli, nga ti Mkoma a nga leletisa tona ka Mosi.
34Vanana va ka Israyeli va mahile totshe ti Mkoma a nga leletisa tona ka Mosi. Nguko mhaka eto, va zumbile ngu kulondetela mijeke yawe, ni kukhukha madingano ni tihunzu ta vatate vawe.
Currently Selected:
Mitengo 2: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
