Mark 11
11
Jisas Jerusalén yakat kana kidika
(Mt 21:1-11; Lk 19:28-40; Jn 12:12-19)
1Jerusalén kaupak ulah bangkat, Betfagé dawak Betania tawanni balna yakat, Olib asangni yaihnit yakat, Jisas witing disainipil balna kaupak bu yakwi sihna, 2diyulna:
—Manna tawan muhnitkau tawan bin as pakkidika yakat yawanauh, kidika yakat yawa āwanama mani kat biriku as sitna sakkat talnama, kidika laih baisa muih as bik kilwas karangki. Uluhta duaita yatanauh. 3Dawak muih as manayulwarang ais yulni kaput yamtamanah, bahang manna kalyultanama Dawan nid kalahwi, kaunah tihndawak watwi duai'mawarang.
4Bahang uina, dawak biriku kidika ta yakat sisitna sakkat tatalna dūr as yaihnit yakat, dawak ululuhna.
5Kidika yakat muih buas bangdai kidika balna yaklau diyulwi dakakana:
—¿Manna ais yamtamanah? ¿Ais yulni biriku kidika uluhtamanah?
6Witingna laih Jisas yaklau diyulna dai kidika kaput nangnitlalana; dawak didamumukwakat uina dai. 7Bahang witingna laih asninana kidika biriku minityakat ilwi Jisas yakat uiwi kalalana. Dawak Jisas laih kilna dai. 8Muih mahni kidika asninana balna ta yakat ririna, dawak ūk balna kidika laih di dahnin pāni kaupak panting babahna dai kidika lalakna dai. 9Dawak tatuna yakat uiwa balna kidika dawak witni kau uiwa balna kidika bik sihm kapat sarahwi aput yuyulwadai:
—¡Alasnina yaksihni!#11.9 Matyu 21:9 yakat talah. ¡Dawan ayangni duwi kaiwa kidika laih ayangni nuhni yamnaki!#Sal 118:25-26. 10¡King kāwa sauni kaiwa kidika laih ayangni nuhni yamnaki, mapapangki Devid king kāwa sauni! ¡Makau yakat alasnina yaksihni yamna karang!
11Jisas laih Jerusalén yakat kawi makat yulnin ūni yakat kiuna. Pa balna bitik yakat talna dawak usnit kat Betania yakat kiunadai disainipil balna karak, kat uman ma ulah dai kidika yulni.
Jisas yaklau ani damni pananiminik yakwas yakat la kaltuhna kidika
(Mt 21:18-19)
12Kidika payahwakat, Betania kaupak kalahwi uiwabang kat, Jisas yakat yuh kaldana dai. 13Nai kaupak ani damni panan as basni duwa kat talna dawak yaihnit yakat kiwi talna minik bik duwapa, kaunah basni manah duwa kat talna, kat miniknin mani awasdai kidika yulni. 14Bahang Jisas yaklau ani damni panan yakat kalyulna:
—¡Muih as bik wat man minik yakma kaupak kaswas karang!
Disainipil balna laih kaldakakana dai.
Jisas yaklau makat yulnin ūnimaisihni dis yamna kidika
(Mt 21:12-17; Lk 19:45-48; Jn 2:13-22)
15Jerusalén yakat uiwi kakana usnit kat, Jisas laih makat yulnin ūni yakat kanadai dawak kidika kaupak kangwi yakna dai muih balna di wauhwi bakanwabangdai kidika dawak uiwi di bakanwabangdai kidika yakat bik. Lalah sins yayamwa tinibil balna kidika dawak buhtuku ilwi bakakanwa dai kidika tinibil balna bik abukmukna dai; 16dawak muih as bik dawak makat yulnin ūni yaihnit munah di duwi bayakwasdai. 17Dawak sumalwi aput yulna:
—Ulna balna yakat aput yulwi: ‘Yang ūki kidika laih makat yulnin ūni karang nisan balna bitik niningna yakat’,#Is 56:7. kaunah manna laih kidika yakat di malyang balna panina sulihni as yamnamana.#Jr 7:11.
18Kidika dakawi, sumalyang balna taninatuna balna kidika dawak la sumalniyang balna kidika karak kalpakwi yulbauwi tatalna amput dawi Jisas īna atnin kidika, kat yamanina duduwadai, kat muih balna bitik laih yamni tatalna dai witing sumalwa kidika. 19Kaunah puklakwa yakat, Jisas disainipil balna karak tawan nuhni yakaupak kalalahna dai.
Ani damni minik yakwas kidika kusuna
(Mt 21:20-22)
20Payahwakat mapiris kat ani damni panan yaihnit munah bayayakna, dawak rikni kaupak buhlana kat tatalna dai. 21Bahang Pita witing, di kalahna kidika isningkatwakat, Jisas yakat kalyulna:
—Sumalyang, talah, ani damni panan la kaltuhnaman dai kidika buhlana.
22Jisas yaklau nangnitlana:
—Manna Papang yakat rahm kulnin lani dutanauh. 23Barangni manayultayang muih as yaklau adika asangni yakat aput kalyulwarangkat: ‘¡Kidika kaupak alahwa kuma yakat āyawah!’, dawak witing kulwinah yamwas ki kaunah witing ais yulwa kidika rahm kaput kalahwangti kulwi, bahang rahm kaput kalahwarang ki.#Mt 17:20; 1 Kor 13:2. 24Kidika bahang manna yakat manayultayang, manna mamatna yulta ais ais yultanama kidika, uman dunamana kapat kultanauh, dawak dunamana karang. 25Dawak manna mamatna yultamana yakat, muih ūk balna niningna yakat ais dutamana kat datanang diswang, kaput laih manna Papangmana kisang kau sakkidika yaklau dutmana dawak diswarang.#11.25 Tingkau ulna balna buas kidika laih aput minitlalakwi S.d. 26: Kaunah manna muih dutni kidika datanangkat diswas laih, Papangmana kisang kau sakkidika bik manna dutmana dawak diswas karangki.,#Mt 6:14-15.
Jisas parasni kidika
(Mt 21:23-27; Lk 20:1-8)
27Kidika usnit kat Jerusalén yakat nawatwi uina dai. Jisas witing makat yulnin ūni yakat lik kat, sumalyang balna taninatuna balna, la sumalniyang balna dawak muihbararak balna kauna witing yaihnit yakat uina, 28dawak aput kalyulwi dakakana:
—¿Ais parasni kau duta aput yamtamahn? ¿Wais yaklau parasni manayah kaput yamna atnam?
29-30Jisas yaklau nangnitnalana:
—Yang bik manna yakat yulwi dakanin as manayultik dakaki ki: ¿Wais yaklau Jan kidika sihnayah muih balna yakat was utuhna atnin, Papang yaklau kidik awaskat muih balna yaklau sisihnayah? Nangkitlatanauh. Manna lawa yayultanama kat, yang lawik manayulki ki ais parasni kau dutik adika yamtayang kidika.
31Witingna laih biri biri yulwi dakakana: “Papang sihna atdarang kat, aput yulwarang ki: ‘Bahang, ¿ampadawakat rahm kalkultasmana daih?’ 32¿Dawak amput muih balna yaklau sisihna atdarang yah? ...” Witingna laih muih balna yakat yamanina duduwadai, bahang witingna bitik rahm kukulna dai Jan laih rahm Papang yulni yulwadai kidika. 33Kaput bahang Jisas yakat nangnitlalana:
—Yangna amanglatasyangna.
Bahang Jisas yaklau nangnitnalana:
—Bahang yang bik sip manayultasyang ais parasni kau dutik yamtayangpa.
Currently Selected:
Mark 11: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
