Lukas 6
6
Akhuni Yahudi meke iniki 7 baga Allah hasik werlegat werek korlek, Yesus agarumi gandum eken palogo nilik lagoukha wene
(Matius 12:1-8; Markus 2:23-28)
1It akhuni Yahudi meke iniki 7 baga Allah hasik werlegat welageikharek etnogo ageikhe baga, at Yesus agarumi ane waganhe lagoukha meke emenogo inom, gandum ai yagomake laga dogolik, agarumi nen gandum eken palogo iniki nen wule tagalogo nilik nilik lagoukha. 2Itithogon hagarik lagunem, it ap Farisi meke aperek nen,
“Hit yi niniki 7 baga Allah hasik werlegat dogolik,
Itithogon hagasusak dek, iluk wene palek werek mekeat he, nenaluk palhe lagap?” iluk yogokhukha. 3Itithogon yogokhukhama, at Yesus nen,
“At Daud agarumi oporlik lagoukha meke inom hipiri nonaik 'bisasikhemo nen, at nen hagakhikhe meke Allah ane baga holal waganek etnogo hit nen etaga thalhidek welagap a? Etaga thalhethebat o. 4Allah ai halekma ukisikhesik hipiri roti meke Allah hasik 'bekhe lagoukha meke yugunat nausak motok dek meke welageikhe. It Allah iteerek meke halok anek nausak iluk, wene palek mekeat he, at Daud nen waganhikhesik, at ageikhe neke dogolik, ageikhe agarumi oporlik lagoukha meke emenogo wogeisasikhe, iluk holal waganek etnogo hit etaga thalhidek welagap nogo?” iluk yogeisasikhesik wene ageikhe men yogeisasikhe,
5“Allah hasik niniki 7 baga werlegat welagorek iti, iteerek an abat itaklasi agagi nebe yiat o,” iluk yogeisasikhe.
Iniki 7 baga Allah hasik werlegat werek korlek, Yesus nen ap ageikhe iki ebelake lapelek meke hano hagakhikhe wene
(Matius 12:9-14; Markus 3:1-6)
6Nen, iniki 7 baga ageikhe, it Allah hasik werlegat dogolik, at Yesus o it akhuni Yahudi meke sembayan egarekma ageikhe ukisikhesik nen, wene yakulisasikhe. Yakulisugunem, ap ageikhe iki ebeke lapelek meke etoma welageikhe. 7Werekma, it ap Allah ane holal waganek iteerek meke men, it ap Farisi meke men, inakla nen,
“Yogotak niniki 7 baga Allah hasik werlegat werek korlek, at nen ap ithi u hano hagasigin? Dek a. Itithogon hagakhe halok, wene at oba 'buok o,” iluk inileken waganhe lagoukha. 8Itithogon inileken waganho werekma, at Yesus nen inakla apasukha meke ekagat hisalok nen, ap iki lapelek meke etnogo men yogokhikhe,
“Hebe melatluk nen, tumo ya eme o,” iluk yogokhikhemo, ap etnogo melatluk nen, tumo eranogo melasi lageikhemo, 9at Yesus nen akhuni emenogo men yogeisasikhe,
“An nen wene ageikhe hinok wokhisak. Niniki 7 baga Allah hasik werlegat dogolik, hano hagarinabusak a? Weak hagarinabusak a. Tilinabusak a? Inasusak a. Hit nen ini ta?” iluk 10itithogon yogeisasikhesik, it tha'bokhogonat ileken hisilik lageikhesik nen, ap etnogo men yogokhikhe,
“Hiki walokhan,” iluk yogokhikhemo iki walothasinem, arat hano ageikhe. 11Itithogon hagakhikhemo, it ap Allah ane holal waganek iteerek meke emenogo men, it Farisi meke emenogo men, inakla aga apik dageiluk nen,
“At Yesus nikithogon hagasuok he,” iluk, it-it abok palhe lagoukha.
Yesus nen ap inebe 12 wenago 'bisasikhe wene
(Matius 10:1-4; Markus 3:13-19)
12Itinem, at Yesus sembayan igiluk tom oba dageisikhe. Dageisikhesik yibako-hibako Allah ayoko 'bisi motok werekma o arat wi ageikhe. 13O wi ageikhemo nen, at agarumi ane waganhe lagoukha meke emenogo waisasikhemo wagoukhama nen, it meke inebe 12 wenago 'bisasikhesik nen,
“Hinebe la'inagagin,” iluk meldisasikhe. 14Ap inayoko 'bisasikhe eta inetaga Simon etaga ageikhe Petrus thalhikhe meke etnogo men, agot etaga Andreas men, Yakobus men, Yohanes men, Filipus men, Bartolomeus men, 15Matius men, Tomas men, Alfeus a'but Yakobus men, Simon,
“O yoma ninaierek meke anek dogogun,” iluk ekhe lageikhe etnogo men, 16Yakobus a'but Yudas men, Yudas Iskariot Yesus wasuagaluk yabokane yoko lageikhe meke etnogo men, inebe eta inayoko 'bisasikhe.
At Yesus nen akhuni motok doalegat wene yakulisigik, u hano hagarinakhik, hagakhikhe wene
(Matius 4:23-25)
17At Yesus itithogon agarumi inayoko 'bisalok, inom tom oba nen usa'agoukhasik nen, agat enagoma etoma huk agoukhasik werekma, at agarumi ane waganhe lagoukha meke emenogo aperek inebe doalegat men, akhuni motok doalegat o Yudea ya ta meke men, o kota Yerusalem meke men, o Tirus Sidon i laut aik oba welageikharek meke men, 18it nen at Yesus ane holhik, at nen it u weak meke hano hagarinakhik, hagasuogoluk at oba natogosi agoukha. Itithogon natogosi agoukhama, mokat obabut weak meke inakla ukiluk werekma inomat hagarinakhikhe. 19At obatneak akla welageikhe meke dukhi agunem, it akhuni inebe doalegat itithogon hano hagarinabuagaluk, inebe tha'bokhogonat iniki hakhauwogoluk walhasukha.
It aperek hanorinakhunem inakla arleken akhigik, it aperek weagarinakhunem, inakla weak ageik, hagasigin isikhe wene
(Matius 5:1-12)
20Itithogon hagakhunem, at Yesus nen agarumi ane waganhe lagoukha meke emenogo ileken inoba 'biluk nen, men yogeisasikhe,
“Hit hinerlageik meke, Allah apma 'binagagin iti nen he,
hinakla arleken akhekhe dogono o.
21Nen, hit yogotak hinakla abu negen welagap meke,
yabokane wokhisugunem hina'ithogon nugun iti nen,
hinakla arleken akhekhe dogono o.
Nen, hit de aga lagap meke yabokane eto asugun iti nen,
hinakla arleken akhekhe dogono o.
22-23Nen, it ap yoma inopa lak nen, it ap alep Allah ane yogeisekhe lagoukha meke hagarinakhe lagoukha hagat,
hit yogotak an abat itaklasi agagi etnogo nane waganhep iti nen ina'it motok hisekhe dogolik,
hit anek kolelogo 'binagagik, inane puk weak wenageisigik,
Ap yi weak, iluk hinetaga ekhe dogolik hinabok
weak palhik, itithogon hagathinakho halok, oko wokhisagein meke pogot oba doalegat werek iti nen,
hinakla arleken akhekhe dogolik hologot hilik hilik etai warekhe dogono.
24Itithogon mekeat he, hit ap kok hinameke werek meke anek,
eiye! Hinameke doalegat iti baga nen,
hinakla arleken akhekhe lagap meke re, yabokane weagathinabigin o.
25Nen, hit aperek yogotak elanma hasik anek hinelabut hina'ithogon neke lagap meke yi.
Eiye! Yabokane hipiri no hugun o.
Nen, hit yogotak elanma hasik anek eto aga lagap meke iti.
Eiye! Hinetaiken warekhe dogolik de asugunat o.
26It ap yoma inopa lak nen, it ap aperek Allah ane yogeisegarek meke thalek nukhetdisasi korlegat, hogorinakhe lagoukha hak,
akhuni tha'bokhogonat nen hogothinakho halok,
eiye! Weagathinabigin o,”
iluk yogeisasikhe.
At Yesus nen, “It ap hinom weak meke iti hinakmurogon dogosak o,” iluk yogeisasikhe wene
(Matius 5:38-48, 7:12)
27Itithogon yogeisasikhesik yabokane men isikhe,
“Itithogon mekeat he, hit an nane holhe lagap meke yi, an wene ageikhe yokhisak. It akhuni hinom weak meke hinakmurogon dogono o. It akhuni hinom weak meke hinakmurogon dogono o. It nen ina'it hisasi korlegat, hit nen oko hano meke anek hagarinakhe dogono o. 28It nen hit homan 'binagasi korlegat, hit nen, hinakla arleken inoba 'bisekhe dogono o. Nen, it weagathinabiogei meke iti, Allah nen hanorinabuagaluk, it inobasik sembayan ekhe dogono o. 29It aperek nen hinelokhoken ebelake dapukhogon hinakho halok he, ebelake inom hinasuagaluk wogeisani o. Nen, it aperek nen hinasu thogei su itikmanke meke iti horlekhe halok he, hinasu akmanke meke iti inomat horloak nen, irlirli waganhup o. 30It akhuni nen kino yokhisekho halok, inebe dopok wogeisekhe dogono. Nen, it nen hinamek waganho halok, yabokane,
Woknisani, iluk kino yogeisugup o. 31Hit hinakla nen,
It aperek nen itithogon hagatninabilep e! iluk apegethep iti hagat, hit nen it iti itithogonat hagarinakhe dogono o. 32Nen, it ap inakmuthinakharek meke anek hit nen hinakmurinakhep halok he,
Hano, iluk yokhisagun a? It akhuni weak hagakharek meke nen itithogon inakmurinakharek meke, it nen meneke, inakmurinakharegat. 33It akhuni hano hagathinabiogei meke iti anek, hit nen hano hagarinakhe lagap halok he,
Hano, iluk yokhisagun a? It akhuni weak hagakharek meke inobabut itithogonat hagakharek. 34Hit nen it akhuni oko woknisoak, iluk apekhe dogolik wogeisekhe lagap halok,
Hano, iluk yokhisagun a? It akhuni weak hagakharek meke iti,
Yabokane oko tak-tagat woknisoak, iluk inagarlak lak weak hagakharek meke aperek wogeisugunem, it nen meneke, wogeisegaregat. 35Iti itithogon hagakharek mekeat he, hit nen hinom weak meke hinakmurinakhik, hanorogon yomageisigik,
Oko it nen ageikhe woknisoak, iluk apigidegat hinobakha palek yugunat wogeisigik, hagakhe dogogun halok he, hinebe Allah Etagapogot a'buriat werekma, oko kok meke wokhisagein o. At nen itithogonat, it inobabut weak at ebe heagei wakhidek weak hagakhe korlek, at akmurinakherek iti. 36Halok he, ninopase akmurinakherek hak, hit nen akhuni hinakmurinakhe dogono o,” iluk yogeisasikhe.
Akhuni wene inoba 'bigik, kokhik, hagakharek meke hasik yogeisasikhe wene
(Matius 7:1-5)
37Itithogon yogeisasikhesik nen, wene ageikhe men yogeisasikhe,
“Allah nen wene hinoba 'binogo iluk, hit nen akhuni aperek wene inoba 'bugup o. Allah nen wene hinoba 'biluk nen, weagathinabinogo iluk, hit nen akhuni aperek wene inoba 'biluk nen, weagarinakhup o. Halok he, hit nen weak hagakhe lagap meke Allah nen thagalogo degetduagaluk, akhuni nen weagathinabiogei meke hit nen thagalogo degetdekhe dogono o. 38Hit nen yi meke ti meke yugunat wogeisegep halok he, Allah nen itithogonat yugunat wokhisageinat o. Nen, isoak walegeke oba walhalok, apem hethok ukhakhunem, yamukhogon usa'iluk yabokane oba dukhogon kerlekhogo aperek pilik pilik usekhe korlek wogeisegethep hak, itithogonat Allah nen kokhogon wokhisagein o. Hit nen hurli walhalok nen wogeisegethep iti hak, Allah nen hurli iti bagaat walhalok wokhisagein o,” iluk yogeisasikhe. 39Itithogon yogeisalok nen, wene ageikhe oba lisogon men yogeisasikhe,
“Ap ageikhe ileken puk meke nen, at agarlak ageikhe itithogon ileken puk meke yogokhe dogolik,
Holak yike lu, iluk iki hago wolok lausak apegep? Itithogon lugun halok he, ipisagat hurlugu karluk waganekma usagun dek nogo? Usagunat o. 40It guru lak wene yakulisegarek meke thebekthek negen werek korlegat, it ina'buri yakulisegarek meke iti siakthek negen upu ya welageikharek dek o. Itithogon meke re, tha nen wene arat yakuliluk hutukhogon ilu atluk halok he, opase yakulisekherek meke iti ipisak tak-tagat o. 41Hit hinekaerek hinilekenma o kok obakha palek meke harokthek werek iti 'bikhakhigidegat dogolik, it hinagarlak lak hinerugi aperek inilekenma amumuleke 'bugurlagat ukiluk werekma wokhauwogoluk hinileken kolageisekhe lagap iti nenaluk. 42Hinekaerek hinilekenma o kok meke palek harokthek werek iti higidek dogoligat, hinagarlak lak hinerugi iti yogeisekhe dogolik,
Amumuleke hilekenma ukekhe meke iti wokheak o, iluk usak apegep? Hinoado baga anek hano thalek hinetaiken pere welagap yi re! Hinekaerek hinilekenma o palek kok meke harokthek werek iti tak wokhakhalok nen, hinileken arat 'bekelaga halok he, yabokane hinagarlak lak hinerugi inilekenma amumuleke werek meke iti, erlok wokhageinat o,” iluk yogeisasikhe.
“O eken ikherek oba nen erlo ekagat hutdegarek,” iluk yogeisasikhe wene
(Matius 7:16-20, 12:33-35)
43Itithogon yogeisasikhesik nen, yabokane ageikhe men yogeisasikhe,
“O erlo hano meke ageikhe eken weak meke ikherek dek. Iti hak, o erlo weak meke eken hano meke ageikhe ikherek degat. 44Yi o ti o iti, eken ikherek iti baga erlo ekagat hutdegarek. O pati arlok weak mekeat he, eken o ara hano meke eken hakene ageikhe itlukmo palharek motok dek. Iti hak, o mun mekeat he, eken anggur eken hano meke itlukmo palharek motok degat. 45Akhuni nen yi wene ti wene inapema nen egarek iti, inakla kerlekhogon dogolik, kagalogo dagei agunem egarek o Inobabut hano meke inakla hano meke kerlekhogon dogolik, wene hano mekeat dukhi ageikharegat. Mekeat he, akhuni inobabut weak meke inakla weagat dogolik, wene weak mekeat dukhi ageikharek o,” iluk yogeisasikhe.
“Ap inebe pere nen o pereat halhukha,” iluk oba lisogon yogeisasikhe wene
(Matius 7:24-27)
46Itithogon yogeisasikhesik nen, ageikhe men yogeisasikhe,
“Hit an nen yokhisekhe lagei meke hagakhidek dogoligat,
Noe, noe, iluk nenaluk yoknekhe lagap. 47-48Tha nen an noba witluk nane holherethek mothogon hagariogei meke iti, o halharek meke oba lisogon yokhisak. At iti, ap nen o halharek iti hakeneat o. Ap ageikhe o haligiluk agat wemarogon hulelogo nen, helekit 'biluk o tik oak helekit oba dukhogon 'biluk nen, o ebe halhikhe. Itithogon halhikhemo, yabokane i itluk waga dogolik, o etnogo warabethasikhe meke re, motok a'bethogon halhikhemo nogo nen he, aborlok ageikhe igidek motok huk ageikhe. 49Itithogon mekeat, at tha nen an nane holhe dogoligat, mothogon hagariogo dek halok he, ap ageikhe o haligiluk herlaga baga 'bigidek halhikhemo, i itluk waga dogolik, o etnogo wakhikhemo, thatnakhogon wolok laga dogolik motok misak-dapukhogon weagatdisikhe iti hagat o,” iluk yogeisasikhe.
Currently Selected:
Lukas 6: LAIDNT
Highlight
Share
Copy
Want to have your highlights saved across all your devices? Sign up or sign in
