KEJADIAN 28
28
1Hobuk, at Ishak en Yakub woletikhesik Allah nen fanorati logouwageluk mel yagatikhe: ”Hat hemi o Kanaan mene ekhe woginabigin lego. 2Hebe homba Betuel againafuri inaiba o Mesopotamia a'lima lambik, hami Laban a'logomi mene ekhe woginabinogen lan o. 3Lambik, he andi wanhen halok he, Allah Omame Hokho a'nogo nen fanothafik, hat afuni inunggulenu hokhorogoat inomba hilingla'nogen haren tagongge mene nen herembulmo hombalak hokhorogo asuageluk hilinghafik, uago. 4Allah nen hat hebe fanothafik, haren tagongge mene fanorinafik, Abraham fanot fesikhe andi hak, uago. Nen, Allah nen kweang hat welagen oba yoma Abraham wogotikhe mene andi hat eise logoino o,” iluk yagatikhe.#Kej. 17:4-8 5A'nogo yagatikhesik, Yakub ebe ami Laban, Yakub inom, Esau inom, inagaisa Ribka oe, Betuel amlogo, o Aram mene a'nogo oba lakfesikhe.
Esau agwe hobuk ekhe helasikhe wene
6Afuni nen he, ”Ishak en, Allah nen Yakub fanotfikhi logouwageluk yagati logolik he, hemi o Kanaan mene wanhun. We, o Mesopotamia mene wanino o, iluk yagatikhesik he, lakfikhemo,” iluk afuni ekhe nen ugunem Esau esanggo holhikhe. 7A'nogo holhikhesik, at Yakub eisena agaisa inane hologo re, o Mesopotamia arat laga, iluk elu agaikheat. 8Elu agaikhesik, endawimo nen he, ”An neisena Ishak en he, hemi o Kanaan mene yoma woginabu re abit higi,” iluk futfesikhe. 9A'nogo futfesikhe andi nen, at Esau agagwi ekhe werek kwelek Ismael Abraham amlogo a'nogo oba lagaikhesik, agwe ekhe Ismael a'logo mene enu Mahalat ap Nebayot ombo'ne mene andi wanhikhe.
At Yakub o Betel en abi hasikhe wene
10At Yakub o Bersyeba herakfisaluk, o Haran lageluk lagaikhe. 11Laga lagaikhe re, o arat hubagaikhemo, ebekhalem andoma nogo isikhe. Nogoigiluk unggul helep oba legeisogo nogo isikhe. 12A'nogo nogo ugunem, abi re, kwe pela kweangma nen elugun pogoroba pelarogo liabe'ma re, malaikat pogoroba nen lagagik, pigik ugunem eilenggen hasikhe.#Yoh. 1:51 13Abi a'nogo hugunem, Tuhan Allah kwe pela a'nogo era'lu menlagaikhesik mel yagatikhe: ”Abraham inom, Ishak inom, ineisena Tuhan Allah fogetnafarek mene a'nogo re, An aro. An nen kweang hat hebe wengik welagen oba yoma hat hebe inom, haren tagongge mene inom, wokhisagain o. #Kej. 13:14-15 14Haren tagongge re, wul al kweangma hokhorogo welagarek andi hangge hilinglasugun. A'nogo hilinglasimbik, o unggut poikwe-maikwe elikwe yikwe it mondok wialarik laga logogun. Wialarik laga logolik, hat hebe inom, haren tagongge mene inom, hit hinoba nen afuni inunggulenu lombok mondogat An nen fanorinafi logogin.#Kej. 12:3, 22:18 15Wene yi hendawimo eberek mondok logoino. An nen fetharek logolik, lebethiikhi logogin o. Hat koma kwe lagen halok, An nen o kweang yibaat wokharek wesigin. An wene watheti mene andi ebe mondogat hilinglasuageluk, an nen hat kofologo herakhobagagi'lek setharek mondok logogin o,” iluk yagatunem abi hasikhe.
16A'nogo yagatikhemo abi hasikhesik, at Yakub eluk agaikhesik he, mel isikhe: ”Neisena Tuhan ebe yoma werek higi,” an nonggot welagi mene yogondagen nelu aga yi,” iluk isikhe. 17A'nogo isikhesik, ailo mondok agaikhesik he, mel isikhe: ”Ya re, Allah aiba, kwe pogoroba nen piagik, lagagik, agarek mene ambe palek were'ma higi, nailo e,” iluk fogeratikhe. 18A'nogo fogeratikhesik, ohealekwe huberat Yakub ebe menlagaikhesik, helep unggul oba legeisogo fesikhe mene a'nogo wanhikhesik he, inendawi wenggelogo eberek logouwogeluk menegeisogo fesikhe. A'nogo fesikhesik, ebene Zaitun amusu mene warogo Allah faget fisasikhe. 19A'nogo fisasikhesik, o andoma attagat he, enu Lus welagaikhe mene, hobuk enu Betel salhikhe.
20A'nogo salhikhesik, Allah enu hombuk palogo mel isikhe: ”An laga lagi yi, neisena Tuhan nen fetnarek welagik, lebetniigik ikhi logolik, sumburu inom, nasu inom, wo'netunem, 21hobuk nambotkwe neisena aiba fano wagi halok, Hat Allah an neisena asigin. 22Nen, yi mene ti mene neisena Tuhan nen wo'nesigin mene andi nenggi wenagaisogo nomoloba lagai wagunem, sogo nen an aga logolik misik ekhe hat honggwarek wokhesigin aro. Nen, helep menegeisogo figi yi neisena Tuhan hobaget fogethafi logouwageluk, inendawi wenggelogo eberek logouwageluk hobagagi o,” iluk enu hombuk palhikhe.
Currently Selected:
KEJADIAN 28: inohap
Highlight
Share
Copy
Want to have your highlights saved across all your devices? Sign up or sign in
