YOHANET 7
7
Yesùt o Yerusalem pesta hagatenem kamo isikesik en pisike wene
1Wene atì'nogo arat yogoisalùk he, it ap kaintek Yahuri mene nen, Yesùt ebe wasuogolùk weim abok ìkì lagaukwa atì nen he, at ebe o Yurea pìlìk nìkì logou abìt en he, a Kalilea tokwe atoma nìkì lagaike. 2Atì'nogo nìkì lagaike atem sat he, it apùnì Yahuri mene o holoat o sabu wùthìlìk welagaukwa mene ina'la eberogo, pesta isago nasal: oba arat hakok i wagaike. 3 3-5Atì'nogo hakok i wagajkomo logolìk, at Yesùt okawerek agaiya'lak mono hogo re, inetaùken at oba hìpìrethìgì'lek welagaukwa atì non he, met yogosukwa:
“Hat hagoromì hane wìlì'lùgì mane amanogo nen, hat hagatetek mane hagatenem ineileken heoak on, o yoma hebùlùk a Yurea pino. Ap metagewerek asuogolùk akìkì logolìk halok he, hinagasogo hagatarek lek o. Halok he, hat hagatì lagen atì, apùnì kweangma mane inebe obogat inelu asuagalùk weinam hogo hagasi pino,” ìlùk yogosukwa. 6Atì'nogo yogosukwama, at Yesùt en he, mel yogoisasike:
“O ninhùp-nanhùp hit an hagasusak he, elok werek mane re, an nen hagasusak oba hakok i wagì'lek oan werek o. 7It apùnì kweangma mene nen hit halok he, inabìt motok hagathinabì'lùgì lek meneat he, an nen,
It hagatarek atì weak motok, ìlùk ìgìrek atì nen he, anat inabìt motok haga'nabì'lùgì o,” ìlùk yogoisasikesik, 8aike mel yogoisasike:
“An hagasusak oba oan werek atì nen he, pesta hagasugun atì hagatenem yogotak yaat pigin lek. We, hit enek pini o,” 9ìlùk yogoisasikesik, at o Kalilea atoma kamo isike.
Yesùt pesta o sabu wùrogo hagatenem pisikesik hagasike wene
10Atì'nogo kamo isikomo, at agaiya'lak amanogo nek pesta a'nogo hagatenem arat pisukwasi'mo nen, at Yesùt hobuk apùnì inokot werek kolek hinagasogo pisike. 11Atoma pisikesik werek kolek, it ap kaintek Yahuri mene pesta hagatenem logolìk Yesùt ebe herasuogolùk hinok wanhì logolìk he,
“At ebe koma werek,” ìlùk isukwama, 12it apùnì apik amanogo inasuk holhukwasik he, inane sami-samok ìkì logolìk, it aike nen he,
“At he, hano,” ikenem he, it aike nen he,
“Lek o. At he, weak. Apùnì lalinabì'logo,” ìlùk isukwa. 13Atì'nogo isukwa meneat he, it ap kaintek Yahuri mene inayùk en he, inane weinam hogo Yesùt abok ìgì'lek. We sami-samok enek isukwa atì.
14 Pesta a'nogo nìlìk laga kolek heise'ma Yesùt Ala awì wùrì'mo ki lìlìk, wene yakùlisìkì lagaike.
15Yakùlisikenem he, it ap kaintek Yahuri mene nen he, mel isukwa:
“Egi! Nayùk e. Ap yì sekola hagatì'lek meneat he, yì wene tì wene yoma nìkì'nogo nen elu aga akegep,” ìlùk isukwama, 16at Yesùt en he, mel yogoisasike;
“An nen wene yakùlhisìkì lagì atì, an na'la nen kagalogo yakùlhisìkì lagì lek meneat he, at an lakhani wagaike mene a'nogo nen yogoneto kolek yakùlhisìkì lagì o. 17Sa nen Ala a'la akikerek mene higit hogo hagasusak walok halok, an nen wene yakùlisìkì lagì atì,
Ala nen yakùleto kolek ìlì'logo, ìgìk,
Okawerek a'la nen kagalogo ìlì'logo, ìgìk, enagat hìlìk elu asiginat o. 18Halok he, sa nen wene okawerek a'la nen kagalogo ikerek atì, apùnì nen hogorasuagalùk ikerek o. Meneat he, sa nen, at lakhei wagaike mene hogorasuagalùk ikerek halok he, apeliak ikerek motok lek o. We, eberogoat ikerek. 19Nen, wene Ala nen ninasuk wasike wene atì, Musa nen helal waganogo wokhisasike lek nogo? At enat wokhisasike akìgì. Meneat he, ap hit mene aike nen, wene atì higit hogo hagatì'lek logolìk an noasuogolùk weim abok ìkì lagep atì nenahalok,” ìlùk yogoisasikomo, 20it apùnì apik amanogo nen he, mel yogosukwa:
“A! Hat mokareke oabùt weak mene ha'la kikesik sìnì'nùk agatik ìkì lagen a? Sa nen hoasigìlùk ìlì'logo nen ìkì lagen,” ìlùk yogosukwama, 21at Yesùt en mel yogoisasike:
“An nen he, nineki sabìt oba Ala hesik welegat logolìk elalinat omake hesik hagatì mene re, hit obogat en he,
Egi! ìlùk hinayùk aga atì. 22Mene re, hit hinagainapùrì inekalima mene inogat palinapesep atì re, ero at Musa hùk. Lek o. Ero Musa ebe oan ta'lagì'lek werek kolek ninopalak en palinapì lagaukwa meneat o. Atì nen, Musa nen atì'nogo palinabusak ìlùk yogohisasikomo, hinekì sabìt oba Ala hesik welegat logolìk palinapesep atì. 23Nen, wene Ala nen ninasuk wasike wene at Musa nen wokhisasike atì sagalinogo ìlùk, ineki sabìt oba Ala hesik welegat logolìk inekalìma mene inogat palinapesep meneat he, an nen nineki sabìt oba Ala hesik welegat logolìk, ap aike ebe motok hano hagatì meneat he, hit en nenahalok wena'netì lagep. 24Wane ebe sekek hogo hinokot meneat he, we wene weinam mene nek hinelu logolìk, apùnì aike ùkùm inoba housak lek o. Wene sekek hogo hinelu arìk en, weak hagatarek higit hogoat ùkùm inoba hìkì logoino o,” ìlùk yogoigasike.
“At Yesùt ebe ap ero kì mene wagaike,” ìlùk isukwa wene
25At Yesùt en wene atì'nogo yogoisiko were'ma, it apùnì o Yerusalem mene inebe heta nen mel ìkì lagaukwa:
“Ap wasuogolùk aweim kabelì'lùgì a'nogo, ebe arì lek nogo? Ebe arìat o. 26Meneat he, ebe lakhani! Nayùk e. Ayù'legat logolìk, wene yogonisikenem, it en wene oko yogotì'legat kamo ìlì'lùgì yì. It ap ninogogì kaintek yoma ina'la nen he,
Ap yì nit apùnì telninabuagalùk Ala nen lakhei wesigin, ìlùk isike a'nogo ebe arìat, ìlùk ina'la akagasik en ìlì'lùgì he a. 27Atì'nogo meneat he, nit apùnì telninabuagalùk Ala nen lakhei wesigin isike a'nogo ebe waga halok, ero ka nen waga he, apùnì obogat inokot logogun meneat he, ap yì nek he,
Ebe ap ero atoma mene, ìlùk nineluat o,” ìlùk ìkì lagaukwa.
28Atì'nogo ìkì lagaukwama, at Yesùt Ala awì wùrì'mo wene re, ane hùkorogo mel yogoisasike:
“An nebe mel, nebe o atoma nen wagagi mel, hit hinelu nogo? An wagagi atì re, an nabusak na'la nen kagalogo wagagi lek o. We, at ane eberogoat enek ikerek mene a'nogo nenat lakhani wagaike meneat he, at ebe hit hinokot o. 29Atì'nogo meneat he, an enek he, at enat lakhani wagaikomo, o at were'ma atoma nenat wagagi atì nen he, an at ebe nelu o,” ìlùk yogoisìkì lagaikomo, 30it en Yesùt ebe hakhouogolùk isukwa meneat he, at ebe hakhousak oba higit asi wagì'lek atì nen he, ebe hakhìgì'lek kamo isukwa. 31It aike nen hakhouogolùk ìkì lagaukwa meneat he, it apùnì apik amanogo inebe heta logolegat inetaùken Yesùt oba hìpìrethesukwasik mel isukwa:
“Ap arì elalin mene hagate re, mea akegep? Nen, apùnì telninabuagalùk Ala nen lakhei wesigin isike a'nogo wìrìk he, ebe hùthoagalùk elalin mene hùkoat hagasigin nogo? Lek o,” ìlùk isukwa.
Yesùt ebe hakhouogolùk isukwa wene
32Atì'nogo ìkì logolìk, it apùnì apik amanogo inane samisamok Yesùt abok ikenem, it ap Parisi mene inasuk holhukwasik he, it ap Ala esewerek inogogì kaintek inom en ap Ala awì wùrìk serogo welagaikarek mene aike nen Yesùt ebe hakhouagalùk wene warisasukwa. 33Atì'nogo iko kolegat, at Yesùt en mel yogoisasike:
“An we, elama hesik neki hamùlùgat ninom logopik he, at lakhani wagaike mene a'nogo oba napotkwe arat legein o. 34An o atoma lìlìk were'ma, hit en an hera'nabìk nìkì logogun meneat he, hit o an logoginmo atoma wesusak motok mea atì nen, an ninom apì asugun lek o,” ìlùk, yogoisìkì lagaikomo, 35it ap Yahuri inogogì kaintek amanogo nen, it-it ìkì logolìk he, mel isukwa:
“At yì o koma lìlìk were'ma, nit at herarik lìlìk ninom apì asugun lek en yogonisike akegep. Ap nit mene o pulelogo apùnì Yunani mene were'ma inoba lagaukwasik were'ma inoba lìlìk, apùnì Yunani mene wene yakùlisìkì logoigìlùk ike akegep a? 36At en yogonisìkì logolìk,
Hit an nebe hera'nabìk nìkì logogun meneat he, an ninom apì asugun lek o. Nen, hit o an logoginmo atoma wesusak motok mea o, ìlùk yogonisike atì re, at a'la nìkì'nogo akikesik en yogonisike akegep,” ìlùk ìkì lagaukwa.
Yesùt en apùnì inelugurinaperek mene hesik yogoisasike wene
37Wene atì'nogo isukwasik oba nen, pesta a'nogo elùgùn kobok nikenem, Yesùt ebe melagaikesik, ane hùkorogo mel Yogoisasike:
“Sa nen i nele halok, an noba na wesusak o. 38Nen, sa nen etaùken an noba hìpìrethike halok he, i inelugurinaperek mene at a'la nen elesi huluk-huluk palogo wùlìpì logogin o, ìlùk Ala ane helal waganek oba isukwa hagat haga'lasigin o,” ìlùk, 39wene atì'nogo yogoisasike atì re, apùnì inetaùken at oba hìpìrethagarek mene hùgì inebe lopok Ala Areagùn wogisegein, ìlùk abok isike meneat he, atem sat, at Yesùt ebe hogorato kolek lagasike a'nogo oan lagagì'lek nogo nen he, Ala Areagùn oan pelabi wagì'lek werek kolek isike.
40Wene atì'nogo yogoisikenem, apùnì apik amanogo inasuk holhukwasik, it aike nen he, mel isukwa:
“Ap yì re, ap aike Ala ane yogonisa wesigin nen, serogo welagorek a'nogoat o,” ìlùk ikenem he, 41it aike nen he,
“Lek o. Apùnì telninabuagaluk Ala nen lakhei wesigin isike a'nogoat o,” ìlùk isukwa meneat he, it aike nen he, mel isukwa:
“Apùnì telninabuagalùk Ala nen lakhei wesigin isike a'nogo, o Kalilea nen elok wesusak nogo? Mea o. 42Apùnì telninabigin mene Ala nen lakhei wesigin isike mene atì re, ap Taùt en tagokwe mene, at Taùt okawerek awì eroma welagaike ba, o Pe'lehem atoma ta'lasigin, ìlùk Ala ane ba helal waganogo hesukwama werek a'nogo lek?” 43Ìlùk atì'nogo ìlìk laga lagaukwasik, elùgùn oba re, apùnì apik amanogo Yesùt hesik inane sagalogo inebe mìkìlhukwa. 44Atì'nogo mìkìlhukwasik, it aike nen Yesùt ebe hakhouogolùk isukwa meneat he, hakhìgì'lek kamo isukwa.
Ap Yahuri mene inogogi kaintek inetaùken Yesùt oba hìpìrethìgì'lek hagasukwa wene
45Atì'nogo kamo isukwasik werek kolek, it ap Ala awì wùrìk serogo welagaukwa mene nen Yesùt ebe hakhouagalùk wene warisasukwa mene amanogo inapotkwe it ap Ala esewerek mene inogogì kaintek mel, Parisi mene mel, inoba wagaukwama re, mel yogoisasukwa:
“Ap a'nogo ebe hakhìlìk ninoba wolok wagì'lek atì, nahalok en kamo egep,” ìlùk yogoisasukwama, 46it en he, mel yogoisasukwa:
“Egi! Wene at en ìlì'logo atì hak he, it ap aike nen wene atì'nogo ikenem isogorek lek meneat he, at en wene hùnogoat ìlì'logo atì nen ebe hehogo o,” ìlùk, yogoisasukwama re, 47it ap Parisi mene amanogo nen he, mel yogoisasukwa:
“Hit hogo re, at en lalhinapomo nen ìkì lagep? 48Nit ap Yahuri mene hinogogì kaintek aike nen inetaùken at oba hìpìrethìgìk, nit ap Parisi mene aike nen inetaùken at oba hìpìrethìgìk, ikenem aike isìkì lagep a? Motok lek o. 49Motok lek meneat he, it apùnì apik yoma wene Ala nen ninasuk wasike wene a'nogo inokot logolìk ìlì'lùgì atì, Ala nen homan inoba hisikomo werek o,” ìlùk yogoisasukwa. 50Atì'nogo yogoisasukwama, ap it mene aike etage re, Nikotemùt, alebat o hùako Yesùt oba wagaike mene a'nogo nen, it mel yogoisasike:
51“Ap sanì. Wene Ala nen ninasuk wasike wene atì ba re, ap aike ane inasuk holhì'legat, nen, at hagate mene wene ero tùkùm hogo inokot logolìgat he, ùkùm tak pìkìt oba housak, ìlùk isike nogo? Lek o,” ìlùk yogoisasikomo, 52it en at mel yogosukwa:
“Hat hogo re, haua o Kalilea mene nogo? Ap Ala ane yogoisagarek mene aike o Kalilea nen wesigin ìlùk Ala ane ba helal waganek aike were'ma heileken hegein motok lek a'naga re, heileken hanorogo hìthìkì logoino,” ìlùk yogosukwa. [53Atì'nogo yogotì lagaukwasik he, apùnì amanogo inauakwe lopok pùgùlogo lagaukwa.
Currently Selected:
YOHANET 7: LAIDNI
Highlight
Share
Copy
Want to have your highlights saved across all your devices? Sign up or sign in
