Markus 5
5
Ap Gerasa meke mokat inobabut weak meke akla werekma, Yesus nen mukhogo ula'isikhe wene
(Matius 8:28-34; Lukas 8:26-39)
1Itithogon hogorakhukhama, at Yesus agarumi inom i yekelekma etnogo aik ilibaganke akhuni o Gerasa meke inaila italhukha. 2Italhukhasik, at Yesus ku akla nen i aik oba dukhisinem etaat, ap ageikhe oila akhuni warek 'bisegarekma nen dukhi ageikhesik, Yesus oba wageikhe. Ap iti mokat obabut weak meke akla ukiluk, 3-4akhuni warek 'bisegarekma motok werekma, akhuni aperek nen hibiku-yogoku herle pisuemaken herle baga iki herle wakhik, isok herle wakhik, wakhe lagoukha mekeat he, iki herle 'bogokhogon la'igik, isok herle obakha sikiphogon la'igik, hagakhunem, yabokane yi herle ti herle pisuemaken herle inomat walhasukhasik nen, nena meke herle baga wasu heat hagatlageikhemo, ebe hakhalok obabut tha nen hebelu heat erlok dek ageikhe. 5Itithogon dogolik, dikene hunik, hibako hunik, akhuni warek 'bisegarekma ukigik, tom obake dageiluk nikhik, hagakhe dogolik, ane naik-waik ekhe dogolik, ekaerek nen helekit oba amep wuluk-walakhogon motok warekhe lageikhe. 6Itithogon hagakhe lageikhe meke, Yesus lageikhe itinem, ebe walegat etoma dogolik, ileken Yesus lakhasikhe. Ileken lakhalok, at oba pirlikha ageikhesik, itibagal yukukhogon,
7-8“Yesus Allah Etagapogot a'but yi, nikithogon hagatnabigiluk wagan,” iluk yogokhikhemo, at Yesus nen,
“Mokat hobabut weak meke yi, ap yi akla nen dukhi lan o,” iluk yogokhunem, at etnogo ane kokhogon ekhe dogolik,
“Eiye. Na'it o. Nopase Allah oak o. Weagatnakhun,” iluk ane kokhogon isikhe. 9Ane kokhogon isikhemo, at Yesus nen,
“Hat hetaga tha,” iluk hinok oba waganhikhemo, at nen men yogokhikhe,
“Ninebe doalegat welago iti nen, netaga opaki doalek u hak, netaga Legiun,” yogokhikhe. 10Itithogon yogokhikhesik, Yesus nen it mokat inobabut weak meke iti o etoma nen walegat la'isaunogo iluk, ane a'buarek a'buarek Yesus yogokhikhe. 11Itinem o etoma tom arlobaga wam doalegat konak nasi lagoukha. 12Konak nasi werekma, it mokat inobabut weak meke emenogo nen, Yesus men yogokhukha,
“Nit wam akla ukhatlasi luok nen, etoma la'inanin o,” iluk inane ina'buarek ina'buarek yogokhukha. 13Itithogon yogokhukhama, at nen,
“I o. Lani,” yogeisasikhemo, it mokat inobabut weak meke emenogo dukhi lagoukhasik, wam akla ukhatlasi lagoukhama, wam doalegat emenogo lumhogon katma i yekelekma usasukhasik nen i lagoukha. Wam i lagoukha iti, ebe 2.000 hakene motok doalegat i lagoukha. 14I lagoukhama, it wam therogo welagoukha meke inayuk atluk pirlirli yoko lagoukhasik, akhuni o ukul kokma yogeisigik, o 'bugurlagatma yogeisigik, yogeisasukha. Yogeisasukhama it akhuni nen,
“Nikithogon hagatlagama nen ega,” iluk, inileken 'bikhauwogoluk Yesus oba wagoukha. 15Wagoukhama, ap alebat mokat inobabut weak meke opaki doalek akla ukiluk welageikhe meke etnogo, obabut hebelageikhesik, asu ugu hurek werekma inileken hasukhasik, inayuk agoukha. 16Inayuk agoukhama, it akhuni aperek wene itithogon hagatlagunem inileken hasukha meke nen, men yogeisasukha,
“Ap yi mokat obabut weak meke akla ukiluk welaga etnogo yigithogon hagakhe. Nen, wam emenogo itithogon hagakhe,” iluk wene pilinerogo yogeisasukha. 17Itithogon yogeisasukhama, it nen men yogokhukha,
“Yesus. Hat hebe nit werekma yoma dogosak dek. Werlekmake lan o!” iluk inane obatnerogon yogokhukha. 18Yogokhukhama at Yesus ku akla ukigin thalekma, at ap mokat inobabut weak meke akla ukiluk welageikhe meke etnogo nen, men yogokhikhe,
“An nipisak nekhe dogouok nen, luok o,” iluk ane a'buarek negen yogokhikhemo, 19at Yesus nen, men yogokhikhe,
“Dek o. Haila lano o. Lanok nen, ninoe Etagapogot etnogo nen akmu nealok nen, yigithogon hano hagatnakhe, iluk hougi hagarumi yogeisa lano,” iluk asuk warogo la'isikhe. 20La'isikhemo, o kota 10 baga halek werekma lageikhesik men yogeisilik nekhe lageikhe,
“Yesus nen itithogon hano hagatnakhe, yigithogon hano hagatnakhe,” iluk yogeisilik lageikhemo, it inebe tha'bokhogonat nen,
“Nayuk o,” iluk hogorakhukha.
Yairus a'but dok, he ageikhe amep wago motok welageikhe meke dok, Yesus nen hano hagarinakhikhe wene
(Matius 9:18-26; Lukas 8:40-56)
21Itithogon hagakhukhasik, Yesus i yekelek etnogo aik yi bagake ku warogo itali ageikhe. Itali agunem, akhuni inebe doalegat at oba i aik oba natogosi agoukha. 22Natogosi agoukhasik werekma, o akhuni Yahudi meke sembayan egarekma inougi kain welagoukha meke ageikhe etaga Yairus wageikhesik, Yesus ileken lakhalok, apma itibagal yukukhogon heagei wakhe dogolik, men yogokhikhe,
23“Yesus noe. An na'but horlak ebe aban meke oba u nen watlasigiluk hagakhe korlek wagei. Hat nen hiki hakhaumo ebe hano atluk iluk dogoak nen, nipisak luogoluk hayoko wagei o,” iluk ane a'buarekhogon yogokhikhe. 24Itithogon yogokhikhemo ipisak lagoukha.
Lagunem akhuni motok doalegat Yesus oporlik laga dogolik kerlek-kerlek Yesus oba ageikhe nen hokokhogon la'igik hagarik lagoukha. 25Lagoukha etoma meke, he ageikhe amep wago motok werek korlek 12 tahun hagatlageikhe. 26Amep wago motok dogolik, dokter lak nen hano hagasuagaluk yi dokter ti dokter inayoko 'biluk, u oko wogeisekhe dogolik, ameke motok degetdisikhe mekeat he, amep etnogo dek ageidek yabokane ebenageigat waga lageikhe. 27-28Amep itithogon wago motok dogolik, Yesus abok asuk holiluk, akla nen, men apasikhe,
“An at asu niki hakhaumo, namep yi dek asigin o,” akla apalok lageikhesik, Yesus oporlik horokhogon laga dogolik, asu iki hakhasikhe. 29Iki hakhekhe korlek eranogoat, amep etnogo 'bogokhogon dek ageikhemo, akla nen he,
“I. An u weagat welagei etnogo, hano hagatnakhe higi,” iluk akla hutdisikhe. 30Itithogon hutdekhe korlek, at Yesus akla nen,
“Eiye! An nobatnerogon elalin hano hagarinakherek etnogo meke nakla nen akhuni aperek inoba laga ekagat higi,” iluk eranogoat hutdisikhe. Hutdisikhesik nen akhuni doalegat emenogo ileken dagakhogon 'birisasikhesik nen, men yogeisasikhe,
“An nasu tha nen iki hakhekhe,” iluk inoba hinok waganhikhe. 31Waganhikhemo, at agarumi ane waganhe lagoukha meke emenogo nen, men yogokhukha,
“Eiye! Noe. Nit ninebe doalegat haliluke kerlek-kerlek waga lago yoma hileken nisekhe dogoligat,
Tha nen hakneekhe, iluk ekhe lagan?” iluk yogokhukha. 32Itithogon yogokhukha mekeat he, at Yesus nen,
“Tha nen hakneekhe,” iluk ebe hutdigiluk ileken dagakhogon 'birisilik lageikhe. 33'Birisilik lagunem at he etnogo akla nen,
“An nen hakhigima hano hagatnakhe etnogo meke iliogo higi,” iluk hutdisikhesik ayuk atluk, oageleke dik-dik hagakhe dogolik, Yesus apma itibagal yukukhogon hureklasi lageikhesik,
“An itithogon welagarik nen, yigithogon hagakhi o,” iluk tha'bokhogonat pilinerogo yogokhikhe. 34Yogokhikhemo, at Yesus nen men yogokhikhe,
“Neru. Hetaiken noba hakotdegen iti nen hano agan o. Halok he, hakla hanorogon lan o,” iluk la'isikhe.
35Itithogon yogokhe korlek eranogoat, o akhuni Yahudi meke sembayan egarekma inoe kain etnogo aila nen agarumi yoko wagoukhasik men yogokhukha,
“Noe. Ha'but horlak etnogo arat watlagama nen wago. Halok he, ninoe kain wene yakulnisekherek meke ithi, isok alomarogo hipisak luogoluk oba tiolusak nogo? Dek o,” iluk yogokhukha. 36Yogokhukhama at Yesus nen, it inane asuk holhikhesigat, inane thogotdisalok kain etnogo men yogokhikhe,
“Hakla wene munini ebekhun o. Hetaiken an noba hakotdiluk nipisak luok o,” iluk yogokhikhesik lagoukha. 37Lagoukhasik, akhuni inebe doalegat yogeisekhe dogolik,
“Ninoporlik wisusak dek. It Petrus men, Yohanes agot Yakobus ipisak men anek ninom lugun o,” iluk inom lagoukha. 38Lagoukha hak, kain etnogo aila akhuni doalegat warekma dogolik, inane apik naik-waik de agunem lagoukha. 39Lagoukhasik, at Yesus ebe uma ukisikhesik men yogeisasikhe,
“Hit he, de naik-waik de aga lagap iti nenaluk. Horlak iti watlageidek, noge iliogo,” iluk yogeisasikhe. 40Itithogon yogeisasikhemo, it akhuni emenogo nen obato kogat agoukha. Obato kogat agoukhama, at nen inebe tha'bokhogonat thikmanke ula'isasikhe. Ula'isalok nen, it horlak etnogo agosa opase men, Yesus agarumi inom lagoukha meke emenogo men, it anek wogosik o kakok palek horlak etnogo welageikhemo ukisukha. 41Ukisukhasik, iki hakhalok, nit ninane baga,
“Horlak yi, na'but. Melasin, iluk yokhekhe lagei o,” iluk u hak, it inane baga,
“Talita kum,” iluk yogokhikhe. 42Itithogon yogokhe korlek eranogoat, horlak etnogo ebe itaklageikhesik oba nen, umur 12 tahun hagatlageikhesikmo nogo nen, ebe melatluk, umake lageik, wageik, hagakhikhe. Itithogon hagakhikhemo, it akhuni emenogo inileken hasukhasik,
“Eiye! Nayuk e,” iluk apik hogorakhukha. 43Itithogon hogorakhukha mekeat he, at Yesus nen, men yogeisasikhe,
“An hagakhunem hinileken neegep meke iti, akhuni aperek motok yogeisugup o,” iluk inasuk wakhikhesik nen,
“Horlak ithi apiri ageikhe noak nen wogotni o,” iluk yogeisasikhe.
Currently Selected:
Markus 5: LAIDNT
Highlight
Share
Copy
Want to have your highlights saved across all your devices? Sign up or sign in
