MARKUS 10
10
Cepes bajiwapom
(Mat. 19:1-12; Luk. 16:18)
1Barewen. Yesus erasan ewjisosef, wunam Yudea capinmi ajaremefen. Aram e Yordan jo poman capinmi ajaremefen. Ow arkeam e aramat ipicpu aomeromfesen. Aramat ipicam atakam e ow amememtamefen. Aram e asanin asanin inimas cowok aea ajimepen.
2Parisi owam aramat ipicpu ameromfesen. Aram e aramat ipic salah atakam botaw epen bwemporen. Inimas aram jonow aramat ipic atowporfesen. “Jipic e arem bajiwapom akat open? E daragama Jirmec inimas acuw bat open?” Inim aefesen.
3Yesus masirin, “Musa ucim jirmec car ajirimfan?” Inim aeefen.
4E owam, “E Musa atakam, ‘Jipic e arem bajiwapom akat aporcow, aram e cowoc bajiwapom surat baemtamcow.’ Musa inim jirmec ajirimforow.” E Parisi ow inim aefesen.
5E Yesus araw, “Musa car jen fak ow aporef. Inimas ar inim jirmec, surat aeapomef. 6E nat, ametnak ara, Allah pokin pokin akenemapomef. Aram jipicin cowoc akenemapomef. 7Inimas ara, jipic, e aricipicam, arosowocam, bakan ajioscema, wunam aremcin akac aemapcemes. 8Bare, armipicam, aremam, dam cowkon aemapcemes. Aram ow jamnuk boemap opok aemcemes. Ar ow cowok inim cimin aemapcemes. 9Bare, Allah, e ow cowkon akajimapomcema. Inimas asmat ow, e ow bapakapimapom arapok.” Yesus inim aeefen.
10Bare, Yesusam, e amamkawi owam, cem afiwfesen. Cem afiwfes, e mamkawi ow, e Yesus atawef atakam, jonow e aramat ipic atowporfesen. 11Aramat ipicam atakam e ow aotawefen. “Jipic arem ajiwapomcow, wunam wun cowoc aotewetcow, ar e bap cowoc ajurusumcema. Aram jursumec ipic aememcema. 12Cowocam armipic ajiwemcow, wunam wun ipic aojuwutcow, bare e cowoc jursumec cowoc aememcema.”
Yesus, asan akat, jiwi aomef
(Mat. 19:13-15; Luk. 18:15-17)
13Barewen. Ow, jiwi, Yesuspu atowocenfesen. Ar Yesus e jiwi ban bakurum akat arawen. E Yesus mamkawi ow nat, inimas acuw aatfesen. 14Yesus inimas aporef ara, aram jak amop aememefen. Aram atakam e amamkawi ow aotawefen. “A jiwi e dodampu inim baenawces. Acuw bat arapok. A jiwi inim awcawor ow e Allah Pemerintah Asan aemapcemes. 15Atakamnak ara, e jiwi inim awcawor memem opok ow, e Allah Pemerintah Asan bwemfiw asan opok cowok.” Inim aeefen. 16Bare, Yesus e jiwi becer ajipiropefen. Aram ban e jiwi dam ton atatiwef wunam, ar Allah, asan akat e jiwi bom, janim aanimefen.
Pok awut ipic
(Mat. 19:16-30; Luk. 18:18-30)
17Barewen. Yesus erasan ewjisosefen. Ajaref ara, jipic cowok aramat ipicpu je akukuenawefen. Aram Yesus bipu jine onok aneyotapefen. Aram atakam Yesus aotawefen. “Guru akatenem. Dor jiwnenak batamemawar akat ara. Inimas dor ucim pok emcey.” Inim aeefen. 18E Yesus masirin, “Oratakam, ‘Guru akatenem,’ inim aemenem nat, ucimaram? Akat ow, bare opok cowok. Allah cowok akat ara. 19Oram Allah Jirmec omsom. E Jirmec ara: ‘Daw catiwcem. Cen osom ecem. Pok osom ecem. Suw atakam atawcem. Tot otcem. Oricipicam, orosowocam, mamsicimawarey.’ Inima.” Yesus inim aeefen.
20E ipicam, “Guru. Dor jiwi ewememawiru, dor eras takas ji aeawiru.” Inim aeefen.
21Yesusam e ipic manmok atiwemefen. Aram damos e ipic ajiomefen. Aram atakam e ipic aotawefen. “Or pok cowoknakap bwem opok aemem. Bare, or e opok takas uang mamuwumtatey. E uang masirin, e pok opok ow sey mamseyamtamey. Or masirin, e onam op capinmi, pok anakat atowomatcemem. Eras aemcem, mamofasienawey. Wunam mamkawiawarcan.” Inim aeefen. 22Bare, e ipic pok awutut aomomefen. Inimas ar inim atakam jen ajief ara, ar bi ciri aememefen. Aram jak pwicak aememef, wunam ajisosefen.
23Bare, Yesus manmok apepemef, wunam atakam e amamkawi ow aotawefen. “Pok awut ow, e Allah Pemerintah Asan bafiw, bare susah awutnakut ara.”
24E amamkawi ow inim atakam jen ajifes ara, aram junum awut aefesen. E nat, Yesusam atakam aotawefen. “Tiperesa. Ow, e Allah Pemerintah Asan bafiw, bare susah awutnakut ara. 25Unta, jarum jof bafiw, bare susah kanim pwiciri ara. E nat, pok awut epcom ow, Allah Pemerintah Asan bafiw, bare susah awutnakut ara.” Inim aeefen.
26Bare, e Yesus mamkawi ow junum awutnakut aefesen. Aram atakam aramaman aamtawfesen. “Ucim inimaram? E ajoremces ow, ucim owaram?” Inim aefesen.
27Yesusam e ow manmok atiwemef, wunam atakam aotawefen. “Asmat ow inimas bwemem asan opok. Allah nat, eras takas bwem, aras araman. Aram e pokin pokin takas bwem, inim fakas aomomamar araman.”
28Bare, Petrusam atakam Yesus aotawefen. “Damar e daras takas bakan ajifom, wunam or ajamkawifenom.” Inim aeefen.
29-30E Yesusam, “Wun ow, e acemnew, e arewcewesnew, e atarsepesnew, e arisarownew, e atiperesnew, e akebunnew, bakan ajifes. Ar eras takas, kerja do bwemtam bakan ajifes. Aram e Atakam Akat acacapiomfes. Atakamnak ara, inim aemfes ow, e bakan ajifesas, eras takas awutnakut aotewetcemes. Ar cem arkenakutam, arewcewes arkenakutam, jiwi arkenakutam, kebun arkenakutam, aotatcemes. E ow eras takas awames capinmi aemcemes. Kawey owam e ow ajurusumcemes. E aenawcow jofay masirin, e eras takas aemces ow, jiwnenak aatamemawarcemes. 31Bare, awut ow arke, kanim ow aoememcemes. Kanim ow arke masirin, awut ow aoememcemes.”
Yesus e damir aafcowas atakam aotawef
(Mat. 20:17-19; Luk. 18:31-34)
32Barewen. Yesusam, amamkawi owam, e Yerusalem baysos bin aojiemfes. Yesusam bap ajarefen. E amamkawi owam junum awut aefesen. E wun fa asoromfes owam omar aefesen. Yesus masirin, e amamkawi ow dua belas ajiwar, arpuak asan ajisomosefen. Aram e aemcowas, atakam e ow aotawefen. 33“Dar Yerusalem ajisosmom. Erasan ara, jipic cowok, e Asmat Anakat Ajaworemef Ipic, e Allah atakam mamtaw tugas ow awut aotasimemtamcema. Aram aramat ipic e Allah Jirmec mamememtam ow aotasimemtamcema. E ow masirin, e aramat ipic bacatiw atakam asakamtiwcemes. Aram e aramat ipic e Yahudi opok samat ow aotasimemtamcemes. 34E ow masirin, e aramat ipic, uc aomoccemes. Aram bese e aramat ipic dam ajiapomcemes. Aram omop e aramat ipic aafcemes, wunam ar e aramat ipic acatiwcemes. Bar mamincop masirin, e aramat ipic aojaworsitcema.” Inim aeefen.
E Yakobusam, Yohanesam, janim Yesus aanimfes
(Mat. 20:20-28)
35Barewen. Yakobusam, Yohanesam, Yesuspu aapenfesen. Ar Sebedeus atiperes arawen. Aram atakam Yesus aotawfesen. “Guru E janim aanimcenomas, mamemtamcarowey.” Inim aefesen.
36E Yesus masirin, “Dor car ucimas emtamcen?” Inim aeefen.
37E owam, “Or e ow takas jirmec ajirimkurumcem jofay, bare asan akatnakut aemapcemem. E jofay, da wun ipic cowok e oban bo jamam bemap, wunam da wun ipic cowok e otamo jamam bemap, inim janim aanimamenom.” Inim aefesen.
38E Yesusam, “E janim aanimamenokomas camsom opok. Bare, asep jofay dor ajurusemcimin. Caram e ajurusemceyas inim cinim mamjurusem akat open?” Inim aeefen.
39E ipic jamnuk masirin, “Bare, akat.” Inim aefesen.
E Yesus araw, “Bare, car e ajurusemceyas inim cimin ajurusemcomokom araman. 40E nat, e doban bo jamam bemap owam, e dotamo jamam bemap owam, inim bweremtew, bare doras opok. Allah e asan akenemapomef. Aram e asan aemapces ow aereremtawef.” Inim aeefen.
41Bare, e wun Yesus mamkawi ow sepuluh ajiwar, e ipic jamnuk janim aanimfesas, atakam jen ajifesen. Aram jak amop aememfes, wunam atakam e Yakobusin Yohanes aotawfesen. 42Yesus masirin, e ow ajateef, wunam atakam aotawefen. “E Allah mamkawi amsom opok samatin samatin, jirmec awutnakut e mami ow ajirimcemes. E ow awutam atakam faknakut e mami ow aotawcemes. Caram inimas camsom. 43E nat, caramaman inimas arapok. E caramaman, wun ow awut memem akat aporces, ar e wun ow kerja baemtamces. 44Wunam, e caramaman wun ow, bap ow memem akat aporces, ar e wun ow takas mami kerja baemtamces. 45E Asmat Anakat Ajaworemef Ipic, ow kerja a bwemtam, bwenaw opok. E nat, ar kerja kawey ow bwemtam aenawef. Aram ow arke bajortew damir baftam aenawef.” Inim aeefen.
Manmok kapi ipic juwas Bartimeus
(Mat. 20:29-34; Luk. 18:35-43)
46Barewen. Aram kota Yeriko ajaremfesen. Wunam Yesusam, amamkawi owam, wun ow arkeam, e Yeriko aewjisosfes ara, manmok kapi ipic juwas Bartimeus e bokotpuak aemapefen. Ar Timeus atiw arawen. Aram uang janim manimawar ipic arawen. 47Aram atakam jen ajiefen. “E aenawmar ipic e Nasaret ipic juwas Yesus ara.” Inim atakam jen ajiefen. Inim atakam jen ajief masirin, atakam afakaytawefen. “Yesus! Daud urpis! Saw akat oworporcan!” Inim aeefen.
48Ow arkeam jiman e ipic aaffesen. “Oram jokona.” Inim aefesen. E nat, e ipic atakam awutnakut aofakaytawefen. “Daud urpis! Saw akat oworporcan!” Inim aeefen.
49Bare, Yesus atukemefen. “E ipic bayteey.” Inim aeefen. E ow masirin, e ipic ajatefesen. “Oram jak faka. Basitey. Aramat ipic or ajateman.” Inim aefesen. 50Bare, e manmok kapi ipic e abaju bipar ajiwitiwefen. Aram asarimsitef, wunam Yesuspu aapenefen.
51Yesusam jonow e ipic atowporefen. “Dor or ucim pok emtamcen?” Inim aeefen.
E manmok kapi ipic ara masirin, “Guru. E domanmok bateremtamcan.” Inim aeefen.
52E Yesus araw, “Bare. Baysoseyo. Or dor asicimamenem. Inimas e omanmok atereyma.” Inim aeefen. Bare, e ipic manmok asarimtereyemefen. Ar masirin, Yesus e bokotpu fa asoromomatefen.
Currently Selected:
MARKUS 10: LAICNS
Highlight
Share
Copy
Want to have your highlights saved across all your devices? Sign up or sign in
LAI 1985
