Mitengo 4
4
Tifanelo ta va ka Kohate
1Se Mkoma a to womba ka Mosi ni ka Aroni, a txi khene:
2“Mahani bhalela, mi bala Valevhi, i ku vanana va Kohate, ngu mimwaya yawe, i ku tinyumba ta vatate vawe; 3vavamna votshe, ava va magumi mararu, kala mtxhanu wa magumi a malembe, avale va ku ni fanelo ya kuya mthumoni ka dibutho da yimbi, kasi va na thuma mthumo wa ditenda da msengeletano. 4Ngu wona mthumo wa vanana va ka Kohate, amu ditendani da msengeletano; ti to ve xayisa siya so sawuleka.
5Ngako di txi khukha, Aroni ni vanana vakwe, va na thavisa nguwo ya txibhiya. Va na fenengeta ngu yona dibhokiso da wufakazi. 6Kambe va na fenengeta txitimwi ka kona ngu madhowo a matxalu, ngu txitimwi ka dona ku na gwimbwa nguwo ya mkuxe; se va na veka minaneko.
7Ni txitimwi ka meza ya mningelo wo tshumbelwa va na gwimba nguwo ya mkuxe; ayile txitimwi ka yona ku no vekwa timbiya,#4:7 Txihebheru mikho, ni sikadyana, ni magombe, o theketa ngu ona. ni so hisela ka sona dibaselo, ni magombe, ni sikadyana; kambe ku nava ni dipawu da mphaxo wa yotshe mbimo, txitimwi ka kona. 8Senkoko txitimwi ka sona va na ateta nguwo yimweyo yo bhilivila, ayile yi no fenengetwa ngu txifenengeto txa didhowo do hehuka. Msana keto, va na bethela sikhongwani sa meza.
9Sekoko ve teka nguwo ya mkuxe, ve fenengeta ngu yona phande ya malambu, ni malambu a kona, ni#4:9 Txihebheru ni siñolo sa kona, ni so tima ngu sona. so tima ngu sona, ni sotshe simaha sa mafura ma thumiswako ka mithumo ya kona. 10Va na veka sotshe siya ka txifenengeto txa didhowo do hehuka, hahatshi, ngu txitimwi ka sikhongwani. 11Ha magandeloni ka kona ka nzalama, va na ateta nguwo ya mkuxe. Se va na fenengeta ngu txifenengeto txa didhowo do hehuka. Ngu msana keto va na veka sikhongwani. 12Msana keto, va na teka sotshe simaha si si thumiswako aha ka wukhalo wo sawuleka, ve si veka aha ka nguwo yo bhilivila, se va txi si fenengeta ngu txifenengeto txa didhowo do hehuka, ve si veka txitimwi ka sikhongwani.
13Ngu msana ka kuva va di thavisile makhuma ha magandeloni ka kona, va na ateta txitimwi ka ona nguwo yo bhilivila. 14Se ngu txitimwi ka kona, va na veketela simaha sotshe si si thumiswako ka mthumo wa mphaxo, asi so hisela ka sona dibaselo; tifoloko, mafoxola, mikamba ni sotshe simaha sa ha magandeloni. Va na ateta ngu txitimwi didhowo do hehuka, se msana keto, va na bethela sikhongwani.
15Msana ka kuva Aroni ni vanana vakwe va di gwitile kuveketela simaha so sawuleka ni sotshe siya sa kona, wugovelo wu na khukha, se vanana va Kohate va nata si rwala. Kambe va nga si gwese asile so yila nguko va nga fa, ngako va txi si gwesa. Awuwa ngu wona mthumo wa vanana va Kohate amu ka ditenda da msengeletano.
16Kambe Eleyazari, mwana Aroni, mphaxeli, ngene a no maha mthumo wo xayisa mtona wa malambu, ni dibaselo do bhumula, ni mphaxo wa sakudya, ka otshe masiku ni mtona wo tota, ni wotshe mthumo wo xayisa dithepele, ni sotshe asi si manekako; i ku wukhalo wo sawuleka, ni siya sa kona.”
17Se Mkoma a to womba-womba ka Mosi ni ka Aroni, a txi khene:
18“Wonani tito, ka nyumba ya lihunzu la ka Kohate, mi nga dhuke mi yi humisa amu ka lihunzu la ka Levhi. 19Aniko, ati mi no va mahela ngu tito, ve hanya va si fi mbimo yile va tshuketako#4:19 Mwendo: ka siya so sawuleka ngutu. ka wukhalo wo kusawuleka ko sawuleka, mi na maha tiya: Aroni ni vanana vakwe, va na emiswa mmweyo ni mmweyo ka mthumo wakwe, ni wukhalo wakwe. 20Kambe ka mbimo yi va wulelako, kha kulaveki ve wonana aha ka simaha so sawuleka, nguko va nga fa.”
Tifanelo ta va ka Gerisoni
21Se Mkoma a to womba kambe ka Mosi, a txi khene:
22“Bala vanana va ka Gerisoni, ngu tinyumba ta vatate vawe ni mimwaya yawe. 23U na bala votshe vathu kukhukhela tanga ya magumi mararu kala mtxhanu wa magumi a malembe, ka vale va ku ni fanelo kuwulela va txi thuma mthumo wa ditenda da msengeletano. 24Awuwa wu na va mthumo wa mimwaya ya vanana va ka Gerisoni, kuxayisa kwawe ni kurwala kwawe. 25Vona va na rwala mijiyo ya dithepele, ni ditenda da msengeletano, ni sibhiyo sa madhowo a matxalu, ale ma ku txitimwi ka dona, ni m'jiyo wa ditimba da ditenda da msengeletano, 26ni mijiyo ya diguma, nguwo ya ha txikeni ka ditimba da diguma, adi di randelako dithepele ni txiluvelo txa kona, tingoti ni sotshe simaha sa mthumo wakwe, ni sotshe simaha asi si lavekako ka mthumo wawe. 27Yotshe mithumo ya vanana va ka Gerisoni, ka totshe ti ti va lumbako; kuxayisa, va na ti maha ngu kurumwa ngu Aroni ni vanana vakwe. 28Ewo wu na va mthumo wa vanana va ka Gerisoni, ka ditenda da msengeletano. Se awu a no va ruma kuxayisa i Itamari, mwana Aroni mphaxeli.”
Tifanelo ta va ka Merari
29“Kasi ngu ka vanana va Merari, u na va bala madingano ni tiveleko tawe, ni madingano ni tinyumba ta vatate vawe; 30u na balela vale va tanga ya magumi mararu kala mtxhanu wa magumi a malembe, ava va fanelako kuwulela ka mthumo wuwa kasi kuthuma amu ka ditenda da msengeletano. 31Awuwa mthumo wu va no wu rwala, i ku fanelo yawe, amu ka ditenda da msengeletano; tiphasa ta dithepele, mapulango a kona, tiphande ta kona ni sipande sa kona. 32Tiphande ti ti randelako diguma da kona, siparako sa kona, tingoti ta kona, ni sotshe si si lavekako. Kambe u na komba ngu matina a sona simaha si va nova ni fanelo yo si rwala.
33Ewo wu na va mthumo wa mimwaya ya va ka Merari. Ni wotshe mthumo wawe mu ka ditenda da msengeletano, va na thangelwa ngu Itamari, mwana Aroni, mphaxeli.”
Kubalwa ka va ka Levhi
34Mosi koko ni Aroni, ni vathangeli va msengelelato, va to bhalela vanana va ka Kohate, ngu tinyumba ta vatate vawe. 35Vavamna votshe va magumi mararu kala ka mtxhanu wa magumi a malembe, avale va nga lulama kuwulela ka mthumo wo xayisa ditenda da msengeletano. 36Se ava va nga balwa hagari kwawe madingano ni liveleko lawe i ti ti 2.750. 37Avava ngu va va nga balwa, va liveleko la Kohate, ka votshe va va nga txi thuma ditendani ka msengeletano, va nga balwa ngu Mosi ni Aroni, madingano ni kuruma ka Mkoma, ngu dianza da Mosi. 38Eto ta fana kambe ni va va nga balwa ka nyumba ya Gerisoni, madingano ni liveleko lawe, kumweko ni tinyumba ta vatate vawe. 39Ka titanga ta magumi mararu kuya masoni kala mtxhanu wa magumi a malembe, ka votshe vale va nga wuletwa ka mthumo wo xayisa ditenda da msengeletano. 40Ava va nga balwa hagari kwawe, madingano ni tinyumba ta vatate vawe, i ti ti 2.630. 41Ngu wonewo mtengo wa vale va nga balelwa, ngu mimwaya ya va ka Gerisoni, votshe vale va nga ti fanete kuthumela mu ka ditenda da msengeletano, i ku vale va nga balwa ngu Mosi ni Aroni, madingano ni kuruma ka Mkoma. 42I ku va va nga balwa ka tiveleko ta vanana va Merari, madingano ni tinyumba ta vatate vawe; 43vavamna votshe va magumi mararu kala ka mtxhanu wa magumi a malembe, avale va nga lulama kuwulela ka mthumo wo xayisa ditenda da msengeletano. 44Ava koko va nga balwa hagari kwawe, madingano ni tiveleko tawe, i 3.200. 45Ewo ngu wona mtengo wa vale va nga bhalelwa, va ka Merari, ngu tinyumba tawe, ava va nga bhalelwa ngu Mosi ni Aroni, madingano ni Mlayo wa Mkoma, wu nga hokiswa ngu Mosi. 46Wotshe mtengo wa Valelvhi vale va nga balwa ngu Mosi ni Aroni, ni vathangeli va ka Israyeli, i ku Valevhi, madingano ni liveleko lawe ni tinyumba ta vatate vawe. 47Vavamna votshe va magumi mararu kala ka mtxhanu wa magumi a malembe, a vale va nga lulama kuthuma mthumo wa wuthangeli amu ka ditenda da msengeletano. 48Votshe va va nga balwa i ti ti 8.580, wa vale va nga bhalelwa.
49Madingano ni kuruma ka Mkoma, ngu dianza da Mosi, va to balwa, m'thu ni m'thu ni mthumo wakwe, ni ti a nga maha, ngu vona va va nga balwa hagari kwawe, avale Mkoma a nga leleta ka Mosi.
Currently Selected:
Mitengo 4: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.