Lukas 10
10
Yesus nen ap inebe 70 paga inayonggo ĘĽbiluk laĘĽbiyasike wene
1Esigit diluk yogisasi lagikesik, ninewe Endaganggok nen ap inebe 70 paga mikogo ĘĽbiyalok nen, at enggaerek yi ai ndi ai o unggul dombok lagaluk akla ambasike paga dombok, it eti ndak alebagik inebe mberendek dombokigik laĘĽbiyasike. 2LaĘĽbiyasi dogolik, men yogisasike,
“Enggen yugu, ebe dogalegat arat korle agasik werek mendeat, akoni mbalusak mende inebe mbererlagat o. Eti paga, ap eyabu Indewerek mende etnogo nen akoni mbalusak mende amberek laʼbiyawak nen, nggino yogoko dogono o,” yiluk yogisalok nen,
3“Kit lani o. An nen kit kinobabut domba obabut kak mende it akoni inobabut yengge kelo obabut weyak mende werekma inakla kiyakogo laʼbinagagin o. 4Nen, kit, uang dompet akla yukarlek mende inom, yi mende ndi mende wokisasinem su yukarlogo wolok lausak mende inom, sepatu omanggi su yukarlogo inom, mondok wolok lagup o. Nen, kolagarlem lago dogolik akoni amberek keyagi warinabiluk nen, kinom erogat dogogup o. 5Nen, akoni inaguma unggisi dogolik,
Kinebe yoma Allah nen panot kinabuwak yiluk, keyagi warinabik unggisi dogono o. 6Keyagi warinabik unggumo inobabut panorinabusak mende werekma unggiluk kalok, Allah nen panorinabiginat o. It amberek inobabut esigit diluk mende dek kalok, kinane owak suguluk waganggo dogono o. 7It akoni kit wokinabusak mende werekma unggiluk kalok etomaat kinom dogono o. It akoni yabu waganggonem ininggi onggo yi mende ndi mende wogisaligogiat o, yiluk, it nen yi mende ndi mende nowagaluk wokisasi kalok, eti at nonggo dogono. O ya kotnokogo lagik, nda kotnokogo lagik, noko dogogup o. 8O unggul omanggila unggisinem, it nen keyagi warogo wokinatluk, kimbiri wokisagun mende etiat nonggo dogono o. 9O unggul etoma dogolik it amberek u warek kalok, kit nen kagarinako dogolik,
Allah nen apma ĘĽbiyagin etnogo arat kinoba panggok yi waga o, yiluk, yogisasi dogono. 10Mende, o unggul omanggi kit unggugunmo etoma nen keyagi warogo wokinakidek kalok, kinebe dukiluk kolagarlem lalok nen, men yino,
11Nit kit kinaguma dogolik agat abubulengge niniyok oba denggelaga mende kit weyak yiluk kiniloba korogo ĘĽbogo yi. Kinakla nen,
Allah apma ʼbinanigin etnogo arat ninoba panggok yi waga mende, yiluk panorogo didisi dogono yiluk, yogisano. 12Yabunggane ilugun oba, it akoni o Sodom mende etoma Allah nen wene inoba ʼbiluk weyagarinabigin mende eti ʼbugurlagat negen o. Mende, o unggul kit wokinabugun dekma etoma Allah nen wene anggin mende inoba ʼbiluk nggokogo weyagarinabigin o, yiluk, yokisaligogo o,” yiluk yogisasike.
Yesus nen akoni wenemuk mberisasike wene
(Matius 11:20-24)
13“Kit akoni o Korazim mende inom, o Betsaida mende inom, iya! Kinaʼbuwa! Akoni nen kagasusak dek mende an nen elalinat kiniloba kagako lagi etnogo, o unggul Tirus Sidon etoma kagako dogolepma, it akoni etoma inobabut kwalatluk nen, iniyom mbelabe yikigik, ʼbisi yirigogi kak wul dabulkik, kagako dogolik, weyak kagako laguka mende eti togot diyalok inobabut paganeat kwalatlep mende, kit esigit diluk kagasusak kinaʼit eti paga weyagat kinabigin o! 14Yabunggane o ilugun kurli paga Allah nen wene inoba ʼbigik nggokik kagasigin etinem, it akoni o unggul Tirus Sidon etoma mende inasigin mendeat, eti ʼbugurlagat o. Nen, kit kak mondok nggokogonat kinasigin o. 15Nen, kit akoni o Kapernaum mende yi kinakla nen,
Allah nen mbogot oba liyaʼbinaniluk nggogot ninabigin, yiluk, kinenggaerek pogorakaligogi a? Mondok dek o. Akoni watlatluk liligogoma etoma wusa ʼbinagagin o,” yiluk yogisasike. 16Esigit diluk yogisalok nen, at agoromi ane waganggo laguka mende yomenogo yogisasi dogolik,
“It akoni kit kinane kolugun kalok, an naneat kolugun o. Nen, ninaʼit yiluk togot dinagasi kalok, anat togot danugun o. Nen, an togot danggo kalok, an laʼbani wagike mende etnogo ebeat togot diyagun o,” yiluk esigit diluk yogisalok nen, laʼbiyasike.
It ap inebe 70 yomenogo iniyogoba waguka wene
17Yabunggane it ap inebe 70 paga laĘĽbiyasike mende yomenogo inakla arlenggen kalok iniyogoba wagukasik nen, men yogokuka,
“Ninewe! Kugi inobabut weyak mende eti kat kendaga mbalogo yogisasinem, kolko lagaka o,” yiluk yogokukama, 18at Yesus nen,
“Iblis eti o yabok negen mbogot oba nen ʼbigal kiligogo kak, agat oba wusa wagonem nilenggen kasigi o. 19Eti paga, lakani! Warlo mbelal inom, ndune inom, aik mbalinabigogi mende eti, kiniyok nen al debelogo ʼbiyigik, Iblis kinom wim mbalek mende etnogo obatne deget diyigik kagako dogobagik nen yiluk, an nobatne mende wokisigirik indet kinaki o. Indet kinakirikmo, yi mende ndi mende amberek nen weyagat kinabigin mondok dek o. 20Mende, it kugi inobabut weyak mende nen kinane koligogi eti paga kinakla arlenggen kagup o. At te, kinendaga mbogot oba kolal mbalek werek eti pagaat kinakla arlenggen kasi dogono o,” yiluk yogisasike.
At Yesus akla arlenggen kasi dogolik, Allah keyagi wakike wene
(Matius 11:25-27; 13:16-17)
21O etinemat, Allah Agurengge etnogo Yesus akla werekma nogo nen, akla arlenggen kasi dogolik, ombae Allah men yogokike,
“Allah nombae. Mbogot agat indewerek karat o! Wene taʼbokogonat eti, it akoni inakla nggagalek mende inom, yi wene ndi wene inilu mende inom, inilu asunogo yiluk lima ʼbiluk nen, it inobabut elegerlak ngget endago mende kak mende yi arlek, ʼbukakogo yogisegen eti, kat kakla warlok ambegen mendeat yogisegen eti paga, keyagi watkabigogo. Nombae,” yiluk yogokike. 22Esigit diluk yiluk nen, yabunggane akoni yogisasi dogolik,
“An Nombae nen yi mende ndi mende taʼbokogonat an indewerek dogowagaluk woknikike. Allah aʼbut eti ta, yiluk, akoni taʼbokogonat, inonggodek mendeat, an Nombae arligat ilu dogoligogo mende. Nen, an Nombae eti ta, yiluk, akoni taʼbokogonat inonggodek mendeat, aʼbut an narligat nilu dogoligogo mende o. An nenat nakla ambalok, nombae eti, akoni amberek inilu asuwagaluk nane ʼbukakogo yogisaligogo mendeat inilu arigogi o,” yiluk yogisasike. 23Esigit diluk yogisasikesik nen, agoromi ane waganggo laguka mende yomenogo inarligat ndiyokogo wogisek lagikesik, eloke mirlokogo, wogisasikesik men yogisasike,
“Kit kinilenggen arat kiligogi mende yi, kinakla arlenggen kasi dogono. 24It ap Allah wene yogisasi laguka mende inom, nggokndek inendaganggok mende inom inebe dogalegat kit kinilenggen kiligogi mende eti,
Ninilenggen kalep o, yiluk inakla ambasi laguka mendeat, inilenggen kigidek welaguka. Wene kinasuk koligogi mende eti,
Ninasuk kolilep o, yiluk, ambasi laguka mendeat, inasuk kolkidek welagukaat,” yiluk yogisasike.
Ap Samaria mende obabut pano yiluk oba lisogo yogisasike wene
25Wene esigit diluk yogisasikemo nen, yabunggane ap Allah wene kolal mbalek yanggul isasi lagike mende omanggi Yesus aren mbaligiluk oba wagikesik men yogokike,
“Newe. An niluk mondok dogik nen, nobabut ninggit diluk kagako dogik,” yiluk yogokikemo, 26at Yesus nen,
“Wene Allah nen ninasuk wakike wene etnogo kolal ninggit diluk mbalek werek. Ninggit diluk mbalek werekma endaga wenarigogon,” yiluk yogokikemo, 27ap etnogo nen, men yogokike:
“At Musa nen,
Kinendainggen inom, kinobabut inom, kinobatne inom, kinakla inom, omanggiat atluk, ninombae Allah Endaganggok ebe etiat kinendainggen kunik dogono o.
Nen, omanggi,
Kit kinebe kinenggaerek kinebe kinendainggen kunik werek eti kagat, it akoni amberek kinom werek mende, esigit dilugat inebe kinendainggen kunigat dogono o, (Im. 19:18; Ul. 6:5)
yiluk yisikemo, Allah wene kolal mbalek werek,” yiluk yogokike. 28Esigit diluk yogokikemo at Yesus nen,
“Eti morat yegen. Yegen eti mot-morat kagako dogogin kalok, kiluk mondok dogogin o,” yiluk yogokikemo, 29at etnogo akla nen,
“Yesus nen,
Ap eti pano kagarigogo mende,” yiluk ambawagaluk, men yogokike,
“Akoni ninom werek mende inaʼbuwarogo dogusak eti inebe sani?” yiluk yogokikemo, 30at Yesus nen,
“Ap omanggi o Yerusalem nen o Yeriko wusasike. Kolagarlem wusasinem ap ininggi abusak waganik liligogi mende nen, ap etnogo paʼbiluk mondok ndamuk-pamukogo watlasusak ndak-ndak warogo etomaat togot diluk, amende yi mende ndi mende yomenogo korlalok laguka. 31Korlalok lagukasikmo, ap omanggi Allah indewerek mende kolak eti paga wusagaluk wusasike mende, ap etnogo warek werekma ilenggen kasike mende, ap etnogo togot diluk kolak ogalogo mbiyokogonat wusasike. 32At wusasike ndak-ndagat, ap unggulowak endaga Lewi mende omanggi kolak etinggeat wusasi dogolik ap etnogo warek werekma kasike mende, ebe togot diluk kolak ogalogoat mbiyokogo wusasikeat. 33Mende, ap Samaria mende omanggi kolak etingge wusagaluk wusasike mende, ap warek etnogo werekma ilenggen kalok aʼbuwa kasike. 34Aʼbuwa kasikesik korokogo eragalilu lagikesik nen, owado laʼbik-laʼbakogo wakuka mende anggur enggen ambusu inom, minyak ambusu amberek inom, agalumo etnogo obangge wat diluk ogoret yilogo at mende keledai ambot oba liyaʼbiluk nen, o akoni onggo mbalogo noge yiligogoma ʼbi lagikesik nen anggorlem welagike. 35Anggorlem noge yiluk kubengge ap etnogo nen ap ago indewerek mende etnogo uang perak mende mbere wogoko dogolik,
Ap yi anggorlem dogono. Anggorlem dogolik, kat mende yi mende ndi mende wogoko dogogin mende, onggo wokigi yi dek ago kalok, an yabunggane witluk nen onggo wokisigin o, yiluk yogokike,” yiluk Yesus nen ap Allah wene yanggul isasi lagike mende etnogo yogokike. 36Esigit diluk yogokikesik nen,
“It ap yogot waganigogo mende nen ap wakuka mende etnogo, Allah nen akoni kinom werek mende inaʼbuwarogo dogusak yisike etnogo ndak-ndak, ap inebe kenagan eti ta kak nen aʼbuwa kasike ambegen,” yiluk yogokikemo, 37at ap etnogo nen,
“Ap eti warek werekma ap omanggi wagikesik aʼbuwa kasikesik yamak kasike etiat o,” yiluk yogokikemo, at Yesus nen,
“Kat esigit diluk kagarik lano o,” yiluk yogokike.
Yesus nen Maria Marta imbisak yogisasike wene
38Esigit diluk yogotluk nen, yabunggane at Yesus ane waganggo laguka mende yomenogo inom kolagarlem lago dogolik, o unggul omanggi unggisuka kak, at kwe omanggi endaga Marta etnogo nen,
“Yesus an naguma unggi wisuwak,” yiluk yogokikemo unggisike. 39Kwe Marta etnogo agot endaga Maria imbisak werekma unggisikemo, kwe Maria etnogo Yesus apma dogolik ane asuk kolek welagike. 40Mende, at Marta nen,
“Ap kuso wagasikmo,” yiluk iyago set weyak iyakik werakik kagako lagikesik wagikesik nen, Yesus yogoko dogolik,
“Newe. An narligat kak kake kagako dogowagaluk, an nagot yi yamak niyigidek togot dangge yi pano ambegen a? Yamakniya wisuwak nen, yogosin o,” yiluk yogokikemo, 41at Yesus nen,
“Marta, Marta. Kat nen yi mende ndi mende ake eti kendainggen pisogo set weyak kagarigogon kigi. 42Mende, omanggiat mende kagasusak werek mendeat yi mende ndi mende kagarigogon. Kagot Maria yi, wene omanggiat pano mende etiat mikogo ʼbakekesikmo it amberek nen inggimo ndilogo waganusak dek mende ʼbakekesik werek o,” yiluk yogokike.
Currently Selected:
Lukas 10: DNA
Highlight
Share
Copy
Want to have your highlights saved across all your devices? Sign up or sign in
