YOHANES 12

He Maria nen amusu amben fano mene Yesus eisok oba watfesikhe wene

(Mat. 26:6-13; Mrk. 14:3-9)

1Wene a'nogo isukwasik werek kwelek, inenggi fuaben welagaukwasigen ekheba seni Paskah a'nogo mene nouwogeluk oan werek kwelek, at Yesus o Betania ap Lazarus wa'lagaikhemo nen eluget fesikhe a'nogo awiba wagaikhe. 2Wagaikhemo it afuni andoma a'nogo nen ahenengge isatukwama, he Marta nen sumburu sumburisugu kwelek, Lazarus inom, afuni inayonggo fesukwa mene inom, Yesus inom nasukwa. 3A'nogo nunggu kwelek, at he Maria nen amusu enu naruwastu amben fano mene onggo hokhorogoat palharek mene Yesus eisok oba watfesikhesik he, at Maria onggwarek esiba tetikhe. A'nogo tetikhemo, oloba a'nogo amben mondok sang-pang isikhe.#Luk. 7:37-38 4A'nogo hilingitikhemo, at Yesus agoromi ane wanhi lagaukwa mene ap ekhe enu Yudas Iskariot, hobuk Yesus wasuageluk yonggo lagaikhe mene a'nogo nen he, mel isikhe: 5”Amusu naruwastu andire afuni yabu inenggi misik oba hilingitunem misikdek wogisagarek a'nogo mene uang perak 300 nen waluk, it afuni inangge lek mene sumburisa meneat he, amusu alemate andi nenahalok,” iluk wene palhikhe. 6A'nogo wene palhikhe andi re, afuni inangge lek mene andi endawi nen isikhe fuk. We, at agaila'lak inom mondogat inarupiah mene fisogo logolik, at onggwarek faget hinagaisogo helikhi lagaikhe andi nen isikhe. 7A'nogo isikhemo, at Yesus nen he, mel yagatikhe: ”He yi amusu watnobagaikhe andi faget, wenagesu fugo. An hobuk wa'lasumo nebe warek salnobagambik amusu watnobagagin higithogoat fisogo welagasik wat nobagaikhe o. 8Nen, it afuni inangge lek mene andi, hit hinom mondok logogun meneat he, an enek he, hit ninom mondok logogun lego,” iluk yagaisasikhe.#Ul. 15:11

It ap Allah eisewerek mene nen Lazarus ebe wasuogeluk weim abok isukwa wene

9At Yesus nen a'nogo yagaisasikhesik were'ma, afuni nen he, ”At Yesus o Betania werego,” iluk isukwama, it afuni Yahudi mene inebe hokhorogoat inesanggo holhukwasik lagaukwa. A'nogo lagaukwa andi re, at Yesus enek ineilenggen houwogeluk lagaukwa fuk. Athe Lazarus warek mene Yesus nen eluget fesikhe mene a'nogo emberegat ineilenggen isouwogeluk lagaukwa. 10-11Lagaukwama, it ap Allah eisewerek inogogwi kaindegen he, mel isukwa: ”Lazarus eluget fikhe andi nen, afuni Yahudi mene inebe hokhorogoat nit ninane herakfisaluk inendawinggen Yesus oba himbiret fili'lagwi,” iluk, Lazarus ogo wasuogeluk aweim abok isukwa.

Yesus ebe o Yerusalem kugunem fogeratukwa wene

(Mat. 21:11; Mrk. 11:1-10; Luk. 19:28-40)

12A'nogo isukwasik werek kwelek, o healekwe, it afuni nen he, ”At Yesus o Yerusalem wesigeluk weri'logo,” iluk isukwama, it afuni hokhorogo seni Paskah nunggunem andogotukwa mene omanogo inesanggo holhukwasik he, 13Erale engga hangge mene engga palhigik waluk he, Yesus elokhoma a'mit-mit suphogo wulibi wagaukwasik he, mel isukwa;

”Noe wa! Noe wa!” iluk u hak, ”Hosana!

Nineisena Allah Enupogoren

nit afuni Israel mene ninoe kain

lak hobagai wagama wagen yi,

arenat fanothabuago,” iluk

wuni warik-warik kwisukwa.#Mzm. 118:26

14-15Kugunem, at Allah nen fageat mel isikhemo lisu yi'nogo palek werek:

”Hit afuni o Sion welagep mene yi hinailo agubo!

Hinoe Raja wam keledai eak ket oan mene

amboroba hurek weri'logo a'li hineilenggen yethani o!” iluk isikhe higithogoat.

Yesus wam keledai eak ket oan mene ekhe wanhikhesik he, amboroba hu'lagaikhesik kwisikhe andi.#Za. 9:9

16A'nogo kwisikhe meneat he, andi sambul, irat agoromi ane wanhi lagaukwa mene omanogo nen, wene hilinglagaikhe mene andi futfigi'lek. Meneat he, at Yesus wa'lagaikhesi'mo nen hobuk Allah nen eluget fesikhesik esinet fesikhemo nen, inendawimo ebetukwasik he, mel isukwa: ”At faget Allah ane lisu palek werek aro. It afuni nen at faget hilingitunem nineilenggen hasugu a'nogo re, wene lisu palek werek andi higithogoat hilingitukwama o,” iluk inendawimo ebetukwa.

17Nen, at Lazarus warek salhukwasi'mo nen he, at Yesus nen wolhasikhemo ebe eluk agaikhesik wulibi wagunem, it afuni ineilenggen hasukwa mene omanogo nen, it fena yagaisikhi logolik, 18”At Yesus ebe futfouwageluk elalin mene a'nogo hilingite,” iluk isukwama afuni inebe hokhorogo inesanggo holhukwasi'mo nen he, Yesus elokhoma wulibi wagaukwa andi. 19A'nogo wulibi wagaukwa andi nen, it ap Farisi mene it-it wene ikhi logolik he, ”Yethani! Yi afuni ti afuni mondogat, at ombo'ne mondok lili'lagwi andi nen he, niren hilingiti lago a'nogo hilingitunem ninane ebe asigin anggikhi lageba? Mondok lego,” iluk isukwa.

It ap Yunani mene nen Yesus herarik wagaukwa wene

20It afuni seni ninggi logolik Allah fogerasuogeluk wagaukwa andi re, it ap Yunani mene fena inom wagaukwa. 21It ap andi wagaukwasik he, ap Filipus awi o Galilea tonggwe mene aiba enu o Betsaida mene a'nogo pisikhesik were'ma oba wagaukwasik he, mel yagatukwa: ”Noe. Nit Yesus oba wesu ninamolo nen wago o,” iluk yagatukwama, 22at Filipus nen wene isukwa mene andi, at Andreas yagasi lagaikhesik emberegen hobuk Yesus yagatukwa. 23A'nogo yagasi lagaukwama, at Yesus nen he mel yagaisasikhe: ”An abat ta'lasi wagagi a'nogo, nebe fogetnabugun oba arat horogasi waga o. 24Nen, afuni nen gandum enggen awi kweangma yati'le'ma, afuni wa'lagaikharek andi hak, agap attak mene fili a'luk ket mene fulelhi'lek halok he, enggen misigat awi yasugun mene andiat logogin o. Meneat he, enggen andi kweangma yatunem afuni wa'lagaikharek hak, agap attak mene andi fili a'luk enek he, hobuk ket mene fulelfuluk enggen hokhorogo iterego,” iluk yagaisasikhe. 25A'nogo yagaisasikhesik, wene ekhe mel yagaisasikhe: ”Ap sa nen, endawimo nen he, An kweangma yoma nebe neluk logogin namolo, iluk anggikherek halok he, hobuk ebe eluk mondok logogin mene faget nongasigin o. Meneat he, ap sa endawimo nen, kweangma yoma neluk logou re, nabit iluk anggikherek halok he, at andi hobuk ebe nong agi'lek eluk mondok logogin o.#Mat. 10:39, 16:25; Mrk. 8:35; Luk. 9:24, 17:33 26Nen, ap sa nen an namingmingengge logolik, endawimo nen he, an Yesus faget hilingiti logogin, iluk anggikhe halok he, an logogin oba andoma nemberegat mondok logouwogeluk nombo'ne waga logouwago. Nen, sa nen an faget hilingiti logogin mene andi, neisena nen at ebe agaugwet fagain o, iluk nane eberogoat yagahisigi,” iluk yagaisasikhe.

Yesus nen, ”An noasugun,” iluk husumbi yagaisasikhe wene

27At Yesus nen wene a'nogo yagaisasikhesik he, samban ekhe mel isikhe: ”Neisena, an yi enggin ti enggin hagain andi nen, yogondak nendawinggen mondok heiseli'logo andi re, haren nebe telnabin o, iluk yagahesu meneat he, a'nogo hilingnabuagelugat wagagisi'mo andi nen he, a'nogo igin lego, Neisena, 28halok he, Neisena, hat henu esinet fakhan o,” iluk yagatunem he, pogoroba nen ane ikhi logolik, mel isikhe: ”Arat esinet fakhigirik he, hobuk esinet fakhagain aro,” iluk yagatunem. 29It afuni hokhorogoat andoma mendek welagaukwa mene nen, inesanggo holhukwasik, it ekhe nen he, ”Unggunggu ane ikhe,” igik, it ekhe nen he, ”Lego. It malaikat pogoroba yonggo nikharek mene ekhe nen ane fak hiikhe o,” igik, isukwa.

30A'nogo isukwama, at Yesus nen he, mel yagaisasikhe: ”Ane ugunem hinesanggo holhep andi re, an faget fuk. Hit faget ikhe o. 31Yogondak Allah nen, afuni kweangma mene wene inoba figik, kotik, ikhi logolik, ap enupogot kweangma mene a'nogo mugusogo wulakfisigik, igin oba arat horogasi waga o. 32An nebe kweangma yoma mennobagaumo re, an nen afuni mondogat lithigik woginarek nonggwarek noba fisa wesigin o,” iluk yagaisasikhe. 33A'nogo yagaisasikhe andi ebe re, ”An hobuk afuni nen yi'nogo mennobagambik noasugun,” iluk u hak isikhe. 34A'nogo isikhemo, it afuni hokhorogo omanogo nen he, mel yagatukwa: ”Wene Allah nen komotninafikhe wene andiba re, nit afuni telninabuageluk Allah nen ap ekhe lakfei wesigin andi ebe wesimbik he, eluk mondok logogin. Iluk isikhemo ninesanggo holhorek meneat he, haren ikhi logolik he, An abat ta'lasi wagagi a'nogo afuni nen kweangma yoma mennobagagagun iluk egen andi re, ap ekhe abat ta'lasi wesigin isikhe andi ebe sa faget isikhemo nen egen,” iluk yagatukwa.#Mzm. 110:4; Yes. 9:6; Yeh. 37:25; Dan. 7:14 35A'nogo yagatukwama, at Yesus nen he, mel yagaisasikhe: ”An nebe selegerinafirek mene a'nogo we endebat ninom logogun o. Halok, at sa nen o hubanggo o mum oba laga halok he, o koma laga lagi he, onggorat lili'logo andi nen he, hit lagunem o mum asinogo iluk, an selegerinafirek mene ninom werek kwelek yaat selek oba laga logoni o. 36Hit hinebe an selegerinafirek mene nagainafuri asubagaigen he, an ninom werek kwelek yaat, nebe futnobagaluk hinendawinggen noba eberogoat himbiret fikhi logoni o,” iluk yagaisasikhe.

Wene a'nogo arat yagaisaluk, it andoma fisaluk, at Yesus ebe ekhema hina'lasi lagaikhe.

It afuni Yahudi mene Yesus eberogoat iluk, ebe futfigi'lek welagaukwa wene

37At Yesus ebe iren futfouwageluk ineilhanem elalin mene hokhorogoat hilingiti lagaikhe meneat he, iren, At eberogoat iluk, ebe futfikhi lagaukwa mondok lek. 38It a'nogo hilingiti lagaukwa andi re, ap Yesaya, Allah ane yagaisikhi lagaikhe mene nen ikhi logolik he, mel isikhe:

”Allah henupogot mene, neisena. Niren hat hane

yagaisugunem, sa nen wene andi eberogoat iluk futfesikhe nogo.

Hat henggi omame ineilenggen hoageluk elalinat

hilingitendek a'nogo ebe hilingitunem, sa nen

eilenggen haluk futfesikhe nogo. Lego,”

iluk isikhe mene lisu palek werek andi ebe asuageluk hilingiti lagaukwa andi.#Yes. 53:1

39At Allah nen yi'nogo hilinginafikhe andi nen, it a'nogo eberogoat iluk fut figi'lek hilingiti lagaukwa, iluk Yesaya nen mel isikhe:

40”At Allah nen he, it ineilenggen en furogo haluk,

inendawimo ebetfuluk inobabut hebela'luk he,

an nawe a'ma wagunem, an nen it fano hilinginafi hanogoluk,

an nenat it ineilenggen mumet fisigik,

endawimo puget fisigik isigi o,” iluk isikhemo, Yesaya nen lisu palogo fesikhemo werek andi.#Yes. 6:10

41At Yesaya nen wene a'nogo isikhe andi re, at Yesus hobuk hilingitunem ebe fogerasugun mene faget eilenggen hasikhesigen, at abok isikhe andi.

42Wene a'nogo isikhemo lisu palek werek meneat he, it ap kaindek Yahudi mene fenakwe inebe hokhorogoat, inendawinggen Yesus oba himbiret fesukwa meneat he, iren he, yi'nogo hilingiti lagaukwa. It ap Farisi mene nen o samban agarek oba nen ninengggi lisogo wulak ninobagainogo iluk he, ninendawinggen Yesus oba eberogoat himbiret fogo iluk afuni ineilhanem fakhogo ikhi lagaukwa lek. 43It andi Allah nen fogerinabuageluk hilingiti lagaukwa lek, we afuni nen fogerinafu mene inamolo nen hilingiti lagaukwa.

Yesus ane andiba wene inoba figik, kotik, ikherek wene

44It a'nogo hilingiti lagaukwa meneat he, at Yesus nen ane hokhorogo yagaisikhi logolik he, mel yagaisasikhe: ”At sa nen endawinggen an noba himbiret fagain halok he, an noba himbiret fagain fuk. Lego. We, an laknobagai wagaikhe mene a'nogo oba endawinggen himbiret fagain o. 45Nen, at sa nen eilenggen an niikhe halok he, an lak nobagai wagaikhe mene a'nogoat eilenggen hikhe o. 46Nen, it afuni inendawinggen an noba himbiret fogoin mene halok mondogat he, o mum oba logoinogo iluk, selegerinabigeluk an nebe selegerinafirek mene kweangma yoma pi wagagi o.

47An kweangma yoma pi wagagi andi re, afuni wene inoba feigeluk pi wagagi fuk. We, inebe telinabigeluk pi wagagi andi nen he, at sa nen an nane esanggo holhesigat he, nane hologo hilingite lek halok, an nenat wene oba fagain fuk. Lego. 48Athe, at andi an nebe wo'nabu abirat, nen nane furogo wanu abirat andi nen wene oba fagain mene werego. Wene oba fagain andi re, o wurep oba tegelinabigin andiba, an nen wene yagahisikhi lagi andibaat wene oba asigin o, iluk a'nogo yagahisikhi lagi andi re, 49an nendawimo nen kagalogo yagahisikhi lagi fuk. Lego. We, an nen yagahisoageluk an neisena laknobagai wagaikhe mene a'nogo nenat, yi'nogo in, ti'nogo in iluk, yaganetu kwelegat yagahisikhi lagi o. 50Nen, aren wene komorogo, yi'nogo hilingi'no, ti'nogo hilingi'no iluk yaganisikherek andi nit nineluk logouwageluk yaganisikherek, iluk an nelu o. An neisena nen wene yaganeri'logo meneat yagahisikhi lagi o,” iluk yagaisasikhe.

Currently Selected:

YOHANES 12: inohap

Highlight

Copy