Wakkagagerak 21
21
Itak nda'nagagerak wone
1-2At Aliku ALA nen, “Togop eerigin o,” yinuk, Tara wone yoreegerak nogo abeke nagagerik, imbirak wone abuk nggaruk togon mbaneegwaarak nogo eyom ndak-ndak ari wage mbareegi, at Abarakam nogo abu anggok agagerak kagak, Ala yoreegerak ndak-ndak kwe Tara nogo abila age nagagerik, aagaluk Abarakam obaane'me wulaga aret ndareegerak. 3Ndake mbareegi, at Abarakam nen wulaga nogo endage Itak aret tooneegerak. 4#Wak. 17:12; Nap. 7:8 Toombege nagagerik, at Ala nen wone lengganogo yoreegerak nogo ndak-ndak, Itak nogo ndarak kagak nogo 7 yippunuk ko'lu paga agabolo mbaneegerak. 5At Abarakam nogo ndarak kagak tahun 100 eeppunuk aret aput Itak nogo ndareegerak. 6Ndake nagagerik, at Tara nen ari logonet, “An niniki ale'nggen paga i'ndok kambikit nduk, Ala nen eeppanegerak ndak-ndak it aakumi ando inaruk konembogo logomenggaarik, an eekirak paga iniki ale'nggen mba'nuk i'ndok kanggo logogun o.” 7Ari nagagerik, at Tara nen ambinom ari logonet, “An nabila aga'lek neegak, Tara elege ndappunuk elak kunigin o, yinuk, ta nen Abarakam togop yoriyak op mbakop? Togop yuurak meek tit kagak kwe, an nore abu anggok agaarak kagak obaane'me wulaga aret ndaki o,” yinuk, yereegerak.
8Wulaga nogo tawe age mbareegi, yilak mbaneegerak. Ndi, yilak mbaneegerak nogo eyom paga Abarakam nen nggelak nggwok lareegerak.
Kwe Agat Itamayen imbirak wumbiyareegerak wone
9Ne ambi paga at Tara nen kwe Agat awi Metit mendek aagaluk Abarakam obaane'me wulaga Itamayen ndareegerak nogo nen at aagaluk wulaga Itak nogo meek eerogo pegak mban eeke enegen kage nagagerik, 10#Nggal. 4:29-30 Abarakam yoge logonet, “Kat keyate naagaluk wulaga Itak kolage logonet, at kwe nayeloman Agat aagaluk Itamayen yi inom wogoriyak lek me, kwe ti, aagaluk imbirak mbet mugogo wumbiyet o,” yoreegerak.
11Wone togop yoge mbareegi, at Abarakam nen, “Itamayen togon an naput aret me, kwe yi, wone nonggop togon yo'nigi ubi?” yinuk, iniki abu piirik eeke mbareegi, 12#Oro. 9:7; Ibr. 11:18 Ala nen Abarakam yoge logonet, “At Abarakam ombowologwe ti, at Itak paga nen aret, yogo logogun me, kayeloman aagaluk wulaga Itamayen imbirak paga kiniki piirik eerugun. Ata, kakwe Tara nen yokkege nogo aret konembunuk eeru o.” 13Yoge nagagerik, “At kayeloman aagaluk wulaga nogo ti, kat kaput aret me, at togon anebunu nggwok aret wiganuwak nduk, ombowologwe ambik agago piyaagin o,” yoreegerak.
14Yoge mbareegi, ko'lu kuubondendok at Abarakam nen mbi inom, niyo ndomba agabolo paga toolak inom, nenet nege logowak nduk, at Agat omba pege nagagerik, wulaga nogo imbirak, “Nanip o,” yinuk, wumbiyareegerak o Mberetiyeba karume time yelok-nggolok nugu nogogwaarak.
15Nugwi me, niyo ndomba agabolo paga toolak nogo aret lek age mbareegi, kwe Agat nogo aagaluk eyoongga mbuuluk logonak me time teppereegerak. 16Teppege nagagerik, “An naagaluk nenegen neegak kambuurak ti neebi o,” mba'nuk, tayorogon maale namburik wobok yi nage menggim ndak-ndak kwi'nari nagagerak. Kwi'nage nagagerik, le nggwok yereegerak.
17At wulaga Itamayen oone ari nogo Ala nen aruk konengge nagagerik, yonggo nappiya wage menggerak malayikat ambi agi mbogut paga nen kwe Agat nogo yoge logonet, “Kwe Agat yi wae. Kat nano paga kiniki piirik agandik o? Kat kaagaluk punuk waganom oone ari nogo, muk Ala aruk konenggerak me, kagabiti mbarugun o. 18An nen at Itamayen nogo anebunu mondok nggwok aret wiganuwak nduk, ombowologwe ambik agago piyaagin me, kaagaluk ti, wa nage logomenggendik, liirogon tawe eeke logot o.”
19Yoge nagagerik, Ala nen kwe Agat nogo enegen tobo wogoge mbareegi, niyo eneeri ambi enegen kage nagagerik, niyoowak nogo wonok niyo mondok eno korok togon tooke nagagerik, wonok aagaluk wogori wagagerak.
20Ndi, at wulaga nogo tawe age kagak, Ala arum aret wonagagerak. Wonage kagak at eebe o Paran karume nogome logonet, yigin paga nambuko menggaarak abu liippereegerak. 21Ndi, o karume Paran nogome aret wonage kagak, agalo nen kolaga awi Metit mendek ambi kwaarogo wogoreegerak.
Abarakam Abimelek imbirak wone mbaneegwaarak wone
22Ne ambi paga at aap Abimelek inom, at awuri yigin unde inowe endage Pikon inom, imbirak nen Abarakam wonage me wogo nogogwaarik, yogo logonet, “Kat Ala kimbirak logonet, yi eekak ndi eekak eerit nage menggendak keego ogoorik o. 23Ndi, togop me, kat nen an inom, an napuri inom, it ndappiyamenggaarak nen wiganak inom, pilit ninambokan laganggwi kiyo, nit niniki obeelom paga kat eeppagagwi ndak-ndak, kat nen nit togop aret eeppinanege, ndi, kat o yime ninom logonet, aakumi obeelom eeppiige, eeke logorak abet aret nineenu aruwok nduk, yogondak Ala enggaanom paga ya'i kumbuk mbanogo yo'niret o.”
24Yogo mbareegwa, at Abarakam nen, “Yogotak ti ndak-ndak aret eeko logowok o,” yinuk, kumbuk mbaneegerak.
25Kumbuk mbangge nagagerik, ti'nuk, Abimelek ayeloman mini nen Abarakam niyo tookak nggween kabunik tebenggologogwaarak nogo iniki, “Ao,” mbake logonet, Abimelek yoge mbareegi, 26at Abimelek nen, “Yogop eekaarak o, yinuk, mbet-mbet yo'niriyak me wonagandak o. Wone yi, an neenggo'lek aret me, yogondak mban aret konenggi ti, ta nen eekerak me yagan o?”
27Yoge mbareegi, at Abarakam nen ndomba inom, tapi inom, waganogo at Abimelek wogoge mbareegi, imbirak nen, “Nit togop aret eeko logowok o,” yinuk, wone abuk nggaruk togon mbaneegwaarak. 28Wone abuk nggaruk togon mbambogo nogogwaarik, at Abarakam nen at aanggumi ndomba kooli ineebe 7 kuli alik leenogo piige mbareegi, 29at Abimelek nen Abarakam kin wakkage logonet, “Ndomba kooli ineebe 7 alik leenogo piigendak yi nonggop nduk eeken o?”
30Yoge mbareegi, at Abarakam nen ari logonet, “Ndomba aagalogwe ineebe 7 kuli leenogo piigirak yi, wagangge logomenggendik, Niyo tookak nggween kabunik yi, at nen aret kabunggerak o, yinuk, kiniki aberak logorak nduk eekirak me, wamen o,” yoreegerak.
31Ndi, wone mbanggo nogogwam nogo ti, imbirak wone togop kumbuk mbaneegwaarak me, o ti endage Mberetiyeba aret o, yinuk, yogo nogogwaarak.
32It imbirak o Mberetiyeba nogome wone abu aret abuk nggaruk togon mbambogo nogogwaarik, at Abimelek at awuri yigin unde inowe aap Pikon nogo imbirak aap Pilitin iname time iniyokan nogogwaarak. 33Ndi, at Abarakam nogo o Mberetiyeba nogome eyo endage tamarika awi yappunuk logonet, “Kaliku Kitok Mondok Menggendak Ala o,” yinuk, endage alut eeke nagagerak. 34Ti eeke nagagerik, at Abarakam nogo aakumi Pilitin wonogo menggam mban aret wonagagerak.
Currently Selected:
Wakkagagerak 21: LAIDNW
Highlight
Share
Copy
Want to have your highlights saved across all your devices? Sign up or sign in
