Wakkagagerak 29
29
Yakup nogo Laban ame unggwi nagagerak wone
1Nogo abu aret eeppege nagagerik, at Yakup noorak mbareegim it aakumi o Kanan ambo'me oonegen wundi wage menggim pa'nggwe wonogo menggam nogome aret nagagerak. 2Nage nagagerik, enegen na'nage logonet, o karume taati niyo nenggak nggween ambi kabunik abiringga yugum kole naberak kagak, kambin-ndomba kenagan aago niyo toorirogo menggam time eraaninu windak wonogwe iyareegerak. 3Kambin-ndomba abok aret kuwak ari wogwe iinok, it ndegeninako menggaarak mendek nen yugum nggween kabunik ambe narak nogo paarogo kambin-ndomba nogo niyo toologo wogorogo nagaatik, abu nunggwi iinok, kabunik ambe nogo yugum obaane'me nappugwi, eeko nogogwaarak.
4Togop eekwi wonogwe me, at Yakup nen iya nage nagagerik, yorage logonet, “Noreewi o. Kit nggeeme mendek o?”
Yorage mbareegi, it nen, “Nit ninawi Karan mendek aret o.”
5Yogo mbareegwa, at Yakup nen kin wogiige logonet, “Aap Nakot ombooluk Laban nogo kineenu ilik, lek a?”
Yorage mbareegi, it nen, “E o. Ninom monggoorak nineenu aret o.”
6Yogo mbareegwa, at Yakup nen, “At eebe obeelom aret wonage ilik?”
Yorage mbareegi, it nen, “E o. At obeelom aret wonage o. Apuluk kolaga Araken ogoba aanggumi wogoren niyo wogoraagin wage iru ti, ket o.”
7Yogo mbareegwa, at Yakup nen it yorage logonet, “Wologo wae! Kambin-ndomba niyo wogoroorak o awo kagak wogoren wogotak me, niyo nunggwi iinok, iri'ngga ambinom mbanogo nawak nduk wogoren nanip o.”
8Yorage mbareegi, it nen wone onggo yogo logonet, “Nit togop eekulik o. Ata, kambin-ndomba nogo abok aret yime kuwak ari wogwe iinok, nggween kabunik ambe yugum narak nogo paarogo punuk, ninaanggumi niyo toologo wogorogo monggoorak o,” yoreegwaarak.
9At Yakup it inom wone awo mbangge wonage me, kolaga Araken nogo ogoba aanggumi wogoren nege menggerak me, niyo nawak nduk, wogoren wagagerak. 10At Yakup nogo nen at agalo iriluk Laban apuluk kolaga Araken nogo nen aap Laban aanggumi wogoren wage enegen kage nagagerik, niyo nonggo menggam nogome nage nagagerik, yugum ambe narak nogo ponggonogo nappunuk, ami aanggumi nogo niyo toologo wogoragagerak. 11-12Wogorage nagagerik, “An ti, kat kogoba awuluk Iribaka nogo aagaluk an aret o,” yinuk, ale'nggen nen Araken agandin eyak mbangge logonet, oone nggwok paga leenggu maareegerak. Leenggu maake mbareegi, at kolaga Araken nogo ame nggare agan ogoba yori nagagerak.
13At Laban nogo amboko Yakup wagaarak wone aruk konembege nagagerik, nggare agan owagam ka wagagerak. Ka wage nagagerik, agandin eyak mbangge logonet, keyage linggik-kambuk yogo nogogwaarik, wonok ame aret nagagerak. Ame nanuk, at Yakup nogo ame nen eerit wagagerak wone abok aret mbininogo yoreegerak. 14Yoge mbareegi, at Laban nen, “Wulaga wae! Kat abet aret an namiya mogonik aagaluk aret keegi o.” Yoge mbareegi, at Yakup nogo erami imbirak nogome logonet, tut ambit peneneegerak.
Yakup nen kumi Araken Leya imbirak wogonabeegerak wone
15Yakup erami Laban imbirak logonet, tut ambi penengge mbareegi, at Laban nen Yakup yoge logonet, “An nami aret me nduk, kat onggo lek we aret neyabu kani eeppanege logorak mbaken? Togop eeriyak meek me, an neyabu-kani eeppanege onggo, Ndi mendek wo'niriyak, yu o,” yoreegerak.
16At Laban apuri komologwe mbere'ndak, manggu endage Leya, ndi, awuluk endage Araken wonogogwaarak. 17At oweeluk Leya nogo etenggen mbeenak lek kumi kokwak aret wonagagerak, ndi, at awuluk Araken nogo perak, eebe mondok amuni mbanak etenggen kigirikwe lombok tawe aret wonagagerak. 18At Yakup nogo nen awuluk Araken nogo abuwa lombok mbareegerak me, Laban yoge logonet, “Kat kapuluk kolaga awo tawe Araken ti aret kolaakit nduk, keyabu eeppagage neegak, tahun 7 eerikit o,” yoreegerak.
19Yoge mbareegi, at Laban nogo nen, “Kolaga yi, aap alik wogorookwak me, kat aret wokkirikit nduk, nimbirak aret logowok o.” 20Yoge mbareegi, Yakup nogo kolaga Araken woorak nduk, yabu eeke kagak, tahun 7 eereegerak kwe, kolaga ti lombok koloorak iniki pereneegerak me, tahun 7 eereegerak kwe, “We ne mande wonage agarik,” mbareegerak.
21Eeke nagagerik, at Yakup nen Laban yoge logonet, “Tahun 7 yogoorak nogo abu aret eekirak me, nakwe kolaakit nduk, wo'niru o,” yoreegerak.
22Yoge mbareegi, at Laban nogo aakumi ambik aret o nogome mendek inayonggo pereegerak kuwak ari wogo mbareegwa, laago nggwok lareegerak. 23-24Laago nogo nonggo nogogwaarik, oonikiya at Laban nen aput kolaga Leya nogo wagangge, at ayeloman Tilapa nogo apuluk Leya ayeloman logowak nduk, wagangge, eeke nagagerik, Yakup wogoge mbareegi, Leya nogo imbirak nogo yereegwaarak.
25Nogo yinuk, ko'lu kuubondendok at Yakup nogo enegen pekkage nagagerik, Leya nogo aret mbareegi, Laban yori nage logonet, “Nami wae. Kat nonggop eeppanegendak o? Kapuluk Araken kolaakit nduk, kake yabu eeppagage nagagirak nogo lek a? Eeke nagagirak nogo kwe, nonggop nduk an nambo'me laganggendak?”
26Yoge mbareegi, at Laban nen wone onggo yoge logonet, “Oweeluk kolaga'lek kagak, awuluk aa'nduk kologolik me nduk, eekirak o, namboko! 27Togop me, napuluk yi, lambumbagago logonet, laago lakwi yi, ne 7 abu lappunuk nen awuluk Araken koloorak op aret o. Ndi, koloorak onggo tahun 7 ambinom yabu eeppanenok o,” yoreegerak.
28Yoge mbareegi, at Yakup nen, “Op aret o,” yinuk, laago lareegwaarak nogo lek ari nage mbareegi, at Laban nen kolaga Araken nogo Yakup akwe kolaawak nduk, wogoreegerak. 29Ndi, wogoge nagagerik, apuluk Araken ndegengge logowak nduk, ayeloman kolaga Mbilaka inom aret wogoreegerak. 30Wogoge mbareegi, at Yakup nogo nen Araken oweeluk Leya imbirak nogo yege nagagerak kwe, Araken nogo mban iniki kunik eeke logonet, Leya ambokan punuk, wonagagerak. Ndi, kolaga Araken waganeegerak nogo aap Laban eyabu eeppege kagak, tahun 7 ambinom aret eereegerak.
Yakup apuri ndaganabeegerak wone
31Yakup nen kwe Leya iniki kunik lek wonage nogo at Aliku ALA nen kage nagagerik, aagaluk ndaruwak nduk, eeppereegerak kwe, Araken nogo perak, wubili aret wonagagerak. 32Ndi, Leya nogo abila age nagagerik, aagaluk manggu wulaga aret ndareegerak. Ndake nagagerik, ari logonet, “At Aliku ALA nen an niniki aaninggin wonage nogo neege nagaarik, naagaluk wulaga yi aret wo'negerak me, yogondak nen perak, at nogonggelo nogo iniki kunik ee'nake logonet, nabuwa mbarigin kagi o.” Ari nagagerik, at endage ti, Uruben tooneegerak.
33Ti'nuk peebi at Leya nogo abila a'nuk, aagaluk wulaga ambi aret ndake nagagerik, ari logonet, “Nabuwa nombaka'lek ambo'me munik negen eeppaninuk wonage nogo, Aliku ALA neege nagaarik, naagaluk wulaga ambi inom wo'negerak me,” yinuk, at endage Timeyon tooneegerak.
34Ti'nuk, at kwe Leya nogo ambinom abila a'nuk, aagaluk wulaga ambi aret ndake nagagerik, ari logonet, “Yogondak perak, nogonggelo obaane'me naagalogwe kenagan aret ndaganakirak me, iniki kundugu nggwok lombok ee'nabigin kagi,” ari nagagerik, endage Lewi tooneegerak.
35Ti'nuk, at Leya nogo ambinom abila a'nuk, aagaluk wulaga ambi aret ndake nagagerik, ari logonet, “Naagaluk yogondak ndakirak yi paga nen perak, at Aliku ALA mban wogoppege logogin o,” ari nagagerik, wulaga nogo endage Yekura tooneegerak. Toongge nagagerik, wonage logonet, ne ti eyom paga ambi ndaganabulik puk aret agagerak.
Currently Selected:
Wakkagagerak 29: LAIDNW
Highlight
Share
Copy
Want to have your highlights saved across all your devices? Sign up or sign in
