LUKAS 10
10
Yesus nen ap inebe 70 nen inayonggo fesikhesik lakfisasikhe wene
1A'nogo yagaisasikhesik ninoe Enupogoren ap inebe 70 nen heragaisogo fisasikhesik he, at onggwarek endawimo anggasikhe kwe yi awi ti awi o sili lombok loageluk, it andi tak inebe pirendek lombogethigik lakfisasikhe. 2A'nogo lakfisikhi logolik he, mel yagaisasikhe: ”Enggen ugu hokhorogo arat wurik agasik werek meneat he, afuni enggen ebe palugun mene inebe endebaro. Andi nen he, ap eabu Eisewerek mene a'naga nen, afuni enggen palugun mene ekhe lakfisoagen he, at ayonggo fikhi logoino o,” iluk yagaisasikhe.#Mat. 9:37-38 3A'nogo yagaisasikhesik he, ”Hit lani o. An nen hit he wam domba obabut hangge it afuni inobabut he, mene olo mene inobabut mondok weak andi hangge were'ma inanggele'ma heakhogo lakhinobagagin o.#Mat. 10:16 4Nen, hit he, uang su elema kwalek mene inom, yi mene ti mene wokhisugunem su kwalogo waluk logoin mene inom, sepatu inom, ekhe waluk lagubo. Nen, ebekwe laga logolik, afuni ekhe hinane abirogo hai warinabik la fugo.#Mat. 10:7-14; Mrk. 6:8-11; Luk. 9:3-5 5Nen, afuni inaiba kwikhi logolik he,
Hinebe yoma Allah nen fanothinabuago, iluk hai warinabik kwino. 6Hai warinabik kugunem, iren hai warogo fano wokhinafa halok he, Allah nen fanorinabigin. A'nogo meneat he, it ekhe nen hai warogo wokhinafi'lek halok he, hai warinafep mene hinane oak helano o. 7It afuni hit wokhinabugun mene were'ma kwegep halok he, andomaat hinom logoino. Logolik, it afuni yabu wokhisugunem inenggi onggo yi mene ti mene wogisagaregaro, iluk, iren yi mene ti mene noageluk wokhisugu halok he, andiat ninggi logoino. O ya kwigik, ta kwigik, nikhi logogubo.#1Kor. 9:14; 1Tim. 5:18 8O sili ekhe kugunem, hai warogo wokhinabugun obaat, iren sumburu wokhisogoin mene andiat ninggi logoino. 9O sili andomaba logolik, it ekhe inoba ou werek halok, hiren higirinafi logolik he,
Allah nen awe a'ma hinobagagin wene andi arat hinoba horok asi waga o, iluk yagaisikhi logoino. 10Meneat he, o sili ekhe hit kugun oba andoma nen hai warogo wokhinafu lek halok he, hinebe wulibi waga logolik ebe khalem asi lambik he, mel ino:#Kis. 13:51
11Nit-hit hinaiba logolik kweang aling nineisok oba labulaga mene yi, hit weak iluk hineilhanem horogo herakfisogo yi. Hinendawimo nen, Allah awe a'ma ninobagagin oba arat yogondak horogasi waga o, iluk, fanorogo futfikhi logoino, iluk yagaisano. 12Hobuk o wurep oba re, it afuni o Sodom mene andoma Allah nen inoasigin meneat he, andi endebat hago. Mene re, o sili hit wokhinabugun lek mene andoma nek he, Allah nen hokhorogo inoasigin o, iluk, yagahisikhi lagi o,” iluk yagaisasikhe.#Kej. 19:24-28; Mat. 10:15, 11:24
Yesus nen afuni wenagisasikhe wene
(Mat. 11:20-24)
13”Hit afuni o Korazim mene inom, o Betsaida mene inom, afuni nen hilingisu lek mene, an nen elalinat hit ninom logolik hilingiti lagi a'nogo, o Tirus Sidon andoma hilingiti logoilema re, it afuni o andoma mene inobabut hebela'luk he, heangfuluk hilingitarek hak, inasu weak mene laberigik, wul fesi inunggul oba yuguligik, ikhi logolik he, weak hilingiti lagaukwa mene andi hebisaluk, inobabut fageat hebela'lep meneat he, hit he, a'nogo hilingisu hinabit andi nen weaget hinabigin o!#Yes. 23:1-18; Yeh. 26:1–28:26; Yl. 3:4-8; Am. 1:9-10; Za. 9:2-4 14Hobuk o wurep oba Allah nen wene inoba figik kotik igin andi sambul he, it afuni o Tirus Sidon andoma mene wene inoba fembik serogo hak inoasigin meneat he, hit enek he, mondok engginhogo hak hinoasigin o. 15Nen, hit afuni o Kapernaum mene yi hinendawimo nen he, Allah nen pogoroba liak ninobagagambik esinetninobagagin, iluk fogerakhikhi lageba? Mondok lego. We, afuni wa'la'luk lagaikharek oba andoma mondok pelakhinobagagin o,” iluk yagaisasikhe.#Yes. 14:13-15 16A'nogo yagaisasikhesik he, at agoromi ane wanhi lagaukwa mene omanogo yagaisikhi logolik he, mel isikhe: ”It afuni nen hit hinane holi'lagwi halok he, an naneat holi'lagwi o. Nen, ninabit, iluk herakhinobagaga halok he, Anat heraknobagaga o. Nen, An heraknobagaga halok he, An laknobagai wagaikhe mene a'nogo Ebeat herakfisaga o,” iluk a'nogo yagaisaluk he, lakfisasikhe.#Mat. 10:40; Mrk. 9:37; Luk. 9:48; Yoh. 13:20
It ap inebe 70 nen omanogo inambotkwe wagaukwa wene
17Hobuk it ap inebe 70 nen lakfisasikhe mene omanogo inendawimo inagaiyek anggaluk, inambotkwe wagaukwasik he, mel yagatukwa: ”Ninoe! Niren munggwarengge obabut weak mene andi, hat henu hombuk palogo yagatunem he, ninane esanggo holhi laga o,” iluk isukwama, 18at Yesus nen he, mel yagaisasikhe: ”Iblis andi eilabut yegelogo lakfei wagarek hak, pogoroba nen pi wagunem neilenggen higi o. 19Halok he, Yethani! Kisu inom, ililim inom, hineisogen alperelogo hebisigik, Iblis ninom weim palek mene a'nogo omame legetfisigik, hilingiti logobagaigeluk, an nomame wokhisigirik eisewerek hilinghinafi o. Eisewerek hilinghinafiri'mo, yi mene ti mene ekhe nen weagethinabigin mondok lego.#Mzm. 91:13 20A'nogo meneat he, it munggwarengge inobabut weak mene nen hit hinane holha mene andi faget, hinendawimo hinagaiyek anggagubo. Meneat he, hinenu pogoroba lisu palek werek andi faget enek he, hinendawimo hinagaiyek hikhi logoni o,” iluk yagaisasikhe.
At Yesus endawimo agaiyek hikhi logolik Allah hai watikhe wene
(Mat. 11:25-27, 13:16-17)
21A'nogo yagaisasikhesik andi sambul he, Yesus endawimo Allah Areagun were'ma andi nen he, endawimo agaiyek hikhi logolik mel isikhe: ”Allah Neisena e. Pogot kweang eisewerek hararo! Wene mondogat andi, it afuni inendawimo kagalek mene inom, yi wene ti wene inelu mene inom, inelu asinogo iluk hinakfuluk he, it inobabut yenggerugwi ketago mene hangge nek he, fakhogo yagaisegen andi re, hat hendawimo hamolo anggegen meneat yagaisegen andi nen he, hai wathafi lagi o, Neisena!” iluk yagatikhe. 22A'nogo yagatikhesik, it afuni omanogo mel yagaisasikhe: ”An neisena nen yi mene ti mene mondogat eisewerek logouwageluk wo'netikhe. Allah amlogo andi sa iluk afuni mondogat inonggot meneat he, an neisena alegat enek elu welagarek. Andi hak he, an neisena Allah andi sa, iluk afuni mondogat inonggot meneat he, amlogo an nalegat enek nelu welagirego. Nen, Allah amlogo an enat nendawimo anggalugen, neisena ebe afuni ekhe inelu asuageluk nane fakhogo yagaisigirek mene halok it andiat inelu agaikharego,” iluk, yagaisasikhe.#Yoh. 3:35, 10:15 23A'nogo yagaisasikhesik he, agoromi ane wanhi lagaukwa mene omanogo inale'ma tegelogo woginarek lagaikhesik elokhe hebekhogo wogisasikhesik he, mel yagaisasikhe: ”Hit hineilenggen hogoin meneat arat hikhi lagep mene yi, hinendawimo hinagaiyek hikhi logoni o. 24It ap Allah ane yagaisikhi lagaukwa mene inom, kaindek inenu pogot mene inom, inebe hokhorogoat hit hineilenggen hikhi lagep mene andi, nineilenggen helo e, iluk inendawimo anggikhi lagaukwa meneat he, ineilenggen higi'lek welagaukwa. Nen, wene hinesanggo holhi lagep mene andi, ninesanggo holilo e, iluk inendawimo anggikhi lagaukwa meneat he, inesanggo holhi'lek welagaukwa,” iluk yagaisasikhe.
Ap Samaria mene obabut fano iluk oba lirogo yagaisasikhe wene
25Wene a'nogo yagaisikhi lagaikhemo re, hobuk ap Allah ane lisu palek yagaisikhi lagaikhe mene ekhe Yesus obabut paligeluk oba wagaikhesik he, mel yagatikhe: ”Noe. An neluk mondok logoigen he, nobabut ninggi'nogo hilingiti logoik he,” iluk yagatikhemo,#Mat. 22:35-40; Mrk. 12:28-34 26at Yesus nen he, mel yagatikhe: ”Wene Allah nen komotninafikhe wene a'nogo lisu ninggi'nogo palek were'ma enu salhi lagen,” iluk yagatikhemo, 27ap a'nogo nen he, mel yagatikhe: ”At Musa nen he,
Hinendawinggen inom, hinobabut inom, hinomame inom,
hinebe inom mondogat misik a'luk, nineisena Tuhan Allah ebe
andiat hinendawinggen hundik logoino o.
Nen, ekhe re,
Hit hinonggwarek hinebe hinendawinggen hundik
welagep andi hak he, it afuni ekhe hinom welagep mene
andi hinendawinggen hundik logoino o,
iluk isikhemo lisu palek werek,” yagatikhe.#Im. 19:18; Ul. 6:5
28A'nogo yagatikhemo, at Yesus nen he, mel yagatikhe: ”Andi wene higithogoat egen o. Hat hobabut wene egen andi hagat higithogo hilingiti logogin halok he, heluk mondok logogin o,” iluk yagatikhemo,#Im. 18:5 29at ap a'nogo endawimo nen he, Yesus nen, ap andi fano hilingiterek mene, iluk anggoageluk, mel yagatikhe: ”Afuni ninom welagorek mene nendawinggen hundik logogun andi, inebe sani,” iluk a'nogo yagatikhemo, 30at Yesus nen he, mel yagatikhe: ”Ap ekhe o Yerusalem en o Yerikho pisikhe. Pigeluk ebekhalem pugunem he, ap inenggi abisak wilik nikharek mene nen ap a'nogo fakfesukwasik he, yei mondok tamuk-tamakhogo wa'lasu hak warogo andomaat herakfesukwasik, angge yi mene ti mene helaluk lagaukwa. 31Helaluk lagaukwama nen, ap ekhe Allah eisewerek mene ekhe kwe andi kwe pigeluk pisikhe hak he, ap a'nogo warek were'ma eilenggen hasikhe meneat he, kwe ogalogo hebisaluk pikhirat pisikhe. 32At pisikhe hagat, ap unggulenu Lewi mene ekhe kwe andi kwe pikhi logolik, ap a'nogo warek were'ma eilenggen hasikhe meneat he, kwe ogalogo hebisaluk pikhit pisikheat. 33It a'nogo hilingitukwa meneat he, ap o Samaria mene ekhe kwe andi kwe pigeluk pisikhe hak he, ap warek a'nogo were'ma eilenggen hasikhesik endawi agaikhe.#2Taw. 28:15 34Endawi agaikhesik he, ebe horokhogo era'lu lagaikhesik he, agap libik-labakhogo watukwa mene omanogo anggur enggen amusu inom, hunogoat mene amusu ekhe inom, oumo bene watfesikhesik he, engga yelogo, at anggo keledai amboroba liak fesikhesik he, o afuni onggo palogo nogo agarek oba fei lagaikhesik he, kwalogo nogo isukwa. 35Kwalogo nogo isukwasik ohealekwe re, ap a'nogo nen ap o andi eisewerek mene uang perak mene pire wogeti logolik he, mel isikhe: Ap yi kwalogo logoino. Kwalogo logolik he, hat mene yi mene ti mene wogeti logogin mene, onggo wokheti yi lek aga halok he, an hobuk wesimbik onggo wokhesigin o, iluk yagatikhe,” iluk, Yesus nen ap Allah ane lisu palek yagaisikherek mene a'nogo yagatikhe. 36A'nogo yagatikhesik he, wene ekhe mel isikhe: ”It ap yogot wanharek mene nen ap watukwa mene andi, Allah nen, afuni hinom welagep mene hinendawirogo logogun iluk isikhe a'nogo higit, ap inebe henagan andi, sa hagen endawiratikhe anggegen,” iluk a'nogo isikhemo, 37ap a'nogo nen he, mel isikhe: ”Ap andi warek were'ma ap ekhe wagaikhesik endawi nen lebethikhe andi aro,” iluk yagatikhemo, at Yesus nen mel isikhe: ”Halok he, haren ogo a'nogoat hilingirik lan o,” iluk yagatikhe.
Yesus nen Maria Marta emberek yagaisasikhe wene
38A'nogo yagaisasikhesik he, hobuk at Yesus agoromi ane wanhi lagaukwa mene omanogo inom lagaukwasik, o sili ekhe kwisukwa. O andoma he ekhe enu Marta welagaikhe. Aren he, ”Yesus an naiba kwi wesuak,” iluk ayonggo fesikhesik wanhikhe.#Yoh. 11:1 39At Yesus, he Marta andi agot enu Maria emberek were'ma kwisikhemo, he Maria a'nogo Yesus awe a'ma logolik ane esanggo hologo welagaikhe. 40Meneat he, at Marta nen, ”Ap pok wagasi'mo,” iluk, obaget set kwil-kwalhogo elokhoma hokhorogo isatik, weratik, hilingitikhesik wagaikhesik he, Yesus yagati logolik he, mel isikhe: ”Noe. An nalegat hat faget hilingisuageluk, an nagot yi lebetniigi'lek heraknobagaikhe yi fano anggegen a? Lebe'nea wesuagen he, yagasin o,” iluk yagatikhemo, 41at Yesus nen he, mel isikhe: ”Marta. Hat he, yi mene ti mene faget hendawinggen firogo set kwil-kwalhogo hilingiti lagen higi. 42Meneat he, wene misik ekhe hilingisu werek kwelegat he, haren yi mene ti mene faget enek hilingiti lagen. Hagot Maria yi nek he, wene fano wene misik andiat wenagaisogo eisewerek agasi'mo re, Herakfisan iluk yagasigin mondok lego,” iluk yagatikhe.
Currently Selected:
LUKAS 10: inohap
Highlight
Share
Copy
Want to have your highlights saved across all your devices? Sign up or sign in
LUKAS 10
10
Yesus nen ap inebe 70 nen inayonggo fesikhesik lakfisasikhe wene
1A'nogo yagaisasikhesik ninoe Enupogoren ap inebe 70 nen heragaisogo fisasikhesik he, at onggwarek endawimo anggasikhe kwe yi awi ti awi o sili lombok loageluk, it andi tak inebe pirendek lombogethigik lakfisasikhe. 2A'nogo lakfisikhi logolik he, mel yagaisasikhe: ”Enggen ugu hokhorogo arat wurik agasik werek meneat he, afuni enggen ebe palugun mene inebe endebaro. Andi nen he, ap eabu Eisewerek mene a'naga nen, afuni enggen palugun mene ekhe lakfisoagen he, at ayonggo fikhi logoino o,” iluk yagaisasikhe.#Mat. 9:37-38 3A'nogo yagaisasikhesik he, ”Hit lani o. An nen hit he wam domba obabut hangge it afuni inobabut he, mene olo mene inobabut mondok weak andi hangge were'ma inanggele'ma heakhogo lakhinobagagin o.#Mat. 10:16 4Nen, hit he, uang su elema kwalek mene inom, yi mene ti mene wokhisugunem su kwalogo waluk logoin mene inom, sepatu inom, ekhe waluk lagubo. Nen, ebekwe laga logolik, afuni ekhe hinane abirogo hai warinabik la fugo.#Mat. 10:7-14; Mrk. 6:8-11; Luk. 9:3-5 5Nen, afuni inaiba kwikhi logolik he,
Hinebe yoma Allah nen fanothinabuago, iluk hai warinabik kwino. 6Hai warinabik kugunem, iren hai warogo fano wokhinafa halok he, Allah nen fanorinabigin. A'nogo meneat he, it ekhe nen hai warogo wokhinafi'lek halok he, hai warinafep mene hinane oak helano o. 7It afuni hit wokhinabugun mene were'ma kwegep halok he, andomaat hinom logoino. Logolik, it afuni yabu wokhisugunem inenggi onggo yi mene ti mene wogisagaregaro, iluk, iren yi mene ti mene noageluk wokhisugu halok he, andiat ninggi logoino. O ya kwigik, ta kwigik, nikhi logogubo.#1Kor. 9:14; 1Tim. 5:18 8O sili ekhe kugunem, hai warogo wokhinabugun obaat, iren sumburu wokhisogoin mene andiat ninggi logoino. 9O sili andomaba logolik, it ekhe inoba ou werek halok, hiren higirinafi logolik he,
Allah nen awe a'ma hinobagagin wene andi arat hinoba horok asi waga o, iluk yagaisikhi logoino. 10Meneat he, o sili ekhe hit kugun oba andoma nen hai warogo wokhinafu lek halok he, hinebe wulibi waga logolik ebe khalem asi lambik he, mel ino:#Kis. 13:51
11Nit-hit hinaiba logolik kweang aling nineisok oba labulaga mene yi, hit weak iluk hineilhanem horogo herakfisogo yi. Hinendawimo nen, Allah awe a'ma ninobagagin oba arat yogondak horogasi waga o, iluk, fanorogo futfikhi logoino, iluk yagaisano. 12Hobuk o wurep oba re, it afuni o Sodom mene andoma Allah nen inoasigin meneat he, andi endebat hago. Mene re, o sili hit wokhinabugun lek mene andoma nek he, Allah nen hokhorogo inoasigin o, iluk, yagahisikhi lagi o,” iluk yagaisasikhe.#Kej. 19:24-28; Mat. 10:15, 11:24
Yesus nen afuni wenagisasikhe wene
(Mat. 11:20-24)
13”Hit afuni o Korazim mene inom, o Betsaida mene inom, afuni nen hilingisu lek mene, an nen elalinat hit ninom logolik hilingiti lagi a'nogo, o Tirus Sidon andoma hilingiti logoilema re, it afuni o andoma mene inobabut hebela'luk he, heangfuluk hilingitarek hak, inasu weak mene laberigik, wul fesi inunggul oba yuguligik, ikhi logolik he, weak hilingiti lagaukwa mene andi hebisaluk, inobabut fageat hebela'lep meneat he, hit he, a'nogo hilingisu hinabit andi nen weaget hinabigin o!#Yes. 23:1-18; Yeh. 26:1–28:26; Yl. 3:4-8; Am. 1:9-10; Za. 9:2-4 14Hobuk o wurep oba Allah nen wene inoba figik kotik igin andi sambul he, it afuni o Tirus Sidon andoma mene wene inoba fembik serogo hak inoasigin meneat he, hit enek he, mondok engginhogo hak hinoasigin o. 15Nen, hit afuni o Kapernaum mene yi hinendawimo nen he, Allah nen pogoroba liak ninobagagambik esinetninobagagin, iluk fogerakhikhi lageba? Mondok lego. We, afuni wa'la'luk lagaikharek oba andoma mondok pelakhinobagagin o,” iluk yagaisasikhe.#Yes. 14:13-15 16A'nogo yagaisasikhesik he, at agoromi ane wanhi lagaukwa mene omanogo yagaisikhi logolik he, mel isikhe: ”It afuni nen hit hinane holi'lagwi halok he, an naneat holi'lagwi o. Nen, ninabit, iluk herakhinobagaga halok he, Anat heraknobagaga o. Nen, An heraknobagaga halok he, An laknobagai wagaikhe mene a'nogo Ebeat herakfisaga o,” iluk a'nogo yagaisaluk he, lakfisasikhe.#Mat. 10:40; Mrk. 9:37; Luk. 9:48; Yoh. 13:20
It ap inebe 70 nen omanogo inambotkwe wagaukwa wene
17Hobuk it ap inebe 70 nen lakfisasikhe mene omanogo inendawimo inagaiyek anggaluk, inambotkwe wagaukwasik he, mel yagatukwa: ”Ninoe! Niren munggwarengge obabut weak mene andi, hat henu hombuk palogo yagatunem he, ninane esanggo holhi laga o,” iluk isukwama, 18at Yesus nen he, mel yagaisasikhe: ”Iblis andi eilabut yegelogo lakfei wagarek hak, pogoroba nen pi wagunem neilenggen higi o. 19Halok he, Yethani! Kisu inom, ililim inom, hineisogen alperelogo hebisigik, Iblis ninom weim palek mene a'nogo omame legetfisigik, hilingiti logobagaigeluk, an nomame wokhisigirik eisewerek hilinghinafi o. Eisewerek hilinghinafiri'mo, yi mene ti mene ekhe nen weagethinabigin mondok lego.#Mzm. 91:13 20A'nogo meneat he, it munggwarengge inobabut weak mene nen hit hinane holha mene andi faget, hinendawimo hinagaiyek anggagubo. Meneat he, hinenu pogoroba lisu palek werek andi faget enek he, hinendawimo hinagaiyek hikhi logoni o,” iluk yagaisasikhe.
At Yesus endawimo agaiyek hikhi logolik Allah hai watikhe wene
(Mat. 11:25-27, 13:16-17)
21A'nogo yagaisasikhesik andi sambul he, Yesus endawimo Allah Areagun were'ma andi nen he, endawimo agaiyek hikhi logolik mel isikhe: ”Allah Neisena e. Pogot kweang eisewerek hararo! Wene mondogat andi, it afuni inendawimo kagalek mene inom, yi wene ti wene inelu mene inom, inelu asinogo iluk hinakfuluk he, it inobabut yenggerugwi ketago mene hangge nek he, fakhogo yagaisegen andi re, hat hendawimo hamolo anggegen meneat yagaisegen andi nen he, hai wathafi lagi o, Neisena!” iluk yagatikhe. 22A'nogo yagatikhesik, it afuni omanogo mel yagaisasikhe: ”An neisena nen yi mene ti mene mondogat eisewerek logouwageluk wo'netikhe. Allah amlogo andi sa iluk afuni mondogat inonggot meneat he, an neisena alegat enek elu welagarek. Andi hak he, an neisena Allah andi sa, iluk afuni mondogat inonggot meneat he, amlogo an nalegat enek nelu welagirego. Nen, Allah amlogo an enat nendawimo anggalugen, neisena ebe afuni ekhe inelu asuageluk nane fakhogo yagaisigirek mene halok it andiat inelu agaikharego,” iluk, yagaisasikhe.#Yoh. 3:35, 10:15 23A'nogo yagaisasikhesik he, agoromi ane wanhi lagaukwa mene omanogo inale'ma tegelogo woginarek lagaikhesik elokhe hebekhogo wogisasikhesik he, mel yagaisasikhe: ”Hit hineilenggen hogoin meneat arat hikhi lagep mene yi, hinendawimo hinagaiyek hikhi logoni o. 24It ap Allah ane yagaisikhi lagaukwa mene inom, kaindek inenu pogot mene inom, inebe hokhorogoat hit hineilenggen hikhi lagep mene andi, nineilenggen helo e, iluk inendawimo anggikhi lagaukwa meneat he, ineilenggen higi'lek welagaukwa. Nen, wene hinesanggo holhi lagep mene andi, ninesanggo holilo e, iluk inendawimo anggikhi lagaukwa meneat he, inesanggo holhi'lek welagaukwa,” iluk yagaisasikhe.
Ap Samaria mene obabut fano iluk oba lirogo yagaisasikhe wene
25Wene a'nogo yagaisikhi lagaikhemo re, hobuk ap Allah ane lisu palek yagaisikhi lagaikhe mene ekhe Yesus obabut paligeluk oba wagaikhesik he, mel yagatikhe: ”Noe. An neluk mondok logoigen he, nobabut ninggi'nogo hilingiti logoik he,” iluk yagatikhemo,#Mat. 22:35-40; Mrk. 12:28-34 26at Yesus nen he, mel yagatikhe: ”Wene Allah nen komotninafikhe wene a'nogo lisu ninggi'nogo palek were'ma enu salhi lagen,” iluk yagatikhemo, 27ap a'nogo nen he, mel yagatikhe: ”At Musa nen he,
Hinendawinggen inom, hinobabut inom, hinomame inom,
hinebe inom mondogat misik a'luk, nineisena Tuhan Allah ebe
andiat hinendawinggen hundik logoino o.
Nen, ekhe re,
Hit hinonggwarek hinebe hinendawinggen hundik
welagep andi hak he, it afuni ekhe hinom welagep mene
andi hinendawinggen hundik logoino o,
iluk isikhemo lisu palek werek,” yagatikhe.#Im. 19:18; Ul. 6:5
28A'nogo yagatikhemo, at Yesus nen he, mel yagatikhe: ”Andi wene higithogoat egen o. Hat hobabut wene egen andi hagat higithogo hilingiti logogin halok he, heluk mondok logogin o,” iluk yagatikhemo,#Im. 18:5 29at ap a'nogo endawimo nen he, Yesus nen, ap andi fano hilingiterek mene, iluk anggoageluk, mel yagatikhe: ”Afuni ninom welagorek mene nendawinggen hundik logogun andi, inebe sani,” iluk a'nogo yagatikhemo, 30at Yesus nen he, mel yagatikhe: ”Ap ekhe o Yerusalem en o Yerikho pisikhe. Pigeluk ebekhalem pugunem he, ap inenggi abisak wilik nikharek mene nen ap a'nogo fakfesukwasik he, yei mondok tamuk-tamakhogo wa'lasu hak warogo andomaat herakfesukwasik, angge yi mene ti mene helaluk lagaukwa. 31Helaluk lagaukwama nen, ap ekhe Allah eisewerek mene ekhe kwe andi kwe pigeluk pisikhe hak he, ap a'nogo warek were'ma eilenggen hasikhe meneat he, kwe ogalogo hebisaluk pikhirat pisikhe. 32At pisikhe hagat, ap unggulenu Lewi mene ekhe kwe andi kwe pikhi logolik, ap a'nogo warek were'ma eilenggen hasikhe meneat he, kwe ogalogo hebisaluk pikhit pisikheat. 33It a'nogo hilingitukwa meneat he, ap o Samaria mene ekhe kwe andi kwe pigeluk pisikhe hak he, ap warek a'nogo were'ma eilenggen hasikhesik endawi agaikhe.#2Taw. 28:15 34Endawi agaikhesik he, ebe horokhogo era'lu lagaikhesik he, agap libik-labakhogo watukwa mene omanogo anggur enggen amusu inom, hunogoat mene amusu ekhe inom, oumo bene watfesikhesik he, engga yelogo, at anggo keledai amboroba liak fesikhesik he, o afuni onggo palogo nogo agarek oba fei lagaikhesik he, kwalogo nogo isukwa. 35Kwalogo nogo isukwasik ohealekwe re, ap a'nogo nen ap o andi eisewerek mene uang perak mene pire wogeti logolik he, mel isikhe: Ap yi kwalogo logoino. Kwalogo logolik he, hat mene yi mene ti mene wogeti logogin mene, onggo wokheti yi lek aga halok he, an hobuk wesimbik onggo wokhesigin o, iluk yagatikhe,” iluk, Yesus nen ap Allah ane lisu palek yagaisikherek mene a'nogo yagatikhe. 36A'nogo yagatikhesik he, wene ekhe mel isikhe: ”It ap yogot wanharek mene nen ap watukwa mene andi, Allah nen, afuni hinom welagep mene hinendawirogo logogun iluk isikhe a'nogo higit, ap inebe henagan andi, sa hagen endawiratikhe anggegen,” iluk a'nogo isikhemo, 37ap a'nogo nen he, mel isikhe: ”Ap andi warek were'ma ap ekhe wagaikhesik endawi nen lebethikhe andi aro,” iluk yagatikhemo, at Yesus nen mel isikhe: ”Halok he, haren ogo a'nogoat hilingirik lan o,” iluk yagatikhe.
Yesus nen Maria Marta emberek yagaisasikhe wene
38A'nogo yagaisasikhesik he, hobuk at Yesus agoromi ane wanhi lagaukwa mene omanogo inom lagaukwasik, o sili ekhe kwisukwa. O andoma he ekhe enu Marta welagaikhe. Aren he, ”Yesus an naiba kwi wesuak,” iluk ayonggo fesikhesik wanhikhe.#Yoh. 11:1 39At Yesus, he Marta andi agot enu Maria emberek were'ma kwisikhemo, he Maria a'nogo Yesus awe a'ma logolik ane esanggo hologo welagaikhe. 40Meneat he, at Marta nen, ”Ap pok wagasi'mo,” iluk, obaget set kwil-kwalhogo elokhoma hokhorogo isatik, weratik, hilingitikhesik wagaikhesik he, Yesus yagati logolik he, mel isikhe: ”Noe. An nalegat hat faget hilingisuageluk, an nagot yi lebetniigi'lek heraknobagaikhe yi fano anggegen a? Lebe'nea wesuagen he, yagasin o,” iluk yagatikhemo, 41at Yesus nen he, mel isikhe: ”Marta. Hat he, yi mene ti mene faget hendawinggen firogo set kwil-kwalhogo hilingiti lagen higi. 42Meneat he, wene misik ekhe hilingisu werek kwelegat he, haren yi mene ti mene faget enek hilingiti lagen. Hagot Maria yi nek he, wene fano wene misik andiat wenagaisogo eisewerek agasi'mo re, Herakfisan iluk yagasigin mondok lego,” iluk yagatikhe.
Currently Selected:
:
Highlight
Share
Copy
Want to have your highlights saved across all your devices? Sign up or sign in