KEJADIAN 21
21
Ishak ta'lagaikhe wene
1At Tuhan nen Abraham oba abok wene waretikhe higithogoat, he Sara fanotfesikhe. 2At Abraham ebe yaman agaikhesi'mo nen, Allah nen, ”Hamlogo yiba ta'lasigin,” iluk abok wene waretikheba, he Sara eak a'ma agaikhesik he, eak ap takhasikhe.#Ibr. 11:11 3Takhasikhemo, Abraham en he, omalik andi enu Ishak salhikhe. 4Salhikhesik, inenggi 8 hari welagaukwasigen Allah nen, ”Yi'nogo hilingi'no,” iluk yagatikhe higithogoat agap enggalimo mene palhikhe.#Kej. 17:12; Kis. 7:8 5Abraham ebe umur 100 tahun oba amlogo Ishak ta'lagaikhe andi. 6A'nogo ta'lagaikhemo, at Sara nen he, mel isikhe: ”Allah nen an nendawimo nagaiyek asimbik endo asuageluk hilingnafemo. Afuni ekhe wene yi inesanggo holugun mene inebe lombok an ninom inendawimo inagaiyek asigin o,” iluk isikhe. 7A'nogo isikhesik ekhe mel isikhe: ”Attagat he, afuni sa higiren Abraham yagati logolik, Sara nen eak takhambik eilak hunisigin o, iluk yagati logoilep legaro. Meneat he, at Abraham ebe yaman oba amlogo ap mene andi,” iluk isikhe. 8Omalik a'nogo arat hokho arik-hokho arik alue agaikhemo re, eilak paluogeluk Abraham endawimo agaiyegen pesta hokho mene ekhe isatikhe.
He Hagar eak Ismael emberek mugusogo wulakfisasikhe wene
9A'nogo hilingitukwasik he, inenggi ekhe sambul, at Abraham amlogo he Hagar aiba Mesir mene eak a'nogo inom, Ishak he Sara eak a'nogo inom, emberek yele yafi lagaukwa. 10A'nogo yafunem, he Sara eilenggen isasikhesik he, Abraham mel yagatikhe: ”Hat halolegengge an neak Ishak helagain mene andi, he amingmingengge mene eak ari emberek eise asinogo nen he, he ari eak emberek mugusogo wulakfisan o,” iluk yagatikhe.#Gal. 4:29-30 11A'nogo yagatikhe meneat he, at Ismael ogo re, at Abraham amlogo welagaikhe andi nen he, ”Wene andi weak ikhe,” iluk endawimo anggasikhe. 12A'nogo anggasikhemo, at Allah nen he, Abraham mel yagatikhe: ”An nen he, haren tago mene inebe hokhorogo asugun o, iluk wene watheti a'nogo re, at Ishak en tago mene nen hokhorogo asugun andi nen, he Hagar eak emberek faget ninggi'nogo hilingisigin, iluk wenesugwi ebetun. We, he Sara nen ikhe andiat ane hologo hilingi'no o.#Rm. 9:7; Ibr. 11:18 13Andi higithogo re, at Hagar eak andi hat hamlogoat andi nen, at andi ombalak inunggulenu hokho asuageluk, an nen at ombalak hokhorogo wogosigin aro,” iluk yagatikhe.
14A'nogo yagatikhemo, hubet ohealegat siakhogo at Abraham en he, sumburu inom, iwak wam agap mene hilingik meneba elema hinago mene inom, ebekhalem noageluk Hagar wogetikhesik, eak a'nogo yaruk fesikhesik, ”Lani o,” iluk lakfisasikhe. A'nogo lakfisasikhemo, o andoma herakfisaluk he, o leimo enu Bersyeba andoma ya nogolik ta nogolik nikhi lagaukwa. 15Nugu kwelek, i ebekhalem en noageluk wogisasikhe mene a'nogo lek agaikhemo, eak a'nogo e sagauk-sagaungge a'ma fuluk he, 16eak fesikheba aremnogo nen endep taganhogo huli 100 meter hangge lagaikhesik hurek logolik, endawimo nen he, mel anggasikhe: ”An neak neilhanem en wa'lagunem he, nendawinggen sebeligin mondok elo'lek asinogo o, neisena,” iluk ane elagaik aneba le agaikhe.
17A'nogo isikhemo Allah nen Ismael ane esanggo holhikhesik, malaikat Allah nen yonggo pelakfisa wagarek mene ekhe pogoroba nen, he Hagar mel yagatikhe:
”He Hagar, hat hendawimo weak aga andi, ninggi'nogo nen. Heak ane Allah esanggo holhe andi nen he, hendawi fitun o. 18Hat hebe heak oba lambik he, heak wanimbik ane konino o. An nen, aren tago mene re, inunggulenu hokhorogo hilingisogo fagain o,” iluk yagatikhe. 19A'nogo yagatikhemo, at Allah nen he, he Hagar eilenggen afumagengge salek hangge welagaikhe mene seleget fesikhemo re, i mogo ekhe were'ma yethasikhe. Yethasikhesik, iwak wam agap mene hilingik meneba a'nogo elema hinasi lagaikhesik he, eak noageluk wogosi wagaikhe.
20A'nogo hilingitukwasik oba nen, Allah nen Ismael kwalogo mondok welagaikhe. A'nogo kwalogo welagaikhe andiba, yenggerek a'nogo arat alue agaikhesik, o leimo enu Paran andoma logolik, paik sue watuaple enggi pagat weak, hilinglagaikhe. 21A'nogo were'ma, at agaisa nen he, he Mesir mene ekhe igetikhe.
Hun Abraham inom Abimelekh inom wene wat-wat agaukwa wene
22Andem higit ap raja Abimelekh agoromi tentara inoe panglima enu Pikhol inom Abraham ambit wagaikhesik yagati logolik he, ”Hat he, yi'nogo ti'nogo hilingitunem Allah nen higithogo lebethili'lago,#Kej. 26:26 23andi halok he, an nen hat hoba nendawinggen fano agagi hakhogo haren an nebeba inom, an nen ambisangma nen ta'lasugun mene inom, iren ambisangma taginabugun mene inom, nanggweang hebe welagen andem oba inom, haren kwanirogo ekhe hilingisigin lek iluk yogondak Allah eilhanem eberogoat iluk hombuk palin,” iluk yagatikhe.
24Yagatikhemo at Abraham en ikhi logolik, ”Nane huli figi o,” hombuk palhikhe.
25A'nogo oba nen he, hobugen at raja Abimelekh amingmingengge nen i mogo habulik mene ekhe telasukwa mene a'nogo faget Abraham en Abimelekh oba ikhi logolik he, nenahalok i mogo andi telha he, iluk nendawimo mondok weak ari'lago iluk isikhe. 26A'nogo isikhemo at Abimelekh en Abraham yagati logolik he, ”Hilinglaga mene andi faget he, haren endep yaganeten le'ma re we an he, yogondak yiba nen nesanggo holhimo re, ebe sa nen hilingite iluk ogo re an nonggorat,” iluk yagatikhe. 27A'nogo yagatikhemo at Abraham en wam sapi inom domba inom ulukhogo Abimelekh wogetikhesik, it emberek aremnogo wene wat-wat agaukwa. 28Mene at he, Abraham en wam domba anggele'ma omanogo nen eak 7 nen omanogo ekhe wendeberogo fesikhe, 29Abimelekh en Abraham heinok wokhiki logolik, ”Nenahalok haren wam domba 7 nen yi wendeberogo fegen?” iluk isikhe. 30A'nogo isikhemo at Abraham en ikhi logolik, ”Neisena, i mogo habulik mene yi re an nen habulhi, iluk fageti logolik, enegenggere wam domba ebe 7 nen an nenggiba mene wokheti lagi mene ya, hat helan o,” iluk yagatikhe. 31O andemen it inebe pire nen a'nogo wene wat-wat agaukwama, o andem enu Bersyeba salhukwa.
32It a'nogo o Bersyeba andem wene wat-wat agaukwasik Abimelekh inom Pikhol inomen he inambotkwe ap Filistin mene were'ma lagaukwa. 33A'nogo hilingitukwasik aremnogo at Abraham en e enu tamariska misik ekhe sombologo waluk o Bersyeba wagaikhesik yakfesikhe, andi huli nen obalik aremnogo Tuhan Allah Etok Mondok welagarek mene a'nogo fogeratarek oba welagaikhe. 34A'nogo hilingitikhesik at Abraham o Filistin inanggweangma andoma aninurogoat welagaikhe.
Currently Selected:
KEJADIAN 21: inohap
Highlight
Share
Copy
Want to have your highlights saved across all your devices? Sign up or sign in
