PILOTIMUA̒TA 9
9
Binatangi bibiahu yilate
1 Eeya lotahuda odelei Musa, “Ponao̒lo mola motaalua woli olongia, wau polelea mao̒ olio deu̒ Eeya, Allahu Taa̒ala taulo Ibrani, lotahuda mai: ‘Poluliyalo umati-U̒ monao̒ alihu timongolio mowali moi̒baadati to ola-U̒. 2Wonu yio̒ diila mohuto mongohi olimongolio, 3Wau̒ mamopo dungga mai wembelo u moo̒tihela hapato to ngoa̒amila bibiahumu, wadala, kolodai, unta, sapi, himba wau batademu. 4Wau̒ mamopo hiheede bibiahu taulo Isirai̒lu wau bibiahu taulo Masiri. Monto bibiahu taulo Isirai̒lu diaaluo penu boli tuwau mao̒ u mate. 5Wau̒, Eeya, mamolantu mao̒ loombu u mohutu mai sua̒li boito.’ ”
6Loloombulio mola Eeya helohutu mai debo odelo umaa tilahuda-Lio. Ngoa̒amila bibiahu bangusa lo Masiri yilate, bo monto bibiahu bangusa lo Isirai̒lu penu boli tuwau mao̒ diaaluo u yilate. 7Ti olongio helohintu mao̒ umalo toduo mai boito, lapatao̒ sililitaalio mao̒ olio deu̒ lonto bibiahu taulo Isirai̒lu diaaluo penu boli tuwau mao̒ u yilate. Bo ti olongia debo baa̒ngiyolo wau diila mohuto mopoluli mao̒ bangusa boito monao̒.
Ngongoto lobohe
8 Eeya lotahuda odelei Musa wolei Haruna, “Pohama mao̒ dengolo wonggomo wahu monto tambati u hepo mobualo. Totalu li olongia, tei Musa musi mopo mua̒yade mola wahu boito ode dulente. 9Yi wahu boito mamoloo̒po mola ode ngoilanggubu huta lo Masiri. To manusia wau binatangi wahu boito mamo pobutu mai boboo-heyaalo u mopota mowali pali onaana.” 10Lapatao̒ tei Musa wolei Haruna helohama mao̒ wahu boito, wau mota lotaalua woli olongia. Tei Musa helo mua̒yade mola wahu boito ode dulente. To manusia wau binatangi malobutu mai boboo-heyaalo ulopota lowali pali onaana. 11Tahi ahalia lo siihili diila mowali motaalua mao̒ wolei Musa kalana ngangaa-waa̒alo mao̒ limongolio polupolu lobohe debo odelo tau-tauwalo Masiri wewolio. 12Bo Eeya helohutu mao̒ oli olongia baa̒ngiyolo, wau debo odelo u matilahuda lo Eeya, ti olongia diila mohuto momandungi loi̒ya lei Musa wolei Haruna.
Didi Esi
13 Eeya lotahuda odelei Musa, “Ponao̒lo loombu didimodupo daa̒ mota motaalua woli olongia, wau potunggula mao̒ olio deu̒ Eeya, Allahu Taa̒ala taulo Ibrani malo tahuda mai: ‘Poluliyalo umati-U̒ alihu timongolio monao̒ mota moi̒baadati to ola-U̒. 14Pee̒enta botie Wau̒ mamopo dungga mai baala diila bo to tahidihuma pantungo lipu wau ulipu wambao̒, boto olemu olo alihu otaawamu mao̒ deu̒ diaaluo tamo ngilabotao̒ ola-U̒ to ngoilanggubu dunia. 15Humayaalio Wau̒ mohuto mohukuumani olemu wau ulipumu wolo ngongoto, tantuulo mao̒ timongoli mabilinasa sama-samaata. 16Bo timongoli hiluliya-U̒ mao̒ tumu-tumulo, alihu Wau̒ mowali mopo bilohei okokawasaa-U̒ to olemu, tilinggula tanggulu-U̒ mowali polu-polutuo̒ to ngoilanggubu dunia. 17Eleponu odito, yio̒ debo donggo ohilao molanggato olo wau diila mohuto mongohi umati-U̒ monao̒. 18Loombu dumodupo, to saaa̒ti u tutuuwauwa Wau̒ mamopo dungga mai didi esi u moo̒tihela hapato, debo odelo udiipo pee̒enta mao̒ helo toduo to Masiri tou̒ muloololio mai tunggula botia. 19Yi palentawa mao̒ alihu ngoa̒amila bibiahu wau totoonulalo hakuumu uwoluo to bulemengo deloa mota ode tambati u aamani. Ngoa̒amila tau wau bibiahu uwoluo to bulemengo wau diila mowali motililungo maamate odungga lodidi esi.’ ” 20Dengolo lota towolota lo tahidihuma pantungo lipu moohe to tahuda lo Eeya. Timongolio helodelo mongo wato wau bibiahu limongolio tilumuwoto ode delomo bele alihu meililungo. 21Bo tawewo diila lomandungi poe̒ela boito wau helo lolaa mao̒ mongo wato wau bibiahi mongolio tohuta udatahu wau luasi.
22Lapatao̒ Eeya lotahuda odelei Musa, “Bintaa̒ mola uluu̒mu odeitaato, wau didi esi mamo tuhutai ode ngoilanggubu huta lo Masiri. Didi boito mamei dungga ode manusia, bibiahu wau totoonulalo pilomulo to halabolu.” 23Tei Musa malo mintaaa̒ mola tunggudio odeitaato, wau Eeya malo polaahei bulonggodu wau didi esi, wau ilato lodehita dunia. Eeya lopodungga mai 24didi esi u moo̒tihela hapato tutuunuhe mai wolo ilato u dedeehita. Ui-uitolo didi esi umalo moo̒tihela hapato todelomo wungguli lo Masiri. 25To ngoilanggubu lipu didi esi boito helopo binasa mao̒ totoonulalo u hitua-tuawua to halabolu, leituwoto manusia wau bibiahu. Ngoa̒amila pilomulo to halabolu heloruusa wau bubuu-ngowaalo ayu yilombaahu. 26Bo madala lo Gosyen, tambati u piloti biluloa̒ tau-tauwalo Isirai̒lu, diila ilodungga lodidi esi.
27Lapatao̒ ti olongia malei̒ tiangai olei Musa wolei Haruna, wau loloi̒ya mao̒, “Wau̒ mai̒lodusa. Eeyaalo tao̒tutu, wau̒ wau ulipuu̒ malohutu totala. 28Podua̒alo mola ode Eeya; malo eenggade dudutolo lami kalana bulonggodu wau didi esi botie. Wau̒ mamo poluli mao̒ olimongoli monao̒. Timongoli diilalo potibiluloa̒ tewe.”
29Ualei Musa odeli olongia, “Molamemeto lapatio mao̒ watia meidungga mota ode bulemengo kota, watia mamo mintaa̒ao̒ uluu̒ u modua̒ mola ode Eeya. Bulonggodu mamohuheli wau didi esi mamoole, alihu otaawa mao̒ li Tuani lowatotia deu̒ dunia botie miliki lo Eeya. 30Bo otaawa lowatotia deu̒ ti Tuani lowatotia wau tahidihuma pantungo lipu debo diipo yiloohe to Eeya Allahu Taa̒ala.”
31Pilomulo rami wau jelai bilinasa, sababu donggo hipo bungawa mai, wau donggo heo̒ panggeangio mai. 32Bo pale wau u hibotu-botua diila loruusa sababu diipo sembolio.
33Lapatao̒ tei Musa lololaa mao̒ oli olongia wau lonao̒ ode bulemengo kota; mola teto tio lomintaaa̒ mola uluu̒lio u lodua̒ ode Eeya. Tou̒ boitolo mola malo huheli bulonggodu, didi esi wau didi. 34Tou̒ ti olongia loo̒onto mao̒ wolo ulotoduo mai, tio luli ilodusa poli. Tio wau tahidihuma pantungo lipulio debo baa̒ngiyolo. 35Debo odelo umaa tilahuda lo Eeya lotimbulude olei Musa, ti olongia diila lohuto lopoluli mao̒ taulo Isirai̒lu lonao̒.
Currently Selected:
PILOTIMUA̒TA 9: LAIGOR
Highlight
Share
Copy
Want to have your highlights saved across all your devices? Sign up or sign in
