Lukat 8

Kumi nen Yetut ake eeko nogogwaarak wone

1Ti'nuk, at Yetut nen obeelom wone Ala abu'me piyoorak wone nogo kota nggwok me inom, mbuuluk me inom, yoranet nege nagagerak. Nege logonet, at oone waganggwi 12 nogo inom nage me, 2#Mat. 27:55-56; Mrk. 15:40-41; Luk. 23:4 it kumi ando kugi inikime unggwagagerak kunduk, andi-pandi aganabeegerak kunduk, at Yetut obeelom eeginabeegerak nogo ti, inom aret nugu nogogwaarak. It kumi obeelom aganabeegerak nogo ti, kwe Mariya endage ambi Magaralena yogo nogogwaarak inikime nen kugi ineebe 7 wumbiyareegerak nogo inom, 3at Keroret ame arum waka endage Kutat akwe Yokana nogo inom, kwe Tutana inom, ndi, kumi alik apit inamendek paga Yetut at oreewi inom inake eeko nogogwaarak nogo inom, Yetut inom nogogwaarak.

Aap awi yumbunit nagagerak eegu laarogo yoragagerak wone

(Mat. 13:1-9; Mrk. 4:1-9)

4It aakumi apit yi awi ndi awi nen at owagam kuwak eeri wogwe iigak, at wone eegu laarogo ambi yorage logonet, 5“Aap awi yumbungge menggerak unde nen awi yumbunikit nduk, wundi nagagerak. Wundi nage nagagerik, yumbunit nage kagak, ando tu paga wambit nagagerak. Tu paga wambit nagagerak nogo aakumi iniyok paga aan lebenogo pit nogwe iigak, towe nenet nogogwaarak. 6Ando yugum eeri paga wambit nagagerak. Yugum eeri paga wambit nagagerak nogo ti, mbilaneegerak kwe, yi amburu lek me, mbuk aret agagerak. 7Ando iri'ngga alok-palok me wambit nagagerak. Iri'ngga alok-palok me wambit nagagerak nogo ti, iri'ngga inom laganeegerak me, iri'ngga nen mbanogo wuppereegerak. 8Ndi, ando nggween mili abe paga wambit nagagerak. Nggween mili paga wambit nagagerak nogo ti, mbilangge nagagerik, mili kwit agan lagangge logonet, ero ambi nen anggen 100 yege, ambi 100 yege, eereegerak o,” yoragagerak.

Wone ti yorage nagagerik, oone nggwok ari logonet, “Wologwe! Kinaruk koneniyak kenok, liirogon aret konenggo logonip o,” yinuk, yoragagerak.

Nonggop nduk Yetut wone eegu laarogo yoragagerak wone

(Mat. 13:10-17; Mrk. 4:10-12)

9Yorage mbareegi, at oone waganggwi nogo nen Yetut kin wokkogo logonet, “Kat wone eegu laarogo yo'niragandak nogo alom ngge nduk yo'niragan o?” 10#Yet. 6:9-10 Yogo mbareegwa, at Yetut nen, “Ala abu'me pinagarak wone inikime lubuk mban wonagagerak nogo kineenu arubagip nduk, Ala nen kilikkiroorak mbake menggerak kwe, it aap ando nogo nen perak,

Inigen kogwe kwe, yelok kogwe,

Ndi, inaruk konenggwi kwe, inikime waganggwi,

Eeko logokwak,

wone eegu laarogo mban yorage minggirak o,” yoragagerak.

Aap awi yumbunit nagagerak eebe yoragagerak wone

(Mat. 13:18-23; Mrk. 4:13-20)

11Yorage nagagerik, “Wone eegu laarogo yokkiragarak nogo eebe yokkira. Awi yumbunit nagagerak nogo ti, Ala wone aret o. 12Tu paga wambit nagagerak nogo ti, aakumi nen Ala wone konembunuk, waganggwi iinok, Ibilit nen wage nagaatik, wone inikime waganggaatak nogo abet mbakwi paga inagap ndake kero, ndininuk wonok nggarek ari menggerak. 13Ndi, yugum eeri paga wambit nagagerak nogo ti, it aakumi Ala wone konembunuk, inale'nggen logonet, Ala wone waganggo nagaatik, luulu abet mbakwi kwe, inikime awi liirogon yakkoloolik me, peebi iniki abut mbangge eyom paga mbo pogo menggaarak nogo aret o. 14Iri'ngga alok-palok me wambit nagagerak nogo ti, it aakumi wone inaruk konenggwi kwe, ambi eeriyak nduk, Ao, yinuk, iniki piirik wonogwe, ineenggi warak eekkoloorak mban iniki aberit nugwi, nggween paga ale'nggen logorak mban iniki koonit nugwi, eerit nugu logonet, wone yugu nogo mbanogo wuppogo menggaarak nogo aret o. Anggen abe mendek abu yugulik aret menggaarak. 15Ndi, nggween mili paga wambit nagagerak nogo perak, it aakumi wone konembunuk, iniki abe lombok paga pippak waganggo nagaatik, nabenak mban eeko logonet, anggen yikkologo menggaarak nogo aret o,” yinuk, yoragagerak.

Ndi wuninogo togolowak abu'me kirappugulik wone

(Mrk. 4:21-25)

16 # Mat. 5:15; Luk. 11:33 Yorage nagagerik, ambinom yorage logonet, “Ndi wuninogo punuk togolowak paga nobappugwi, nogo yugu menggam abu'me pugwi, ti eekulik o. Ata, wuninogo punuk, it aakumi tu unggwi wogwe nogo eya kaawak nduk, tena'me tiyarogon aret pogo menggaarak. 17#Mat. 10:26; Mrk. 4:22; Luk. 12:2 Yi mendek ndi mendek kumaarak wonage kenok, pilak ari, ndi, wone inikime taberak wonage kenok, nggwok paga aret pagak ari, eerigin o.

18 # Mat. 13:12; 25:29; Mrk. 4:25; Luk. 19:26 Togop me, wone nonggop konenggo monggotak nogo ti, kiniki liippinip o. It aap inamendek wonage kenok ti, ambinom lunogo wogorage, ndi, inamendek lek kenok ti, mbuuluk, Yi an mendek o, mbakwi iigak kwe, aret kolage, eeke kaamunggup o,” yinuk, yoragagerak.

Yetut agalo awuri wogogwaarak wone

(Mat. 12:46-50; Mrk. 3:31-35)

19Yorage me, Yetut agalo-awurilogwe at owagam wogo nogogwaarik, aakumi ambik kuwak aago me, Yetut wonage me oome ungguurak meek age mbareegi, 20aakumi nen, “Kagalo-kawurilogwe keyaawok nduk, wagaarak endekem wonogwe o.”

21Yogo mbareegwa, at Yetut nen, “Nagalo-nawurilogwe ti, Ala wone konembunuk, eeko menggaarak it yi aret o,” yinuk, yoragagerak.

Wiya koba'le, “Kabolok lek aru,” yoreegerak wone

(Mat. 8:23-27; Mrk. 4:35-41)

22Peebi ne ambi paga at Yetut oone waganggwi inom yiiro paga unggwogo nogogwaarik, yorage logonet, “Yi yenggenak ene paga wunda nawok o,” yinuk, wunda nogogwaarak. 23Wunda nogo logonet, at Yetut nogo, nogo yereegerak. Nogo yege kagak, yi yenggenak me o wiya koba'le nabuninuk wage logonet, yiiro inikime niyo yenggeni unggwage kagak, yiiro tebe agan wambuurak eereegerak.

24Tebe agan wambuurak eeke mbareegi, Yetut owagam nogo nogogwaarik, eenik eeppunuk, “Ninogoba wae! Ninogoba wae! Yi abu ndonggonninake agaarik o.”

Yogo mbareegwa, at eenik a'nuk, o wiya inom, yi kilaarak-mogonik eeke inom, mberege mbareegi, puk a'nuk, yi yenggenak nogo abolok lek agagerak. 25Lek age mbareegi, Yetut nen at oone waganggwi yorage logonet, “Kiniki noba panggombunuk, abet nombakwi nogo ti, nonggop agaarak me, yogo ogotik o?”

Yorage mbareegi, inagabiti nen at ambi nen at ambi yogak yogo logonet, “Wologwe! O wiya inom, yi inom, yoge kenok, at oone konengge menggerak yi, ta mbakop? Wi!” yinuk, pi wareegwaarak.

Aap kugi inikime unggwagagerak wumbereegerak wone

(Mat. 8:28-34; Mrk. 5:1-20)

26Pi wako nogogwaarik, yi Nggalileya ene paga nen o Nggerata wambi wogogwaarak. 27Wambi wogo nogogwaarik, at Yetut yiiro paga nen nggween paga wundi wage mbareegi, aap ambi kota time mendek kugi inikime unggwagagerak nogo Yetut ka nagagerak. O maan nen oome wonaga'lek kobeewak mbanak aakumi kanggaatak piigo menggam ndoome time aret wonagagerak. 28At nen Yetut kage nagagerik, abu'me ngginnari nage logonet, oone nggwok paga, “Yetut wae! At Tiyanak Lombok Menggerak Ala aput kat Yetut yi, an nonggop ee'nabikit nduk wagan o? An nooke keyo nduk, yokkigi o,” yoreegerak. 29Ti yoreegerak nogo ti, at Yetut nen kugi ogole warak aap inikime nen wundi nawak nduk, yoge me, aap nogo nen Yetut yoreegerak. O maan togon kugi nen aap nogo piga wagak mban eeke kenok, eenggi-iyok mbuti keele paga maappunuk, arum wonogwe iigak, keele ndenenak-penenak eerogo mbo punuk, kugi nen aap nogo piyaninuk karume aakumi lek me time pi nagak eeke nagagerak.

30Kugi nogo nen Yetut yoge mbareegi, at Yetut nen, “Kat kendage yu o!”

Yoge mbareegi, kugi ineebe ambik aap nogo inikime unggwogogwaarak wonogwe me, “An nendage Ambik o,” 31#Wayu 9:1; 11:7; 17:8; 20:1 yinuk, “Aap yi, inikime nen wundi nogwe niinok, mbuun me nappinaniyak ti mage o,” yoreegwaarak.

32Puurom elan me time wam ambik ambit me inogobak eerit nugwi me, wam inikime time unggwi nawok nduk, “Nappinanu o,” yinuk, inoone nabek togon Yetut yogo mbareegwa, Yetut nen, “E o. Time aret unggwi nanip o.” 33Yorage mbareegi, kugi nogo aap inikime nen wundit nogo nogogwaarik, wam inikime unggwogo mbareegwa, wam apit aret elan me nogome yuulu agan yi yenggenak inikime tabu-tabu unggwit nogo mbareegwa, yi nogo nen ndonggoninabeegerak.

34It wam ndegeninaka nen wam yi ndonggoninake nogo kogo nogogwaarik, kole mbaganit wogo logonet, wam ndonggoninabeegerak wone nogo o kota time yorogwe, o yaga'lelo lombok nogome yorogwe, eerit nugu nogogwaarak. 35Eerit nugu mbareegwa, eereegerak nogo it aakumi pekka nawok nduk, iname nen wundinuk Yetut owagam nogo nogogwaarik, aap kugi inikime nen wundi nagagerak nogo aap iniki a'nuk, yum yirik Yetut abu'me kwi'ndak wonage me ka nogogwaarak. Ka nogo nogogwaarik, inagabiti mbareegwaarak. 36Inagabiti mbako mbareegwa, kugi ambik aap inikime unggwogogwaarak Yetut obeelom eeke kogogwaarak nogo nen it nogogwaarak nogo yorogogwaarak. 37Yorogo mbareegwa, it aakumi o Nggerata yi awi ndi awi time abok inagabiti abu alik lombok aganabeegerak me, Yetut iname nen wundi nawak nduk, yogo mbareegwa, at Yetut yiiro paga unggunuk, iyok paga wunda nagagerak.

38Nage me, at aap kugi inikime wundi nagagerak nogo nen, “Nimbirak nawok o,” yinuk, oone nabek togon Yetut yoreegerak kwe, Yetut nen at ame nappege logonet, 39“Kame kiyok paga nage logomenggendik, Ala nen eekkakerak nogo mbininogo yorage a nak o.” Yoge mbareegi, wage nagagerik, at ame kota time abok aret, “Yetut nen ndogop ee'nakerak o,” yinuk, mbininogo yoranet nege nagagerak.

Kolaga kambeegerak, kwe amiya eeke, obeelom eeginabeegerak wone

(Mat. 9:18-26; Mrk. 5:21-43)

40It aakumi apit aret Yetut woraawak nduk, tokkogwe me, iyok paga lagi nage mbareegi, keyage warogo waganeegwaarak. 41Waganggo mbareegwa, it Yakuri tamban eeko menggam unde inowe aap ambi endage Yariyut nogo Yetut owagam wage nagagerik, abu'me tebe yinuk, “An name pe'neya nanok nduk, mok o,” yinuk, oone nabek togon Yetut yoreegerak. 42At apuluk ambolom kolaga ndarak tawe kagak, tahun 12 eereegerak abu kambuurak eeke me, yoreegerak.

Yoge mbareegi, Yetut nogo nage kagak, it aakumi ambik inom ninggi'nuk nogogwaarak. 43#Unde 15:25 Nogwe me, kwe ambi amiya eeke kagak tahun 12 eereegerak me, obeelom aruwak nduk amendek abok aret ndotet wogoragaatak kwe, obeelom aga'lek aret wonagagerak. 44Kwe nogo Yetut ambo'me wage nagagerik, ayum irip eenggi pigagangge kagak, amiya eeke nagagerak nogo lek aret agagerak. 45Lek age mbareegi, at Yetut nen, “Ta nen pi'nakerak?”

Yorage mbareegi, it apit aret lik-lek yogwe iigak, Peterut nen at yoge logonet, “Nogoba o. It aakumi apit yi, ninggikkeren wogo logonet, taga'mbit agago pagagwi iigi o.”

46Yoge mbareegi, at Yetut nen, “Lek o. An nomaawi ambi lek negen age kagarak me, ta nen pi'nakerak?”

47Yoge mbareegi, kwe nogo nen, “Muk yelok neegerak kagi o,” mba'nuk, agabiti nen aganak nugege logonet, Yetut abu'me tebe yinuk, aakumi abok inenggaanom paga alom ngge paga Yetut ayum pigaganeegerak inom, ndi, awo pigagangge kagak eebe obeelom agagerak nogo inom, mbininogo yoreegerak. 48Yoge mbareegi, at Yetut nen, “Napuluk o. Kiniki an noba panggombunuk, abet nombakendak paga obeelom agandak me, kinikiigun kame nak o,” yoreegerak.

49Awo yoge kagak, aap ambi it Yakuri tamban eeko menggam unde inowe ame nogome nen wage nagagerik, aap Yariyut nogo yoge logonet, “Kapuluk muk kanggerak me, ninogoba Ngguru yi, tu aanom warogo wonok nagun o.”

50Yoge nogo at Yetut aruk konengge nagagerik, Yariyut yoge logonet, “Kagabiti mbarugun o. Kiniki noba panggombunuk, abet nombake keenok, kapuluk obeelom arigin o,” yo'nuk, 51aap nogo ame aret nogogwaarak.

Nogo nogogwaarik, it aakumi abok endekem logowak nduk, yorage nagagerik, Peterut kunduk, Yaya kunduk, Yakobut kunduk, kolaga agalo-ogoba kunduk, nogo mban wogoret ame unggwi nagagerak. 52Unggwi nage nagagerik, aakumi apit aret le yogwe, ineebe wakkologwe, eekwi iige nagagerik, “Le yugup o. Kolaga yi, kanggerak lek we nogo yege me, le yugup o.”

53Yorage mbareegi, it aakumi nen kolaga nogo abu kanggerak ineenu me, at agi'ndok kambeegwaarak. 54Agi'ndok kanggwi iigak kwe, Yetut nen kolaga nogo eenggi pigagangge logonet, “Napuluk mi'naru o!” 55Yoge mbareegi, kolaga nogo iniki obaane'me ari wage logonet, mi'nagagerak. Mi'nage mbareegi, Yetut nen, “Kolaga yi, mbi nawak nduk, wogo'nip o.” 56Yorage mbareegi, kolaga agalo-ogoba nogo nen, “Ia!” yinuk, pi wako mbareegwa, Yetut nen, “Eeke neegotak nogo aakumi abu yoraagup o,” yinuk, inaruk wareegerak.

Currently Selected:

Lukat 8: LAIDNW

Highlight

Copy