MARKUS 4
4
Pi Kigii Te-tai Me
1Kigeena ma Jesus me wedaba iteida make etopai. Me wedaba okaapa kotuu timakijake okai koma matakai, uwo wado toune tijake. Me wedaba kede adaida peku watija kodaa tou.
2Okai mana muto inoudo ena dani awe-tai manaidaiga meido etopai, etopeete mana ko,
3„Juwidowei, pi kigii te-tai me kidi pi kigii taine podomai.
4Okai pi kigii teetigo pi ino ko ita watija gootidaa; tijake bedoudo mejake nojawigou.
5Ino ko mogo makiida gootidaa, maki beu daniida; tijake egaa kodo pakamai, maki beu dani kouja.
6Kodeja meuka wadoujo kijake denadaa tai; tijake mani beu kouja wei kogi tai.
7Ino ko dogo jupi gootidaa; dogo ejajake pi kodo mijo gapegape tai, tijake uta gou beu.
8Ino ko enaa makiida gootidaa tijake uta gojake abuma kidaa tai; ino ko jokagaati, ino ko mutoona, ino ko mepiija ka wija ajaago tidaa.”
9Tijake eteete mana, „Juwe-tijake gapa jago bagee juwii to tai,” etii.
Pi Kigii Te-tai Me Mana Boko Petai
10Jesus to kijake okai eepeete bagee ma, etope-tai wija ma gaati ma ka ena dani awe-tai mana kodo etidou.
11Tijake Jesus eteete mana, „Ugatameja jakimakita makiida ka boone-boone mana kodo kinita, kodeja ojaa bageidoopa ena dani awe-tai manaidaiga kei manaido etii.
12Okei dojake te domake-tita; daana juwijake te gamaketita; okei tedemijake peu awita ipa ejaikai na kojoka.”
13Tijake eteete mana, „Ikii ena dani awe-tai mana ko gai beu, mee? Kawe dani tijake ino ka ena dani awe-tai mana gamakija?
14Pi kigii te-tai me kidi ki mana muto kodo kigii te-tai kidi.
15Kei ke ita watija ka mana muto kigii tita kede: Okei mana juwijake okai kou gaa kodo kegepa duba kigii tita mana kodo Teege mejake jamotigou.
16Kii dani maija, mogo makiida ka kigii tita kede ke, mana muto juwijake okai kou gaa kodo egaa ideide ma jakimakai.
17Kodeja okei duba mani wejawii beu kouja mijo gaa to jakimakai; tijake mana kodo maida make gaagaa juwa, peepu juwa eti-toojogo, okai kou gaa kodaa okei jaikidokii.
18Joko daniido kede dogo jupi kigii tita kodo ko, okei mana muto kodo juwita bagee;
19tijake makiida ka gai peu agijo ma, tonawi agijoudo eukai mana ma, tuma tumaija agijo kibigi gai ma kodaa mana muto mijo gape-gape tai, tijake uta gou beu.
20Kodeja enaa makiida kigii tita kodo, kou ko mana muto juwijake jakimakita bagee; tijake uta gojake, jokagaati juwa, mutoona juwa, mepiija ka wija juwa ajaago tidaa.”
Lampu Kodo Kakate ka Taapumijawija
21Tijake Jesus eteete mana, „Me ka lampu doke-mejake kakate mijo makeigai, mee? Uno umii kejage mijo makeigai, mee? Beu, mee? lampu make-taida makija kodo ko.
22Tumaana agijo ma te boonimakita, kodeja ewaa tapa ketita. Daana gabo agijo ena ma beu, kodeja ewaida ke-tita.
23Meija juwe-tijake gapa jago kipi juwii to tai,” etii.
24Daana Jesusja eteete mana, „Ikii juwija mana epeepite gai. Ikii jaebijadojake menii kodo danite, kijaebijadojake kiniitai kouja, daana abuma maija kijamakii.
25Agijo jago bageepa euga menii kouja; daana agijo tagu bageepa make makita agijo kodo jamotii.”
Pi Pakamijake Ejai Ena Dani Awe-tai Mana
26Daana ino ka mana maija kii dani eteete, „Ugatameja jakimakita makiida kodo, me idaana makiida pi kigii tija danite.
27Okai uno umii ma, anigou ma, wanee ma agapi ma, daana pi kodo pakamijake ejai, kodeja kawe danite ejapa ko ewo.
28Maki kodaa uta podomijawii, edoga kidi pudu-pudu, tijake uta gobadaa. Gobadaa tijake miti ewaa kai uta duba kodo.
29Uta kodo enáá kai wagi ko duwa-tai bagee ebadikumii, uta duwai wagi kidoke kouja.”
Sesawi Pi Ena Dani Awe-tai Mana
30Daana Jesus eteete mana, „Inii kawe dani tijake Ugatameja jakimakita makiida ena dani awija? Má ena dani awe-tai mana ka ewaa tapa awija?
31Kou ko sesawi miteena dani bukaa; makiida wejake joko ka miti ma ko umina mijo daba kodeja,
32we-toojogo ko ejajake naapoudo ma ko euga ibo kijake ibo kago makii. Tijake okai kou mijo kodaa epa bede maki bede ka bedoudo kede geka migii,” etii.
Ena Dani Awe-tai Manaidaiga to Me Etopita
33Okai kou dani okai ena dani awe-tai mana inoudo ka mana muto kodo oowegai, okeija gaja danite.
34Ena dani awe-tai mana beudaiga okai oowegai beu. Kodeja etope-taido ma to toja gaa to, okai kou mana mutoudo kodo eti-menii.
Pekuuda Ukija Ipata Awii
35Okai kou naago kodo uwaataa kijake Jesus etope-taido „Mewei, inii peku adii no,” etii.
36Meido kodo Jesus uwei etijake, komaida toogi dani to etope-taido ka Jesus ouwii. Ino ka mijo koma maija okei ma enaimo.
37Kou gaa kodo ukija ibo peijo mijouwe kijake ukija kodo koma adaawe tai, gaadi edidaa taine dani.
38Jesus koma epaato eba maida uno umi-toojogo. Tijake okei matoki eteete mana, „Ei, Kuduu, inii bokaate kodo nigai beu?” etii.
39Okai anigojake ukija kodo ewidogijake peku kodo eteete mana, „Gabo. Ipadoke ti,” etii. Ukija kodo duwadoke tijake umina ipadoke tai.
40Tijake Jesus eteete mana, „Magijo ka ikii weda gaaga? Ikii maakodo gai beu, mee?” etii.
41Okei weda umina gajake okei kede wegaate mana, „Kii ke meime no? ukija ma peku ma jajuweega kou ko,” wegai.
Currently Selected:
MARKUS 4: EKG
Highlight
Share
Copy
Want to have your highlights saved across all your devices? Sign up or sign in
