KEJADIAN 19
19
Afuni Sodom mene weak hilingiti lagaukwa wene
1It ap malaikat inebe pire aremnogo Abraham inom ambi agaukwasik a'nogo laga lagaukwasik he, o Sodom hubanggo kwi lagaukwa. Kwi lagaukwa hak he, at Lot ebe o kota kuogeluk kwagarek oba kwe ambe palek oba hurek logolik, it ap a'nogo eilenggen yerisasikhesik he, it woginabigeluk siakhogo menlagaikhesik inelokhoma wagaikhesik eindep awi yakfesikhesik he, 2mel yagaisasikhe: ”Nogogwi, an naiba set walambik lobagaigo. An naiba ninom nogo ikhi logolik, hineisok ebene sobalubagaigo. O hobit logoin hinamolo halok, hubet siakhogo lobagaigo,” iluk yagaisasikhemo, iren he, ”I O, fano. Nit o sili kota yiba ninom nogo ugun o,” iluk yagatukwa. 3A'nogo yagatukwama, at Lot en, ”Set walobagaigo,” iluk ane a'nogo ninghogoat yagaisasikhemo re, at aiba inom kwisukwa. Kwisukwasik, at Lot en sumburu roti fiterek lek mene weratik, fano mene ekhe isatik, isikhesik higithogo wogisasikhemo nasukwa. 4A'nogo meneat he, ap pok omanogo nogo igi'lek oan were'ma, ap inaluendek inom, alagendek inom, o kota andoma mene inebe mondogat wagaukwasik o andi walinget fesukwasik welagaukwa. 5A'nogo logolik, inane hokhorogo Lot oba wene mel iluk heinok wokhasukwa: ”Ap hat haiba nogo uogeluk wagaikha omanogo, inebe koma werek? Nit it ninom hemi fakfisagarek hak hilingisuogeluk inebe wo'nisan o,” iluk yagatukwa.#Hak. 19:22-24
6A'nogo yagatukwama, at Lot aiba nen wulibi wagaikhesik, kwe yagatfesikhe, yagatfesikhesik 7afuni Sodom mene omanogo mel yagaisasikhe, ”Nagaila'lak, hit weak a'nogo hilingisugun mondok lego. 8Hinesanggo fanorogo holini. An nen na'logomi silerik ap inagap inonggot mene inebe pire yi hit wokhisamo, hiren it yi'nogo ti'nogo hilinginabugun elok meneat he, it ap pok mene yi, an nen ferinarek logou hagat welagi andi nen he, hiren it yi'nogo ti'nogo ekhe hilinginabugun mondok lego,” iluk yagaisasikhe. 9A'nogo yagaisasikhe meneat he, it afuni Sodom mene omanogo nen Lot mel yagatukwa: ”Hebe hela lan! Hat hebe ap pok mene nen, hit yi'nogo hilingi'ni, ti'nogo hilingi'ni, iluk yaganisagain nogo? Nineilenggen werek kwelek yaat lan o! Lagi'lek halok, niren ap pok inebe pire andem endebat hak fakfisikhi logolik, hat enek he, mondok weakhogo senhobagagun o,” iluk yagatukwa. A'nogo yagatukwasik he, Lot ebe tamakhogo lakfisasukwasik he, inebe horokhogo hobetha kwisukwasik kwe sou meisaluogeluk isukwa. 10A'nogo hilingitukwa meneat he, ap pok inebe pire aremnogo inenggi wulak fesukwasik Lot lisogo oloba kwelakfesukwasik he, kwe yagatfesukwa. 11A'nogo yagat fesukwasik he, it afuni o silimo welagaukwa mene omanogo mondogat ineilenggen mondok mumet fisasukwama re, kwe sou a'nogo inenggi ya fak ta fak heratukwa mene re komaheat hilinglagaikhe.#2Raj. 6:18
Lot o Sodom herakfisaluk lagaikhe wene
12-13It ap pok inebe pire a'nogo nen Lot mel yagatukwa: ”Nineisena Tuhan nen afuni o kota Sodom yoma mene inobabut mondok weak hilingiri'lagwi andi esanggo holhesik, niren afuni o kota yoma mene mondok wulil tagalogo legetfisoageluk ninayonggo fikhemo wagosik yogondagat legetfisogoin andi nen he, hat hagainafuri ap inom, hemi inom, heamalugwi inom, hogogwi hagaila'lak inom, o kota yoma ekhe werek halok he, woginarek lanogen iluk yonggo wago o,” iluk yagatukwa. 14A'nogo yagatukwama, at Lot a'nogo siakhogo at a'logomi inebe pire aremnogo ap wenago welagaukwa mene inoba lagaikhesik mel yagaisasikhe: ”Nineisena Tuhan nen afuni o kota yoma mene mondok legetfisagain andi nen he, weak-weak heise wilibuogeluk hisa wagi o,” iluk yagaisasikhe meneat he, Lot eranen ikherek mene a'nogo iluk anggasukwa.
15A'nogo anggasukwama wagaikhemo, ohealek siakhogo it ap malaikat inebe pire aremnogo nen he, Lot mel yagatukwa: ”Ha'logomi inebe pire yi inom, hagwe inom, afuni o kota yoma mene legetfisikhi logolik hit hinebe inom hinoasi nogo nen he, yoma nen weak-weak heise lani o,” iluk mimingitukwa. 16A'nogo yagatukwa meneat he, at Lot a'nogo endawinggen nong-hong isikhesik aninurogo welagaikhe. A'nogo were'ma At Tuhan nen Lot endawi agaikhemo, it ap pok inebe pire aremnogo nen Lot ebe inom, a'logomi inebe pire aremnogo inom, agwe inom, inenggi lisogo wulakfisasukwasik o kota andoma nen woginarek lagaukwa.#2Ptr. 2:7 17A'nogo wulibi lagaukwasik, it malaikat inebe pire aremnogo ekhe nen mel yagaisasikhe: ”Hinebe telobagaigen he, weak-weak lani o. Laga logolik, hineilenggen hinambotkwe yetlasi wagik, o tonggwe horokhogo yoma kamo igik, ugun mondok lego. Hinebe wa'lagep hanogo nen he, o tom oba yatmaat andoma weak-weak heise lani o,” iluk yagaisasikhe.
18A'nogo yagaisasikhe meneat he, at Lot en onggo mel yagaisasikhe: ”Eige, noe. O tom oba andoma heise loageluk yaganisagun o. 19Haren an nebe hendawi nen an neluk fano logouwageluk eberogoat telnafen oba nen he, o tom oba andoma yatma mene at he, nebe andoma oan lagi'le'ma afuni Allah nen legetfisagain andi mene age nombo'ne laga logombik noasi lanogo. 20Yethan. Ninelokhoma horogat o kota endebat mene ekhe werek a'li. An heise andoma higit lambik fano logoigen yaganom o,” iluk yagatikhe. 21A'nogo yagatikhemo, at malaikat a'nogo nen he: ”Fano, afuni o kota endebat andi mene an nen mondogat inoasigin lego. 22An nen hat o andoma oan lagi'lek werek kwelek, yi'nogo ti'nogo ekhe hilingisigin lek andi nen, weak-weak lan o,” iluk yagatikhe. At Lot en, ”O kota andi endebat,” iluk isikhe andi nen o kota andi enu Zoar salhukwa.
Allah nen afuni Sodom Gomora mene mondok felelenghogo inoatikhe wene
23At Lot o Zoar asi lagaikhe hak he, o mo arat lakfei wagaikhe. 24Aremnogoat Allah nen meiso endu mene inom hendali al hangge amben weak mene enu belerang inom o Sodom Gomora pelabi wagaikhe.#Mat. 10:15, 11:23-24; Luk. 10:12, 17:29; 2Ptr. 2:6; Yud. 7 25A'nogo pelabi wagaikhemo, o kota pire andi arat weagetfikhi logolik, o tonggwe mondogat inom, yi mene ti mene inom weagetfigik, afuni inebe felelenghogo inoatik, isikhe. 26A'nogo meneat he, at Lot agwe a'nogo eilenggen ambothan hebekhogo yet lasi wagaikhemo re, mayu higit wera'lagaikhesik lo'loh mendek menlagaikhe.#Luk. 17:32
27A'nogo hilinglagaikhemo, ohealekwe at Abraham o age hak nineisena Tuhan emberek welagaukwaba aremnogo humusek lagaikhe. 28A'nogo lagaikhesik, eilenggen o Sodom Gomora higit o tonggwe mondogat omanogo yethasikhe re, o nunggunem endu hule mon-mon lagaikherek hak lagagunem eilenggen yethasikhe. 29Allah nen o tonggwe kota at Lot welagaikheba omanogo mondogat feleleng sapukhogo inoatikhe andi. A'nogo legetfisikhi logolik, Allah nen Abraham oba ebethasikhesik alisikhogo re, Lot telhikhemo heise lagaikhe andi.
Afuni o Moab mene inom, Amon mene inom, inombalak eroba nen ta'larik wagaukwa wene
30At Lot o Zoar andoma logou ailo agaikhemo re, a'logomi inebe pire aremnogo inomat o tom oba andoma lagaukwasik oumo welagaukwa. 31A'nogo logolik, a'logo manggusa mene nen agot mel yagatikhe: ”Nit nineisena arat yaman aga, nen, nit nineagwi ekhe takha mene ap wo'ninabu mene o yoma mondogat lego. 32Ma re, nit nineagwi ekhe takhouwogeluk nineisena mene ninom nogo uogen he, at obakheindok palasuageluk ekhe hilingisuogo,” iluk yagatikhe. 33A'nogo yagatikhesik, o hubanggo andi sambul ineisena i anggur amusu noageluk wogetukwa. A'nogo wogetukwasik, a'logo manggusa mene emberek nogo isukwa meneat he, eisena obakheindok mondok palagaikhesi'mo nogo nen he, a'logo emberek nogo isukwa mene andi onggorat welagaikhe.
34A'nogo hilingitukwasik, ohealekwe at a'logo manggusa mene a'nogo nen he, agot mel yagatikhe: ”Yogo, hubanggo an nineisena nemberek nogo ogo. O yogondak hubanggo re, hat hemberek nogo ubagaigen he, at obakheindok palasuageluk ekhe hilingisuok aro. A'nogo hilingisumo re, hobuk nit nemberegat nineagwi takhogoin o,” iluk isikhe. 35A'nogo yagatikhesik, o hubanggo andi sambulat, at Lot obakheindok palasuageluk hilingitukwasik, a'logo hobuk mene emberek nogo isukwa. A'nogo nogo isukwa meneat he, at Lot obakheindok mondok palagaikhemo nogo nen he, a'logo emberek nogo isukwa mene andi onggorat welagaikhe. 36A'nogo werek kwelek, Lot a'logomi andi inonggwarek ineisena mene inom nogo isukwa andiba emberegat omalik ina'ma agaukwa. 37A'nogo ina'ma agaukwasik, a'logo manggusa mene a'nogo eak abengge takhasikhesik enu Moab salhikhe. At he, afuni inunggulenu Moab mene yogondak werek andi inomba ta'lagaikhe andi. 38Nen, at Lot a'logo hobuk mene a'nogo nen eak abengge takhasikheat. Takhasikhemo re, enu Ben-Ami salhikhe. At andi afuni inunggul enu Amon mene inomba ta'lagaikhe andi.
Currently Selected:
KEJADIAN 19: inohap
Highlight
Share
Copy
Want to have your highlights saved across all your devices? Sign up or sign in
