LUKAS 12
12
”Ap Farisi mene inendawinggen pire andi nen he weagethinabinogo nen hinebe hebelogo logoino,” iluk yagaisasikhe wene
(Mat. 10:26-27)
1Wene a'nogo ugu kwelek, afuni mondok hokhorogoat inera'lu andogosi wagaukwama re, inebe mondok esa hokhorogo andi nen he, it ekhe nen it ekhe ineisok ungguren al perelogo fisilik lagaukwa. A'nogo hilingfisilik lagaukwama, at Yesus nen agoromi ane wanhi lagaukwa mene omanogo wene mel tak yagaisasikhe: ”Ap Farisi mene inobabut he, enggen sumburu roti mene fisuageluk, anggele'ma pelafarek mene andi hangge logolik he, inagap oba nek fano hangge, inendawinggen pire andi nen, weaget hinabinogo iluk hinebe hebelogo logoino.#Mat. 16:6; Mrk. 8:15 2Mene re, yi mene ti mene sebelek mene andi faget figik, hinago werek mene andi inelurogo sele'mat figik, igin enego.#Mrk. 4:22; Luk. 8:17 3A'nogo hilingisigin andi nen he, hit o mum oba logolik ikhi lagep mene andi, o selek oba ugunem mondogat inesanggo holugun o. Nen, oloba logolik hinane samik-samok inesanggoma ikhi lagep mene andi re, o weinam oba lagalik inane hokhorogo yagaisugunem holugun aro,” iluk yagaisasikhe.
”Allah hinailorogo logogun,” iluk yagaisasikhe wene
(Mat. 10:28-31)
4A'nogo yagaisasikhesik he, ekhe mel yagaisasikhe: ”Nerugwi nagaila'lage! An wene yi hit hinelurogo yagahisago. Afuni nen hinebe hinoasugun andi hinailo asu fuk. Hinagap enek hinoasimbik he, iren hobuk ekhe weaget hinabugun elo'lek andi nen he, hinailo asu fugo. 5Meneat he, hit sa hinailorogo logogun nogo. An nen yagahisak. At Allah nen hinebe hinoasimbik he, hobuk endu ai'mo elok lakhinobagagin werek andiat hinailorogo logoino, iluk yagahisikhi lagi andi. 6Mene re, sue ulue andi onggo miren palharek nogo. Ebe 5 mene onggo uang sen mondok endebat pire meneba wanharek anggigi. A'nogo hilingitarek meneat he, at Allah re sue andi misigat halok ekhe onggot agi'lek eberek mondok welagarego. 7Nen, hit hinesi hinungguloa'ma mondogat, at Allah nen enggi mondok wenago welagarego. At Allah nen sue ulue hokhorogo andi esin hangge anggikherek fuk. Hinebeat esin mondok anggikherego. Andi nen hinailo lekhogo logoino o,” iluk yagaisasikhe.
Afuni ineilhanem, ”Yesus an noe,” iluk inane fakhogo ugun wene
(Mat. 10:32-33, 12:32, 10:19-20)
8A'nogo yagaisasikhesik, ekhe mel yagaisasikhe: ”Ap sa nen, Yesus andi an noe o, iluk afuni ineilhanem fakhogo ugu halok he, An Abat ta'lasi wagagi a'nogo nen ogo re, At yi an nagoro, iluk, it malaikat Allah nen yonggo lakfisa wagarek mene omanogo ineilhanem nane fakhogoat yagaisagain o. 9Meneat he, ap sa nen, Yesus andi an nonggoro, iluk afuni ineilhanem, labelhe halok he, An nen ogo re, at andi an nonggoraro, iluk, it malaikat pogoroba mene Allah nen yonggo lakfisa wagarek mene omanogo ineilhanem nane fakhogo yagaisagain aro. 10An abat ta'lasi wagagi a'nogo nabok weak palhu halok he, weak hilingisugun mene andi inebe lombok Allah nen sebelogo legetfisagain meneat he, Allah Areagun andi abok weak palhu halok he, weak hilingisugun mene andi Allah nen legetfisagain mondok lego.#Mat. 12:32; Mrk. 3:29 11Hit hinanema wanuageluk, afuni nen it ap Yahudi mene samban agarek oba andoma inom, it ap pemerintah mene ineilhanem andoma inom, it ap inenupogot ineilhanem inom, wokhinarek hinobagai lagu halok he, hinendawimo nen he, Nit ninagap telogo wene re onggo ki mene ugun, iluk hinendawinggen fitubo.#Mat. 10:19-20; Mrk. 13:11; Luk. 21:14-15 12Andi sambul he, hiren wene onggo uageluk Allah Areagun en, ”Yi'nogo ini o, iluk, hinendawimo kagaligin mene werego,” iluk yagaisasikhe.
”Ap ekhe kain enggi werek meneat he, obabut kembu hak hilingitikhe,” iluk oba lirogo yagaisasikhe wene
13At Yesus nen a'nogo yagaisugunem, it afuni hokhorogo andogorek welagaukwa mene omanogo misigat ekhe nen he, mel yagatikhe: ”Noe. An noe nen nit nineisena wa'laga logolik, at alolegengge nit nemberek faget fuluk laga meneat he, nagailak alegat agasik werek andi, an ekhe minggilogo wo'nesuagen he, yaga'no o,” iluk yagatikhemo, 14at Yesus nen he, mel yagatikhe: ”Hinebe tegelogo hinobagaluk hinagarek lombok sumbuthisagain andi, an mennobagagama anggegen?” iluk yagatikhesik he, 15afuni hokhorogo omanogo mel yagaisasikhe: ”Afuni inagarek hokhorogo welagarek andiba ineluk welagaikharek lego. Yi mene ti mene an mene nek logoilep, iluk inendawimo anggikhi logoinogo iluk hinebe hebelogo logoino o,” iluk a'nogo yagaisasikhesik he, 16wene ekhe oba lirogo mel yagaisasikhe: ”Ap kain mene ekhe nen eabu kweang mulimo fanoma awi yatikhemo re, ebe enggen hokhorogo itikhemo, 17at ap a'nogo endawimo nen he, Awi yati mene ebe enggen hokhorogo ite andi, ebe palogo fagain oba obuluk lek yoma, ninggi'nogo hilingisigin, iluk, endawimo ebeti lagaikhe. 18Endawimo ebeti lagaikhesik he, yi'nogo hilingisigin, iluk, mel anggasikhe. O wuri'mo attak fikhi lagiba yi meisalogo re, hobuk hokho mene ekhe wutfembik, nagarek inom, yi mene ti mene awi yati mene enggen palogo inom, o andoma mondok fikhi logogin. 19A'nogo fakhambik werek kwelek he, nonggwaregen komorikhi logolik,
Yogo. Mo lagagik, pigik, ugu kwelek yi tahun ti tahun faget nagarek hokhorogo higithogo fakhigiri'mo fano. Yogondak set walogo logolik, sumburu ninggik, enggen amusu ninggik, ninggi logolik he, nendwimo nagaiyek hikhi logogin o, iluk, nonggwarek komorikhi logogin, iluk anggikhi lagaikhemo, 20at Allah nen he, ap yi, hendawinggen mondok lek yi ri! Yogondak hubanggo yi arat hareagun selokhogo wulakfisa wesigin o. Wulakfisa wagunem, hagarek mondok hokhorogo andogorogo fakhegen andoma sa eise asigin anggegen, iluk yagatikhe. 21Andi hak he, it afuni Allah eilhanem inenggi werek isili'lago legoba nen, kweangma meneba nek inenggi werek hilingfakhili'lagwi a'nogo re, andi emberek higiraro,” iluk yagaisasikhe.
”Hinendawinggen fitubo,” iluk yagaisasikhe wene
(Mat. 6:25-34)
22A'nogo yagaisasikhesik, at agoromi ane wanhi lagaukwa mene omanogo yagaisikhi logolik he, mel yagaisasikhe: ”An nen a'nogo yagahisigi andi nen, hit hinendawimo nen he: Nineluk logouwogeluk he, ninamburu ki mene nogoin. Ninasu ki mene laberogoin, iluk hinendawinggen firogo menenei uan horok ebeti logoinogo iluk yagahisigi. 23Nenggarek mene andi esanggoma meneat he, esin he, hinebe hineluk logogun andi aro. Nen, su labetarek mene andi esanggoma meneat he, esin he, hinebe andi aro. 24At sue ponggiet en hilingiterek mene andi futfeni. Aren he, yi mene ti mene awi yatik, enggen palhik, ikherek mondok lek. Nen, hobuk nagain mene faget enggen palogo o wuri'mo fakhikherek oba mondok lek meneat he, at Allah nen amburu wogeterek. Mene re, at Allah nen sue andi esineraterek nogo? Lego. We, hit hinebeat esinethinafi logolik hinamburu wokhisagain lek nogo? Wokhisagain aro. 25Nen, hit ekhe nen he, an wa'lasigin higit andi sambul he, katokhogo wa'lagi'lek, endebat ekhe inom logoile e, iluk menenei uan horok ebesigin andiba heluk ekhe inom logogin nogo? Elo'lego. 26Halok he, hiren yi wene ti wene endebat mene hilingisigin elo'legen logoligat he, hokho mene andi hinendawinggen fiti lagep andi nenahalok? 27Enggen mulinggen-molanggen iterek andi futfeni o. Enggen andi oan isigeluk, set kwalogo hilingitik, yo hak lalogo su itik ikherek mondok lek meneat he, ap kain Salomo a'nogo helalingge wagane'ma fogerati lagaukwa oba nen he, elo'lek hangge. Enggen andi nek he, eilamulit mondok fano andi hani!#1Raj. 10:4-7; 2Taw. 9:3-6 28Halok he, engga helengga o leikwe welagarek mene andi re, yogondak hak, fano welagaresigen, ohealekwe re, endumo nolfisagarek meneat he, Allah nen inasu labetfisikherek hak fano mene hilingisogo fisikherek andi nen, hit hinebe faget lebethisagain lek nogo? Hinendawinggen at oba himbirik welagi'lek yi ri!
29Hinendawimo nen he, ninamburu inom, ninagai inom, ki mene nogoin, iluk, andi meneat esinet fuluk hinendawinggen firogo logogubo. 30A'nogo hilingitarek andi mondogat he, it afuni endakwe mene nen andi mene esinet fuluk herarik nikharek meneat he, hit yi nek he, yi mene ti mene legen hinelagaik hak welagep andi, at hineisena Allah pogoroba mene elu welagarego. 31At Allah awe a'ma kuluk logogun andi mene esinet fogoin halok he, hit yi mene ti mene andi oba loukhogo wokhisagain aro.”
”Fano mene pogoroba hinobagauwageluk lakfakhikhi logoino,” iluk yagaisasikhe wene
(Mat. 6:19-21)
32”Halok he, hit Allah againafuri a'luk welagep mene hinebe endebat mene yi, nerugwi nagaila'lage! Allah nen hit at awe a'ma hinobagaigeluk endawimo anggikhesik werek andi re, hinailo agubo.
33Hit hinagarek mene andi onggo hunisimbik he, onggo uang hunisugun mene omanogo it inagarek lek mene inelagaik mene andi sumburisano o. Sumburisaluk he, uang awi fili agarek lek mene waganogo fuluk, kwalogo fikhi logou hak, hinagarek fano mondok lek asigin lek mene, it ap ineil masi weak mene nen yogot hinasi kwigik, elugengge nen palhik, ikherek mondok le'ma pogoroba andoma kwalogo hinobagauwageluk lakfakhikhi logoino o. 34Hinagarek hinendawinggen hundik mene andoma andogorek were'ma, hinendawinggen andomaat logogin o,” iluk yagaisasikhe.
Yesus nen, ”Hinebe hebelogo logogun,” iluk yagaisasikhe wene
35-36A'nogo yagaisasikhesik hobuk yagaisikhi logolik he, ”Ap kain mene hemi iginafunem laluk isago naluk wagunem, agoromi amingmingengge mene yerogo inebe hebelogo were'ma, at ambotkwe we'luk kwe papaget hugunem weak-weak kwe huthagarek hak, hit ogo re, hinasu fanorogo laberogo nen esage ibilogo fuluk logoino o.#Mat. 25:1-13 #Mrk. 13:34-36 37At kain a'nogo amingmingengge mene omanogo inoe yerogo were'ma ebe waga logoumo re, inendawimo inagaiyek hokhorogo anggogoin o. A'nogo yerogo were'ma wesimbik he, at inoe a'nogo obakhe hele pukhogo, agoromi omanogo isago noageluk inebe misi'mo lambukhogo hutfisambik he, aren sumburisagain o, iluk yagahisigi,” isikhe. 38”A'nogo hilingisigin andi re, at ebe o hubenggen tulem wesigin he a? O wigik wesigin he a. It yerogo were'ma isa wagunem, inendawimo inagaiyek hokhorogo asigin o.” 39”Wene yi hinendawimo eberek logoino. Ap awi eisewerek mene ekhe endawimo anggikhi logolik, o yogondak hubanggo re, jam tiba an inaiba yoma ap ekhe yogot wanigeluk kwi wesigin, iluk elu logolik aiba kagalek logoilepma re, o pin talogo yogot wani kwilep lek.#Mat. 24:43-44 40Andi hak he, hit hinendawimo nen he, at andi sambul wesigin, iluk anggigi'lek wonogat werek kwelek, an abat ta'lasi wagagi a'nogo re, arat wesigin andi, hinebe tegelek logoino o,” iluk yagaisasikhe.
Ap inamingmingengge mene obabut higithogo hilingiterek mene inom, obabut weak hilingiterek mene inom faget, oba lirogo yagaisasikhe wene
(Mat. 24:45-51)
41At Yesus nen a'nogo yagaisasikhemo at Petrus nen mel yagatikhe: ”Noe! Wene oba lirogo yaganisegen andi re, nit faget enek egen a? At he, afuni mondogat ninom faget egen a,” iluk yagatikhemo, 42at ninoe Enupogot Yesus nen he, mel yagatikhe: ”Ap kain mene ekhe againafuri yerinarek logolik inamburu nogoin mene wogisogoin higithogo wogisikhi logouwageluk, at amingmingengge mene ayonggo fugunem endawimo kagalek logolik obabut oe ane igin mene higithogo hilingiterek andi sa hangge anggegen. At andi oe andi nen, menfuluk lagarego. 43Menfuluk lagunem, amingmingengge a'nogo andi higithogo hilingitunem, at oe a'nogo ambotkwe eilenggen ha waga halok, amingmingengge mene a'nogo endawimo agaiyek hokhorogo anggagain o. 44A'nogo fano hilingitunem, ha wesimbik, oe a'nogo nen he, an nagarek yoma felelenghogo hat henggiba logouwak, iluk menfagain o, iluk eberogoat yagahisigi. 45Meneat he, at amingmingengge mene andi obabut weak halok he, endawimo nen he, noe a'nogo weak-weak weri'logo lek andi logombigen wesigin higi, iluk, at oe amingmingengge mene ekhe ap inom, hemi inom, yei inoatik, sumburu inom, anggur amusu inom, endawinggen wenggelek lek naluk, wurep oba, anggur amusu andi nen ebe lugulugwi palhik, ikhi logolik, aren he, 46Noe a'nogo o andi sambul, jam andiba wesigin, iluk mondok onggorat were'ma oe kain a'nogo ha wesimbik he, amingmingengge mene a'nogo ebe pinggi warogo re, it afuni ekhe inendawinggen Allahba himbiret figi'lek mene fisikherek oba andoma lakfagain o.
47Ap amingmingengge mene ekhe endawimo nen he, an noe nen, yi'nogo hilingisogo nobagailep, iluk endawimo anggikherek mene elu logoligat he, hilingisogo fisigi'lek logogin halok he, ap andi yei ou werek wasi wesigin o. 48Meneat he, amingmingengge mene ekhe endawimo nen he, an noe nen, yi'nogo hilingisogo nobagailep, iluk endawimo anggikherek mene onggot logolik a'nogo hilingisogo fisigi'lek yei ou weak wasu higirat weak hilingite halok, yei endephogo hak wasi wesigin o. Afuni inebe lombok hokhorogoat wogisagain mene andi, onggwarek waga logolik hokhorogoat kino igin o. Nen, yi mene ti mene hokhorogo inenggiba logouwageluk menfisagain mene andi, hobuk, hokhorogo wo'ne'ni, iluk igin o,” iluk yagaisasikhe.
Yesus nen, ”Afuni inebe misigat mene minggilogo hinobagaigeluk wagagi,” iluk yagaisasikhe wene
(Mat. 10:34-36)
49A'nogo yagaisasikhesik he, hobuk mel isikhe: ”An he, o kweangma yoma endu noligeluk wagagi andi nen he, endu andi amulok weak-weak ibila'nik, iluk anggikhi lagi. 50Afuni yoma ima pelaginafarek andi hangge, an yi enggin ti enggin hilingnabugun mene re, oan werek kwelek, nendawinggen mondok heiselnafunem welagi.#Mrk. 10:38 51Hit hinendawimo nen he, at kweangma yoma wagaikhe andi re, afuni kweangma mene yoma lambulogo ninobagaigeluk wagaikhe iluk anggikhi lageba? Lego. An he, minggil hinabigiluk wagagi iluk yagahisikhi lagi o. 52O yogondak huli nen he, ap ekhe againafuri inom inebe 5 inaiba misi'mo mene logolik, it-it inom hekhogo weak arik inebe henagan en he, inebe pire inabok palhik, nen, inebe pire nen he, lagakhogo inebe henagan aremnogo inabok palhik, ugun o. 53Inom a'nogo heksek logolik he, eisena nen amlogo emberek weak agik, amlogo nen eisena emberek weak agik, agaisa nen eak emberek weak agik, eagen agaisa emberek weak agik, oan en he, a'logo emberek weak agik, a'logo nen he, oan emberek weak agik, a'nogo inom weagarik logoin o,” iluk yagaisasikhe.#Mi. 7:6
O yogondak elokhonggen hilinglagunem futfogoin wene
(Mat. 16:2-3)
54A'nogo yagaisasikhesik he, afuni hokhorogo omanogo wene ekhe mel yagaisasikhe: ”O mo ubuk ikherek higit a'lima nen ohena ekhe lagai wagu halok he, o huk! Meiso wesigin, iluk ikhi lagep hak, meiso arat wagarek. 55Nen, o sogoi i ambut higit a'lima nen wagu halok he, o huk! O hibi lagagin, iluk ikhi lagep hak he, arat hibi agarego. 56Hit hinagap oba nek fano hangge hinendawinggen pire yi ri! Kweang pogot elokhonggen futfuluk he, a'nogo hilinglasigin iluk hinendawinggen wenggelek logolik, obabut enegat palhi lagep meneat he, o yogondak welago yaba yi'nogo hilinglasigin, iluk futfigi'lek welagep andi nenahalok,” iluk yagaisasikhe.
”Wene hinoba fili'lagwi mene sebelogo legetfeino,” iluk yagaisasikhe wene
(Mat. 5:25-26)
57A'nogo yagaisasikhesik, wene ekhe mel isikhe: ”Wene hinonggwaregen katokhogo ikhi lagep lek nenahalok.” 58”Ap ekhe nen wene hat hoba fembik wene ero pilingitarek mene inoba wokharek laluk, it ap andi nen hebe polisi inenggim hobagaumo, iren he, inenggi hele warogo fisagarek oba andoma kwelakhobagai lanogo nen he, oan ebe kwe laga logolik andemat hemberek wene sebelogo legetfisano. 59Nen, sebelogo legetfigi'lek halok he, henggi hele warogo kwelakhobagaumo re, onggo katokhogo mondogat wogeti'lek halok he, andoma nen wulibi wesigin mondok lego, iluk yagahisigi,” iluk yagaisasikhe.
Currently Selected:
LUKAS 12: inohap
Highlight
Share
Copy
Want to have your highlights saved across all your devices? Sign up or sign in
