PILOTIMUA̒TA 15
15
Lahu lei Musa
1Lapatao̒ tei Musa wau tau-tauwalo Isirai̒lu helo polahu mola lahu botie u lomuji Eeya,
“Wau̒ ohilaa mopolahu mola duo̒lo Eeya,
sababu Tio maloo̒haama wolo polu-polutuo̒.
Ngoa̒amila wadala wau jokilio
pilomahu-Lio mola ode delomo deheto.
2 Eeya tamoodulua olau̒ tamolotolo;
Tiolo talo poa̒ahu olau̒.
Tio Allahu Taa̒alau̒, wau̒ ohilaa momuji mola o-Lio,
Allahu Taa̒ala tahe pujaa linene moyaau̒,
pou̒daa̒au̒ Tio.
3 Eeya yito tamoo-hipatea tamolotolo boli buheli daa̒,
Eeya, boi-boitolo tanggu-Lio.
4Suludadu lo Masiri wau ngoa̒amila kaletaalio
pilomahu-Lio ode delomo deheto.
Mongo polowila talaba-labaalo molotolo
helo ahumo to Deheto Gelaga.
5Timongolio tiloloolo deheto u modelomo,
wau debo odelo botu lolaahe mola ode wamoi̒o.
6Olootolu-Mu malo moo̒linggolabe, yaa Eeya,
pilohutu-Mu mao̒ musu lopulito loa̒antulu.
7Wolo odudaa̒a-Mu uleidaa̒
pilopo binasaa-Mu mao̒ ngoa̒amila tamo luwali ole-Mu.
Omulukaa-Mu wali-walihuhu debo odelo tulu,
wau lomobu olimongolio debo odelo laato.
8Deheto hiliipa-Mu, taluhee lotililibe molanggato,
tilimihula lotulide debo odelo dingingo meeseli,
tilinggula wamoo̒ deheto lowali polibayaalo.
9Ualo musu mao̒, ‘Timongolio mawanelau̒ wau wau̒upou̒,
pahutou̒ wamiluu̒, wau poo̒pulitou̒ timongolio.
Lapatao̒ ngoa̒amila halata limongolio lambatou̒,
taya-tayaduu̒ mao̒ wau nii̒imatiyou̒ tunggula olulia.’
10Bo Eeya wolo pee̒enta lohilao
helo podungga mai ode Masiri dulahee u marapo.
Timongolio yilomoduo̒ debo odelo timohe u mobuheeto
todelomo oliyoo̒ buo̒olo taluhu ulaba-labaalo.
11Allahu Taa̒ala toonu tamowali mongilabotao̒ ole-Mu,
yaa Eeya Taa Laba-labaalo molamahu wau mantali?
Tatoonu tamowali mohutu u momoo̒-linggolabeyalo
wau huhutu leidaa̒ debo odelo Eeya?
12Bilintau̒-Mu mola uluu̒ olowala-Mu,
yi yiloolilo mola musu tiloloolo huta
13Dilelo-Mu bangusa tamaa piloa̒ahu-Mu botie,
sababu Yio̒ tatapu wau molotolo hilao todanti-Mu.
Wolo olootolo leidaa̒ timongolio diluo̒lo-Mu,
wau dilelo-Mu ode huta-Mu u mantali.
14-15Babaa-ngusawalo modungohe olio wau hulu-huluhelio;
taulo Pilistina wau mongo tau̒wa lo Edom logeegeri.
Taulo Moab tamolotolo boli buheli daa̒ hulu-huluhee moo̒ohuu̒,
taulo Kanaa̒n ohilaa kikiio.
16Timongolio laba-labaalo moohe
mosakusi olootolo Eeya.
Tou̒ umati lo Eeya lumaode, musu diila okawasa molaahangi;
malo aahulo bangusa tamaa yilopatu-Mu.
17Lapatao̒ Isirai̒lu dilepitu-Mu ode
tambati u tilulaotu-Mu upoti biluloa̒a-Mu.
Timongolio lotitatapu to huludu-Mu u mantali,
to Bele u bilongu-Mu lohihilao.
18Yio̒lo Eeya, Olongia,
tamo malenta ohiheo-hiheolo mao̒.”
Lahu li Miriyama
19Tou̒ taulo Isirai̒lu helo balango deheto, timongolio lonao̒ to wamoi̒o u mohengu. Bo tou̒ kakaa-letaalo Masiri wolo wadala wau jokilio tilumuwota mola ode delomo deheto, Eeya lohutu mao̒ taluhio luli tilumolohe tilinggula timongolio yilumoduo̒.
20Lapatao̒ ti Miriyama, ngotaalio lo nabia titaata lei Haruna lohama mai rabanaalio, wau ngoa̒amila mongobua helo dudua̒ lolaa̒pa rabana wau longelungo. 21Ti Miriyama lopolahu mola ode limongolio,
“Polahualo mola duo̒lo Eeya,
sababu Tio maloo̒haama wolo polu-polutoo̒.
Ngoa̒amila wadala wau jokilio
pilomahu-Lio ode delomo deheto.”
Taluhu mopaa̒to
22Lapatao̒ tei Musa lodelo bangusa lo Isirai̒lu lonto Gelaga lotidulunga ode huta udatahu wau luasi udelita lo Syur. Ngotilonggadu tolo hui mola timongolio hinao̒wa loli huta datahu wau luasi udelita diila loo̒dungga taluhu. 23Lapatao̒ malei dungga mota timongolio ode tambati u ilunte Mara, bo taluhu mota teto boito mopaa̒to daa̒, tilinggula diila mowali yilumolo. Sababu uito tambati boito iluntelio Mara, boliilio mao̒ mopaa̒to. 24Yi tau-tauwalo boito helo hungoto odelei Musa wau lohintu mao̒, “Wolo u mailumonto?” 25Tei Musa malodua̒ wolo tio̒otutua ode Eeya, lapatao̒ Eeya malopo bilohei olio ayu ngoputu. Ayu boito pilomahula mola lei Musa ode delomo taluhu, lapatao̒ taluhu boito lowali ilolamita, tilinggula lowali yililumo.
To tambati boito Eeya longohi mai wuwuu-uduwaalo ode limongolio, wau mota teto olo Tio helo himontala olimongolio. 26Tahuda lo Eeya, “Podungohulo ola-U̒ lou̒ tio̒otutua, wau pohutualo wolo u oontonga-U̒ mopiohe; duduui̒lo ngoa̒amila palentaa-U̒. Wonu timongoli mohutu mao̒ odito, timongoli diila tahukuu-maniyo-U̒ wolo ngongoo-towaalo u podungga-U̒ ode taulo Masiri. Wau̒lo Eeya tamo poo̒luli olimongoli.”
27Lapatao̒ uito timongolio malei dungga mola ode tambati u ilunte Elim. Mota teto woluo butu lotaluhu mopulaa duluo wau pitu lopulu bungo lohuruma. Timongolio helo titikema totili lotaluhee boito.
Currently Selected:
PILOTIMUA̒TA 15: LAIGOR
Highlight
Share
Copy
Want to have your highlights saved across all your devices? Sign up or sign in
