KEJADIAN 22
22
Allah nen he, ”Hamlogo Ishak an faget warogo nolne'no,” iluk Abraham yagatikhe wene
1Inenggi ekhe inom welagaukwasigen Allah nen Abraham obabut paligeluk, ”Abraham,” iluk woletikhemo at Abraham en he, ”Woi! Neisena. Nebe yi welagi,” iluk yagatikhemo,#Ibr. 11:17-19 2At Allah nen he, ”Hamlogo Ishak misigat tago hendawinggen hundik mene andi waluk he, o Moria lan o. Andoma lagen halok, an nen punu ekhe yagahesigin oba, andoma hamlogo andi an faget warogo endumo nolne'no o,” iluk yagatikhe.#2Taw. 3:1 3A'nogo yagatikhemo, ohealek huberat siakhogo, Abraham en Allah faget warogo nolesugun mene faget e wurogo anggo keledai amboroba homagaisogo fesikhe. A'nogo fesikhesik, amlogo inom, amingmingengge inebe pire inomat, o Allah nen yagatikheba a'nogo lagaukwa. 4Andoma louwogeluk, o inenggi henaganek meneba laga logolik, Abraham eilenggen yethasikhe re, o Allah nen, ”Andoma lan o,” iluk yagatikheba a'nogo yatmaat were'ma yethasikhe. 5A'nogo yethasikhesik he, amingmingengge inebe pire aremnogo mel yagaisasikhe: ”Hit hemberek wam keledai yi fisogo ya logoino. An namlogo nemberek enek he nineisena Tuhan fogerasi lambik he, ninambotkwe hinoba wesugun o,” iluk yagaisasikhe.
6A'nogo yagaisasikhesik, Abraham onggwaregen pisok inom, endu inom wanhikhesik he, e Allah faget ekhe warogo nolesugun mene waluk lagaukwa mene a'nogo amlogo Ishak omoloba fesikhesik he, emberegat lagaukwa. 7A'nogo laga logolik, amlogo Ishak en he, mel yagatikhe: ”Neisena,” iluk isikhemo Abraham en he, ”Nangge, namlogo,” iluk yagatikhemo, at Ishak en he, ”Nit he, Allah faget ekhe warogo nolesugun mene endu inom, e inom, waluk wago meneat he, wam domba eak ebe ki, neisena,” iluk yagatikhe. 8A'nogo yagatikhemo, at Abraham en he, ”Allah onggwaregen wam domba eak ekhe wo'nisagain o,” iluk yagatikhesik emberegat pikhit lagaukwa.
9It a'nogo laga lagaukwasik, o Allah nen Abraham yagatikheba a'nogo arat lagaukwasik, Allah faget ekhe warogo nolesugun oba obalik halogo, helep sengget warogo e amboloba fesikhesik, amlogo a'nogo enggi hele warogo re, amboloba weingfesikhe.#Yak. 2:21 10Arat weingfesikhesik, pisok lisogo wanhikhesik he, amlogo ebe wasigeluk isikhe. 11A'nogo wasigeluk ugunem, malaikat Tuhan nen yonggo pelakfisa wagarek mene ekhe ane pogoroba nen mel yagatikhe: ”Abraham, Abraham,” iluk yagatikhemo, at Abraham en he, ”Woi? Neisena,” iluk isikhemo, aren he, 12”Hat hamlogo ari henggi fakfuluk at oba yi'nogo ti'nogo ekhe hilingitun o,” iluk malaikat en yagatikhe andi ebe re, nineisena Tuhan nen yagati logolik ekhe mel yagatikhe: ”Hat hamlogo ari ebe misik tago hilingi'mo re, hendawirati'legat, An wo'nesigeluk egen andi nen, haren An agaugwetnafendik nane hologo hilingiten andi nen hat hobabut yogondagen an arat nelu aga o,” iluk yagatikhe. 13A'nogo yagatikhemo, at Abraham eilenggen era'lukwe yethasikhe re, wam domba ai mene ekhe andimuk oba nen e anggele'ma hobal lagaikhesik were'ma eilenggen hasikhe. Hasikhesik wam a'nogo warogo re amlogo obali'mo eisena Tuhan faget noletikhe. 14A'nogo noletikhesik, o andoma enu re, mel salhikhe: ”Nineisena Tuhan nen, afuni yi mene ti mene le'ma wogisikherek oba,” iluk enu salhikhe. A'nogo salhikhe andi nen, huli yogondagen ogo re, ”Nineisena andom oba afuni yi mene ti mene le'ma wogisikherek oba,” iluk agaregat.
15Hobuk malaikat nineisena Tuhan nen yonggo pelakfisa wagarek mene a'nogo pogoroba nen Abraham mel yagatikheat: 16”Nineisena Tuhan nen he, haren hamlogo misigat mene hendawirati'legat an wo'nesigeluk egen andi nen he, an nonggwarek nenu hombuk palogo wene yi wathesik:#Ibr. 6:13-14 17An nen hobugalep hokhorogoat fanothafik, haren tagongge mene inebe hesagal pogoroba hokhorogo welagarek andi hangge inom, i al i laut yenggelek era'lukwe welagarek andi hangge inom, mondok sik-pikhogo hilinglasuageluk hilinghafik, iren tagomangge mene o inaselei mene welagaikharekwe andoma mabenetfisaluk logouwageluk hilinginafik, igin o.#Ibr. 11:12 18An nen, yi'nogo hilingi'no, iluk yagaheti mene nane hologoat hilingiten andi nen he, afuni kweangma mene inunggulenu lombok mondogat, An nen haren tagongge mene fanorinafi logogin andi hak, iren ogo An nen fanorinabuageluk, kino yaganesugun, iluk ikhe o,” iluk malaikat a'nogo nen yagatikhe.#Kis. 3:25 19A'nogo hilingi'luk, inambotkwe Abraham amingmingengge inebe pire aremnogo inoba wagaukwasik, inomat o Bersyeba wagaukwasik, at Abraham andoma welagaikhe.
Nahor ambisangma mene nen ta'larik lagaukwa wene
20At Abraham oe re enu Nahor welagaikhe. Tom Moria oba nen hilingitukwa mene arat hilingitukwasik Abraham holhugunem en he, Nahor agwe Milka emberek aremnogo inamlogomi ap mene inebe 8 nen werek ugunem holhikhe. 21-23It inebe re inoe manggusa mene enu re Us, nen ombo'ne re Bus inom, Kemuel, Kesed inom, Hazo, Pildash, Yidlaf, Betuel inom andem. At Kemuel andi at Aram eisena welagaikhe, nen at Betuel ebere Ribka eisena welagaikhe. 24Hun Nahor agwe ekhe heihe mene welagaikhe enu re Reuma, nen at he andi nen omalik he, Teba inom, Gaham inom, Tahash inom, Maakha inom taginafikhe.
Currently Selected:
KEJADIAN 22: inohap
Highlight
Share
Copy
Want to have your highlights saved across all your devices? Sign up or sign in
