Génesis 19
19
Papang yaklauwi Sodoma dawakGomorra balna kidika dismukna
1Mahka puklakwa yakat insal bu kidika Sodoma yakat uiwi kakana. Dawak Lot laih yalahna sakdai Sodoma tawanni nuhni dūrnikung yakat, bahang kidika yakat muihni balna kal ududuhwa dai kidika. Witing talwi mahka yaklauwi kidika balna duna, dawak witing limbabahwi sau kat muhni lakna 2dawak diyulna:
—Dakiwan balna, kalmana dinit yakat buktik yultayang, manna watta dimana yamyang ūni yakat payahtanauh. Kidika yakat sip-awanama kalmana suhnamna, dawak yahan mapiris watta lawa yawanama.
Kaunah witingna biriwi kalyuyulna:
—Dikah, tingkih. Yangna tapas yakat payahtanaki ki.
3Kaput kaunah, Lot yaklauwi wat wat yulna, witni kat witingna yaklauwi agha atwi ūni yakat payahna uina. Witingna uiwi kakawak, Lot witing masan kasnin yamni as yamwak kakasna, plawar busna pupuhnin dini āwas, dawak uiwi kakana muihni balna kakasna.
4Dawak baisa kalalangwas kat, Sodoma tawanni nuhni kidika ahalni balna bitik uiwi ūni kidika awaihdadakna, walabis wawahma binina kaupak muih bararak kat, 5parasni sarahni kalyuyulna Lot yakat:
—¿Angkat bangyah kidika ahalni balna man ūma akat aiwadaika adika pukta? ¡Yaktah! ¡Witingna karak alangwanakuhtiang!
6Kaput laih Lot witing ahni yakat kalahna muih balna yakarak yulbauna atnin, kaunah dūr kidika yamni putwi kalahna dai, 7aput diyulna:
—Plismana wanaih balna, manna di dutni yayamwinih. 8Yang walakibis yayal bu dutayang bahang witingna baisa ahal karak kalpapakwas ki; bahang yang yaktik manaki kaput laih manna witingna karak ais yamnin kultanama kidika yamtanama, kaunah adika alni balna yakat laih di as bik diyayamwinih, kat kidika balna laih yang yultik duainayang muihni balna bahang.
9Kaunah witingna yaklauwi nangnitlalana:
—¡Īslawah! Baisa pa ūk muihni man kapat kidika manah laih yaklauwi di yanapakwasdai yamna atnikna. ¡Kaput laih warmani man yakat tanit dutni mayamdarang, kidika balna yakat diyamnikna dai kidika tanit!
Kidika usnitkat Lot yakat laihwi babauna dawak dūr yakat uiwi tukwi bahnin yayamna, 10kaunah Lot ūni kau ahal balna dai kidika yaklauwi Lot yakat laihwi murwi ahana ū pasyakat; dawak dūr puputna, 11kaput laih ahalni balna yaklauwi yayamwa kat ahnikau muih bahang dai kidika bitik miniknapa puklakna. Wawahma kaupak muih bararak kat miniknapa di talwas dadana. Dawak kaput laih dūr kidika walna manah sip yayakwas dadana. 12Kaput dawak ahal balna kidika yaklauwi Lot yakat kalyuyulna:
—¿Akat man wanaihma baisa ūk dutamahn? Walambis ahal, yayal dawak umasah ahal balna kidika bik dutah dawak adika tawanni nuhni akat ais dutaman balna kidika bitik; dawak yakta adika kaupak naikau duyawah, 13kat adika pāni dispamtanaki ki. Adika tawanni nuhni muihni balna yulnina dutni manas dakana Dawan, kidika bahang yanasihna dispamna atnikna.
14Kaput laih Lot witing kiwi ditalna unisah ahal balna yakat, yuldarang kat witing walanibis yayal yakat dunin yuyulna balna dai yakat, dawak diyulna:
—¡Lawanauh, dawak akaupak mahka yawanauh kat Dawan yaklauwi adika tawanni nuhni dispamwarang ki!
Kaunah witing unisah balna kidika rahm laih kukulwas dai Lot diyulwa kidika. 15Uman payahlawa bahang, insal balna yaklauwi Lot yakat kalyuyulna:
—¡Bainahtah! Lawah, dawak yalma duta yawah, walamabis yayal balna bik, man daukihmawas kat adika tawanni nuhni akat wah kalatanaki yakat.
16Kaunah Lot witing sirihni awas bahang, insal balna yaklauwi tingni yak lalaihna, kat Dawan yaklauwi Lot yakat dalani kaltalwa bahang. Kaput bik laih yalni yaka bik lalaihna, dawak walanibis yayal balna kidika bik, dawak tawan nuhni kaupak yayakna, laihwi yakna atnin yulni.#2 Pi 2:7. 17Tawan nuhni kaupak ahni yakat kalahwi uidadawak, insal balna dai kidika as yaklauwi kalyulna:
—¡Irah, sangmaka kidika laihta yaktah! Dangmat yakat wiryaklawi talwinih, dawak sau langni yakat bik wiryaklawi talwinih. Asang yakat īra yawah, sangmaka laihta yaknin kultaman kat.
18Kaunah Lot yaklauwi diyulna:
—¡Dikah Papangki balna plismana! 19Manna yang ilpki nuhni yamnamana, dawak yang kau yamni yayamna mana sangkika laihta yaknin yulni, kaunah yang sip-awasyang asang yakat yawinik, kat daunin kidika sipki tapas yakat yalaihnin, bahang kaput laih dauki. 20Adika kaupak ulis yakat tawan as pakki, bahang kidika yakat sipyang irinik. ¡Yadatanang kat kidika yakat yawik sangkika laihtik yakkuh, kat rahm kidika laih tawanni kidika dibin palni ki!
21Kaput laih insal as yaklauwi kalyulna:
—Madakanayang, bahang ais yayulnaman kaput yamki. Tawanni bin yayulnaman kidika laih dispamtas awaki, 22kaunah ¡yawah!, kidika yakat mahka yawah, kat baisa kidika pāni yakat yawasman kat yang sip di as bik yamtasyang.
Kaput bahang kidika tawanni nuhni laih ayangni pakna Zoar.#19.22 Hibru kau, Zoar kidika yulni tanka laih, dibin, sihm kapat paruh yulwi.
23Payahlawakat Lot laih uman Zoar yakat kiwikana dai, 24kaput laih Dawan yaklauwi kalawak Sodoma dawak Gomorra minit yak kuhpau dawak sulhpa karak was kapat launa dai; 25daukalpamna dai#Mt 10:15; 11:23-24; Lc 10:12; 17:29; 2 Pi 2:6; Jud 7. kidika yakat yalalahwa balna bitik yakat, dawak kidika sauni langni yakat barakwa balna kidika bitik laih dismukna dai. 26Kaunah Lot yalni#Lc 17:32. laih witing usnit yakat kaiwalikdai kidika kaupak dangnit yakat wiryaklawi talna, dawak kidika minitni yakat kuma kalna.
27Kidika kaupak payahwak, Abraham witing kiuna Dawan karak yulbabauna dai pāni yakat, 28bahang witing Sodoma dawak Gomorra kidika niningyak muhwi talna, sauni langni bitik yakat, dawak talna kidika sauni pīsni bitik laih wayau manah pukwi kilna, sihm di busnin ūni kaupak pukwi kilwa kapatdai. 29Kaput kuduh Papang yaklauwi Lot yalahwa pāni langni kau tawan nunuhni balna dismukna dai kidika, kaunah Abraham yakat isningkatna bahang Lot kidika dispamnin pāni kaupak yakna.
Moab dawak Amón muihni balnaangkaupak aiwi kalalahna kidika
30Usnit kat Lot witing yamaduna Zoar yakat watna atnin, dawak witing walanibis yayal balna bu kidika duwi kiuna asangpas yakat, bahang kidika yakat witingna pa sulihni as kau yalalahna. 31Ma as kat, walanibis binkauh kidika yaklauwi wirahni barakni yakat kalyulna:
—Mapapangki uman muihbarak kalna, dawak adika sauni pīsni akat muih al as bik diski mayang karak kaldunin, nining yayamwa kaput; 32kaput bahang wasak īdang dawak witing karak malangwang, kaput yamdi witing walanibis dunin.
33Kidika puknita papangnina yakat wain bayayahna, dawak walanibis yal muihbarak kidika tatuna papangni karak kalalangna; kaunah papangni kidika isning aiwasdai walanibis yal witing karak kalangna, dawak yaklauna kidika bik. 34Kidika kaupak ma ūk payahwak, wirahni barakni kidika yaklauwi wirahni bin yakat kalyulna:
—Talah, pukta yang mapapangki karak alangwanayang, kaput bahang adika puknita watdi wasak īdarang, bahang kaput laih witing karak alangwama; kaput laih mayang albupak witing walanibis dudarang.
35Kidika puknita watwi papangnina yakat wain kalalana, dawak walanibis yal binkauh kidika papangni karak kalangna; kaunah Lot witing isning aiwasdai mampat kalangwi dawak mampat yaklauna kidika bik. 36Kaput laih Lot walanibis yayal bupak muihkaruk dadana, witingna papangnina kaupak. 37Walanibis yal barakni kidika muihbin as duna, dawak ayangni pakna Moab,#19.37 Hibru kau, Moab kidika yulni tanka laih papangni saitni yakat, sihm kapat paruh yulwi. bahang kidika laih warmani Moab muihni balna kidika. 38Dawak walanibis binkauh kidika bik walanibis as duna, dawak ayangni pakna Ben-amí,#19.38 Hibru kau, Ben-amí, tanka laih, tawanki walanibis. witing kuduh warmani amonita balna papangnina.
Currently Selected:
Génesis 19: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
