KEJADIAN 20
20
Ap Abraham inom Abimelekh inomen hilingitukwa wene
1Hun Abraham a'nogo o Mamre nen he o Kanaan abel selatan fikhit andoma lagaukwasik o Syur honggolek Kadesh honggolek tulem andoma eisewerek hogo welagaukwa, andoma welagaukwasik hobuk o Gerar endebat ekhe logolik 2at agwe Sara a'nogo faget he, andi re an nagot iluk isikhe. A'nogo isikhemo it raja Abimelekh he Gerar agun a'nogo nen he, he Sara andi wani laluk he at ambit waluk wesuageluk lakfisasikhe.#Kej. 12:13, 26:7 3Hup misik obare it raja a'nogo abi wokhugunem en he Allah elokhoma weinam agaikhesik yagati logolik, he andire agun werek kwelek wanhenma re hebe wa'lasigin iluk yagatikhe. 4A'nogo yagatikheba nen he at raja Abimelekh en, he Sara agap senhasikhe lek andi nen he, at a'nogo nen ikhi logolik, ”Tuhan, an weak ekhe hilingiti'lek oba nen! Haren he an nebe inom, namlogomi an nunggulenu mene inom, mondogat leget ninobagagin a? 5At Abraham onggwaregen ikhi logolik he, he ari re an nagot ikhe, nen at he andi onggwaregen ogo re, an he Abraham agot ikhe andi nen he, wene andi faget an nendawinggen fanoba weak hilingiti fuk iluk anggikhi lagi o,” iluk yagatikhe.
6Yagatikhemo, Allah nen onggo abiba yagati logolik, ”Eberogoaro, hat hendawinggen mondok fano logolik hilingiten andi an nelure'ma re, an weak noba fegen hanogo iluk hagap telogo hobagagi o. Haren he andi agap sen hoak iluk herak fisegen andiba nen, he andi agun he, Nawene yagaisugu mene hilingi'mo hat wa'lagen hanogoluk samban hobaget igin enggere yogondak he andi agun onggwarek wogom o, nen haren he andi agun onggwarek wogosigin lek halok he hat hebe inom hat hamlogomi halinafi lagen mene mondogat inom wa'lasugun. 7Andi nen, he ari agun he Nawene yagaisili'logo mene hilingi'mo hat hebe wa'lagen hanogoluk aren samban hobaget igin enggere, yogondak he ari onggwarek wogom o. Hat hendawinggen wenggelhan! Haren, he ari agun onggwarek wogosigin lek halok he, hat hebe inom, hat hamlogomi tegelhabi'lagwi mene inom mondogat wa'lasugun,” iluk yagatikhe.
8A'nogo yagatikhemo ohealek hubet siakhogo at Abimelekh en it agoromi pegawai omanogo wolisasikhesik hilingitukwa aple a'nogo mondogat tindelogo yagaisasukwama it mondogat inailo hokho mene agaukwa. 9Andi hilingitukwasik Abimelekh en hun Abraham a'nogo wolhasikhesik heinok wokhikhi logolik, ”An nen weak hat hoba ningginik mene hilingitimo, haren enggin mene an nebe inom, an nagainafuri ferinarek welagirek mene inom ninoba fei wagen a? Nit ninoba yire ninggi'nogo nen hilingninobagegen, ap yi ariginik mene andi re ninobagaure mondok elo'lek meneba nen ninobagen o. 10Nenahalok haren a'nogo hilingiten abi!” 11iluk heinok wokhasikhe. At Abraham en onggo yagati logolik, ”An nen ebethikhi logolik he, o yoma afuni inendawinggen Allah oba inailo mene ekhe werek le'ma re, iren an nagwe yi inamolo asimbik an nebe pinggi noasinogo iluk anggirik hilingiti o. 12Nen at andi eberogoat he an nagot nineisena misik mene oba nen he, ninagaisawi amu-amu nen tagongge mene logolik wok-wok agagu. 13Allah nen an miming nafi logolik, heisena aiba herakfisaluk o honggotkwe andoma ya nogogik ta nogogik nikhi logogin iluk yaganetemo an nen he, nagwe yagati logolik hendawinggen an noba tipsek welagen halok he ap amu mene inobare, ari an noe o, iluk yagaisugunogo,” iluk yagatikhe.
14A'nogo yagatikhemo re, at Abimelekh en he, he Sara a'nogo hobuk Abraham onggwarek oba fei laga logolik, aren amingmingengge ap inom, hemi inom, wam domba, kambing, sapi, lembu, inom, wogetukwa. 15Wogoti logolik he at raja a'nogo nen Abraham yagati logolik, ”An naiba nanggweang omare haren kwelakhambik hendawimo hamolo asigin oba logogin halok fano,” iluk yagatikhe. 16Andi nen, he Sara a'nogo yagati logolik, ”Hat eberogo weak hilingiten lek iluk afuni nen inelurogo, enegengge re, Hoe uang perak mene 100 nen wogeti andi,” iluk yagatikhe.
17-18Wene hun Abraham agwe Sara faget hilinglagaikhe a'nogo oba re, Tuhan nen it hemi hun Abimelekh awi istana ba welagaukwa mene omanogo mondogat abili mene hilingfisasikhe mene andi faget, Abraham en Allah ayonggo fesikhemo, Allah nen Abimelekh ebe fanot figik, agwe inom, it hemi amingmingengge omanogo inom fanot fisasikhemo, inomalik taginabik lagaukwa.
Currently Selected:
KEJADIAN 20: inohap
Highlight
Share
Copy
Want to have your highlights saved across all your devices? Sign up or sign in
