YOHANET 9
9
YesĂąt en ap aike eileken mĂąm mene hano hagasike wene
1At Yesùt ebe o atoma hebùlùk kwe laga logolìk, eileken hìthasike hak he, ap aike agosa a'la nen motok eileken mùm ta'lagaike mene hasike. 2Atì'nogo hasikomo, at agoromì ane wanhì lagaukwa mene amanogo nen he, mel yogosukwa:
“Noe. Ap eileken mùm arì re, ero at okawerek en weak hagasike ba nen a? At he, ero opase agosa weak hagasukwa ba nen ebe atì'nogo ta'lagaike a,” ìlùk yogotì lagaukwama, 3at Yesùt en he, mel yogoisasike:
“Ero ap yì mel, opase agosa mel, weak hagasukwa ba eileken mùm ta'lagaike hùk. At he, Ala nen ap yì hagatenem apùnì nen ineileken hìlìk, at Ala nen hagaterek mene inelu asuagalùk ta'lagaikomo o,” ìlùk yogoisasikesik, 4aike mel yogoisasike:
“Hobuk o mùm asigin o. Atì'nogo mum aganem, apùnì aike nen yì mene tì mene hagasusak mea asigin atì nen he, at lakhani wagaike mene hagaterek mene atì, o yogotak o lìa werek kolek ya baat hagatì logouok o. 5An kweangma yoma logolìk, nebe o lìa hake nogo nen he, apùnì lìa hagarinapìrek o,” 6ìlùk atì'nogo arat yogoisasikesik he, wesi sup hogo kweangma hesikesik en, eki nen kweang inom wokul negen hagarogo nen ap a'nogo eileken oba labulhesike. 7Atì'nogo labulhesikesik he, ap a'nogo mel yogosike:
“Helokoken i Siloam moge a'lì ba sobali lan o,” ìlùk yogosike. I atì nit ninane ba re, lakhesike u hak etage Siloam were'ma yogosike. Atì'nogo lakhesikomo, at a'nogo lagaikesik, elokoken sobalhikomo eileken hano agaikomo apotkwe wagaike. 8Atì'nogo hano a'lùk waganem, it apùnì at agaiya'lak mene mel, it aike ap a'nogo alep ape kìno weak ikenem ineileken hìkì lagaukwa mene mel, ineileken hasukwasik he, mel isukwa:
“Egi! Nayùk e. Ap yì re, ebe hùrek enek logolìk, ape kìno weak ikerek mene a'nogo lek nogo? Ap a'nogoat o,” ìlùk isukwama, 9it apùnì amanogo aike nen be, mel isukwa:
“Ebe arat o,” ìgìk, it aike nen he:
“At hùk. Hunigat meneat he, at elokoken hake,” ìgìk, isukwama at okawerek en he:
“Eberogoat an nebeat o,” ìlùk yogoisasikomo, 10it en at oba hinok wokhìkì logolìk he:
“Nìkì'nogo nen heileken hano aga,” ìlùk yogosukwama, 11at ap a'nogo nen mel yogoisasike:
“Ap etage Yesùt egarek a'nogo nen kweang mene eki nen wokul negen hagarogo neileken oba labulhanhesik mel yogonete:
Helokoken i Siloam moge a'lì ba sobali lan o, ìlùk, yogonetomo, at en yogonete hagat lagarìk, arat sobalhìma re, neileken hano aga o,” ìlùk yogoisasikomo, 12it en at yogotì logolìk he,
“Ap atì ebe koma werek?” ìlùk isukwama, at en he,
“An nokot o,” ìlùk yogoisasike.
It ap Parisi mene nen ap eileken mĂąm mene YesĂąt en hano hagasike mene a'nogo anema wanhukwa wene
13Atì'nogo isikomo, it en he, ap eileken mùm mene a'nogo ap Parisi mene inoba wolok lagaukwa. 14Atì sat he, ineki sabìt oba Ala hesik welegat werek kolek, at Yesùt en kweang mene wokul negen hagarogo ap eileken mùm mene hano hagasike. 15Atì'nogo hagasike atì nen, it ap Parisi mene nen ap eileken mùm mene a'nogo oba hinok wokhìkì logolìk he,
“Nìkì'nogo nen heileken hano aga,” ìlùk isukwama, at en he:
“At a'nogo nen kweang mene wokul negen hagarogo neileken oba labulhanhomo, sobali lagìma re, hano aga o,” ìlùk yogoisasikomo, 16it ap Parisi mene aike nen he, mel isukwa:
“Nineki sabìt oba Ala hesik welegat logousak ìlùk, wene palek mene atì sagalogo hikesik hagate atì nen he, at ebe Ala were'ma nen wagaike mene re, lek ù,” ìlùk isukwa meneat he, it ap aike nen he,
“At ebe weak hagaterek mene logoilepma re, wene hùthoagalùk elalin mene yì'nogo hagasusak nogo? Lek o,” ìlùk, it ina'la atì'nogo hùnogo tomok akasukwasik inane sagalogo inebe mìkìlhukwa atì. 17Atì'nogo mìkìlhukwasik he, ap eileken mùm mene a'nogo oba hinok hobuk wokhìkì logolìk he,
“Hat en he,
At en neileken hano haga'nape ìlùk egen akìgì. Halok he, ap atì abok hat en nìkì'nogo igin,” ìlùk yogosukwama, at en he:
“At ebe ap Ala ane yogoisagarek a'nogo meneat o,” ìlùk yogoisasike. 18Atì'nogo yogoisasike meneat he, it ap kaintek Yahuri mene nen ap yì alebat eileken mùm welagaike meneat he, yogotak arat hano agama, ìlùk hùthasak inabìt en he, ap a'nogo opase agosa waisasukwama wagaukwama re, inoba hinok wogisìkì logolìk he,
19“Hit en he, elege eileken mùm ta'lagama isigip a'nogo re, ebe yìat a? Halok he, yogotak eileken nìkì'nogo nen hano aga,” ìlùk yogoisasukwama, 20it en yogoisìkì logolìk he,
“Elege yì re, ebe nit en hogo mene eileken mùm ta'lagaike, ìkì lago a'nogo meneat he, 21nìkì'nogo nen hano aga he, nit ninokot o. Nen, sa nen hano hagate he, nit ninokorat o. Halok he, at ebe ap yekerek hùk o. Ebe alùgeat hake yoma re, at okawerek hesik yogohisoak en oba hinok wokhani o,” ìlùk yogoisasukwa. 22Atì'nogo yogoisasukwa atì re, it ap kaintek Yahuri mene nen, ìkì logolìk he,
“It apùnì inebe lopok en,
Ap yì re, Ala nen nit apùnì telninabuagalùk lakhei wesigin isike a'nogo Karìsùt ebe yìat o, ìlùk pak hogo iko halok he, ouma sapan egare'ma nen lisogo wulaksùok o,” ìlùk wene palhukwa mene werek atì nen he, ap atì opase agosa it ap kaintek Yahuri mene inayùk en he, 23mel isukwa atì:
“At ebe re, ap yekerek hùk. Ebe alùgeat hake yoma re. At okawerek en yogohisoak en oba hinok wokhani o,” ìlùk yogoisasukwa atì. 24Atì'nogo isukwama, it en he, ap alebat eileken mùmat ta'lagaikesik welagaike mene a'nogo hobuk,
“Eme,” ìlùk waesukwama wagaikomo re, mel yogosukwa:
“Ap atì ebe weak hagaterek mene nit ninelu atì nen he, hat hokawerek en hane eberogoat Ala etage hopuk palogo yogonisan o,” ìlùk yogosukwama, 25at en he, mel yogoisasike:
“Ap atì ebe weak hagaterek mene he a? Lek he a. An nokot meneat he, an alebat en neileken mùm welagìrek mene re, yogotak ya hano agarìk welagì atì nek nelu o,” ìlùk yogoisasikomo, 26it en he, mel yogosukwa:
“At en nìkì'nogo hagathape? Heileken nìkì'nogo hano hagathape,” ìlùk yogosukwama, 27at en he, mel yogoisasike:
“Wene hageat arat yogohisìgì meneat he, hinasuk holusak hinabìt hagatì logolìk en, hobuk hinasuk holuogolùk ìkì lagep atì nenahalok. Hit at agoromì asusak walok en ìkì lagep he a? Ì a,” ìlùk yogoisasikomo, 28it en inane sagan wokhìkì logolìk he,
“Hat at agot agatik ìkì lagen hìgì. Nit he, ap Musa agoromì welago o. 29Nen, ap Musa hesik he, wene Ala nenat yogosike, ìlùk, nit ninelu meneat he, ap atì hesik enek he, ebe o koma nen waga mene he, nit ninokot o,” ìlùk ìkì lagaukwama, 30at en he, mel yogoisasike:
“Egi! Nayùk e. Ap atìi nen, an neileken hano haga'nape meneat he, hit en,
At ebe o koma nen waga mene he, nit ninokot, ìlùk ìkì lagep atì, elalin hogoat ìkì lagep ù. 31Apùnì weak hagatarek mane Ala nen inane asuk holherek motok lek atì, nit ninelu o. We, apùnì Ala inayùk hogo logolìk, at a'la akikerek mene higit hogo hagatarek mene halok, inane Ala asuk holherek o. 32Nen, apùnì emakum ero ba nen yogotak hùlì, apùnì aike ineileken mùm ta'larì'mo nen hobuk hano hagarinapukwa, ìlùk ninasuk holhorek motok lek o. 33Ap atì Ala nen lakhei wagì'lek logoilepma re, at en yì hagatìk, tì hagatìk, hagaterek atì'nogo hagatì logoilep lek o,” ìlùk yogoisìkì lagaikomo, 34it en he, mel yogosukwa:
“Hat hoabùt weagat ta'lagagitik, weak motok hagatetek meneat he, hat en wene nit yakùlnisasak nogo? Motok mea o,” ìlùk yogosukwasik he, o sapan egarek oba nen eki lisogo legeta'ma wulaksa wagaukwa.
Yesùt en, “Apùnì ebe wene hesik ineileken mùm negen werek,” ìlùk yogoisasike wene
35Apùnì nen,
“It en ap a'nogo legeta'ma wulabi wagai,” ìlùk isukwama, at Yesùt asuk holhikesik oba nen, hobuk ap a'nogo eperak apì agaukwasik he, mel yogosike:
“Ap aike ebe abat ta'lasi wesigin, isukwa a'nogo, ebe hùthìlìk en hetaùken oba hìpìrethegen a?” ìlùk yogosikomo, 36at en he, mel yogoisasike:
“Ap atì ebe sa nogo, noe. An nen ap atì ebe hùthìlìk en netaùken oba hìpìretheik en he, yakùlnom o,” ìlùk yogosikomo, 37at Yesùt en he:
“Hat heileken arat neegen a'nogo yogotak neperak weneane ìkì lago nebe yìat o,” ìlùk yogosikomo, 38at en he mel yogosike:
“Yogotak arat hùthagalìk netaùken hoba hìpìrethìgì, noe,” ìùk eitep awì yagasogo re, Yesùt hogorasike. 39Ati'nogo hogorasikomo, at Yesùt en he, mel yogosike:
“An nen apùnì aike ineileken mùm mene hùgì hanorinapìk, it aike ineileken hano mene hùgì mùmerinapìk, ìkì logoigìlùk nebe kweangma yoma pi wagagi o,” ìlùk ikenem, 40it ap Parisi mene aike atoma logolìk inasuk holhuwasik he, mel isukwa:
“Hat ha'la nen he,
It ineileken mùm, ìlùk akìkì logolìk, nit yogonisegen a? Lek o,” ìlùk yogosukwama re, 41at Yesùt en he, mel yogoisasike:
“Hit hineileken mùm logoilepma re, hit weak ìlùk ùkùm hinoba heilep lek. Meneat he, hit en he,
Nit nineileken hano hìkì lago, ìlùk ìkì lagep atì nen he Ala nen,
Hit weak, ìlùk, ùkùm hinoba hikomo werek o,” ìlùk yogoisasike.
Currently Selected:
YOHANET 9: LAIDNI
Highlight
Share
Copy
Want to have your highlights saved across all your devices? Sign up or sign in
