Markus 15
15
Yesus iki herle warogo Pilatus wogosi lagoukha wene
(Matius 27:1-2, 11-14; Lukas 23:1-5; Yohanes 18:28-38)
1Itithogon hagakhe lagoukhasik, o wi ageikhemo nen, ap wene Allah hasik erlo pilinekharek meke inebe tha'bokhogonat, it ap Allah iteerek meke inougi koktek emenogo men, inarluetek emenogo men, Allah ane holal waganek iteerek meke emenogo men, hetnake inomat nen,
“Itithogon hagasuok,” iluk isukhasik nen, Yesus iki herle warogo Pilatus wogosi agoukha. 2Wogosi agoukhama, at nen hinok Yesus oba waganhe dogolik men yogokhikhe,
“Akhuni Yahudi meke inoe etagapogot etnogo, hat mekeat ega?” iluk yogokhikhemo at nen,
“Hat egen itiat o,” iluk yogokhikhe. 3Itithogon yogokhikhemo it ap Allah iteerek meke inougi koktek emenogo nen, yi wene ti wene oba 'bisukha. 4Wene itithogon oba 'bisukhama, at Pilatus nen Yesus oba yabokane hinok waganhe dogolik, men yogokhikhe,
“Yi wene ti wene doalegat hoba 'biliogei yoma, hat nen wene oko yogeisagein dek?” iluk yogokhikhe. 5Itithogon yogokhikhemo at Yesus ane oko dagakhogon igidek huk ageikhemo, at Pilatus nen,
“Nayuk o,” iluk hogorakhikhe.
Yesus ebe motok wasuagaluk ukum oba 'bisukha wene
(Matius 27:15-26; Lukas 23:13-25; Yohanes 18:39, 19:16)
6It akhuni Yahudi meke pesta Paskah kok isago neke dogolik, it nen,
“Akhuni iniki herle warek meke iti, opakiat hisalogo woknisano o,” iluk kino ugunem, at Pilatus nen opakiat ageikhe hisalogo wogeisekhe lageikhe. 7Itithogon wogeisekherethekma nogo nen, itinem ap ageikhe etaga Barabas, ap aperek inom nen,
“Ninougi koktek pemerintah meke, nina'it,” iluk horlim kagalogo inasuogoluk, inom yakhe dogolik, ap aperek inakhukhama, iniki herle warogo 'bisasukhama, 8werekma, it akhuni doalegat emenogo Pilatus oba wagoukhasik, men yogokhukha,
“Pilatus noe. Hat nen akhuni iniki herle warek meke hisalogo woknisegetek etnogo itithogon, yogotak ageikhe hisalogo woknisanogoluk wago o,” iluk kino yogokhukha. 9-10Yogokhukhama, at Pilatus akla nen,
“It ap Allah iteerek inougi koktek yi Yesus oba ua palogo ebe woknesi ageikha apigi,” iluk hutdisikhesigat men yogeisasikhe,
“Hit Yahudi meke hinoe kok etagapogot yi iki herle hisalogo wokhisoagaluk wagap a?” iluk yogeisasikhe. 11Itithogon yogeisasikhe mekeat he, it ap Allah iteerek meke inougi koktek emenogo nen, akhuni doalegat emenogo inakla kagalhe dogolik,
“Barabas itiat iki herle hisalogo woknisanok. Yesus iti dek o, iluk yogosubageik,” iluk inakla kagalhukha. 12Inakla itithogon kagalhukhama, it nen itithogonat yogokhukhama, at Pilatus nen men yogeisasikhe,
“Halok he, hit akhuni Yahudi meke nen,
Ninoe kok etagapogot, iluk ekhe lagap meke yi, nikithogon hagasik,” iluk yogeisasikhemo, 13it nen men yogokhukha,
“O baga meldiluk watno o!” iluk inane obatnerogonat yogokhukha. 14Itithogon yogokhukha mekeat he, at Pilatus nen men yogeisasikhe,
“At weak nena meke hagakhemo nen,” iluk yogeisasikhe mekeat he, it nen,
“O baga meldiluk watno o!” iluk yabokane inane ebenageik kokhogonat yogokhukha. 15Itithogon yogokhukhama, at Pilatus nen akla men apasikhe,
“Halok he, akhuni doalegat yoma inakla hanorogo yigithogon hagasik,” iluk isikhesik Barabas etnogo iki herle hisalogo wogeisekhe dogolik, at agarumi tentara nen Yesus tugi la'bisoko tugi warogo o baga meldiluk wasuagaluk wogeisasikhe.
It ap tentara meke nen Yesus inane sagun yogokhe lagoukha wene
(Matius 27:27-31; Yohanes 19:2-3)
16At Pilatus nen itithogon wogeisasikhemo re, it ap tentara meke emenogo nen Yesus wolok ap kok gubernur ai silimo ukisukhasik it inagarlak lak inom opakiat doalek doalhe lagoukha meke tha'bokhogonat waisasukha. 17Waisasukhama wagoukhasik Yesus su elokhoken ki'bi-ki'bi warek hakene ap koktek ugu welageikharek meke hakene i'bigik, ap koktek meke inakare-kare i'bisegarek iti hak, arlok weak meke makona warogo ukuloak oba i'bigik, hagakhukha. 18Itithogon hagakhukhasik men yogokhukha,
“Wi! Akhuni Yahudi meke inoe hetagapogot etnogo harat higi o, wi!” iluk heagei wakhe lago thalek inane sagun kerotdigik yogokhukha. 19Itithogon yogokhukhasik, tugi payuk yekelek oba ukuloak pakhogon wakhik, wosi oba suphogon la'igik, inane dagakhogon heagei wasuogoluk initibagal yukukhogon apma hureklasi ukigik, hagakhukha. 20Itithogon arat hagakhukhasik, su uanat elokhoken ki'bi-ki'bi warek hakene meke nokorlogo 'biluk, ekaerek asu meke apuke i'bisukhasik, o baga meldiluk wasuogoluk leget itikmanke wolok dukhi agoukha.
Yesus o baga meldiluk wakhukha wene
(Matius 27:32-44; Lukas 23:26-43; Yohanes 19:17-27)
21Itithogon wolok holagarlem wagunem, ap ageikhe etaga Simon, ai o Kirene meke, ap Aleksander men, Rufus men inopase iti, o etoma itikmanke nen o kota ukigiluk wagunem inom abuk agoukha. Inom abuk agoukhasik men yogokhukha,
“Yesus ebe o baga meldiluk wasugun meke o yi, hat nen waganin o!” iluk inane obatnerogon yogokhukhama waganhikhe. 22Waganhikhemo Yesus wolok o etaga nit ninane baga, Inukuloak Palegem werekma u hak, it inane baga Golgota wolok dagei agoukha. 23Dagei agoukhasik anggur eken apusu men, hotali al hakene arle weak meke etaga mur men, inom dapukhogon hagarogo wogokhukha meke here'isikhe. 24Yesus ebe arat o baga meldisukhasik asu nokorlek emenogo inebe dopok,
Tha hak horlagein, iluk omatok thekerlogo walhegarek hak, helekit hupurlekentek meke walhasukhasik nen mikirlogo horlasukha. 25Yesus ebe wakhukha iti, huben jam 9 o baga meldisukha. 26Itithogon 'bisukhasik,
“Ap yi wene erlo yi baga 'bogosik nen wakho,” iluk u hak, “AKHUNI YAHUDI MEKE INOE KOK ETAGAPOGOT,” iluk holal waganogo 'bisukha.
27Yesus ebe o baga turlem itithogon meldisukhasik nen, it ap inebe pere akhuni inameke iniki abusak waganhe lagoukha meke, ageikhe iki ebeke, ageikhe iki paike, inom meldisalok inakhukhaat. [ 28#Yesaya 53:12 Itithogon hagakhukha iti haganeat Allah ane holal waganogo 'bekhe dogolik men isukha,
“Akhuni nen, at iti ebe re, akhuni inobabut weak hagakharek meke thalek inom opakiat iniki wenageinabugun o,”
iluk isukha meke iti, at Yesus it ap iti inom itithogon meldisasukha iti baga ebeat ageikhe iti.] 29-30Itithogon meldisasukhama werekma, akhuni holagarlem itike lageik, wageik, hagakhe dogolik Yesus men yogokhe lagoukha,
“Aha! Hat nen men isigin apigi,
Allah ai halek yi misalogo 'biluk, niki pere baga halhe dogoluk nen niki ageikhe baga yi arat tirliphogon haligin, iluk isigin etnogo, hekaerek hebe o ithi baga nen tilogo usa me ta!” iluk inut kinik inut konok hagakhe dogolik inane sagun yogokhe lagoukha. 31Itithogon isi korlek, it ap Allah iteerek meke inougi koktek emenogo men, Allah ane holal waganek iteerek meke emenogo men, inom it-it inane sagun yogokhe dogolik,
“At nen, it akhuni aperek meke erlok tilinakhe laga etnogo mekeat he, ekaerek nen tilausak erlok dek higi. 32Kristus nit akhuni Yahudi meke ninoe etagapogot yi nit eberogonat apauwok nen ninilhanem o ithi baga nen usatnek he,” iluk inane sagun yogokhe lagoukha. Nen, it ap pere o baga Yesus inom meldisasukha meke eranogo nen, Yesus inane sagun itithogon yogokhukhaat.
Yesus ebe watlageikhe wene
(Matius 27:45-56; Lukas 23:44-49; Yohanes 19:28-30)
33 #
Mazmur 22:1
O dikene eketurlem jam 12 oba o hi ageikhesik, o etoma tha'bokhogonat hurli jam 3 hiat welageikhe. 34Hiat werek korlek, jam 3 arat asi lageikhemo, at Yesus nen Allah men yogokhikhe. Nit ninane baga,
“Nopase Allah! Nopase Allah! An nenaluk here'anhen,”
iluk u hak, it inane baga,
“Eloi! Eloi! Lama sabakhtani!” iluk ane kokhogonat yogokhikhe. 35Itithogon yogokhunem, it akhuni hetnake etoma welagoukha meke inasuk holhukhasik,
“Elia waeriogo higi,” iluk isukhama, 36ap ageikhe pirlirli lageikhesik haki isiken hakene meke anggur eken apusu arle weak meke mago nen, noagaluk thukat oba hunogo wogokhe dogolik, it aperek men yogeisasikhe,
“A! Elia nen at yi tilogo usa'isigin a? Dek a. Ninileken dogouok,” iluk yogeisasikhe. 37Itithogon yogeisasikhemo, at Yesus ane opaki hasik kokhogon isikhesik, arat debekhogon watlageikhe. 38At ebe watlagunem Allah ai halekma su kain meke o itikmoke hurli palek welageikhe meke, upu eloma nen turlem heisogonat kagalarik kagalarik ilugun oba kagoukhogon kagalageikhe. 39Yesus itithogon watlagunem it ap tentara meke inoe kok meke Yesus elokhoma mot-mot dogolik, itithogon watlagunem ileken hasikhesik men yogeisasikhe,
“Ap yi eberogonat Allah a'but higi o,” iluk yogeisasikhe. 40Itithogon hagakhe korlek, it humi aperek he Maria ai Magdala meke, ageikhe, he Maria at ap Yakobus elege meke men, Yoses men, inagosa, ageikhe he Salome, humi aperek inomat inebe walegat nen inileken lageik welagoukha. 41It humi iti alebat Yesus oporlik o Galilea eloke nekhe dogolik, yomakhekhe lagoukha meke. Nen, humi aperek doalegat Yesus inom o Yerusalem usasukhasik inom etoma dogolik inileken welagoukhaat.
Yesus ebe warek oila 'bisukha wene
(Matius 27:57-61; Lukas 23:50-56; Yohanes 19:38-42)
42-43At Yesus watlageikhe iti, it akhuni Yahudi meke hubuluke iniki 7 baga Allah hasik werlegat dogouogoluk, yi meke ti meke tugutrogo 'bisi korlek watlageikhe. Watlageikhemo, o arat hi ageikhemo ap ageikhe Yahudi inougi koktek wene pilinisuogoluk inom natogokhe lagoukha meke etaga Yusuf. Ai o Arimatea meke. Obabut hano nen, akhuni nen,
“At hano,” iluk abok ekhe lagoukha. Itithogon hagakhe dogolik akla nen,
“Allah nen apma 'binanigin iti an therogo welagei,” iluk therogo welageikhe meke iti, Pilatus ayuk degat lageikhesik Yesus ebe warek kino ukisikhe. 44Warek kino ukisikhemo, at Pilatus nen,
“Merake watlaga heat. Ibat watlaga yi nayuk o,” iluk hogoratluk ap tentara meke inoe kok meke etnogo wisuagaluk ayoko la'isa ageikhemo lageikhemo men yogokhikhe,
“Ebe haganeat watlaga a? Yogotagat watlaga a,” iluk hinok waganhikhe. 45Hinok waganhikhemo, at nen,
“Haganeat watlaga o,” iluk yogokhikhemo, at Pilatus nen Yusuf men yogokhikhe,
“Halok he, ebe warek iti wagani lan o,” iluk yogokhikhe. 46Itithogon yogokhikhemo wageikhesik, su kain etaga lenan hano meke oko palogo Yesus warek etnogo o baga nen usa'i ageikhesik su etnogo baga yilogo oila akhuni warek 'bisauwogoluk akhuni ineram nen elo herlelhukhama meke baga 'bikisikhe. 'Biluk nen helekit kok meke dipilogo wolok wageikhesik nen tetnokhogon latdisikhe. 47Tetnokhogon latdisinem, it he Maria ai o Magdala meke etnogo men, he Maria Yoses agosa etnogo men, wagoukhasik,
“Etha 'bekhe,” iluk inileken 'birogo welagoukha.
Currently Selected:
Markus 15: LAIDNT
Highlight
Share
Copy
Want to have your highlights saved across all your devices? Sign up or sign in
