MARKUS 12
12
Anggur kebun baposomtew atakam
(Mat. 21:33-46; Luk. 20:9-19)
1Barewen. Yesus baposomtew atakam e ow aotawefen. “Jipic cowok anggur kebun atawapomefen. Aram pagar e kebun fumi abwicirimapomefen. Anggur bwi burumwisim asanam akenemefen. Cemam opnakut aeapomefen. Er e kebun manmok batiw ow bemap asan ara. Aram e kebun, kebun kerja bwemtam ow aotasimtitamefen. ‘Car e doranggur kebun kerja aemtamcenokom, dor e wun anggur eke car atatamcimin. E wun masirin, doras ara.’ Inim atayi aeefen. Ar masirin, wun jo capinmi ajisosefen. 2Bare, e anggur eke bakokomtaw bwi aenawefen. E kebun aramat ipic masirin, wun kerja bwemtam ipic cowok, e kebun kerja bwemtam owpu atewosomefen. Ar e ipic e wun anggur eke bataw atewosomefen. 3E kebun kerja bwemtam ow masirin, e kerja bwemtam ipic ban akimomfesen. Aram e ipic omop aaffes, wunam desenkus afasimenemfesen. 4E kebun aramat ipic masirin, wun kerja bwemtam ipic erasan aotewosomefen. E kebun kerja bwemtam ow nat, e ipic kus atakamtewfesen. Aram pwicakas e ipic aemfesen. 5E kebun aramat ipic masirin, wun kerja bwemtam ipic erasan aotewosomefen. E kebun kerja bwemtam ow nat, e ipic acatiwfesen. E kebun aramat ipicam wun kerja bwemtam ow arke erasan aotawosomefen. E kebun kerja bwemtam ow nat, omop e wun ow aaffesen. Aram e wun ow acatiwfesen.”
6“E kebun aramat ipic, wun ipic cowoknakap aomomefen. Er atiw arawen. Aram e atiw damos ajiomefen. Aramat ipicam, ‘Bare, e ow dotiw bwemumiris asan opok.’ Inim aeefen. 7E kebun kerja bwemtam ow nat, atakam aramaman aamtawfesen. ‘Awamec ipic, e aricipic pok takas atowomcema. Dey. E ipic bacatiwmoc. Inimas e aricipic pok takas darma baportowom.’ Inim aefesen. 8Bare, aram e ipic ban akimomfes, wunam acatiwfesen. Acatiwfes masirin, ar e sumu ipic e kebun asan ewjiwisimfesen.
9E anggur kebun aramat ipic nat, ucimas aemcow? Bare, ar e kebun asan ajisoscema, wunam e kebun kerja bwemtam ow acatiwcema. Ar masirin, e kebun, wun kerja bwemtam ow aootasimtitamcema. 10Caram e Alkitab atakam baca emcaemfokom openow. E Alkitab atakam: ‘E cem bweapom ow, ek cowok pwicak aporfes, wunam e ek aeremtiwfes. E ek nat, cem ek penting awutnakut aemamesef. 11Bare, Tuhan eras aemef. Daram e aemefas akat cowok apormom ara.’ E Alkitab inim aema.” Yesus inim aeefen.
12Yesus e baposomtew atakam atawef ara, ar e Yahudi agama kepala ow atakam atawefen. E owam inimas aporfesen. Ar masirin, Yesus ban bakimom aemporfesen. E nat, ar e ow arke omar aefesen. Inimas ar Yesus bakan ajiosfesen.
Uang raja ipic batetam atakam
(Mat. 22:15-22; Luk. 20:20-26)
13Bare, e ow, Parisi owam, Herodes mamkawi owam, Yesuspu atewosomfesen. Ar, e ow, aramat ipic salah atakam epen bwempor atewosomfesen. 14E owam Yesus ameromfes, wunam atakam e aramat ipic aotawfesen. “Guru. Or jipic tarowat apormom ara. Oram ow e atakam atawmesas omar opok. Oram, ‘Wun ow awut. Wun ow awut opok,’ baji opok ara. E nat, or e Allah bokotpu atakam, atakamnak amememtamcemem. Inimas daram jonow o batowpor. Ow e raja Kaisar jirmec ajirimef uang ar atatamces, inimas akat open? 15Dar e uang Kaisar batatam aranew? Batatam opoknew? Ucimaram?” Inim aefesen.
Yesus nat, e ow pir aefes aporefen. Ar masirin, “Car aempormenokom ucimaram? Bare, uang dinar cowok tetamcan. Dor e uang bapores.” Inim aeefen. 16Bare, ar e uang Yesus atetamfesen. Aramat ipic masirin, jonow e ow atowporefen. “Awap gambar ca biam? Awap asuk wow, ca juwasam?” Inim aeefen. E ow masirin, “A Kaisar bi ara. Aram Kaisar juwas ara.” Inim aefesen.
17E Yesus masirin, “Bare, car Kaisar pok, Kaisar mamtetamey. Caram Allah pok, Allah mamtetamey.” Inim aeefen. Bare e ow e aramat ipic atawef atakam junum awut aefesen.
E damir ow aojaworsitcesas
(Mat. 22:23-33; Luk. 20:27-40)
18Barewen. Saduki owam Yesus ameromfesen. E Saduki ow abi binip ara, “Damir aaffes ow bojaworsit opok,” inim bi binip aceceremcemes. Bare, aram jonow e aramat ipic atowporfesen. 19“Guru. Musa inim jirmec tulis aeapomtamforow. ‘Petew ipic jiwi opok damir aafcow, arewec e damir aafef ipic arem baotewetcow. Ar masirin, jiwi e arepwec bafimtamcow.’ Musa inim aeefen. 20Bare, jipic cowok ower jiwi tujuh ajiwar arawen. E betiw ipic cepes atewetefen. E nat, aramat ipic jiwi bafimat opok damir aafefen. 21E abak ipicam e damir aafef ipic arem aotewetefen. E nat, aram jiwi bafimat opok damir aoafefen. E wun abak ipicam inim cowok aemefen. 22Bare, e ow tujuh ajiwar takas damir aaffesen. Aram jiwi bafimat opok cowok arawen. Asep ara masirin, e cowocam damir aafefen. 23Bare, e ow tujuh ajiwar e cowoc ateweta aefesen. Inimas ara, e damir aaffes ow aojaworsitces jofay ara, e cowoc ca ipic arem aememcow?” Inim aefesen.
24E Yesus masirin, “Car e Alkitab atakam camsom opok. Caram Allah afakas camsom opok. Inimas car bi binip jiwic awamcokom. 25E damir aaffes ow aojaworsitces, owerow, cepes botewet opok aemcemes. Cepesam ower bojuwut opok aemcemes. E nat, ar e onam op malaikat inim awcawor aememcemes. 26Car e damir ow aojaworsitcesas atakam atawmokom ara. Bare, ametnak ara, Musa e fa epcom os kari jismak komen epcom, atakam tulis aeapomef. Aram e Allah atakam e aramat ipic aotawefas tulis aeapomef. E atakam, ‘Dor Abraham arAllah ara. Doram Ishak arAllah ara. Doram Yakub arAllah ara.’ Allah inim aeef. Caram e atakam baca emcaemfokom openow. 27Bare, Allah, damir ow arAllah opok. E nat, ar tetakay ow arAllah ara. (Inimas e damir aaffes ow aojaworsitcemes apormom ara.) E nat, car bi binip jiwicnakut ow awamcokom.” Yesus inim aeefen.
E awutnakut jirmec
(Mat. 22:34-40; Luk. 10:25-28)
28Barewen. Allah Jirmec mamememtam ipic cowok erasan ameromefen. Aram e ow e atakam aamtawfesas jen ajiefen. Ar Yesus e ow atep ajitefas akat cowok aporefen. Inimas ar jonow e aramat ipic atowporefen. “Allah jirmec arke atatitamforow. E nat, e awutnak jirmec, ucim jirmecaram?” Inim aeefen.
29E Yesus masirin, “E awutnak jirmec inim ara: ‘Israel owa. A atakam jen foa. Tuhan darAllah ara. Ar cowok Tuhan ara. 30Bare, damos awutnakut e oTuhan Allah mamjiomkurumey. Or e ojak epcomam, e obi binip epcomam, e ofakas takas epcomam, damos e aramat ipic mamjiomkurumey.’ Allah inim aeef. 31E wun awut jirmec masirin, inim ara: ‘Damos e ojowow mamjiomey— or damos orma ajiomamem inim awcawora.’ Allah inim aeef.” Yesus inim aeefen.
32E Allah Jirmec mamememtam ipic masirin, atakam Yesus aotawefen. “E atawmem atakam bare akat ara. Aram atakamnak ara. Bare, Tuhan cowok, Allah ara. Wun ow Allah opok. 33Owam e ajak epcomam, e abi binip epcomam, e afakas epcomam, damos Allah bajiomkurumces. Aram damos ajowow bajiomces— ar damos arma ajiomames inim awcawora. E takas, bare atakamnak ara. Ow e jirmec jamnuk ji bwe, bare penting awut ara. Ow, pok Allah jis bafamtamnew, pok Allah bacatitamnew, bare penting kanim inim ara.” Inim aeefen.
34Bare, Yesus, e ipic atakam atawefas, akat cowok aporefen. Ar masirin, “Or e Allah Pemerintah Asan bafiw, bare sotopnakap ara.” Inim aeefen. Bare, e jofay ajiwar, ow jonow Yesus bwemotowpor asan opok. Ar omar aefesen.
E Allah Aeremtewef Ipic cam?
(Mat. 22:41-46; Luk. 20:41-44)
35Barewen. Yesus e Allah cem aman atakam amememtamefen. “E Allah Jirmec amememtamames ow atakam, ‘E Allah Aeremtewef Ipic, bare Daud urpis ipic ara.’ Inim aemes. Ar inim atakam atawmes nat, ucimaram?” 36Ametnak ara, e Roh Kudus, atakam bi binip, Daud atetamef. E Daud masirin, inim atakam aotawef:
Tuhan, atakam e doTuhan aotawef:
“Or e doban bo jamam emapey— dor e ojewew ow akumimosomkurumcey jofay ajiwara.” Tuhan inim atakam aotawef.
Daud inim aeef. 37“Bare, Daud, e Allah Aeremtewef Ipic, atakam atawef, ‘Ar doTuhan ara.’ Inim aeefen. Inimas ara, e Allah Aeremtewef Ipic, Daud urpis ipic aememef nat, ucimaram?” Yesus inim aeefen.
Car e Allah Jirmec mamememtam ow pimicima
(Mat. 23:1-36; Luk. 20:45-47)
E ow arke e Yesus atawef atakam jen ajifes ara, aram jak akat aememfesen.
38Bare, Yesus wun atakamam amememtamefen. “Car e Allah Jirmec mamememtam ow pimicima. Ar baju jirow ajimomcemes, wunam e pasar asan acowojarcemes. Aram ow, ‘selamato’ a baji jak aserememcemes. 39E sembahyang cem amanam, e pokbwi cem amanam, ar e bap ow asan bemap jak aserememcemes. 40Aram tot e fwisma cepes aotcemes, wunam e apok takas osom atatcemes. Janim Allah aanimces, aram janim jirownakut aanimcemes. E nat, er bweyofas cowok ara. Bare, Allah e ow siksa awutut aemcema.” Yesus inim aeefen.
Fwisma cowoc derma uang atetamef
(Luk. 21:1-4)
41Barewen. Yesus, e Allah cem derma uang batawapom asan, bin ajiapefen. Ar ow arke uang e asan atawapomfes aporefen. Aram uang awut ow, uang awut e asan atawapomfes aporefen. 42Pok opok fwisma cowocam aenawefen. Aram uang sen kanim jamnuk e derma asan atewapomefen. E uang sen nat, harga opoknakap arawen. 43-44Yesusam e amamkawi ow ajateefen. Ar atakam e ow aotawefen. “Atakamnak ara, a ow arke uang awut ara. Aram e wun uang e derma asan atawapomeres. Awamec cowoc nat, pok opok ara. Aram e aruang takas e asan atewapomor. Er e apok baytin uang takas ara. Inimas ara, awamec cowoc uang awut inim e asan atewapomor. E wun ow takas, uang kanim inim atawapomeres.” Inim aeefen.
Currently Selected:
MARKUS 12: LAICNS
Highlight
Share
Copy
Want to have your highlights saved across all your devices? Sign up or sign in
LAI 1985
