ILOOWALI 40
40
Tei Yusu helo tombangao̒ boli lo tohiilopo lotahi tahangia
1Dengolo wakutu mola lapatio mao̒ tamomayawa duulota li olongia lo Masiri, deu̒yito-yito tamoo-ngulusia minumani wau tamoo-ngulusia lotilio, helohutu totala toli olongia. 2Yi maloingo ti olongia totahi pomayaalio duulota boito, 3lapatao̒ pilopo tuwotio timongolio duulota ode delomo tutupa, tobele lotau̒wa tamookawalia bele biluloa̒ saaha li olongia, to tambati lei Yusu tilahangialio. 4Lohiheo olo timongolio totutupa boito, wau tau̒wa lo tamookawalia bele biluloa̒ saaha li olongia malongohi mao̒ tuugasi olei Yusu u mohinta olimongolio.
5Tou̒ huilio tuwau tamoo-ngulusia minumani wau tamoo-ngulusia loti boito ngota-ngota loo̒ tohiilopo. Boli lo tohiilopo limongolio boito diila tutuuwauwa. 6Tou̒ tei Yusu lonao̒ mai ode limongolio loombulio mola didimodupo, timongolio oontonga mao̒ suukali. 7Lapatao̒ tio lohintu mao̒, “Yilongola mongo wutato malo odito suukali todulahee botie?”
8Tametao̒ limongolio, “Ohui amiaatia loo̒ tohiilopo, wau diaaluo mao̒ tamotota boliilio.”
Ualei Yusu, “Bo Allahu Taa̒ala wambao̒ tamopo luasi mai tau motombanga boli lo tohiilopo. Nte wunggulia mai tohiilopomu boito.”
9Tamoo-ngulusia minumani boito malo loi̒ya, “To delomo tohiilopo boito watia loo̒onto woluo bungo lo angguru totalu lowatia. 10Bungo lo angguru boito otango mohelu totolu. Boheli tataa-ngolio mahe oduungai, bubuu-ngaalio hua̒a longoa̒be mola, tulusi hungolio malowali lolutu. 11Tou̒ boito watia donggo dihudihu halati lo minumani li olongia, tulusi pilohinta mao̒ lowatia olio.”
12Ualei Yusu, “Uti-utieelo tombangio: Tango totolu boito boliilio mao̒ tolo hui. 13To delomo tolo hui botie ti olongia mamopo bebasi mao̒ olemu, tio mamo ngambungu olemu wau mopowalinga olemu ode huhuloa̒mu ubohu-bohulio mai. Yio̒ mamohinta mao̒ halati lo minumani odeli olongia debo odelo ubohu-bohulio mai. 14Bo Eelai mai watia wonu owowoluwoamu malopiohe. Tulungia mao̒ potunggula mota sua̒li lowatia odeli olongia, alihu watia maa bebasialio monto tutupa botie. 15Sababu, otutuulio mao̒ muloololio mai watia pilotetei̒o lonto lipu taulo Ibrani wau boli tewe olo, to Masiri botie, diila pee̒enta mao̒ watia helohutu u hitua-tuawua umoleeto tunggula watia musi pilopo tuwoto ode delomo tutupa.”
16Tou̒ tamoo-ngulusia loti boito lotota deu̒ boliilio lo tohiilopo lo tamoo-ngulusia minumani boito mopiohe, yi tio olo malo loi̒ya mao̒ odelei Yusu, “Watia olo loo̒ tohiilopo, wuntu-wuntu kalanji lo roti mohelu totolu to lunggongo. 17To delomo kalanji u toitaato daa̒ tua-tuanga kuukisi u hidala-dalaala odeli olongia, bo bubuu-lungiyalo tilumombotai mailonga kukuu-kisiyaalo boito.”
18Tametao̒ lei Yusu, “Uti-utieelo tombangio lo tohiilopo boito: Tolo kalanji boito boliilio tolo hui mola. 19To delomo tolo hui mola botie ti olongia mamopoa̒hu mai tau molimade lunggongumu lapatao̒ mopontayungo milatemu to wolihi tuwau, wau bubuu-lungiyalo mamonga mao̒ tapumu.”
20Tolo hui lapatio mao̒ yi todulahee iloowali mai li olongia, wau tio helohutu potihunggu daa̒ ode ngoa̒amila pogawee. Tio lomalentao̒ alihu tamoo-ngulusia minumani wau tamoo-ngulusia roti pilei̒ lualio mao̒ lonto tutupa wau pilei̒ delolio mai ode talu lo ngoa̒amila pogawee lobele biluloa̒ saaha li olongia. 21Tamoo-ngulusia minumani pilopo walingio mao̒ ode huhuloa̒ ubohu-bohulio mai. 22Bo tamoo-ngulusia roti hilukuumani yila-yilateelo mao̒. Ngoa̒amilalo boito lotoduo mai lotuuu̒de lou̒ wolo u mailoi̒ya lei Yusu. 23Bo tamoo-ngulusia minumani boito diilalo loe̒ela olei Yusu. Tio sama-samaata lolipata olei Yusu.
Currently Selected:
ILOOWALI 40: LAIGOR
Highlight
Share
Copy
Want to have your highlights saved across all your devices? Sign up or sign in
