Génesis 7
7
Was ilna
1Usnit kat Dawan yaklauwi Noé yakat kalyulna: “Adika mani muihni balna pasyakat, man manah yang kulnik lani yamtaman. Kaput bahang kuring nuhni yakat awah man wanaihma balna bitik karak. 2Tinglau balna dawak asangpas dini balna pasyak maisihni dis balna kidika ahalmuk tiaskaubu dawak yayal tiaskaubu dutah, kaunah maisihni kulna balna kidika laih almuk as dawak yal as dutah. 3Di lawani balna satni paskaupak tiaskaubu dutah, alnimuk kauna, kaput laih dini balna kidika diswas atnin sau akat, 4kat man tiaskaubu laihwakat kalating waslauwarangki ma 40, dawak pukta 40. ¡Sau akaupak ustik yakki ki sangnika duwa balna bitik, yang lawik yamnayang balna kidika!” 5Dawak Dawan Noé yak ais yamnin kalyulna kidika bitik yamna.
6Sau yak was nuhni āna mani, Noé laih kurih 600 duwa dai. 7Dawak Noé kuring nuhni yakat kana#Mt 24:38-39; Lc 17:27. yalni, unisah balna karak was nuhni kaiwa kidika kaupak nanitna daknin yulni. 8Tinglau dawak asangpas dini balna bik maisihni dis dawak maisihni balna, lawanina kau yaklauwa balna, dawak pasnina kau murwa balna bitik, 9Noé karak kalpakwi kuring nuhni yakat kakana, wanaihni karak bu, alnimuk dawak yalni karak, Papang yaklauwi yulna dai kaput.
10Ma tiaskaubu laihna yakat was nuhni kidika sau minit yakat banghilna. 11Kidika laih waiku bu kidika kaupak ma 17 dai. Kaput laih Noé kurih 600 duwa dai. Kidika mani palni kuma nuhni dinit kau burhwi kalahwa kidika tutna dai, dawak makau kisang dūrni bik apahna dai.#2 Pi 3:6. 12Madah 40 pukta 40 sau minit yak was kidika launa. 13Kidika mani yak Noé walanbis balna ahal Sem, Cam, dawi Jafet, maridni karak, dawak unisah yayal balna kidika karak kuring nuhni yak kakana. 14Witingna karak kakana tinglau balna, asang pas dini balna satni kidika bitik, pasnina kau mumurwa balna dawak uhu balna bik. 15Tinglau balna, dawak asangpas dini balna bitik Noé karak kuring nuhni yakat kakana, di balna bu libit. 16Alnimuk as dawak yalni as kakana, di satni balna bitik kaupak, Dawan yaklau Noé yakat pakna dai kaput, usnit kat Papang yaklauwi kuring nuhni dūrni kidika putna dai.
17Ma 40 waslauna. Was kidika bang-ilwa kat, kuring nuhni kidika dulauwak, was minit yakat uruhnna. 18Was kidika baisa bang-ilna, kaunah kuring nuhni kidika laih ban uruhnwa witdai. 19Was kidika nuhni palni bang-ilna bahang sau kat asang tanit nunuhni balna kidika bitik laih saramna dai; 20asang balna kidika saramna usnit kat, baisa minit yakat metro 7 ilna dai. 21Kaput laih sau akat muih balna yalalahwa dai kidika bitik dadauna, di lawani balna bik tinglau balna, dawak asangpas dini balna, dawak pasnina kau mumurwa balna bik, sau yakat. 22Sau yakat di bangdai kidika bitik, sangnika duwa balna dai kidika, yak-urupdinin sip balna dai kidika bitik dadauna. 23Noé dawak kuring nuhni paskau bangdai kidika manah sangka yaklalana; ūk balna laih bitik dismukna: muih, tinglau balna, uhu balna, asangpas dini pasnina kau mumurwa balna bik; 24kat sau was āna kidika laih ma 150 duwa sakdai bahang.
Currently Selected:
Génesis 7: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
