Mitengo 7
7
Miningelo ya vathangeli va tihunzu
1Ngu ditshiku di Mosi a nga gwitisa kuaka Ditenda da Msengeletano, a to di tota mafura, ni ku di katekisa, kumweko ni sotshe simaha sa dona, ni txiluvelo. 2Vathangeli va ka Israyeli, va to maha mningelo, i ku misungo ya mimwaya ya vatate vawe, avale i ku vathangeli va tihunzu, ni kuva va nga balwa; 3se va to ningela masoni ka Mkoma, mtxhanu wa sikotxikani ni tximwetxo si nga fenengetwa, ni digumi da tihomu ni timbidi, txikotxikani tximwetxo i ti vathangeli vambidi ni homu yimweyo ka mthangeli mmwani ni mmwani. Va to si ningela masoni ka nyumba yo sawuleka. 4Se Mkoma a to womba ka Mosi, a txi khene:
5“Si amukele awe Mosi, nguko si na lumba mthumo wa Ditenda da Msengeletano, u na si ningela ka Valevhi; mmwani ni mmwani ka mthumo wakwe.”
6Ngu kumaha keto, Mosi a to teka sikotxikani ni tihomu, e si ningela ka Valevhi. 7Vanana va Gerisoni a va ningile sikotxikani simbidi ni mune wa tihomu, madingano ni mthumo wawe. 8Ka vanana va Merari a va ningile mune wa sikotxikani, ni mtxhanu wa tihomu ni tiraru, e ninga madingano ni mthumo wawe, awu va nga thangelwa ka wona ngu Itamari, mwana mphaxeli Aroni. 9Se vanana va ka Kohate, kha va nga ningwa txilo, nguko mthumo wawe i ti wo pakata siya so sawuleka.
10Se vathangeli va to ningela miningelo yawe ya mphaxo wa ha txiluveloni, ngu ditshiku di va ngadi sawula. 11Se Mkoma a to khene ka Mosi:
Mthangeli mmweyo ni mmweyo a na ningela miningelo wakwe (mmwani ni mmwani ngu ditshiku dakwe), ka msengeletano wa txiluvelo.
12Awu koko a nga ningela mningelo wakwe ngu ditshiku do khata i Nasoni, mwana Aminadhabhe, wa lihunzu la ka Judha. 13Se mningelo wakwe i ti ti wa mbiya ya silivhela, ya kunemela ka 130 wa maxekele, ni mbiya ya silivhela, ni mtxhanu wa magumi ni magumi mambidi a maxekele, madingano ni maxekele a wukhalo wo sawuleka; ka totshe timbiya tatimbidi, ti di tate ngu mpupu wo kanyangelwa ni mtona, kasi kumana mningelo wa sakudya; 14digombe dimwedo#7:14 Mwendo: mkho. da nzalama, adi kunemela ka dona i ku ka digumi da maxekele, do tala ngu dibaselo; 15dirole da matune, ni txinvutana tximwetxo txa matune, txa dilembe dimwedo ni hamba, kasi kumaha mningelo wo hiswa; 16mabhongwe, kasi kumaha mningelo wa txionho; 17ni kumaha mphaxo wa kuthutha, se ni tihomu timbidi, ni mtxhanu wa tihamba, ni mtxhanu wa vamabhongwe, ni mtxhanu wa sinvutana sa dilembe dimwedo; awuwa ngu wona mningelo wa Nasoni, mwana Aminadhabhe. 18Ka ditshiku da wumbidi, awu a nga maha mningelo wakwe i Nathaniyele, mwana Zuwari, mthangeli wa Isakari. 19Se ka mningelo wakwe a to ningela mbiya ya silivhela, ya kunemela ka 130 wa maxekele, ni mtxhanu wa magumi ni magumi mambidi a maxekele, a wukhalo wo sawuleka; ni mbiya. Se totshe timbiya tiya ti di tate ngu mpupu wo tshura, wo kanyangwa ngu mtona, kasi kumaha mningelo wa sakudya; 20ni khadi ya nzalama ya digumi da maxekele ma di tate ngu dibaselo; 21ni dirole da matune, ni hamba, ni txinvutana txa dilembe dimwedo, kasi kumaha mphaxo wa kuhiswa; 22ni mabhongwe wa mphaxo wa txionho; 23ni sa mphaxo wa kuthutha, ni tihomu timbidi, ni hamba, ni mtxhanu wa vamabhongwe, ni mtxhanu wa tihamba ta dilembe dimwedo; awuwa ngu wona mningelo wa Nathaniyele, mwana Zuwari. 24Ka ditshiku da wuraru, ku to ningela Eliabhe, mwana Eloni, mthangeli wa vanana va lihunzu la Zebhuloni. 25Mningelo wakwe i ti ti wa mbiya ya silivhela, ya kunemela ka 130 wa maxekele, ni mtxhanu wa magumi ni magumi mambidi a maxekele, madingano ni dixekele da wukhalo wo sawuleka; ka miningelo yimbidi, yi di tate ngu mpupu wo tshura, wo kanyangelwa ngu mtona, kasi kumaha mningelo wa sakudya. 26Se ku ti ti ni dijingo da nzalama, da digumi da maxekele yo tala ngu dibaselo; 27ni dirole da matune, ni hamba, ni txinvutana tximwetxo txa dilembe dimwedo, kasi kumaha mphaxo wo hiswa; 28ni mabhongwe, kasi kumaha mphaxo wa txionho; 29Ni kumaha mphaxo wa kuthutha, tihomu timbidi, mtxhanu wa tihamba, ni mtxhanu wa vamabhongwe, ni mtxhanu wa sinvutana sa dilembe dimwedo; awuwa ngu wona mningelo wa Eliyabhe, mwana Eliyoni. 30Ka ditshiku da wumune, a tisile mningelo wakwe Elizuri, mwana Sedhewuri, mthangeli wa vanana va ka Rubheni. 31Mningelo wakwe mbwa mbiya ya silivhela, kunemela ka wona i di ka 130 wa maxekele, yi ku ni mtxhanu wa magumi ni magumi mambidi a maxekele, madingano ni dixekele da wukhalo wo sawuleka. Se amu ka timbiya timbidi, ti di tate ngu mpupu wo tshura wo kanyangelwa ngu mtona, kasi kumaha mningelo wa sakudya. 32Se dijingo da nzalama, ya digumi da maxekele, do tala ngu dibaselo; 33dirole, ni hamba, ni txinvutana txa dilembe dimwedo wukale wa txona, kasi kumaha mningelo wo hiswa. 34Mabhongwe wa mphaxo wo thavisa txionho, 35ni mphaxo wa kuthutha, ni tihomu timbidi, ni mtxhanu wa tihamba, ni mtxhanu wa vamabhongwe, ni mtxhanu wa tihamba ta dilembe dimwedo wukale wa tona. Awuwa i ti mningelo wa Elizuri, mwana Sedhewuri.
36Ka ditshiku da wutxhanu, a tisile mningelo wa Selumiyeli, i ku mwana Zurixadhayi, mthangeli wa vanana va ka Simiyoni. 37Mningelo wakwe i ti ti wa mbiya ya silivhela, awuwa kunemela ka wona i ku ka 130 maxekele, ni mkamba wa silivhela, kunemela ka wona i ku ka mtxhanu wa magumi ni mambidi a maxekele, madingano ni dixekele da wukhalo wo sawuleka, ni timbiya timbidi, ti di tate ngu mpupu wo tshura, wu ti kanyangetwe ngu mtona, kasi kumaha mningelo wa sakudya. 38Dijingo dimweyo da nzalama, adi kunemela ka dona i ku ka digumi da maxekele, do tala ngu dibaselo. 39Ku ti ni dirole da matune, ni hamba, ni txinvutana txa dilembe dimwedo, kasi kumaha mphaxo wo hiswa; 40ni mabhongwe wa mphaxo wo thavisa txionho; 41Ni mphaxo wa kuthutha, ni tihomu timbidi, ni mtxhanu wa tihamba, ni mtxhanu wa vamabhongwe, mtxhanu wa sinvutana sa dilembe dimwedo; awuwa ngu wona mningelo wa Selumiyeli mwana Zurixadhayi.
42Ngu ditshiku da wutxhanu ni dimwedo, a nehile mningelo wakwe Eliyasafi, mwana Reweli; mthangeli wa vanana va ka Gadhi. 43Mningelo wakwe mbwa mbiya ya silivhela, wu ku ni kunemela ka 130 wa maxekele, ni mkamba wa silivhela, awu kunemela ka wona i ku ka mtxhanu wa magumi ni magumi mambidi a maxekele, madingano ni dixekele da wukhalo wo sawuleka, sotshe sa simbidi so tala ngu mpupu wo tshura, wu nga kanyangwa kumweko ngu mtona, kasi kumaha mningelo wa sakudya. 44Dijingo da nzalama, ayi kunemela ka yona i ku ka digumi da maxekele yo tala ngu dibaselo. 45Ku ti ni dirole, ni hamba, ni txinvutana txa dilembe dimwedo, kasi kumaha mphaxo wa kuhiswa; 46ni mabhongwe wa mphaxo wa txionho. 47Kasi ta mphaxo wa kuthutha, tihomu timbidi, ni mtxhanu wa tihamba, ni mtxhanu wa vamabhongwe, ni mtxhanu wa sinvutana sa dilembe dimwedo; awuwa ngu wona mningelo wa Eliyasafe, mwana Reweli.
48Elisama, mwana Amihudhi, mthangeli wa vanana va ka Efrayime, a to ningela siya: 49Mningelo mbwa mbiya ya silivhela, wu ku ni kunemela ka 130 wa maxekele, ni mkamba wa silivhela, awu kunemela ka mtxhanu wa magumi ni magumi mambidi wa maxekele, madingano ni dixekele da wukhalo wo sawuleka, se sotshe sa simbidi si di tate ngu mpupu wo tshura, wu nga kanyangelwa ni mtona, kasi kumaha mphaxo wa sakudya; 50dijingo da digumi da maxekele a nzalama, do tala ngu dibaselo; 51dirole, ni hamba, ni txinvutana txa dilembe dimwedo, kasi kumaha mphaxo wo hiswa; 52ni mabhongwe, kasi kumaha mphaxo wo dihela txionho; 53ni mphaxo wa kuthutha, tihomu timbidi, mtxhanu wa tihamba, mtxhanu wa vamabhongwe, mtxhanu wa sinvutana sa dilembe. Awuwa mningelo wa Elisama, mwana Amihudhi.
54Ka ditshiku da wutxhanu ni mararu, mthangeli a to ningela Gamaliyeli, mwana Pedhazuri, mthangeli wa vanana va ka Manasi. 55Mningelo wakwe mbwa mbiya ya silivhela, ayi kunemela ka yona i nga ti ka 130 wa maxekele, ni mkamba wa silivhela, wa mtxhanu wa magumi ni magumi mambidi a maxekele, madingano ni dixekele da wukhalo wo sawuleka, sotshe sa simbidi so tala ngu mpupu wo tshura, kasi kumaha mningelo wa sakudya; 56dijingo da nzalama, da digumi da maxekele, na di di tate ngu dibaselo; 57ni dirole, ni hamba, ni txinvutana txa dilembe dimwedo, kasi kumaha mningelo wo hiswa; 58ni mabhongwe wa mningelo wo dihela txionho; 59ni mphaxo wa kuthutha, tihomu timbidi, mtxhanu wa tihamba, mtxhanu wa vamabhongwe, mtxhanu wa sinvutana sa dilembe dimwedo; awuwa, ngu wona mningelo wa Gamaliyeli, mwana Pedhazuri.
60Ka ditshiku da wutxhanu ni mune, awu a nga maha mningelo wakwe i Abhidhani, mwana Gidhiyoni, mthangeli wa vanana va ka Bhenjamini. 61Mningelo wakwe ngu wuwa: Dijingo da silivhela, adi kunemela ka dona i ku ka 130 wa maxekele, ni mkamba wa silivhela, awu kunemela ka wona i ku ka mtxhanu wa magumi ni mambidi a maxekele, madingano ni dixekele da wukhalo wo sawuleka, sotshe sa simbidi so tala ngu mpupu wo tshura, wo kanyangelwa kumweko ni mtona, kasi kumaha mningelo wa sakudya. 62Ku ti ni dijingo da nzalama da digumi da maxekele, do tala ngu dibaselo. 63Ni dirole, ni hamba, ni txinvutana txa dilembe dimwedo, kasi kumaha mphaxo wa kuhiswa. 64Mabhongwe, kasi kumaha mphaxo wa kudivalela; 65ni mphaxo wo ninga kuthutha, tihomu timbidi, mtxhanu wa tihamba, mtxhanu wa vamabhongwe, mtxhanu wa sinvutana sa dilembe dimwedo; awuwa ngu wona mningelo wa Abhidhani, mwana Gidhiyoni. 66Ngu ditshiku da wugumi, Ayezeri, mwana Amixadhayi, mthangeli wa vanana va ka Dhani, a to ningela mningelo wakwe. 67Mningelo wakwe i ti wuwa: Dijingo da silivhela, adi kunemela ka dona i ku ka 130 wa maxekele, ni mkamba wa silivhela, awu kunemela ka wona i ku ka mtxhanu wa magumi ni magumi mambidi a maxekele, madingano ni dixekele da wukhalo wo sawuleka, sotshe sa simbidi so tala ngu mpupu wo tshura, wu nga kanyangelwa ni mtona, kasi kumaha mningelo wa sakudya. 68Dijingo dimwedo da nzalama, da digumi da maxekele, do tala ngu dibaselo; 69ni dirole, ni hamba, ni txinvutana txa dilembe dimwedo, kasi kumaha mningelo wo hiswa, 70ni mabhongwe, kasi kumaha mningelo wo diha txionho; 71ni kumaha mphaxo wa kuthutha, ni tihomu timbidi, mtxhanu wa tihamba, mtxhanu wa vamabhongwe, mtxhanu wa sinvutana sa dilembe dimwedo; awuwa ngu wona mningelo wa Ayezeri, mwana Amixadhayi. 72Ka ditshiku da wugumi ni dimwedo, Pajiyeli, mwana Okrani, mthangeli wa vanana va ka Aseri, a to neha mningelo wakwe. 73Mningelo wakwe mbwa: Dijingo da silivhela, adi kunemela ka dona i ku ka 130 wa maxekele, ni mkamba wa silivhela, awu kunemela ka wona i ku ka mtxhanu wa magumi ni magumi mambidi a maxekele, madingano ni dixekele da wukhalo wo sawuleka, ngu wumbidi wa sona si di tate ngu mpupu wo tshura, awu wu nga kanyangelwa ni mtona, kasi kumaha mningelo wa sakudya; 74ni dijingo da nzalama, adi kunemela ka dona i ku ka digumi da maxekele, do tala ngu dibaselo; 75dirole, hamba, ni txinvutana txa dilembe dimwedo, kasi kumaha mphaxo wo hiswa, 76ni mabhongwe, kasi kumaha mphaxo wo dihela txionho; 77se ka mphaxo wa kuthutha, tihomu timbidi, mtxhanu wa tihamba, mtxhanu wa vamabhongwe, ni mtxhanu wa sinvutana sa dilembe dimwedo; awuwa ngu wona mningelo wa Pajiyeli, mwana Okrani.
78Ka ditshiku da wugumi ni mambidi, ku to ningela Ayira, mwana Enani, mthangeli wa vanana va ka Naftali. 79Mningelo wakwe ngu wuwa: Mbiya ya silivhela, ayi kunemela ka yona i ku ka 130 wa maxekele, ni mkamba wa silivhela, wa mtxhanu wa magumi ni magumi mambidi a maxekele, madingano ni wukhalo wo sawuleka; sotshe sa simbidi, si di tate ngu mpupu wo tshura, wo kanyangelwa ni mtona, wa mningelo wa sakudya; 80ni dijingo da nzalama da digumi da maxekele, do tala ngu dibaselo; 81dirole, hamba, ni txinvutana txa dilembe dimwedo, kasi kumaha mphaxo wo diha txionho; 82mabhongwe, kasi kumaha mphaxo wo thavisa txionho; 83se ka mphaxo wa kuthutha, tihomu timbidi, mtxhanu wa tihamba, mtxhanu wa vamabhongwe, mtxhanu wa sinvutana sa dilembe dimwedo; awuwa ngu wona mningelo wa Ayira, mwana Enani;
84ayiya ngu yona miningelo ya txiluveloni, yo mahwa ngu vathangeli va ka Israyeli, ka ditshiku di a nga totwa ngu dona: Digumi da timbiya ni timbidi ta silivhela, digumi da mikamba ni yimbidi ya silivhela, ni digumi da majingo ni mambidi a nzalama; 85mbiya yimwani ni yimwani, yi di tate ni kunemela ka 130 wa maxekele, kasi mkamba wumwewo ni wumwani, wu ti ti ni mtxhanu wa magumi ni mambidi a maxekele; sotshe siya sa silivhela si ti ti ni kunemela ka 2.400 wa maxekele, madingano ni dixekele da wukhalo wo sawuleka; 86digumi da majingo ni mambidi a nzalama, o tala ngu dibaselo, dimwani ni dimwani di ti ti ni kunemela ka digumi da maxekele, madingano ni dixele da wukhalo wo sawuleka, yotshe nzala ya majingo, yi ti ti ni kunemela ka 120 wa maxekele; 87totshe tihomu ta mningelo wa kuhiswa, i ti ti digumi da marole ni mambidi; ni digumi da tihamba ni timbidi; ni digumi da sinvutana ni simbidi sa dilembe dimwedo, ni miningelo wa sakudya, ni digumi da vamabhongwe ni vambidi, kasi kumaha mphaxo wa txionho; 88se totshe tihomu, kasi kumaha mphaxo wa kuthutha, i ti ti magumi mambidi ni mune wa marole; ni mtxhanu wa magumi ni dimwedo a tihamba, ni mtxhanu wa magumi ni dimwedo a vamabhongwe, ni mtxhanu wa magumi ni dimwedo a sinvutana sa dilembe dimwedo; awuwa ngu wona mningelo wa kusawulekisa txiluvelo, msana ka kuva txi di totilwe.
89Se mbimo yile Mosi a nga ti wulela ditendani ka msengeletano, kasi kuya womba-womba ni Mkoma, a ti ti engisela dipswi, di di nga ti womba kwakwe, ngu txitimwi ka txikhalo txa wumbilu, txitimwi ka dibhokiso da Wufakazi, ngu hagari ka makerubhima mambidi; di ti ti wombawombisa tona tiya nayo.
Currently Selected:
Mitengo 7: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.