YOHANET 14
14
Yesùt en, “An o hit logousak oba tegeli legein,” ìlùk wene warisasike wene
1At Yesùt en wene atì'nogo yogoisasikesik, hobuk he, aike mel yogoisasike:
“Nagainapùrì. Hit hina'la nen he,
Eige, ìlùk hinalabut hìrogo logogùp o. Hinetaùken Ala ba hìpìrethìgìk, an noba hìpìrethìgìk, ìkì logoino. 2An nopase aua atoma, o hit logousak oba obùlùk apik selek werek o. Atì'nogo lek logoilepma re, an o hit logousak oba tegeli legein, ìlùk wene wathisele lek o. 3An o atom arat lìlìk he, hit hinaua arat tegelogo hùlùk, an logoginmo atoma ninom logouok en ìlùk, napotkweat wokhinabi wesigin o. 4Nen, o an legeinmo atì, kwe ebe hit hineluat o,” ìlùk yogoisasikomo, 5at Tomat en he, mel yogosike:
“Noe. O hat legeinmo atì ninokotma re, kwe atì nìkì'nogo nen ninelu asusak o,” ìlùk yogosikomo re, 6at Yesùt en he, mel yogosike:
“Kwe mel, ebe wene mel, inelugurinapìrek mel, atì an nebeat o. At sa nen an noba wagì'lek halok, nopase were'ma pìkìt kusak motok mea o,” ìlùk yogosikesik, 7it obogat yogoisìkì logolìk he:
“Hit an nebe hinelu agep atì re, an nopase hinelu asiginat o. Hinelu asigin atì re, hùlì yogotak hùlì nen, at ebe hinelu agìk, hineileken hìgìk, arat hìkì lagep o,” ìlùk yogoisìkì lagaikomo, 8at Pilipùt en he, mel yogosike:
“Noe. Nineileken hìlìk ninetaùken hapuk hogo logouagalùk, hat hopase atì ebe yakùlnisan o,” ìlùk yogosikomo, 9at Yesùt en he, mel yogosike:
“Pilipùt nagot e. An o hageat a'loma nenat ninom welago meneat he, hat en an nebe hùthanì'lek welagenma hìgì, ì a? At sa nen an eileken niike atì re, an nopaseat eileken hike o. Atì'nogo meneat he, hat en,
Hopase atì yakùlnisan o, ìlùk egen atì nìkì'nogo nen egen. 10An nen nopase neperak hutik, nen, nopase nen an neperak hutik, welagorek atì, hat hùthìkì lagen lek a?” ìlùk yogosikesik he, it obogat yogoisìkì logolìk,
“An nen wene yogohisìgìrek atì, an na'la nen kagalogo yogohisìgìrek hùk. Lek o. We, an nepase neperak hutik logolìk, an nane ba nen ìgìk, neki ba nen hagatìk, ìgìrek mene atì, at okawerek enat hagarì'logo o. 11An nenat nopase neperak hutik, nen, nopase nen an neperak hutik, welagorek ìgì atì, eberogoat ìlùk, hit hùtheni o. Atì hùthasak mea halok he, an hagatì lagì mene atì hineileken hìlìk, hùthanini o. 12At sa nen etaùken an noba hìpìrethike halok he, an hagatì lagì mene atì, at en hagatì logoginat o. An hagatì lagì atì re, hamùlùgat negen meneat he, an nopase oba legein atì nen he, at sa nen etaùken an noba hìpìrìk welagarek mene atì nen ebenagei'mo hùkorogo hagatì logogin o, ìlùk nane eberogoat yogohisìgì. 13Nen, at sa nen, yì mene tì mene an netage palogo Ala kìno yogote halok he, an aput en hagatenem, it apùnì nen nopase hogorasuagalùk, an nen hagasigin o. 14Atì'nogo hagasigin atì nen he, hit en yì mene tì mene an netage palogo kìno yogonetì logoino. Atì'nogo kìno yogonetep halok he, an nen hagasigin o,” ìlùk wene warisasike.
Yesùt en, “Ala Areagùn wokhisegein,” ìlùk abok yogoisasike wene
15At Yesùt en wene atì'nogo warisasikesik he, wene aike mel yogoisasike:
“Hit an hinetaùken hutik halok he, an nen hit yì'nogo hagatì logoino, tì'nogo hagatì logoino, ìlùk yogohisìkì lagì mene atì hagatì logogun o. 16-17Atì'nogo hagatenem, hit lebethisìkì logolìk, hinom motok logouageip en ìlùk, an nen nopase kìno yogosumo, at en ap aike pelakhisa wesigin o. At atì ebe re, Ala Areagùn ebe wene yogohisìkì logogin mene. Atì'nogo hinoba pelakhisa wesumo, it apùnì kweangma mene nen, at atì ebe inokorat. Nen, ebe ineileken hogoin legat, atì nen he, ebe wanusak mea o. Atì'nogo meneat he, hit enek he, at ebe hinom logolìk, hina'la motok logogin atì nen he, at ebe hinelu logogun o. 18An hogo re, hit hinebe yekerùgì suarek mene negen harakhikalùk legein lek o. We, hobuk napotkwe hisa wesiginat o. 19Nineki hamùlùgat logopik he, apùnì kweangma mene ineileken neogoin motok lek meneat he, hit enek he, an nelugat logogin, nen hit hobuk hinelugat logogun atì nen he, hineileken neogoin o. 20Atì'nogo hinoileken neogoin atì sat, an nopase neperak hutik welago, nen, hit an ninom hutik, nen, an hit ninom hutik welago mene atì, hinelu asigin o. 21At sa nen, an nen, yì'nogo hagatì logoino, tì'nogo hagatì logoino, ìlùk yogohisìgì mene atì, nane hologo hagaterek halok, an nebe awaken hutik mene at atìat o. Nen, nopase nen at atì ataùken hutigat. Nen, an nen at atì netaùken hutik logolìk, nebe hùthanuagalùk yakùlesigin o,” ìlùk yogoisasikomo, 22ap Yùrat Isikariot a'nogo hùk. At he, Yùrat hunigat mene aike nen he, mel yogosike:
“Noe. Hat hebe hùthagauagalùk, apùnì obogat yakùlisìgì'lek he, nit enek yakùlnisegein atì nenahalok en,” ìlùk yogotì lagaikomo, 23at Yesùt en he, mel yogoisasike:
“At sa nen an nebe etaùken hutik halok he, nane hologo hagatì logogin o. Nane hologo hagatì logoumo, nopase nen at atì etaùken hutik logogin o. Atì'nogo logolìk, an nopase neperak ap atì oba wìrìk, at ninom motok logogun o. 24Nen, at sa nen, an etaùken hutik lek halok he, an nane hologo hagaterek lek atìat o. An nane hit holhì lagep atì re, an nane mene hùk. We, an nopase lakhani wagaike mene a'nogo ane o.
25-26“Wene atì an nebe hit ninom logolìk, yogohisìkì lagì. Meneat he, an nopase nen at Areagùn hit lebethisìkì logouagalùk, an netage ba pelakhisa wesumo re, at en yì wene tì wene obogat yakùlhisìgìk, an nen yogohisìkì lagì mene atì obogat hina'la ebethisìgìk, ìkì logogin o. 27Halok, hit hinetaùken hapuk hogo logouagalùk an netaùken hapuk hogo welagìrek mene wokhisalùk legein o. Atì re, apùnì kweangma mene nen wogisagarek atì hak wokhisegein lek atì nen he, hinalabut hìtì logolìk hinayùk agùp o. 28An legein meneat he, hobuk napotkwe hinoba wesigin o, ìlùk yogohisìgì a'nogo arat hinasuk holhep akìgì. An nebe hinetaùken hutik logoilepma re, an nopase ebe esin, nen an nebe mea atì nen he, an nopase oba legein atì hesik hina'la hai hakelep o. 29Wene obogat yogohisìgì atì ebe haga'laga halok, hit en he,
Wene yogonisasike a'nogo arat haga'laga yì, ìùk hùthìlìk, hinetaùken an noba hìpìrethouageip ìlùk, wene atì ebe oan haga'lagì'lek werek kolek, abok tak yogohisìgì o. 30Apùnì kweangma mene inoe kain a'nogo ebe wìrì'logo atì nen he, an wene apigat yogohisegein lek o. At atì wesigin meneat he, an at eki ba welagì lek o. 31Atì'nogo meneat he, an nopase netaùken hutik welagìrek atì apùnì kweangma mene inelu asuagalùk, an nopase nen nasuk warogo yogoneterek meneat hagatì lagì o,” ìlùk yogoisasikesik he,
“Nagoromì. Lùok en mela'ni o,” ìlùk yogoisasike.
Currently Selected:
YOHANET 14: LAIDNI
Highlight
Share
Copy
Want to have your highlights saved across all your devices? Sign up or sign in
