KEJADIAN 25
25
Hun Abraham agagwi amu mene inambisangma nen ta'lagaukwa wene
(1Taw. 1:32-33)
1Hun Abraham agwe heihe enu Ketura helasikhe. 2Helasikhe mo at agwe andiba nen he againafuri inenu Zimran inom, Yoksan inom, Medan inom, Midian inom, Isybak inom, Suah inom, taginafikhe. 3At Yoksan andi re it Syeba inom he Bedan inom ineisena, nen at Bedan ambisangma menere Asyur inap inom, Letus inap inom, Leum inap inom andoma. 4At Midian againafuri re: Efa inom, Efer inom, Henokh inom, Abida inom, Eldaa inom. It mondogat he, he Ketura oba nen tagongge mene. 5At hun Abraham mene alolegengge yi mene ti mene omanogo mondogat he, at Ishak enek wogetikhe. 6At ebe eluk logolik angge yi mene ti mene fena hokhorogo at amlogomi agagwi heihe mene nen tago mene omanogo inendawimo fanorogo iluk wogisasikhe. Wogisasikhesik at Ishak horokhogo yoma logogin enggere, hit he at were'ma ya herakfisaluk o yatma lani isikhe. Isikhemo o Kanaan mo lagai wagarek fikhit andoma lagaukwa.
Abraham ebe wa'lagaikhemo salhukwa wene
7-8Abraham ebe mondogat yaman agaikhesik umur 175 tahun hilinglagaikhemo nen wa'lagaikhe. At ombawi hokhorogo welagaukwa mene omanogo nen sali lagaukwa. 9Wa'lagaikhemo, at amlogo Ishak inom, Ismael inomen he, o Mamre mo lagai wagarek fikhit yabumo oumo enu Makhpela andoma salhukwa. Oumo o ogoi andi attak he Zohar amlogo Efron aiba Het agun a'nogo anggweangma mene. 10Obalik andire attak hun Het agun andiba at Abraham en onggo palhikhesik agwe waganogo andoma sali lagaikheba.#Kej. 23:3-16 11Andem sambul he, at Ishak i mogo nit ninaneba, ”An futnobagali'lagoba,” iluk u hak Lahai-Roi agarek oba horokhogo andoma welagaikhe. At eisena Abraham wa'lagaikhemo Allah nen Ishak fanot fikhi lagaikhe.
Ismael ambisangma nen ta'larik lagaukwa wene
(1Taw. 1:29-31)
12At Ismael andi hun Abraham agwe Mesir mene enu Hagar at Sara amingmingengge welagaikhe mene a'nogo inomen tago mene. 13-16Ismael againafuri inebe 12 nen ta'lagaukwa, nen it inebe ta'lagaukwa higithogo inenu re yi: Nebayot, Kedar, Adbeel, Mibsam, Misyma, Duma, Masa, Hamad, Tema, Yetur, Nafisy, Kedma inom taginafikhe. A'nogo taginafikhemo it andi inebe 12 inap andi mene inambu-inombalak inom, inogogwi inenupogot inom, it mene inawi sili inom, inebe inenu re inawi enu higithogo salek welagaukwa. 17At Ismael ebe umur 137 tahun welagaikhesigen ebe wa'lagaikhemo at ambu-omba salinafukwaba omanogo salhukwa. 18Nen, it at ambisangma mene re o Hawila hilingi'luk Syur hilingi'luk o Mesir en mo lagai wagarek fikhit Asyur yeretma andoma welagaukwa. Nen, at Abraham en taginafikhe mene fena omanogo inom he, yatmaat inamu-inamu welagaukwa.
Esau Yakub emberek ta'lagaukwa wene
19At Abraham amlogo Ishak en hilingiti lagaikhe re, yi'nogo: 20At Ishak en, he Ribka Laban ombo'ne mene Betuel a'logo aiba Aram o Mesopotamia mene itikhe a'nogo, Ishak ebe umur 40 tahun oba itikhe. 21Itikhe mene re, at Ribka eak legen he, nineisena Tuhan kino yagatikhe. A'nogo yagatikhemo, nineisena Tuhan Ishak ane esanggo holhikhesik, Ribka omalik a'ma agaikhe. 22Omalik a'ma agaikhe andi re, hulipmio a'ma agaikhesik, inebe oan ta'lagi'lek logolik, alabutmo nen emberek limamit mondok palhi lagaukwa. A'nogo palhi lagaukwama, Ribka nen he, mel isikhe: ”An nalabutmo yi ninggi'nogo nen hilingiri'lago he,” iluk Tuhan oba heinok wanhikhe.
23A'nogo heinok wokhasikhemo, At Tuhan nen he:
”Ap inunggulenu pire mene halabutmo werego.
Were'ma re, agailak emberek weak logogun mene taginabigin o.
Omalik hobuk mene omame hokho ta'lagunem,
attak mene nen he, ombo'ne mene andi awe a'ma hak logogin o,” iluk yagatikhe.#Rm. 9:12
24A'nogo yagatikhesik oba nen, Ribka omalik tasigin mene ambol heinet watikhesik, omalik ap hulipmio taginafikhe. 25Eak manggusa mene re, agap elokhonggen mep mene hangge, omosi ebene mondok hokho werek mene ta'lagaikhe. A'nogo ta'lagaikhe andi nen enu Esau salhukwa. 26Nen, at ombo'ne mene tatunemen he, attak mene eisok onggut enggi ninghogo senegengge ta'lagaikhe. A'nogo ta'lagaikhe andi nen enu Yakub salhukwa. At Ishak ebe umur 60 tahun oba omalik hulipmio mene andem ta'lagaukwa andi.
At Esau nen, ”Manggusa mene re, harame o,” iluk agot oba onggo wanhikhe wene
27It yenggerugwi aremnogo emberek inebe inalue aga logolik, at Esau sue, paik enggi puk weak watu elu mondok agaikhesik, ebe enggama mondok welagaikhe. Nen, at Yakub obabut he, yi kwe ti kwe lagi'lek aiba mondok welagaikhe. 28At Ishak sue, paik amolo welagaikhe andi nen he, Esau endawinggen tulem hangge welagaikhe. Nen, at Ribka Yakub endawinggen tulemhogo welagaikhe.
29Inenggi ekhe sambul, at Yakub kacang eil mep mene isatunem, at Esau sue, paik sorik nikhi lagaikhesik, sumburu mondok aik fesikhemo oba wagaikhe. 30Oba wagaikhesik he, mel yagatikhe: ”Nagailak. An sumburu mondok naik fikhemo re, kacang eil mep mene isaten oma an ekhe wo'nom o,” iluk kino yagatikhe. (A'nogo yagatikhe andi nen he, at Esau enu ekhe Edom, iluk agarek andi.)
31A'nogo yagatikhemo, at Yakub en he, ”Fano o. Haren he, An nebe manggusa esin logolik eise asigin mene andi, hat eise ame, iluk yaganeten halok he, wokhesigin aro,” iluk yagatikhe. 32A'nogo yagatikhemo, at Esau nen he, ”An sumburu naik mondok hokho mene fikhemo re, wa'lasu hak welagi. Ma re, an nebe manggusa mene logolik eise asigin mene andi esin fuk, mondok lego,” iluk yagatikhe. 33A'nogo yagatikhemo, at Yakub en mel yagatikheat: ”Haren he, an nebe manggusa esin logolik eise asigin mene andi, hat eise ame, iluk Allah enu hombuk palogo yaganom o,” iluk yagatikhemo, at Esau nen he, Allah enu hombuk palogo ebe manggusa esin logolik eise asigin mene andi agot Yakub eise asuageluk wogetikhe.#Ibr. 12:16 34A'nogo isukwasik he, at Yakub en sumburu roti mene ekhe inom, kacang eil mep mene isatikhe omanogo inom wogetikhe. Wogetikhemo i inom nasikhesik he, helalagaikhe. At Esau nen, an nebe manggusa mene logolik eise asigin andi esin lego, iluk agot oba onggo wanhikhe re, andi.
Currently Selected:
KEJADIAN 25: inohap
Highlight
Share
Copy
Want to have your highlights saved across all your devices? Sign up or sign in
