Matius 28

Yesus ebe iluk ageikhe wene

(Markus 16:1-10; Lukas 24:1-12; Yohanes 20:1-10)

1Itithogon hagakhukhasik iniki 7 baga Allah hasik werlegat welagoukhasik nen, hubuluke hari Minggu baga, mo yegelogo dagei aga korlek, at he Maria ai Magdala meke etnogo inom, he Maria ageikhe etnogo inom, Yesus ebe warek 'bisukhama inileken 'bikhauwogoluk wagoukha. 2Waga korlek eranogoat, dugul kogat luk-lagathasi korlek, malaikat Allah nen pogot oba yoko usa'isa agarek meke ageikhe usa'ageikhesik, thu helekit meke tetnokhogon lakhukha etnogo dipikhogon la'iluk nen, oba hurek lageikhe. 3At malaikat etnogo elokhoken o yabok hakene hagakhe dogolik, asu ugu meke elokhoken kut motok yibarlabethasikhe. 4Itithogon hagakhikhemo, it ap thuam welagoukha meke emenogo inayuk nen inoageleke dik-dik hagakhe dogolik, akhuni warek meke hakene motok hagatlagoukha. 5Nen, at malaikat etnogo nen it humi emenogo yogeisekhe dogolik,

“Hinayuk agup o. Hit nen, Yesus o baga meldiluk wakha etnogo hinileken 'bikhauwogoluk wagap iti an nilu o. 6Meke re, ebe yoma dek. At nen yokhisasikhe hagat, Allah nen ilugutdekhemo werek o. At welagama yoma oboluk anek yi hinileken 'bikhatni. 7'Bikhalok nen,

Yesus etnogo watlagasikmo nen Allah nen ilugutdekhemo o, iluk, at agarumi ane waganhe lageikha meke emenogo ibat yogeisa lano o. Hit o Galilea etoma aban lageidek werek korlek, at tak hinelokhoma lalok werekma hinileken 'bikha lugun o. Nane yokhisigi iti eberek dogono o,” iluk yogeisasikhemo, 8it humi emenogo oila etoma nen ibat laga dogolik inayuk agoukha mekeat he, yabokane inakla arleken motok akhilik akhilik, at agarumi ane waganhe lagoukha meke emenogo inoba pirlirliat yogeisa lagoukha. 9Yogeisa luogoluk lagunem holagarlem at Yesus inom abuk agoukhasik nen, men yogeisasikhe,

“Nerugi o!” iluk yogeisasikhemo it humi emenogo horok-horok lagoukhasik nen, isok iniki hakhekhe dogolik, heagei warogo initibagal yukukhogon hogorakhukha. 10Hogorakhukhama, at Yesus nen he,

“Hinayuk agup o. An nagarumi emenogo o Galilea dagouak nen, yogeisa lani o. Etoma dageiluk inileken 'bitneagun o,” iluk yogeisasikhe.

Inekalat, “Yesus warek lima'iluk dukhisukhama iluk yogeisano,” isukha wene

11Itithogon yogeisasikhemo, it humi eranogo aban laga korlek, it ap thuam welagoukha meke emenogo aperek o kota ukisukhasik nen, wene tha'bokhogonat hagatlageikhe meke emenogo,

“Itithogon hagatlaga,” iluk, it ap Allah iteerek meke inougi koktek emenogo motok pilin-palinhogo yogeisasukha. 12Itithogon yogeisasukhama, it men, it ap inarluetek emenogo men, inom natogotdiluk wene paldiluk nen, it ap tentara meke emenogo uang perak meke doalegat wogeisekhe dogolik 13men isukha,

“Hit nen,

Hibako nit noge isi korlek, at Yesus ane waganhe lageikha meke emenogo wageikhasik nen Yesus ebe warek lima'iluk dukhegama, iluk yogeisekhe dogono o. 14Wene hagatlaga meke iti hasik, at Gubernur asuk holigin halok, hit wene ninoba 'bigin iluk, hinelabut hisunogo iluk, nit nen akla kagalugun o,” iluk isukhama, 15it ap tentara meke uang emenogo horlasukhasik nen, it ap emenogo nen isukha tak-tagat hagakhukha. Wene iti wikhatdisukhama nen, it akhuni Yahudi meke nen, yogotak hurli isi motogat werek o.

Yesus nen, “Hano wene yogeisilik laga dogono o,” iluk yogeisasikhe wene

(Markus 16:14-18; Lukas 24:36-49; Yohanes 20:19-23; La'isasikhe 1:6-8)

16At Yesus nen at agarumi ane waganhe lagoukha meke inebe 11 emenogo yogeisekhe dogolik,

“O Galilea lalok tom iti baga dageiluk dogono,” iluk wene warisasikhe tak-tagat lagoukhasik dageisukha. 17Dageisukhasik werekma at Yesus ebe inileken hasukhasik nen, heagei warogo initibagal yukukhogon hogorakhe korlek mekeat he, it aperek emenogo anek he,

“At ebeat a? Men a,” iluk apasukha. 18Itithogon apekhe korlek, at Yesus ebe inalilu wageikhesik nen, men yogeisasikhe,

“Allah nen he, pogot oba meke inom, agat oba meke inom, tha'bokhogonat an iteerek 'banhemo o. 19-20Halok he, yi akhuni ti akhuni inukuloak etaga dopok tha'bokhogonat an nagarumi hagatlasuagaluk, nopase Allah etaga baga, an a'but netaga baga, Agoreke etaga baga, ninetaga palogo ima usa'isigik, an nen wene hinasuk wakhi meke iti tha'bokhogonat it akhuni nen mothogon hagakhe dogoagaluk yakulisigik, hagarik laga dogono. Lakhani! Hit itithogon hagarinabik lagunem, an nebe ninom motok-motogat werekma, hurli o ilugun hurli baga hagatlasigin o,” iluk yogeisasikhe.

Currently Selected:

Matius 28: LAIDNT

Highlight

Copy