KEJADIAN 27
27
Ishak en he, Yakub Allah nen fanorati logouwageluk yagatikhe wene
1Inenggi ekhe sambul he, Ishak arat yaman agaikhesik eilenggen mondok mum agaikhemo, logolik, amlogo Esau manggusa mene a'nogo woletikhemo wagaikhemo re, mel yagatikhe: ”Namlogo e,” iluk yagatikhemo, at Esau nen he, ”Wu, Neisena,” iluk yagatikhe, a'nogo yagatikhemo 2at Ishak en he, ”An nebe arat mondok yaman agarik neluk logogin mene hangge lek andi, heilenggen niikhi lagen o. 3Halok, hasikhe haruabengge wanimbik he, paik enggama mene misigat halok ekhe wa'nesi lan o. 4Waten halok he, an namolo nen fano ninggirek hagat fanorogo isagaisogo wo'nesi we'no. Wo'nesi wagunem an nambik he, nebe wa'lagi'lek neluk logolik yaat Allah nen fanothafi logouwageluk wene nendawimo mene ekhe yagahesigin o,” iluk yagatikhe.
5Wene Ishak en Esau yagatikhe andi, he Ribka esanggo holhikhesik, Esau paik sosigiluk enggama lagu kwelek he, 6Yakub mel yagatikhe: ”Yogondak yaat heisena nen he, Esau mel yagatunem nesanggo holhi: 7-8Paik misigat halok ekhe wasi lambik he, fanorogo isagaisogo wo'nesi we'no. Wo'nesi wagunem an nambik he, an nebe wa'lagi'lek neluk logolik yaat Allah nen fanothafi logouwageluk wene nendawimo mene ekhe Allah eilhanemat yagahesigin o, iluk yagatunem nesanggo holhi,” iluk yagatikhesik, ekhe mel yagatikhe: ”Neak, wene an nen yagahesigin mene andiat hesanggo holimbik he, higithogoat hilingi'no o. 9Hat he, wam domba nit mene awiloba lambik he, an nen heisena amolo mene isasigen he, wam kambing eak pire mondok otholik fano mene ekhe wendeberogo hambogoisogo wo'nesi we'no. 10Wo'nesi wesumo an nen isasumo re, heisena noagen wogosi lanogen o. Wogosi lamo nambik he, at ebe oan wa'lagi'lek logolik, Allah nen fanothafi logouwageluk wene endawimo mene yagahesuagen, lano,” iluk yagatikhe.
11A'nogo yagatikhe meneat he, at Yakub en agaisa mel yagatikhe: ”Nagaisa. Esau ebene re, omosi hokhorogo werek, nen an nebene re nomosi lek. ariginik meneat he ninggi'nogo yaganeten? 12Neisena nen nebe enggi fa'neambik he, heranen lalnabi wagen, iluk Allah nen fanothafi logouwak, iluk wene endawimo mene yaganeti'lek he, homan nobagauwageluk yaganeten andi nenahalok?” iluk yagatikhe. 13A'nogo yagatikhemo, agaisa nen he, ”Ninggi'nogo hilingisigin iluk hendawinggen fitun o, neak. Homan hobagaikhe halok an noba lombok a'ma re, an nenat hilingisigin o. An nen wam kambing andoma wani lan o, iluk yagaheti mene andiat hilingi'no o,” iluk yagatikhe. 14A'nogo yagatikhemo, at Yakub wam kambing omanogo hambogosi lagaikhesik agaisa wogosi wagaikhemo re, at Ishak amolo mene isatikhe. 15Isatikhesik, Esau asu fano mondok mene aiba fesikhe mene wanhikhesik Yakub ikfesikhe. 16Ikfesikhesik, kambing esi nonggolek mene at Yakub enggiba inom, ot oba inom omosi lekwe labetfesikhe. 17A'nogo labetfesikhesik, fano mondok isatikhe mene omanogo inom, sumburu roti mene werago fesikhe mene inom, Yakub wogetikhe.
18A'nogo arat wogetikhemo re, at Yakub en waluk eisena oba lagaikhesik he, mel yagatikhe: ”Neisena,” iluk yagatikhemo, aren he, ”Wu! Hat sa. Esau a? Yakub a?” iluk yagatikhe. 19A'nogo yagatikhemo, aren he: ”An Esau hamlogo manggusa mene a'nogo aro. Haren, Allah nen fanothafi logouwak, iluk yagane'nogen he, Paik ekhe isagaisogo wo'nesi we'no, iluk egen a'nogo an arat wasi lagarik isago waluk wagi yi nanogen he, hebe menlame o,” iluk yagatikhe. 20A'nogo yagatikhemo, at Ishak en he, ”Namlogo e, weak-weagat heilmo agama andi nailo e,” iluk yagatikhemo, aren he, ”Nineisena Tuhan Allah haren fogeratendek mene a'nogo nen neilmot fikhemo o,” iluk yagatikhe. 21A'nogo yagatikhemo, at Ishak en Yakub mel yagatikhe, ”Hat Esau eberogo ara? Lega. Nenggi fakheagen he, noba horokhogo ya higilha me o,” iluk yagatikhe. 22A'nogo yagatikhemo, at Yakub Ishak oba horokhogo higilha wagaikhemo re, enggi fakhikhi logolik, mel yagatikhe: ”Hat hane re, Yakub hane hangge meneat he, henggi nek he, Esau enggi hangge o,” iluk yagatikhe. 23A'nogo yagatikhesik, at Yakub enggi omosi hokhorogo Esau omosi hangge welagaikhe andi nen: ”Hat nabit,” iluk yagasu elo'lek agaikhe meneat he, Yakub Allah nen fanorati logouwageluk wene yagasigiluk, 24heinok tak wokhasikhe: ”Hat Esau eberogo ara? Lega,” iluk heinok wokhasikhemo, at Yakub en he, ”An eberogoat Esau aro,” iluk yagatikhe. 25A'nogo yagatikhemo, at Ishak en he, ”Paik isago andi wo'netunem, an nambigen he, Allah nen fanothafi logouwagen yagahesigin o,” iluk yagatikhemo, at Yakub en he, wam isa'luk wagaikhe mene a'nogo inom, i anggur amusu mene ekhe inom, noagaluk wogetikhe. 26Wogetikhemo, mel yagatikhe: ”Namlogo e, hebe noba horokhogo ya higilha wesimbik he, hai hambe saluk wa'nabin o,” iluk yagatikhe.
27A'nogo yagatikhemo, at Yakub en hai ambe saluk wasigeluk ebe era'lu horokhogo higilha lagunem he, asu Esau asu amben enegat hasikhesik he, ”Allah nen fanothafi logouwago,” iluk, mel yagatikhe:
”Namlogo hamben he, o lei Allah nen fanotfikhe
mene amben hangge fano mondogo.#Ibr. 11:20
28Allah nen he, lilengge pogoroba mene pelakhesi wagik,
heabukwe muli mondok wokhetik,
sumburu gandum mene inom,
i anggur enggen amusu inom,
mondok hokhorogo oba heilarogo wokhetik,
ikhi logouwago.
29Afuni inunggulenu lombok mondogat
hat hamingmingengge hilinglaga logolik,
hat hawe a'ma logouwago.
Nen hoe hagot mondogat
haren ferinarek logogin o.
Hat hagaisa nen tagongge
nen he, ineindep awi yagaisogo
fogethafi logouwago.
Nen, afuni ekhe nen, hat homan
hobagagun halok,
Allah nen it andi mondogat
homan fisikhi logogin o.
Nen, hat fanothafu halok he,
it andi Allah nen fanorinafi logouwagaro,” iluk yagatikhe.#Kej. 12:3
At Esau, ”Allah nen fanotnafi logouwagen he, yaganom,” iluk Ishak yagatikhe wene
30At Ishak en he amlogo Yakub oba, ”Allah nen fanothafi logouwak,” iluk yagatikhemo, wulifu kwelek he at oe Esau paik sorik nikhi lagaikhesik wagaikhe. 31At Esau ogo re, paik fano mondok isago waluk eisena oba wagaikhesik he, mel yagatikhe: ”Neisena, helugame. Haren he, Allah nen fanothafi logouwageluk yagane'nogen he, paik isago yi nanogen menlame o,” iluk yagatikhe. 32A'nogo yagatikhemo, at Ishak en he,
”Hat sa,” iluk heinok wokhasikhemo, at Esau nen he,
”An he, hat hamlogo manggusa mene Esau a'nogo aro,” iluk yagatikhe. 33A'nogo yagatikhemo, at Ishak ailo agaikhesik oak lei'leik isikhesik mel yagatikhe: ”Eige, andi halok attagat paik wasi lagasik isago wo'nesi waga andi sa? Hat hebe oan wagi'lek werek kwelek ninggi mo nen, ninggirik he wene an nendawimo mene Allah nen fanot fikhi logouwageluk arat yagatimo o, at mondok eise agasik wulibi lagama o,” iluk yagatikhe. 34A'nogo yagatikhemo, Esau esanggo holhikhesik endawimo weak agaikhesik he, le ane hokhorogo aga logolik mel yagatikhe: ”Neisena, Allah nen fanotnabuageluk an ekhe yaganom o,” iluk yagatikhe. 35A'nogo yagatikhemo, at Ishak en he, ”Hagot tak wagasik lalnabi wagama higi. An wene nendawimo mene Allah nen fanothafi logouwageluk yagahesigin anggigi mene, hat hagot tak yagatiri'mo o,” iluk yagatikhe. 36A'nogo yagatikhemo, at Esau nen he, ”Enu Yakub andi higithogoat salasikhemo higi. Attak an nebe manggusa esin mene andi nenggimo telogo helikhesik he, hobuk Allah nen an fanotnafi logogin mene a'nogo ogore arenat telikhe andi o,” iluk eisena yagatikhesik, mel yagatikheat, ”Wene hendawimo mene Allah nen an fanotnafi logouwageluk yaganesigin mene ekhe werega? Lega!” iluk yagatikhe.#Kej. 25:29-34
37A'nogo yagatikhemo, at Ishak en he, mel yagatikhe: ”An nen he, at ebe hoe hilingisogo figik, at ogogwi agoromi mondogat inebe at amingmingengge hilingisogo fisigik, igiri'mo o. A'nogo hilingisogo fisigirik, sumburu gandum mene inom, i anggur enggen amusu inom, at arat wogetiri'mo o. Hobuk hat wokhesu mene ekhe mondok lego, namlogo,” iluk yagatikhe. 38A'nogo yagatikhe mene re, at Esau kamo igi'lek kino yagatu mondogat weregen he: ”Wene hendawimo mene Allah nen fanorinafi logogin mene misigat andi ara? Ekhe werek halok, an ekhe yaganesigin aro, neisena, iluk yagatikhesik, le mondok hokhorogo agaikheat.#Ibr. 12:17 39A'nogo yagati lagaikhemo, hobuk at Ishak en he, mel yagatikhe:
”Hat faget he, lilengge pogoroba nen he,
pi waga logoinogo o.
Nen, heabukwe kweang fano muli aga logoinogo o.#Ibr. 11:20
40Hat he, henggarok andibaat afuni inoatungge logogin.
Logolik he, hebe hagot amingmingengge
hilinglasimbik meneat he, hobuk nabit iluk
folim hibirogo menlasimbik he,
hale'ma asigin o,” iluk yagatikhe.#Kej. 36:8; 2Raj. 8:20
41A'nogo yagatikhemo,
eisena nen wene endawimo
mene Allah nen agot fanorati
logouwageluk yagatikhe andi
nen agot abiret fesikhe.
Abiret fesikhesik, endawimo
mel anggasikhe:
”Neisena ebe weak-weagat wa'lasiginmo re,
arat wa'laga halok, ware'ma logombik,
nagot Yakub ebe wasigin,” iluk anggasikhe.
Yakub heise Laban oba loageluk yagatikhe wene
42At Ribka Esau nen hilingisigin mene andi, afuni ekhe nen ugunem esanggo holhikhesik he, it ekhe nen Yakub wolesi loageluk yagaisasikhemo, woletukwama wagaikhemo re, mel yagatikhe: ”Wene yagahesigin yi hesanggo fanorogo holin o. Hoe Esau endawimo mondok weak agasik onggo hat hebe hoasigeluk weim abok endawimo werego. 43Halok, an nen yagahesigin mene andi nane hologoat hilingi'no. Hebe weak-weagat an noe Laban aiba o Haran lan o. 44-45An neagwi hinebe pireat inenggi misik oba mondogat lek asugun andi nabit. Hat hoe lalhen mene andi faget a'mage lagaikhe mene andi lek agik, onggot agik, ugu kwelek afuni yonggo lakfisa wagu halok we'nogen he, elama faget noe Laban oba lambik logoino o,” iluk yagatikhe.
46At Ribka nen Yakub a'nogo yagatikhesik, Ishak mel yagatikhe: ”An he, Esau agagwi afuni endakwe inunggul enu Het mene ina'logomi woginafikhe mene andoma neilenggen kwelagisigik he, mondok nabit ari'logo o. At Yakub a'nogoat hemi Het mene woginafe halok, an nebe neluk logogin he, nabiro.
Currently Selected:
KEJADIAN 27: inohap
Highlight
Share
Copy
Want to have your highlights saved across all your devices? Sign up or sign in
