ILOOWALI 50
50
1Tei Yusu lopo wombahe mola batangalio toli paapalio sambela hilumoyongo wau lodiilao̒ bayalio. 2Lapatao̒ tei Yusu lomalentao̒ taa u opongotota mohutu alihu milate moo̒tahangi u moramba-ramba mao̒ milate lei Yako. 3Kalaja boito yilongaa wakutu wopato pulu hui mola, deu̒yito-yito wakutu u biasaalio palaluwolo u moramba-ramba mao̒ milate. Taulo Masiri helo tilimi duo̒lei Yako pitu lopulu hui mola hiheolio.
4Lapatao̒ lopalutao̒ maasa helo tilimi, malo loi̒ya tei Yusu tomongo pogawee li olongia, “Potunggula mao̒ tahuli botie odeli olongia. 5‘Tou̒ tipaapa lowatotia mamembideo̒ mate, ilahulalio watotia modanti olio, deu̒ watotia musi molobungao̒ olio todelomo kuubulu u mapilo dapatolio tohuta lo Kanaa̒n. Sababu uito, poluasiyalo mai watotia monao̒ mola molobunga oli paapa lowatotia. Lapatao̒ uito watotia mamuli mohualingai.’ ”
6Lapatao̒ malo loi̒ya ti olongia, “Ponao̒lo molabunga oli paapamu debo odelo u mapilo dantimu mao̒ olio.”
7Lapatao̒ malonao̒ tei Yusu mola lolobunga oli paapalio. Ngoa̒amila pogawee li olongia, mongo panggola tobele biluloa̒ saaha li olongia wau ngoa̒amila taduduulaa̒ lo Masiri, lonao̒ pee̒-pee̒enta wolei Yusu. 8Ngaalaa̒lio, mongo wutatio, wau mongo pohutatalio uwewo lonao̒ olo. Bo tau̒kekeei̒ wau bibiahi mongolio u tilolaalio mao̒ tolipu lo Gosyen. 9Pasukani tao̒kaleta, wau tao̒wadala tilonggo dudua̒ olo, tilinggula baalisi lo tahelo hunuhee boito haya-hayaa̒a daa̒.
10Tou̒ timongolio leidungga mola totambati lotaa hemo pomolota pale to Goren-Haatad, to ambahu tiimuru lo Dutulaa Yordan, timongolio helo hilimuta wolo suukali wau suala hihunggalaa̒ daa̒. Tei Yusu helohutu mao̒ upacala ilopatea, pitu hui mola hiheolio. 11Tou̒ ulipu lo Kanaa̒n loo̒onto mao̒ polotilimi to Goren-Haatad boito, timongolio malo loi̒ya, “Donggo boli wooloolio upacala polotilimi taulo Masiri boito!” Uitolo sababuulio tambati boito ilunte Abel-Mijraim.
12Odi-odieelo mola mongo walae̒e Yako helohutu mao̒ wolo u pilolahuli lei Yako olimongolio. 13Timongolio malo mintaa̒ milatelio ode Kanaa̒n wau lolobungao̒ olio todelomo gowa Makhpela, to ambahu tiimuru lo Mamre, to halabolu u matilali lei Abraham lonto olei Epron taulo Het boito, u pilohetulio lowali tambati polobungalo. 14Lapatao̒ tei Yusu lolobungao̒ oli paapalio, tio luli lohualinga mola ode Masiri pee̒-pee̒enta wolo mongo wutatio wau ngoa̒amila tau tahelo dudua̒ olio u lolobungo oli paapalio boito.
Tei Yusu lopoduo̒tao̒ hilaa lomongo mohuhulalio
15Lapatao̒ tipaapa limongolio yilate mao̒, mongo mohuhula lei Yusu malo loi̒ya, “Woloolo mola humayaalio tei Yusu oniyati ohilaa molontuli ololeetonto u muloololio mai?” 16Sababu uito timongolio malolao mota tahuli botie odelei Yusu, “Tou̒ ti paapanto diipo yilate, 17tio helo poa̒hu olami molele mao̒ olemu odie, ‘Ambungualo mao̒ totala u muloololio mai hepilohutu lomongo mohuhulamu to olemu.’ Oditolio, odelo mongo wato lo Allahu Taa̒ala tahe pujaa li paapanto, ami momolohone, ambungualo mai totala u mapilohutu lami.” Tei Yusu hilumoyongo tou̒ lololimo tahuli boito.
18Lapatao̒ mongo wutatio boito lohihilao lonao̒ mai wau helo sujudu totalulio wau loloi̒ya mao̒, “Ami botie watomu.”
19Bo tei Yusu loloi̒ya mao̒ ode limongolio, “Diila mao̒ oohe; sababu watia diila mowali motikawasa odelo Allahu Taa̒ala. 20Timongoli malo woomboa helohutu u moleeto ode laatia, bo Allahu Taa̒ala lolomela u moleeto boito lowali u mopiohe, alihu wolo u lotoduo muloololio mai boito dadaata tau tahitimula botia mowali poa̒ahuwolo. 21Diila mao̒ polawalo. Watia mamopo tuuheta mai upalaluo limongoli wau mongo walai̒ mongoli.” Odi-odieelo mola tio helo poduo̒tao̒ hilaa limongolio wolo tataa-heyaalo u molumboyoto, tilinggula tilumua̒ta hilaa limongolio.
Tei Yusu yilate
22Tei Yusu debo lotibiluloa̒ to Masiri wolo mongo pohutatalio; tio tilumumulo demola o umulu ngohetuto mopulu lotaunu. 23Tio donggo ilohiyango loo̒onto mao̒ walao̒ wombu lei Epraim. Tio olo ilohiyango helodaha mongo walae̒e Makhir, deu̒yito-yito wombu lei Manasye, odelo walai̒o lohihilao. 24Ualio mao̒ ode mongo wutatio, “Opopate lowatia malembidei, bo Allahu Taa̒ala tantu mamolaalao̒ olimongoli wau modelo olimongoli lumualao̒ monto lipu botie, ode lipu u mapilo danti-Lio mai wolo tadia odelei Abraham, Isihaka wolei Yako.” 25Lapatao̒ tei Yusu helo poa̒hu mao̒ ngoa̒amila mongo pohutatalio lotadia, ualio mao̒, “Podantilo mai olaatia, deu̒ wonu bolo Allahu Taa̒ala modelo mota olimongoli ode lipu boito, timongoli mamodelo olo milate lowatia.” 26Lapatao̒ mailate tei Yusu to Masiri to umulu ngohetuta mopulu lotaunu. Timongolio loramba-ramba mao̒ milatelio wau lopobalatao̒ todelomo bulua lo milate. 60
Currently Selected:
ILOOWALI 50: LAIGOR
Highlight
Share
Copy
Want to have your highlights saved across all your devices? Sign up or sign in
