Lukat 19

Yetut Takeyut imbirak eereegwaarak wone

1At Yetut o Yeriko unggwi wage nagagerik, nok-nok wage me, 2aap ambi endage Takeyut o unde inake wu kuwak eeka inowe eenggi abu warak lombok wonagagerak. 3At nogo nen, “Yetut ti, nonggop kwe?” yinuk, pekkaakit nduk, eereegerak mendek anggup kuwagaluk, ndi, aakumi ambik kuwak eerak wonogwe me, pekkoorak meek agagerak. 4#1End. 10:27; Yet. 9:10 Meek age mbareegi, “Yetut tu yi paga wage kagi,” yinuk, kaakit nduk, at aa'nduk mbe agan nage nagagerik, eyo paga laganeegerak.

5Eyo paga laganeegerak wonage me, at Yetut wok yi wage nagagerik, ena nikkage logonet, “Takeyut wae. Yogondak kat kame nimbirak nogo yi noorak me, mbet wambi mok o.” 6Yoge mbareegi, Takeyut nogo mbet-mbet eyo paga nen wambi wage nagagerik, keyage wappunuk, ale'nggen mbakak imbirak aret at ame nogogwaarak.

7Yetut imbirak nage it aakumi nen kogo nogogwaarik, ineebi-ineeba yogo logonet, “Aap maluk eeke menggerak imbirak ame nogo yuurak nduk, nogwe yi kiraap?”

8 # Wund. 22:1; Unde 6:4; Lin. 5:7; 2Tam. 12:6 Yogo mbareegwa, at Takeyut nen it apit inenggaanom paga Yetut yoge logonet, “Nogoba o. An namindik-namendek mogonogo aap ineenggi lek kenok, wogorage, aap wi-wi aganake nagarak kero, obaane'me onggo 4 aret wogorage, eerikit o.”

9Yoge mbareegi, at Yetut nen, “Kat kunduk Abarakam ombooluk aret me, kat kapuri kinom yogondak aret kinagap ndakkologop o. 10An aap aret nda'nagagirak yi, it aakumi kobak ogogwaarak nogo kwaarogo inagap ndarikit nduk, wambi wagagirak o,” yinuk, yoreegerak.

Wu mbuti emas paga eegu laarogo yoragagerak wone

(Mat. 25:14-30)

11It aakumi nogo inaruk konenit wogwe iigak, at Yetut nen wone yoranet inom o Yerutalem wok yi wambi wogo nogogwaarik, it aakumi nen Ala abu'me piige menggim mbet-mbet tena'me ariyak mbakwi yelok iige nagagerik, wone eegu laarogo ambi yorage logonet, 12“Aap nagawan aput ambi nen, O nda time nage neenok, aap nggwok nendagembogut mippanugwi iinok, woraakit o, yinuk, 13naakit nduk, eeke logonet, at ayeloman mini ineebe 10 wiirage nagagerik, wogo mbareegwa, awu mbuti emas mendek 10 aret mogonogo wogorage logonet, An waga'lek neegak, nawu yi paga yi mendek ndi mendek kunit nogo logonet, ambinom nabenggo'net nogo logonip o.

14Yorage nagagerik, nagagerak. Nage kagak, it at abu'me menggaarak nen at ineebi lombok ombako logonet, Kat yi, ninowe kendagembogut a'nuk, ninarum logorak nineebi o, yinuk, yori nawak nduk, inawuri nappiyareegwaarak.

15Nappiyareegwaarak yori nogogwaarak kwe, kagak, aap nogo endagembogut mippogo mbareegwa, ame iyokan wage nagagerik, Nawu nogo paga it mande nabenggolagaarak kaamun? yinuk, ayeloman mini awu wogoragagerak nogo wiiragagerak.

16Wiirage mbareegi, ayeloman aa'nduk wagagerak nogo nen, Nogoba o. Kawu wo'negendak nogo paga 10 ambinom nabenggolagarak o.

17Yoge mbareegi, ogoba nen, Naput wa! Nayeloman obeelom kat aret me, abu op lombok eekendak o. Mbuuluk eeriyak mendek kwe, kagak, liirogon eerit nege nagandak me, yogondak o kota 10 unde logonok nduk, mippagi o.

18Yoge mbareegi, ambi ambokan wage nagagerik, Nogoba o. Kawu wo'negendak nogo paga 5 ambinom nabenggolagarak o. 19Yoge mbareegi, ogoba nen, Ndi, kat o kota 5 aret unde logonu o.

20-21Yoge mbareegi, ambi ambokan wage nagagerik, Nogoba o. Kat kogogumbuk aret menggendak me, ndi, kogogumbuk logonet, kat nen puulik kwe, wagangge, ndi, awi yumbunulik kwe, anggen yugu mbanggolage, eeke menggendak me, nagabiti nen kawu nayuma nggerenak porogo wonagarak nogo yi o, yinuk, yoreegerak.

22Yoge mbareegi, ogoba nen ayeloman nogo yoge logonet, An eeriyak yokkege kwe, noone tagangge menggendak kat nayeloman yi, koone yagandak nogo paga kenggali wappagi o. Nogogumbuk logonet, puulik kwe, wagangge, ndi, awi yumbunulik kwe, anggen yugu mbanggolage, eeke minggirak kat keenu menggendak kwe, 23an wage neenok, nawu inom, porogo logomenggaarak onggo inom, an wa woraakit lak, it aakumi inawu nggwok aruwak nduk, eeko menggaarak nogo, wogoraga'lek nonggop nduk wonagagindak?

24Yoge nagagerik, aakumi at inom wonogwe nogo yorage logonet, Nawu at porogo wonage nogo ndinogo aap wu 10 nabenggolegerak nogo wogo'nip o.

25Yorage mbareegi, it nen, Nogoba o. At ti, muk wu 10 wonage ti.

26 # Mat. 13:12; Mrk. 4:25; Luk. 8:18 Yogo mbareegwa, at nen, It aakumi inamendek wonage kenok, ambinom lunogo wogorage, ndi, inamendek lek kenok, mbuuluk porogo wonage nogo aret ndingge, eeke kaamunggup o. 27Ndi, it ninom ogoorak logonet, At ninowe endagembogut a'nuk, ninarum logorak, Nineebi o, yagaarak nogo perak, wogoret wogo logomonggotik, nenegen neegak, inoo'nip, yoragagerak o,” yinuk, Yetut nen aakumi nogo yoragagerak.

“Ninowe endagembogut yi aret,” agan wogogwaarak wone

(Mat. 21:1-11; Mrk. 11:1-11; Ya. 12:12-19)

28Yetut nen wone ti yorage nagagerik, at aa'nduk o Yerutalem wage me, oone waganggwi inom wogo logonet, 29puut endage Tayitun eegwa'me o yaga'lelo Mbetapage inom, Mbetaniya inom, panggo yi wogo nogogwaarik, at oone waganggwi mbere nappiige logonet, 30“O yaga'lelo irukuna time nanip o. Awo mbo unggwi nogo logonet, keledai awooluk aakumi amborowak paga kwi'naga'lek mbarenak kinigen kogo logomonggotik, nogo aret piinogo wonok wa'nu o. 31It aakumi time nen, Kit nonggop nduk keledai ti, piinggo ogotik o, yokkirogwe iinok, kit nen yorogo logonet, Nit ninogoba keledai lek me, Wa nanip o, yo'nirage mbaki, wa wogo, yoraanu o,” yinuk, nappiyareegerak.

32It nappiyareegerak nogo, nogo nogogwaarik, yoragagerak nogo ndak-ndak aret kogogwaarak. 33Kogo nogogwaarik, keledai awooluk nogo piinggwi me, it aap keledai unde nogo nen, “Keledai ti, nonggop nduk piinggo ogotik o?”

34Yorogo mbareegwa, it nen, “Nit ninogoba keledai lek me, Wa nanip o, yo'nirage mbaki, wa wogo o,” yorogo nogogwaarik, 35wonok Yetut owagam pi wogogwaarak. Pi wogo nogogwaarik, inambogoyum endekem mendek nggoorogo keledai amborowak paga lenggembogo nogogwaarik, Yetut nogo keledai amborowak paga kwippereegwaarak. 36Kwippogo mbareegwa, Yetut wage kagak, it aakumi inambogoyum tu nggwok paga mbiganogo ndoombit wogogwaarak.

37O Yerutalem panggo yi wogwe iigak, tu puut Tayitun wambi wogo menggam nogome aakumi at oone waganggwi mendek abok nen eerubok mendek ambik eerit nage nogo inigen kogo nogogwaarak me, inale'nggen nen keekok agan wogo logonet, Ala endage alut eerit wogogwaarak. 38#Nda. 118:26 Keekok agan wogo logonet,

“Ninogoba Ala nen ninowe endagembogut nappi wage yi, endage wogoppuwok o.

It mbogut paga menggaarak nogo iniki tayenak logonet, inale'nggen mbakwi,

Ndi, it mbogut irimbaga lombok menggaarak nogo Ala tiyappugwi,

Eeko logowak o,”

yinuk, agan wogogwaarak.

39Agan wogwe nogo, it Pariti mendek ando nen aakumi apit kuwak eeri wogogwaarak nogo inenggela'me logonet, Yetut yogwi, “Ngguru wae. Koone waganggwi yi, mberiret o.”

40Yogo mbareegwa, Yetut nen, “Wologwe! It aakumi yi, inoone puk logonetak en, yugum yi, inoone yogo logonetak o, yinuk, yokkiragi,” yoragagerak.

O Yerutalem kage nagagerik, le yereegerak wone

41Yorage nagagerik, o kota Yerutalem panggo yi wage nagagerik, enegen kage logonet, le yereegerak. 42Le ari logonet, “Kat Yerutalem yi, yogondak yi eyom paga nonggop agago kiniki ugun obeelom logomunggun nduk, eeppagarak nogo, keenu agambok eekendak me, ao, kombake kwe, yogondak kenegen kage keyo, nobarak wonage o. 43Ala yi eyom aret neya wagaarak o, yinuk, yelok koolik me, kame nen wundi nage keyo, it kinom wim mbanak nen yagat wurogo pagagwi, wanggekkakwi, agi-ogu nen, iru-ogwe nen, yigikkabuwok nduk, panggo yi wogwe, eeko logonet, 44kawi yugum paga wurik yi, yugum ambi obaga lu'luk aago logogin lek o. Langgunogo pogo logonet, kaagalogwe kinom abok aret mondok pup eerogo pinagarak eyom panggoni woraagin o,” yinuk, yoragagerak.

Ala awi wurik me ndegeneegerak wone

(Mat. 21:12-17; Mrk. 11:15-19; Ya. 2:13-22)

45Ti yoranuk, Ala awi wurik me unggwi nage nagagerik, it aakumi yi mendek ndi mendek onggo kunggologwe nogo mugogo wumbiige logonet, 46#Yet. 56:7; Yer. 7:11 “An nawi wurik yi, Tamban eeko menggam logorak o, yinuk, liiru mbaneegerak kwe, kit perak, o yi, aap yogoot woppunuk, kiraa'nari unggwogo menggam eerogo pugwi kiigi o,” yoragagerak.

47 # Luk. 21:37 Yetut ko'lu-kii'me Ala awi wurik me wone mamunirage nagagerak. Mamunirage nagagerak kwe, it Ala unde inoweewi inom, it Ala wone liiru mbanak unde inom, it aakumi inoweewi inom, at Yetut wariyak nduk, eereegwaarak kwe, 48aakumi nen at wone yorage nogo iniki kundugu lombok eeko logonet, inigen at mban pippak ugwi me, “Nonggop waruwi kwe?” yinuk, puk ogogwaarak.

Currently Selected:

Lukat 19: LAIDNW

Highlight

Copy