KEJADIAN 18
18
Allah nen Abraham omalik ap ekhe wokhesigin iluk abok yagatikhe wene
1 Tuhan ebe Abraham elokhoma o Mamre e wesagayo iluk fogerati lagaukwa mene eroma andoma weinam asi wagaikhe. O andi sambul he, o mo aigen he at Abraham o sabu tenda mene wuri'mo kweba hurek logolik, 2ot legeisogo eilenggen yethasikhe re, afuni inebe henagan mene elokhoma mendek were'ma yerisasikhe. A'nogo yerisasikhesik, awi tenda wuri'mo a'nogo nen wulifikhesik, uarek it inera'lu lagaikhesik he, eindep awi yakfesikhesik,#Ibr. 13:2 3-4mel yagaisasikhe: ”Nogogwi. An naiba tenda wuri'mo yoma set waligi'lek pikhit logoin lego. We, set walobagaigen he, e eroma yoma hu'la'ni o. A'nogo werek kwelek, an nen he, i ekhe wanimbik hineisok ebene sobalhinabigin o. A'nogo hilingisigin enggere ariginin iluk yagane'ni. 5An nen, hit hinomame asimbik, lobagaigen iluk he hinelokhoma ekhe isasigin o. An hit hinamingmingengge naiba kwi wagep andi re, agaukhogoat hilingnafep andi,” iluk yagaisasikhe. A'nogo yagaisasikhemo, iren he, ”Hobabut fano nen wo'ninafenma set walogoin andi faget hai wathafo o,” iluk yagatukwa.
6A'nogo hai watukwama, at Abraham weak-weak aiba tenda wuri'mo a'nogo kwisikhesik he, Sara mel yagatikhe: ”Tepung fano mene su misigat kwalek mene wanimbik he, weak-weak roti hombonundek mene ekhe werasin o,” iluk yagatikhe. 7A'nogo yaga'luk, humusek wam sapi andogorek were'ma lagaikhesik he, sapi eak otholik sei hokho mene halok wendeberogo waluk he, amingmingengge at eabu hilingitarek mene nen weak-weak isasuageluk wogosi wagaikhe. 8A'nogo wagaikhemo, arat isatikhemo re, Abraham en susu amusu a'ma mene inom, amboloba sei asi lagai wagarek mene inom, wam isatikhe mene inom, waluk he, ap omanogo sumburisasikhe. A'nogo wogisasikhemo nunggu kwelek, Abraham e eroma logolik, it faget leberisikhi lagaikhe.
9Hobuk it ap pok omanogo nen he, Abraham mel yagatukwa: ”Hat hagwe Sara ebe koma werek,” iluk yagatukwama, at Abraham en he, ”At ebe o tenda wuri'mo werego,” iluk yagaisasikhe. 10A'nogo yagaisasikhemo, ap it mene ekhe nen he, ”An tugi 9 en folelhunem logombigen hobuk hinoba wesigin o, a'nogo wagunem, andi sambul hagwe Sara eak ap tasigin o,” iluk yagatikhe. A'nogo ugu kwelek he, at he Sara ebe it ap pok inambotma o tenda wuri'mo kweba hurek logolik esanggo holek welagaikhe.#Rm. 9:9 11It Abraham agwe Sara emberek mondok yaman agaukwasik, at he Sara tugi inamep hagarek a'nogo palagaikhesik omalik tasu mondok elo'lek agaikhe. 12A'nogo agaikhesik welagaikhe andi nen, at he Sara endawimo nen endo aga logolik he, mel isikhe: ”An arat yaman agarik nagap arat pulang ikhemo re, nagun nemberek higitnogo u hak nogo? Nagun ogo re, ebe arat yaman agamaat meneat he, nailo,” iluk isikhe.#1Ptr. 3:6
13A'nogo isikhemo, At Tuhan nen Abraham heinok yi'nogo wokhasikhe: ”He Sara nen he, nebe yaman oma re, neak elok takhagain nogo? Elo'lek anggikhesik endo aga andi nenahalok? 14An hineisena Tuhan nen elalin mene hilingisu re elo'lek nogo? Hilingisigin enego. Tugi 9 logombigen hobuk hinoba wesigin, iluk attagat yagahisigi andi hak, wesigin aro. Wagunem, Sara eak abengge takhagain o,” iluk yagatikhe.#Luk. 1:37 15A'nogo yagatikhemo, at he Sara ailo nen he, ”An endo agi lego,” iluk labelhikhe. A'nogo labelhikhemo, at nineisena Tuhan nen he,
”Hat attagat eberogoat endo agen, anggigi,” iluk yagatikhe.
Abraham en he, afuni Sodom mene weak hilingiti lagaukwa mene telinabuageluk inobaget samban isikhe wene
16A'nogo arat iluk he, it ap pok mene inebe henagan a'nogo louwogeluk ugunem Abraham en lakfisageluk woginarek lagaikhe. Laga lagaukwasik he, o Sodom ineilenggen yethagarek oba lagaukwa. 17Lagaukwasik, At nineisena Tuhan endawimo nen he, ”An nen hobuk hilingisigin mene andi Abraham labeligin lek, nabit. 18Aren tagongge mene inunggulenu hokhorogo asimbik, inomame hokhorogo logogun lek nogo? Nen, at alisikhogo re, afuni kweangma mene mondogat inunggulenu lombok an nen fanorinabigin lek nogo? 19Aren he, nagainafuri inom, aren tagongge mene inom, an nen wene it warisigi mene a'nogo fisogo logolik higithogo hilingiti logouwageluk komorinafi logouwageluk wenagaisogo menfigi anggigi. Iren a'nogo mondogat hilingisugun halok, An nen Abraham wene wareti mene andi ebe mondok wogisagain o,” iluk anggasikhe. 20Endawimo a'nogo anggasikhesik he, nineisena Tuhan nen Abraham mel yagatikhe: ”It afuni o Sodom, Gomora mene weak hokhorogo hilingiri'lagwi iluk yaganeri'lagwi o. 21Andi nen, wene inoba faga mene an nesanggo holhi andi eberogo ara? Le'ma a, iluk an a'lima lambik wene andi ero pilingisi lagaino,” iluk yagatikhe.
22A'nogo yagatikhesik, it ap pok mene inebe pire aremnogo o Sodom, Gomora lagu kwelek At Tuhan enek he Abraham inom welagaikhe. 23A'nogo inom logolik, at Abraham ebe nineisena Tuhan oba higilogo era'lu wagaikhesik he, mel yagatikhe: ”Haren he, afuni weak hilingitarek mene mondok legetfisikhi logolik, it ekhe weak hilingiti'lek mene inomat wene inoba fuluk weaget fisagain nogo a? 24O kota andoma afuni inebe 50 nen weak hilingiti'lek mene ekhe werek halok, haren afuni o kota andoma mene mondogat legetfisagain a? It afuni inebe 50 nen andi ineluk logouwageluk, haren afuni weak hilingita mene andi sagalogo herakfisagain elo'lek nogo? 25Haren afuni weak hilingita mene andi wene inoba fembik inoati logolik afuni weak hilingiti'lek mene andi inomat inoasigin andi nen he, afuni weak hilingiti'lek mene andi, it weak hilingita mene inom inoatun o. Haren kweangma mene inom, pogoroba mene mondogat wene inoba figik kotik egendek andi weak ugun nogo? Higit hogoat egendek andi,” iluk yagatikhe.
26A'nogo yagatikhemo, At nineisena Tuhan nen he, ”Afuni inebe 50 andi weak hilingiti'lek mene o Sodom eberogoat were'ma isigi halok, it inalisikhogo re, afuni o kota andoma mene mondogat weak hilingiri'lagwi mene andoma sagalogo herakfisagain o,” iluk yagatikhe. 27A'nogo yagatikhemo at Abraham en ekhe hobuk mel yagatikheat: ”Neisena, an yi re, nebe afuni mene yi wene ti wene u lek mene nailo legat wene yi hobuk ekhe inomat yagahesigin yi re, wena'netun o, neisena. 28Afuni weak hilingiti'lek mene werek igi andi inebe 50 nen werek fuk, we, 45 nek werek he a anggikhi lagi o. Ma re, afuni inebe 5 nek legaga andi nen afuni o kota andoma mene mondogat legetfisagain anggegen a?” iluk yagatikhe. A'nogo yagatikhemo, nineisena Tuhan nen he, ”O a'lima inebe 45 weak hilingiti'lek mene isigi halok, afuni o kota andoma mene inebe mondok legetfisagain lego,” iluk yagatikhe.
29A'nogo yagatikhemo, at Abraham en ekhe mel yagatikheat: ”Afuni weak hilingiti'lek mene andi inebe 40 ba werek halok, haren ninggi'nogo hilinginabigin,” iluk yagati lagaikhemo, nineisena Tuhan nen he, ”Afuni inebe 40 andi inalisikhogo re, An na'mage lagambik inoasigeluk igi mene andi kamo igin o,” iluk yagatikhe. 30A'nogo yagatikhemo, at Abraham en he mel yagatikhe: ”Neisena, an nen hobuk ekhe inomat yagahesigin andi re, ha'mage noba fugun o. Afuni weak hilingiti'lek mene inebe 30 nek werek halok, haren ninggi'nogo hilingisigin,” iluk yagatikhemo, nineisena Tuhan nen he, ”O kota andoma afuni weak hilingiti'lek mene inebe 30 nen were'ma isigi halok, inoasigin igi mene andi kamo igin o,” iluk yagatikhe.
31A'nogo yagati lagaikhemo, at Abraham en he, ”Neisena, an nailo legat yagaherik mondok lagain andi re, wena'neti'lek sagalogo legetfisano o, neisena. Afuni weak hilingiti'lek mene inebe 20 nek werek halok, ninggi'nogo hilinginabigin, neisena,” iluk yagatikhemo, At nineisena Tuhan nen he, ”Afuni inebe 20 nen weak hilingiti'lek mene andi eberogoat were'ma isigi halok, o kota andoma mene legetfisagain lego,” iluk yagatikhe.
32A'nogo yagatikhemo, Abraham en he, wene elugun warogo mel yagatikhe: ”An nen wene misigat ekhe hobuk yagahesiginat andi re, ha'mage noba fugun o, neisena. Afuni weak hilingiti'lek mene inebe 10 nen were'ma heilenggen isegen halok he, ninggi'nogo hilingisigin anggegen, neisena,” iluk yagatikhemo, At nineisena Tuhan nen he, ”Afuni weak hilingiti'lek mene inebe 10 nen andi eberogoat werek halok, an nen afuni o kota andoma mene mondok legetfisagain lego,” iluk yagatikhe. 33A'nogo mondogat iluk, At nineisena Tuhan a'nogo lagaikhemo, at Abraham ambotkwe aiba wagaikhe.
Currently Selected:
KEJADIAN 18: inohap
Highlight
Share
Copy
Want to have your highlights saved across all your devices? Sign up or sign in
