KEJADIAN 26
26
Ishak o Gerar welagaikhe wene
1O andomaba attak hun Abraham logolik hilinglagaikhe a'nogo hakhogo nekhengge sumburu ouwak lagasikhemo, at Ishak en an o Gerar andoma logogin fano a, iluk hun Abimelekh raja Filistin mene andiba heinok wani lagaikhe. 2At Tuhan Ishak elokhoma weinam asi wagaikhesik yagati logolik, ”Hat he, o Mesir la fuk. An nen yagaheti hakhogo o yoma logoino, 3An nen wene abok wene warogo heisena Abraham yagatigi mene a'nogo higithogo hilingiti logolik, hebe fetharek welagik, fanot hobagagik, ikhi logogin. Nen o kweang yoma hat inom haren tagongge mene inom wokhisagain. 4-5Hat hamlogomi inom, hombawi inom he pogoroba hesagalenggen hokhorogo werek andi hakhogo wokhetik, nen haren tagomangge mene inoba kweang yi abirengge it wogisigik, igin. Nen at Abraham An nane holfuluk nawene melalek inom, yi'nogo hilingi'no ti nogo hilingi'no iluk melalhu mene inom, tiphogo hilingiti lagaikhemo at alisikhogo re hat fanot hobagagin. A'nogo hilinghafunem neambik, it yi afuni ti afuni inunggulenu lombogen yaganeti logolik he, Abraham Ishak inombawi fanot fisikhi lagagin hak, nirogo higithogoat fanotninabin iluk yaganesugun,” iluk yagatikhe.#Kej. 22:16-18
6A'nogo yagatikhemo at Ishak o Gerar omanogo welagaikhe. 7Andoma logolik, at Ishak endawimo ebeti logolik he at agwe mondok eil alili re'ma afuni andoma mene nen ebe warogo fuluk agwe lisogo helanogo iluk he, iren Ribka faget heinok wokhasukwama aren he, ”Andi an nagwe fuk. Mene at he an nagot,” iluk yagaisasikhe.#Kej. 12:13, 20:2 8At Ishak o andoma enggi aninurogo logolik lingge misik sambul at raja Abimelekh a'nogo jendela folelekwe nen wulak isa wagunemen he at Ishak a'nogo he Ribka inom inagap sen-sen agunem yerisasikhe. 9A'nogo hilingitunem isasikhesik at Ishak a'nogo wolhasikhesik heinok wokhiki logolik, ”He ari re hat hagwe logoligen, nenahalok haren at he an nagot, egen?” iluk heinok wokhasikhe. Heinok wokhasikhemo, at Ishak en onggo ikhi logolik, ”An nen he ari nagwe igin halok nebe pinggi noasugun yi re, iluk ebetirigen igi o,” iluk yagatikhe. 10At Abimelekh en ikhi logolik,” An nagoromi mondogat halinafi lagi mene nen ekhe hagwe ari inom nogoilep andi, nen andi eberogo hilingla'lepma nen he, nit weak hilingitoba re hat honggwaregat lalegen. Hat he nit ninoba yi re ero ninggi'nogo nen hilingfegen?” iluk yagatikhe. 11A'nogo yagatikhesik at Abimelekh en afuni omanogo yagaisikhi logolik,” Ap sa nen ogo, he sa nen ogo, ap yi agwe emberek fagisugunem isegep halok he, ap andi ebe pinggi wa'no,” iluk yagaisasikhe.
12At Ishak en o andoma yabu wanhikhesik enggen awi feik lakfesikhemo At Tuhan nen enggen awi a'nogo fanot fugunem tahun andiba enggen itikhe re yatikhe mene a'nogo we endebat oba nen, we ekhe inom sik-pik arik laga logolik altap 100 nen mangorogo ekhe inom itikhe. 13At Ishak angge yi mene ti mene hokho aga logolik enggi werek agun agaikhe. 14A'nogo aga logolik at mene amingmingengge inebe hokhorogoat agaukwa, domba, sapi inom hokhorogoat agik ugunem, it Filistin inaben inoba haro oba fikhi lagaukwa. 15Inoba haro fikhi logolik at Abraham eluk logolik, amingmingengge nen i nunggu kwe iluk kweang habulhikhe kwe omanogo mondogat kweang te'merik lagaukwa. 16A'nogo hilingitukwasik, at Abimelekh en ikhi logolik, ”Hat he nit mene a'ma hak werek kwelek mondok henggi werek agenma, kweang ya nit ninanggweang oba yogondak yaat hela wulibin,” iluk wenagetukwa. 17Wenagetukwama at Ishak a'nogo wulibi lagaikhesik o Gerar tonggoma awi tenda wurogo enggi aninurogo andoma welagaikhe. 18Andoma logolik i mogo yenggelek kwe eisena Abraham eluk logolik habulhikhe mene at wa'lagaikhemo it ap Filistin inaben kweang oba sebelhukwa mene omanogo habulhikhe. Habulhikhesik i mogo omanogo enu eisena nen salek welagaikhe hakhogo salik lagaikhe.
19At Ishak amingmingengge nen o Gerar tonggoma andoma i mogo hokhorogo habulhukwasik, i mondok hokho-pokhorogo heratukwa. 20Meneat he, it Gerar inap andoma it sapi, domba halhi lagaukwa mene inomen, Ishak anggo it sapi, domba halhi lagaukwa mene inom inane sagalhi logolik he, ”I yi niren mene,” isukwama, at Ishak en i mogo a'nogo nit ninaneba ”Inane sagalhukwaba,” u hak, enu Esek salhikhe. 21A'nogo hilingitu nen at Ishak amingmingengge nen i mogo fena amu mene habulhikhemo nen nekhengge andi faget ogo nili-hili isukwasik, at Ishak en i mogo a'nogo hilingitukwa a'nogo faget nit ninaneba, ”Ninom weak,” u hak iluk enu Sitna salhikhe. 22Andoma herakfisaluk at higilogo o ale'ma asi lagaikhesik i mogo henaganek mene ekhe habulhikhe. Habulhikhemo nen attak hilinglagaikhe a'nogo hakhogo hilingitukwa le'ma aren ikhi logolik he, ”Yogondak nit Nineisena Tuhan nen seleget ninobagaikhemo o kweang yomaba logolik ninenggi werek hilingninobagali'lago,” iluk i mogo a'nogo nit ninaneba, ”Lologo” u hak Rehobot salhikhe.
23A'nogo nen at Ishak o omanogo nen wulifikhesik o Bersyeba wagaikhe. 24Wagaikhesik hup a'nogo sambul nineisena Tuhan at elokhoma weinam asi wagaikhesik yagati logolik, ”An nen attak namingmingengge Abraham oba wene abok wene warogo yagatigimo hat he hailo asu fuk. Heisena Abraham eisena Allah Nebe An. An nenat fetharek welagik, fanot hobagagik, hat herembul oba mene ta'lasuageluk hokhorogo wokhetik hilinghafi logogin,” iluk yagatikhe. 25A'nogo yagatikhemo at Ishak en helep mezbah wut fesikhesik aremnogo nineisena Tuhan fogeratikhe. A'nogo hilingitikhesik o andoma tenda wurogo werek kwelek amingmingengge nen i mogo fena ekhe habulhukwa.
Ishak inom Abimelekh inom wene watukwa wene
26Lingge misik sambul at Abimelekh o Gerar en he hun Ahuzat at onggwarek komotu mene inom, hun Pikhon ap sikhe fisogo mene inoe panglima inom he Ishak inom ambi asugun iluk ambit wagaukwa.#Kej. 21:22 27Wagaukwama at Ishak en it heinok wogisikhi logolik, ”Hit he attak an ninom weim palagagusik hinanggweang oba nen mugisogo wilaknabi wagagip engge a'nogo nen he, yogondak nenahalok an ninom ambi asugun iluk wagep?” iluk heinok wogisasikhe. 28Heinok wogisasikhemo iren onggo yagati logolik, ”Hat Allah nen fetharek a'nogo yogondak nit ninelu ari'lagoma, ninom seberogo wene wat-wat uogeluk anggikhi lago o. 29Andi faget niren hat hoba weaget hobagagi'lek, ninobabut sakhorek oba loageluk oboget heasugumo, yogondak hat Tuhan nen fanot habi'lago mene weinam agunem niren enek hikhi lagoma, an nen ogo hit hinoba weaget hinobagagin lek iluk hombuk palin,” iluk yagatukwa. 30A'nogo yagatukwama at Ishak en it a'nogo seni isagaisogo woginafikhesik, inamburu ninggik, inagai ninggi isukwa. 31A'nogo hilingitukwasik lingge weirogo hubet it inebe fena-fena inane wene warogo hombuk palogo hilingitukwasik, at Ishak en it a'nogo nendawi-hendawirogo lakfisikhi logolik, hai warogo ebekhalem lakfisa lagaikhemo inaiba lagaukwa.
32Inenggi andi sambul, it Ishak amingmingengge omanogo nen i mogo habulhukwa mene omanogo faget yagasi waga logolik, ”Niren i herato,” iluk yagatukwama, 33at Ishak en i mogo a'nogo ninaneba, ”Hombuk Palek” u hak Syeba salhikhe. Nen, ero a'nogo hilingitikhe andiba nen o andoma enu Bersyeba salhikhe andi.
Esau agagwi inunggulenu endakwe mene woginafikhe wene
34At Esau ebe umur 40 tahun oba at agagwi inebe pire mene afuni inunggulenu Het mene ina'logomi woginafikhe. Nen, Inenu re Yudit hun Beeri a'logo inom, Basmat Elon a'logo inom, woginafikhe. 35It helime inebe pire andem en he, at Ishak inom Ribka inom inabusakwe sagauk-pagaukhogo hilinginafi lagaukwa.
Currently Selected:
KEJADIAN 26: inohap
Highlight
Share
Copy
Want to have your highlights saved across all your devices? Sign up or sign in
