ILOOWALI 42
42
Mongo mohuhula lei Yusu lomonggato ode Masiri
1Tou̒ tei Yako loo̒dungohe deu̒ woluo pale to Masiri, malo loi̒ya tio ode mongo walai̒o, “Yilongola timongoli bo hipoo̒oyonga wambai̒o? 2Mailo dungoheu̒ deu̒ woluo pale to Masiri; ponao̒lo mola odito potalilo mai pale alihu ito diila tamate lo polaango.” 3Lapatao̒ malonao̒ olo mongo mohuhula lei Yusu mopulu lota boito mola lotali pale to Masiri. 4Bo tei Yako diila lopoluasi olei Benyamin, tawaliyali pulua lei Yusu lonao̒ pee̒-pee̒enta woli mongolio, kalana tio moohe bolo topotala mai walai̒o boito.
5Sababu polobiti tolipu lo Kanaa̒n, mongo walae̒e Yako pee̒-pee̒enta wolo taa dadaata wewolio mai lotali pale to Masiri. 6Tahemo potali mao̒ pale totau-tauwalo lonto ngoilanggubu dunia tei Yusu, gubolonulu lo Masiri. Sababu uito mongo mohuhula lei Yusu lonao̒ mai wau losujudu totalulio. 7Tou̒ tei Yusu loo̒onto mao̒ tomongo mohuhulalio boito, maa ilotaawalio mao̒ timongolio, bo pilohutulio debo odelo diila otaawalio. Wolo bangganga tio malohintu mao̒ olimongolio, “Timongoli tau lou̒ toonu?”
“Amiaatia taulo Kanaa̒n. Amiaatia lonao̒ mai motali ua̒alo,” tametao̒ limongolio.
8Eleponu oonuhe lei Yusu mongo mohuhulalio, bo timongolio diila moo̒onuhe olio. 9Lapatao̒ tio loo̒e̒ela mola tohiilopio tomimbihu olimongolio. Wau malo loi̒ya mao̒ tio, “Timongoli botie tamoo-hehulawa; timongoli malonao̒ mai motulete mao̒ tou̒toonu olulupuhu lolipu lami.”
10“Diila, Tuani lo watotia,” tametao̒ limongolio. “Mongowatotia, mongo wato li tuani bo mai motali ua̒alo. 11Mongowatotia botie mohutato, Tuani lowatotia. Mongowatotia botie taa hipiiohe, diila tamoo-hehulawa.” 12Tei Yusu loloi̒ya mao̒ olimongolio, “Wimbulo! Timongoli lonao̒ mai odia bo mai motulete tou̒toonu olulupuhu lolipu botie.”
13Tametao̒ limongolio, “Mongowatotia botie mohutata mopulaa duulota, Tuani lowatotia, mongowatotia walao̒ lou̒ ngotiyamo tolipu lo Kanaa̒n. Ngotaalio lo mongowatotia mailate wau tawaliyali daa̒ botia woluo pee̒-pee̒enta woliyamo lo mongowatotia.”
14“Memangi otutu debo odelo uiloi̒yau̒ mai,” tametao̒ lei Yusu, “timongoli botie tamoo-hehulawa. 15Wau̒ motohilaa motesi olimongoli; Wau̒ motadia mai domi tangguli olongia deu̒ timongoli diila tamololaa mao̒ lipu botie wonu tawali-yalimu daa̒ boito diila monao̒ mai odia. 16Ngotaalio limongoli musi mohualinga mola mohama mai olio. Tawewo maa tahangiyau̒ tunggula loi̒yamu obukuti mao̒. Wonu diila, domi tangguli olongia, timongoli botie musu tamoo-hehulawa to olami!” 17Lapatao̒ timongolio pilopo tuwotio ode delomo tutupa tolo hui mola hiheolio.
18Todulahee otolulio tei Yusu malo loi̒ya ode limongolio, “Wau̒ taa u moohe wau taa u modungohe to Allahu Taa̒ala. Timongoli mapo aahuwou̒ mai wolo danti tuwau. 19U mopobukuti mao̒ deu̒ timongoli botie juujulu, ngotaalio limongoli maa tahangiyau̒ todelomo tutupa; taa wewo mowali mohualingo wau modelo mota pale u matilali limongoli duo̒lo ngaalaa̒mu tadonggo hidutola lo polaango. 20Lapatao̒ uito timongoli musi modelo mai tawali-yaliimu daa̒ boito ode olau̒. De mau̒itolo u mopobukuti mao̒ deu̒ loi̒yamu boito otutu, wau timongoli diila tahukuu-maniyou̒ mate.”
Timongolio akolo wolo putusani li gubolonulu boito. 21Lapatao̒ uali mongolio ngota timongota, “Naa, ito botia hilukuu-manilio akiibati lo totalanto to tawali-yalinto muloololio mai; tio lei̒ tulungi olanto bo ito diila lomandungi olio, eleponu iloontonganto tio duto-dutolaa daa̒. Uitolo sababuulio ito botia molaasa mao̒ polodutolo botie.”
22Ualei Ruben, “Diila mapilolele mai lowatia omoo̒molu olimongoli alihu walao̒ boito diila mao̒ pongolawa. Bo timongoli diila mohuto modungohu. Wau botia opopatelio pilo tontuliilio mai to olanto.” 23Tei Yusu mongalati bahasa limongolio, bo diila otaawa limongolio sua̒li boito, sababu timongolio helo biisalawa wolei Yusu loli ngotaalio tamo tohuwalea. 24Tei Yusu lololaa mao̒ olimongolio, lapatao̒ mahilu moyongo. Tou̒ maluli loo̒ bisala, tio luli lohualinga mota ode limongolio, tulusi lohama olei Simeon, wau lei̒ pungu mao̒ olio totalu lomongo wutatio ngoa̒amila.
Mongo mohuhula lei Yusu luli lohualinga ode Kanaa̒n
25Tei Yusu malei̒ tuangaao̒ kakaa-dowaalo u dilelo mai lomongo hulangio boito wolo pale, wau doi limongolio ngota-ngota pilei̒ tuwotio mao̒ ode delomo kakaa-dowaalo boito. Wau olo timongolio pilei̒ wohilio mao̒ ua̒alo potomeu̒ limongolio todalalo. Palentalio boito pilohutu mao̒ limongolio. 26Lapatao̒ uito mongo hulango lei Yusu lopo detoheo̒ kolodai limongolio wolo pale u matilali limongolio boito, tulusi lomonggatolo timongolio lonteto. 27To tambati pilo titihuiya limongolio, ngotaalio limongolio malomuo̒ mao̒ kado lopalelio u mopoa̒ kolodailio. Ilodunggaalio doilio toitaato pale boito. 28“Doi lowatia luli pilopo walingio mai,” ibodio mao̒ ode mongo wutatio. “Bilohi mai, woluo todelomo kado lowatia!” Hilaa limongolio mailoohe, wau wolo owowohe boito timongolio mahipo hihiintua, “Wolo umaa pilohutu lo Allahu Taa̒ala olanto?”
29Tou̒ malei dungga mola ode Kanaa̒n, timongolio malo hungguli mao̒ ode liyamo limongolio totoonulalo u malo toduo to olimongolio. Uali mongolio, 30“Ti gubolonulu lo Masiri malo bisala wolo bangganga to olamiaatia wau helo potuludu olamiaatia hemo ngimato lipulio. 31Amiaatia lolametao̒, ‘Amiaatia botie taa hipiiohe, diila tamoo-hehulawa, amiaatia taa juujulu. 32Amiaatia ngoa̒amila mohutato mopulaa duulota, walao̒ ngotiyamo, wau ngotaalio mailate, hiambola tawaliyali daa̒ lamiaatia woluo toliyamo lamiaatia to Kanaa̒n.’ 33Ti Gubolonulu boito loloi̒ya, ‘Wau̒ motohilaa motesi olimongoli alihu otaawau̒ mao̒ wolo timongoli taa juujulu: Ngotaalio limongoli musi motitolaa mao̒; tawewo mowali mohualingo modelo mola pale ode ngaalaa̒mu tadonggo hidutolaa lo polaango. 34Lapatao̒ timongoli muli pohualingai modelo mai tawali yaliimu daa̒ odia mai, wau̒ mamotota mao̒ deu̒ timongoli diila tamoo-hehulawa, bo taa juujulu. Yi mongo wutatumu tatilaa-hangiyau̒ boito mamuli pohualinguu̒ mai ode limongoli wau timongoli mowali motibiluloa̒ tolipu botie wau bebasi modahangi.’ ”
35Lapatao̒, tou̒ timongolio lopo koosongi mao̒ kakaa-dowaalo limongolio, timongolio ngota-ngota loo̒dungga dompeti u hituanga doi; tulusi timongolio mailoohe daa̒, odito olo tiyamo limongolio. 36Lapatao̒ malo loi̒ya tiyamo limongolio, “Timongoli taloo̒ sababu olau̒ iloolia lomongo walau̒uu̒ ngoa̒amila. Tei Yusu madiduu̒; tei Simeon madiduu̒; wau botia timongoli mamohama poli olei Benyamin. Mailaba polodutoluu̒!”
37Lapatao̒ ualei Ruben ode liyamolio, “Wuduwalo mai tei Benyamin ode laatia, Paapa; de mamuli pohualingai lo watia, wonu diila ti Paapa mowali momate-mateelo mao̒ walao̒ mongo lolai̒ laatia duulota.”
38Bo tei Yako loloi̒ya mao̒, “Diila! Tei Benyamin diila mowali deloo limongoli; tamo huhulalio mailate wau botia bolo tio-tiolo tadonggo woluo. Tio bolo moo̒tapu mai topotala to nonao̒lio boito. Wau̒ botie mapanggola, wau osuukali u mapo dungga mai limongoli olau̒ boito mamoo̒ sababu opopateu̒.”
Currently Selected:
ILOOWALI 42: LAIGOR
Highlight
Share
Copy
Want to have your highlights saved across all your devices? Sign up or sign in
