AEMAWIRISAS 2
2
Roh Kudus aneyef
1Bare. Hari Pentakosta aenawef ara, e ow takas, asan cowok emcajarewsiapfesen. 2Jon bawum ciminas e onam op ewsarimneyefen. E jon bawum inim, e ow aemapfes cem aman asanin asanin takas aemtepkurumefen. 3Bare, e ow, komen inim cimin pok arke aporfesen. E komen, jismak inim cimin aporfesen. E komen arke masirin, aampacayfes, wunam, ar e ow takas, adam tona adam tona, inim aneyaptotorfesen. 4Roh Kudusam e ow takas aomomkurumtotorefen. E ow masirin, kawey samatin samatin atakam jukpiri atawtotorfesen. E Roh Kudus inim atakam e ow atetamtotorefen.
5E jofay nat, Yahudi samat ow e Yerusalem aemapfesen. Ar agama mamkawi fak ow arawen. Ar e capinmiin capinmiin ewenawfes ow arawen. 6E ow e jon bawum ciminas jen ajifesen. Jen ajifes masirin, ajarewsiemfesen. Ar e Yesus basicim ow, e ajarewsiemfes ow arop samatin samatin atakam jukpiri atawfes, inim atakam jen ajitotorfesen. Inimas aram bi binip arke aceceremfesen. 7Aram junum awutut aefesen. Atakamam aotawfesen. “E atakam atawmes ow takas nat, Galilea ow araman. 8Ucimaram? E jen ajimom atakam nat, dar aporsipor ajispetiwforow capinmi atakam ara. 9Dar Partia owam, Media owam, Elam owam, Mesopotamia capinmi bemap owam, Yudea owam, Kapadokia owam, Pontus owam, Asia owam, 10Frigia owam, Pamfilia owam, Mesir owam, Libia capinmi kota juwas Kirene sotop owam, Roma ewenawfom owam, inima. 11Dar Yahudi samat owam, agama Yahudi darma afiwfom owam, Kreta owam, Arab owam, inim ow awamcom ara. Dar takas e Allah e awutnakut aemawirias, atakam jen ajimom. Dar e atakam, dar aporsipor samatin samatin atakam jukpiri, inim atakam jen ajitotormom.” Inim aefesen. 12Bare, e ow takas junum awutut aefesen. Aram bi binip amsom opoken. Atakamam aotawfesen. “Ucim inimaram?” Inim aefesen. 13Wun ow nat, uc aomocfesen. “Awamces ow, ay anggur bwi awutut aaneres. Inimas ar jayic ara.” Inim aefesen.
Petrus acacapiomef
14E nat, Petrusam, e batewosom ow sebelas ajiwaram, asitfesen. Atakamam awut aotawefen. “Awamcokom Yahudi owam, Yerusalem aemapmokom owam. Car aras baporkurumey. Doratakamam jen pajikurumey. 15Car awamces ow jokmen bwi jayic, atewmeperemtiwmokom. Er atakamnak opok. Wow nat, jam sembilam tam cowok ara. 16E aemames nat, e Allah atakam botaw ipic juwas Yoel aotawefas ara:
17Allah atakam ara, E asepnak jofay ara, Dor e doRoh, asmat ow takas atetamcimin.
Inimas ara, e catiperes doratakam acacapiomcemes. E caray owam pok desen aporcemes. E carownucuram isi atamwitcemes.
18Bare. E jofayam dor e doRoh, e dokerja bwemtam owam, cepesam, atetamcimin. Ar masirin, doratakam acacapiomcemes.
19Dor junum bweas e onam op aporomtamcimin. Doram junum bweas awames capinmi aporomtamcimin. E junum bweas, esam, jismakam, jisamwin awutam, ara.
20Bare, e jopok jiwic acamtiwcema. E piram esakam es cimin aemcema. Asep ara masirin, Tuhan Jofay aenawcema. E jofay, awutnakutam, akatnakutam, ara.
21E janim Tuhan aanimces ow takasam ajoremcemes.” Allah inim atakam ara.
Yoel inim aeefen.
22“Car awamcokom Israel owa. Doratakam jen pajiey. E Yesus, Nasaret ipic ara. Bare, Allah, afakas, Yesus atetamef. Inimas Yesus e junum bweas cawowoc aemawiri. Eras Allah e Yesus atewemef, inim baporomtamas ara. Caram inimas camsom. 23Wunam, ow e Yesus car aotasimemtamfes. Car masirin, jursumec ow, e aramat ipic, salibpu seyfinim bapowapom jirmec ajirimfokom. Inimas car aramat ipic acatiwfokom. Bap ara nat, Allah, ow inim pok bwem, atakam emcasakamtiwef. Aram eras takas amsom. 24Allah nat, Yesus ajaworomsumutumef. Yesus damir aafef ara, aram ajurusemef. E nat, Allah e Yesus ajortewef. Bare, e damiras, Yesus bwemkimopawar asan opok. 25Daud nat, e Yesus inim atakam aotawefen:
‘Dor Tuhan e dobipu aatamporawiru. Aram e dodampu aatamememama. Inimas ow do bwemjurusum asan opok.
26Inimas do jak akat ara. Doram si asimin. Damir adamirafcey, e dodam, asan akat aemamescema.
27Allah. Or e doranakat ipic, e damir ow bemap asan, den bapwitimtiw opok aemcemem. Oram e ojipic tarowat, dam of bofames, inim batetam opok aemcemem.
28Bare, or e jiwne bokotpu aporomtamfan. Doram e odampu akawiemcey, or jak akat atetamceman.’ ”
Daud inim aeefen.
29“Dojowow akatonokom. Dor Daud atakam umuton car aotawmin ara. Aramat ipic darafasutmar ara. Aram damir adamirafef, wunam ow, aramat ipic awuapomfesen. Wowam e arawerem darasan awames. 30Daud nat, tetakay aememef ara, aram Allah atakam botaw ipic aememefen. Allaham atayi faknakut e Daud aetamefen. ‘Asep jofay dor orurpis ipic cowok, raja ipic atewemcimin.’ Inim aeefen. Daudam inim atakam jen ajikurumefen. 31Ar e Allah aemcowas aporefen. Inimas ar e Allah aeremtewef ipic aojaworsitcowas, atakam atawefen. Inimas ar Allah e ipic e damir ow bemap asan den bapwitimtiw opokam, e dam of bofames opokam, inim atakam atawefen. 32Bare, Allah e Yesus ajaworomsumutumef. Daram takas inimas emeporfom. 33Allaham, aramat ipic aban bo jamam atomettewapomefen. Aram e Roh Kudus e aramat ipic atetamefen. Ametnak ara, e Yesus aricipic, eras bwem, atayi aetamefen. Bare, e wow apormomasam, e jen ajimomasam, e Yesus atewnemamaras ara. 34E Daud nat, onam op baptomet opok. Aram atakam arma atawef:
‘Tuhan, atakam, e doTuhan aotawef, 35“Or a doban bo jamam mamemapey— a ojewew ow takas akumimosomcey jofay ajiwara.” Tuhan inim aeefen.’
Daud inim aeefen. 36Car e Yesus e salib os op acatopomfokom. Allaham, e aramat ipic, Tuhan atewemef. Aram aramat ipic aeremtewef. Bare, e Israel ow takas inimas baporkurumces.” Petrus inim aeefen.
37E ow inim atakam jen ajifes ara, aram jak pwicak awutnakut aememfesen. Aram atakam Petrusam, e wun atakam botaw batewosom owam, aotawfesen. “Awamcokom owa. Dar ucim pok emcom?” Inim aefesen. 38Petrus masirin, atakam e ow aotawefen. “Car dosa bak mampayemtotorey. Ow Yesus Kristus juwas bajiemces, wunam bwi car babwimcenes. Bare, Allah e cadosa bi binip ajiosomcema. Aram e Roh Kudus car atetamtotorceman. 39Allah, e Roh Kudus batetam, atayi, caram, catiperesam, e damasam opok owam, aetamef. Er e daTuhan Allah ajateef ow takas ara.” Inim aeefen. 40Petrus, wun atakamam arke e ow aotawefen. Aram atjen fak e ow aowefen. “Car mamjoremtotorey. Allah, car, a fasi samat cowkon, siksa bwemasin.” Petrus inim aeefen.
41Barewen. Wun ow e atakam ji aefesen. Ow masirin, e atakam ji aefes ow bwi abwimfesen. Inimas e jofay ara, e Yesus mamkawi ow, ow tiga ribu ajiwarnew kayimin akakayiemfesen. 42E owam e atakam botaw batewosom ow atakam, amememawirisen. Aram cowok asan aniapa ajiawirisen. Aram perjamuan Tuhan cowkon aana ajiawirisen. Aram janim Allah aanima ajiawirisen.
Yesus basicim ow, akat pok aemfes
43E atakam botaw batewosom ow, junum bweas aema ajiawirisen. E ow takasam, omar aea ajiawirisen. 44E Yesus basicim ow takas cowkon aememawirisen. Aram pok takas cowkon aomomatawirisen. 45Pok aramat ow, pok, uang auwumteweta ajiawiris, wunam e uang, pok opok ow sey aseyamtama ajiawirisen. 46Join aatamfafayawiri, ar bi binip cowkon, Allah cem aman ajarewsiapa ajiawirisen. Ar masirin, amos acema jiwnatiwa, acema jiwnatiwa, inim ajiawirisen. Jak akat epcomam amos sey aseyamtama ajiawirisen. 47Aram Allah asicimawirisen. E kawey owam, e ow, atakam akat atawa ajiawirisen. Join aatamfafayawiri, Tuhan e ajortewa ajiawiri ow, e owpu kayimin akakayima ajiawirien.
Currently Selected:
AEMAWIRISAS 2: LAICNS
Highlight
Share
Copy
Want to have your highlights saved across all your devices? Sign up or sign in
LAI 1985
