YOHANES 11
11
Lazarus wa'lagaikhe wene
1Ap ekhe enu Lazarus erugwi Maria agot Marta inom inaiba o Betania misi'mo mene welagaukwa.#Luk. 10:38-39 2He Maria andi ebe re, amusu amben fano mene ninoe Enupogot Yesus eisok oba watikhesik esiba tetikhe mene a'nogo inom inaiba were'ma inenggi ekhe sambul he at Lazarus oba ou hunitikhemo re,#Yoh. 12:3 3it hemi inebe pire oe agot emberek inerei oba ou andi nen he, Yesus yagasi loageluk, afuni inoba wene warogo lakfisikhi logolik he, mel isukwa: ”Noe. Lazarus hendawinggen hundik mene a'nogo oba ou hunitesik werego,” iluk wene warogo lakfisasukwama, 4at Yesus yagasi lagaukwama, esanggo holhikhesik he, mel yagaisasikhe: ”Ou oba agama werek andi nen ebe wa'lasigin fuk, we an nen higitunem afuni nen Allah ebe fogeratik, amlogo an fogetnafik, uageluk ou oba aga andi o,” iluk yagaisasikhe. 5At Yesus nen, he Marta oe inom, Lazarus inom, endawinggen hundik welagaikhe meneat he, 6”At Lazarus oba ou werek,” iluk yagatukwama, esanggo holhikhe meneat he, eranen o welagaikheba andoma kamo isikhesik, enggi pire welagaikhe. 7A'nogo welagaikhesigen, at agoromi wanhi lagaukwa mene omanogo yagaisikhi logolik he, ”Nit ninambotkwe o Yudea puogo,” iluk yagaisasikhe. 8A'nogo yagaisasikhemo, iren he, mel yagatukwa: ”Noe. Ap kaindek Yahudi mene nen yogondak yiat helep oba hoasuogeluk ikhi lagaikhama lagai wagen a'nogo meneat he, hat hobuk hambotkwe o andomaat pigeluk ikhi lagen?” iluk isukwama, 9at Yesus nen he, mel yagaisasikhe: ”O inenggi misigam faget wei ugunem he, ohealek jam 6 en pikhit hu'mokwe jam 6 agunem lambukhogo 12 jam wenatarek a'nogo lek? Ap sa nen o mo afuni kweangma selerinaferek mene andi eilenggen hikhi logolik, ebe selek oba laga halok, eisok a'lip silukhogo palagain mondok lego. 10Meneat he, ap sa nen o hubanggo laga halok he, at endawimo selek mene le'ma andi nen, eisok a'lip silukhogo palagain o,” iluk a'nogo yagaisasikhesik, 11hobuk ekhe yagaisikhi logolik he, mel yagaisasikhe: ”Nit ninagailak Lazarus a'nogo arat nogo ikhemo, meneat he, an nen at nogo ugunem eluget fei lagain o,” iluk yagaisasikhe. 12A'nogo yagaisasikhemo re, it at agoromi ane wanhi lagaukwa mene omanogo nen he, mel yagatukwa: ”Noe. At andi we nogo ili'logo halok he, oba fano asigin o,” iluk yagatukwa andi ebe re, 13at Yesus nen Lazarus ebe arat wa'lagaikhemo nen isikhe meneat he, it inendawimimo nen he, eberogoat nogo ili'logo nen ikhe, iluk, inendawimo anggasukwa. 14Inendawimo a'nogo anggasukwa andi nen he, at Yesus nen wene fakhogo mel yagaisasikhe: ”Lazarus ebe arat wa'lagama o. 15A'nogo wa'laga meneat he, hit hinendawinggen an noba eberogoat himbiret fobagaigen iluk, an andoma pigi'lek kamo igi andi, hit faget nendawimo nagaiyek anggikhi lagi o. Halok yogondak nit Lazarus ambit puogen we'ni o,” iluk yagaisasikhe. 16A'nogo yagaisasikhemo, ap enu Tomas igik, Hulipmio igik, agarek andi nen he, agaila'lak Yesus agoromi fena omanogo mel yagaisasikhe: ”Yesus ninomat wa'lasuogen he, puogen we'ni o,” iluk yagaisasikhe.
Yesus nen, ”Ineluk mondok logouwageluk inelugerinafirek he, Anaro,” iluk yagaisasikhe wene.
17A'nogo yagaisasikhemo, at Yesus agoromi inom a'nogo pi lagaukwa hak he, Lazarus kweangma salfesukwasi'mo nen inenggi henagan welagaukwasik ekhe inom were'ma pisukwa. 18O Betania andi re, o Yerusalem era'lu horogat kwe lagaikharek huli re, ilirengge 3 kilometer hangge andi nen he, 19it afuni Yahudi mene hokhorogo, he Maria inom, Marta inom, inerei Lazarus ware'ma inendawimo fanorogo iluk, inoba wagaukwasik welagaukwa. 20A'nogo were'ma, afuni nen ikhi logolik, ”At Yesus ebe weri'logo,” iluk ugunem Marta esanggo holhikhesik he Maria oloba werek kwelek Marta a'nogo Yesus elokhoma lagaikhe. 21Lagaikhesik, Yesus yagati logolik he, mel isikhe: ”Noe, hat yoma we'lendik logoilenma re, an nerei wa'laga andi re, wa'la'lep lek anggigi o. 22A'nogo wa'la'lep lek meneat he, Noe, yogondak haren we nena mene Allah kino yagasumo re, aren wokhesigin enek a'nogo re, an nelu aro,” iluk yagati lagaikhemo, 23at Yesus nen he: ”Hat herei ambotkwe eluk asigin aro,” iluk yagati lagaikhemo, 24at Marta nen he mel yagatikhe: ”O wurep oba afuni wa'lagaukwa mene inelugerinabigin andi sambul, at Lazarus andi hobuk ambotkwe eluk asigin iluk an nelu aro,” iluk yagati lagaikhemo, 25At Yesus nen he mel yagatikhe: ”Afuni ineluk mondok logouwageluk, an nenat inelugerinafirego. At sa nen endawinggen an noba eberogoat himbiret foumo nen wa'lasigin halok he, at ebe wa'lasigin meneat he, hobuk eluk asigin o. 26Nen, afuni ineluk logolik inendawinggen an noba eberogoat himbiret fagarek mene nek inebe lombok wa'lagi'lek ineluk mondok logogun o. Wene andi eberogoat iluk futfegen a?” iluk yagati lagaikhemo. 27At Marta nen he, mel yagatikhe: ”Noe, hat hebe Allah amlogo Kristus Allah nen wenagaisogo menfuluk lakfei wesigin isukwa a'nogo harat, iluk fut hobagagi o,” iluk yagatikhe.
Yesus le agaikhe wene
28A'nogo yaga'luk he, Marta nen oe Maria wolha lagaikhesik mel yagatikhe: ”Ninoe wene yaganisili'logo mene a'nogo ebe wagasik horok yoma logolik wolhili'logo,” iluk ane samik-samokhogo yagatikhe. 29A'nogo yagatikhemo Maria esanggo holhikhesik weak-weak siakhogo menla'luk he Yesus oba wagaikhe. 30Wagaikhesik, at Yesus o silimo kwigi'lek, we he Marta nen Yesus ha lagaikhesik emberek ambi agaukwaba aremnogo were'ma wagaikhe. 31Maria a'nogo weak-weak siakhogo wulibi wagaikhemo re, it afuni Yahudi mene Maria endawimo fanorogo iluk oloba welagaukwa mene omanogo ineilenggen hasukwasik he, ”Maria Lazarus oak oba le asi laga higi,” iluk ombo'ne wagaukwa. 32Wagu kwelek, he Maria a'nogo eilenggen Yesus ebe yethasikhesik he, oba wagaikhesik eindep awi yagaisogo awe a'ma soma isikhesik he, mel yagatikhe: ”Noe, hat yoma we'lendik logoilenma re, an nerei wa'laga andi, wa'la'lep lek anggigi o,” iluk yagatikhesik le agunem. 33it afuni Yahudi mene Maria ombo'ne wagaukwa mene omanogo inomat le agunem, at Yesus nen eilenggen isasikhesik, it endawi nen endawinggen heiselhikhemo re, inoba heinok wogisikhi logolik he, mel yagaisasikhe. 34”Lazarus ebe ka kwe hak salfegepma werek,” iluk yagaisasikhemo, iren he: ”Noe. Heilenggen hanogen eme o,” iluk yagatukwama re,
35At le agaikheat. 36A'nogo le aga lagaikhemo, it ap Yahudi mene omanogo nen he, ”Egi! Yethani! Yesus Lazarus endawinggen hundik mondok welagama yi, nailo e!” iluk fogeratukwa. 37A'nogo isukwa meneat he, it afuni omanogo mene fena nen he, mel isukwa: ”Aren ap ekhe eilenggen mum mene fano higite andi hak, Lazarus eluk logouwageluk higi'lepma re, wa'la'lep anggegep? Wa'la'lep lek aro,” iluk isukwa.
Yesus nen Lazarus eluget fesikhe wene
38A'nogo isukwama, at Yesus endawinggen heiselhikhemo re, warek ebe oumo anggwe folele'ma helep te'merogo fei lagaukwaba andoma ha lagaikhe. 39Ha lagaikhesik he, mel yagaisasikhe: ”Helep ari lenggakhogo lakfeni o,” iluk yagaisasikhemo, ap wa'lagaikhe mene a'nogo erei Marta nen he, mel yagatikhe: ”Noe. At ebe salhosik oba nen ninenggi henaganat welagosik ekhe welago yi. Halok, arat fili agasik amben agama o,” iluk yagatikhemo, 40at Yesus nen he, mel yagatikhe: ”An nen wene yagaheti logolik, hendawinggen an noba eberogo himbiret fegen halok he, Allah fogeratarek mene a'nogo nen ekhe hilingitunem heilenggen hagain aro, iluk arat yagaheti lek nogo? Yagaheti aro,” iluk yagatikhemo, 41iren helep a'nogo lenggakhogo lakfesukwama re, Yesus eilenggen pogoroba liakhasikhesik he, mel isikhe: ”Allah neisena. An nane hesanggo holhen andi nen he, hai wathafi lagi o. 42An nen hat kino yagahetunem, nane hesanggo holhi lagen a'nogo, an nelu meneat he, it afuni yoma nen, haren an laknobagai wagagin andi nebe futnobagauwageluk yagaheti o, neisena,” iluk a'nogo isikhesik, 43hobuk ane hokhorogo ikhe logolik he, mel yagatikhe: ”Lazarus. Wulibime o,” iluk yagatikhemo, 44Lazarus ebe wa'lagaikhe mene a'nogo eluk a'luk, enggi eisok engga yeligat, elokhonggen su laberegat, wulibi wagaikhe. A'nogo wulibi wagaikhemo, at Yesus nen it afuni andoma welagaukwa mene omanogo yagaisikhi logolik he: ”Ebe kwe loagen, oba engga su mene yelik yoma fikhal feni o,” iluk yagaisasikhe.
Yesus wasuogeluk weim yonggo wulakfisasukwa wene
(Mat. 26:1-5; Mrk. 14:1-2; Luk. 22:1-2)
45A'nogo hilingitikhemo, it afuni Yahudi mene inebe hokhorogo Maria oba wagaukwasik welagaukwa mene omanogo, at Yesus nen hilingitikhe mene andi ineilenggen hasukwasik he, it fena hokhorogoat inendawingen Yesus oba eberogoat himbiret fesukwa. 46A'nogo himbiret fesukwa meneat he, it fena ap Farisi mene inoba lagaukwasik he, mel yagaisasukwa: ”At Yesus nen yi'nogo hilingite, ti'nogo hilingite,” iluk yagaisa lagaukwa. 47A'nogo yagaisa lagaukwama re, it ap Allah eisewerek inogogwi kaindek inom, Farisi mene inomen he, it ap wene ero pilingiterek mene wolisasukwama wagaukwama re, mel yagaisasukwa: ”At ap andi ebe futfouwageluk elalin mene hokhorogo hilingiri'logo andi re, niren ninggi'nogo hilingisuok anggegep? 48Niren, at a'nogo hilingirik nugu kwelek wenageti'lek herakfogoin halok he, afuni hokhorogo inendawinggen at oba himbiret fugunem he, wurep oba re, it ap Roma mene wesimbik ninebe wolelenggen tagalninafi logolik he, Allah awi wurik meisali wesugun o,” iluk yagaisasukwama, 49ap it mene ekhe enu Kayafas it ap Allah eisewerek mene inoe kain tahun misik andiba welagaikhe mene nen mel yagaisasikhe: ”Hit wene mondok hinonggoren ikhi lagep. 50Nit mondogat wolelenggen tagalninafi'lek, we nit faget ap misigat enek wa'lasumo fano, iluk futfikhi lagep lega?” iluk wene a'nogo isikhe andi re, 51at endawimo nen kagalogo isikhe fuk. We, at ebe ap Allah eisewerek mene inoe kain tahun misik andiba were'ma, Allah nen endawimo kagalhikhemo re, mel isikhe: ”Nit afuni Yahudi mene faget Yesus ebe wa'lasigin,” mene faget isikhe andi. 52Mene re, it afuni Yahudi mene faget enek isikhe fuk. Afuni mondogat Allah againafuri mene nek o yi awi ti awi pugulogo lagaukwasik welagaikharek mene inom lambukhogo inobagaigeluk, Yesus wa'lasigin mene faget isikhe. 53A'nogo yagaisasikhemo, huli andi huli nen, it ap kaindek Yahudi mene nen Yesus ebe mondok wasuogeluk weim abok isukwa. 54A'nogo isukwa andi nen he, Yesus o Yudea andoma ap Yahudi mene ineilhanem ebe weinamhogo nikhi lagaikhe lek. We, hinak-hinak nikhi lagaikhesik he, o andoma herakfisaluk, o leimo afuni le'ma era'lu o sili enu Efraim lagaikhesik, at agoromi ane wanhi lagaukwa mene omanogo inom andoma welagaukwa.
55Welagaukwa andem sambul he, it afuni Yahudi mene seni enu Paskah nenggarek a'nogo mene nogoin oba arat horogasi wagaikhemo nouwogeluk logolik, it inenggi sabul horogo iluk, Yahudi mene hilingitarek hak hilingisuogeluk, inawi lombogen o Yerusalem andogoti lagaukwa. 56-57Andogotukwasik werek kwelek, it ap Allah eisewerek mene inogogwi kaindek mene inom, Farisi mene inomen wene mel isukwa: ”It afuni ekhe Yesus ebe werek inelu halok he, niren at ebe fakfouwageluk yaganisa wesuago,” iluk weim yonggo wulakfisasukwama andi nen he, it afuni omanogo Allah awi wuri'mo logolik, Yesus herarik it-it heinok wanhi logolik he, ”At he seni isatunem yi wesigin anggikhi lageba? Lega,” iluk ikhi lagaukwa.
Currently Selected:
YOHANES 11: inohap
Highlight
Share
Copy
Want to have your highlights saved across all your devices? Sign up or sign in
