ILOOWALI 20
20
Tei Abraham wolei Abimelekh
1Tei Abraham malo limbata lonto Mamre ode wimbihu huliaalio huta lo Kanaa̒n, wau lotitatapu to wolota lo Kades wau Syur. Dengolo wakutu mola lapatio mao̒, tou̒ tio lotibiluloa̒ to Gerar, 2tio malo loi̒ya deu̒ ti Sara dilelio yito tawali-yaliilio. Sababu uito ti Olongia Abimelekh lonto Gerar lopoa̒hu mota utolialio lei̒ delo mai oli Sara ode olio. 3Tou̒ huilio tuwau Allahu Taa̒ala lopo bilohei batanga odeli olongia boito todelomo tohiilopo, wau lotahuda mao̒, “Yio̒ maamate, kalana mahilamamu taabua boito; sababu tio mao̒dile.”
4Bo tei Abimelekh diipo mao̒ loo̒dedeta oli Sara, yiloi̒ya mao̒ li olongia boito, “Eeya, watotia diila ototala! Wolo Eeya mamopo binasa mai olo watotia wau bangusa lo watotia? 5Tei Abraham lohihilao loloi̒ya deu̒ taabua boito tawali-yaliilio, wau taabua boito malo loi̒ya odito olo. Watotia malohutu mao̒ sua̒li boito wolo hilaa mantali, oditolio watotia diila ototala.”
6Yi Allahu Taa̒ala lotahuda mai todelomo tohiilopo boito, “Memangi, otaawa-U̒ deu̒ yio̒ helohutu uito wolo hilaa mantali. Sababu uito Wau̒ malo ngabutao̒ olemu mohutu dusa to ola-U̒, wau diila piloluli-U̒ yio̒ modedeta taabua boito. 7Bo botia, powualingalo mao̒ tio ode dilelio. Dilelio yito ngotaalio lonabi, wau tio mamodua̒ mola olemu alihu yio̒ diila mate. Bo wonu yio̒ diila mopowalingao̒ olio, eelai mao̒, yio̒ wau ngoa̒amila ulipumu maamate!”
8Loloombulio mola, didimodupo, tei Abimelekh lotiangai ngoa̒amila pogaweelio wau lopoo̒taa mao̒ olimongolio totoonulalo uilowali boito. Timongolio mailoohe daa̒. 9Lapatao̒ uito tei Abimelekh lotiangai olei Abraham wau lohintu mao̒, “Wolo umaa pilohutumu olami? Wolo totalaau̒ olemu, yio̒ lopowoluo mai baala botie to batangau̒ wau to yilaidiaau̒? Otutu diila paatuti yio̒ lohutu debo odelo uito to olau̒. 10Yilongola yio̒ helohutu odito?”
11Tei Abraham lolametao̒, “Pikiliyalo mao̒, teewe diaaluo taa u moohe to Allahu Taa̒ala, tilinggula watia mapateelio mate-mateelo mao̒ lo taa u motohilaa todile lowatia. 12Donggo poli tio boito memangi tawali-yali lowatia. Amiaatia ngotiyamo, bo tiilo ngolaaini, wau lapatao̒ amiaatia lonika. 13Odito tou̒ Allahu Taa̒ala lopoa̒hu olaatia lololaa mao̒ bele liyamo lo watia wau lonao̒ ode utoonulalo mao̒ ode lilii-puwaalo deli, watia loloi̒ya mao̒ todile lowatia, ‘Poi̒laalolo mai otatapu wau olootolo hilaamu to olau̒ wolo moloi̒ya ode timii̒du tau deu̒ wau̒ botie tikakaamu.’ ”
14Lapatao̒ uito tei Abimelekh malo powualingao̒ oli Sara odelei Abraham, wau tou̒ boito tio longohi mao̒ olo mongo wato, himba wau sapi. 15Uali olongia boito odelei Abraham, “Uti-utieelo ngoilanggubu lipuu̒; poti tatapulo tou̒toonu u otohilaamu.” 16Laptao̒ ualio mao̒ odeli Sara, “Ti kakaamu mailohiyau̒ mao̒ ngolihu doi talaa̒ odelo bukuti ode taa ngoa̒amila deu̒ yio̒ otu-otutuulo mao̒ diila ototala.”
17-18 Eeya malohutu mao̒ bintela ngoa̒amila mongobua to bele biluloa̒ saaha li olongia lei Abimelekh sababu uilowali mai woli Sara, dile lei Abraham boito. Lapatao̒ tei Abraham lodua̒ mola ode Allahu Taa̒ala, wau Allahu Taa̒ala lopoo̒luli mao̒ olei Abimelekh, dilelio wau mongo watolio mongobua, tilinggula mongobua boito muli mowali mopotutu mai.
Currently Selected:
ILOOWALI 20: LAIGOR
Highlight
Share
Copy
Want to have your highlights saved across all your devices? Sign up or sign in
