LUKAS 17
17
Komorinafikhe wene
(Mat. 18:6-7,21-22; Mrk. 9:42)
1At Yesus nen a'nogo yagaisasikhesik he, at agoromi ane wanhi lagaukwa mene omanogo wene ekhe mel yagaisasikhe: ”Afuni nen an obokhogo heraknobagauwageluk it ekhe inendawimo kagalugun mene weregaro. Meneat he, at sa nen inendawimo kagalhu mene andi Allah nen ebe weaget fagain o. 2At andi nen it afuni sebelek mene yi misigat ekhe an obokhogo heraknobagauwageluk endawimo kagalumo, an obokhogo heraknobagaikhe halok, at endawimo kagalhe mene andi helep hokho mene alonggopma hele kelogo re, i laut yenggele'ma hambogoisogo pelakfiselepma fano o. 3Halok he, hinebe elelerogo re, hinebe hebelogo logoino o. Hit hinerugwi hinagaila'lak ekhe weak hilingitu halok he, komora'no o. Komorati logoumo, obabut hebelhe halok he, weak hilingite mene andi sebelogo legetfisano.#Mat. 18:15 4Ap andi nen inenggi misik sambul he, enggi 7 nen hobuk attak weak hilinghobagaikhesik he, hundik-handik enggi 7 nenat hoba we'luk, weaget hobagagi mene andi nobabut hebelaga o, iluk yagahesi waga halok he, sebelogo legetfisikhi logoino,” iluk yagaisasikhe.
”Inendawinggen Allahba eberogoat himbiret fuluk hilingiti logogun,” isikhe wene
5A'nogo isikhemo, it agoromi lakfisasikhe mene omanogo nen he: ”Noe e! Ninendawinggen en Allah oba himbiret fogo mene a'nogo wurik asuageluk ekhe inom ninomamet ninabin o,” iluk yagatukwama, 6at ninoe Enupogoren he: ”Kibi-kibi magenggelak mene feik lakfagarek andi hak, hit hinendawinggen an noba endebat enek himbiret fuluk he, hiren, e yi yoma nen sanokhogo re, i laut hokho yenggele'ma a'lima ya'lasi lan, iluk yagasugun halok he, hinane esanggo holigin aro,” iluk yagaisasikhe.
Oe nen amingmingengge mene yagaterek wene
7A'nogo yagaisasikhesik he, hobuk wene ekhe inom mel yagaisasikhe: ”Hit ekhe hinamingmingengge mene hineabu wanhi logombiga, hinanggo konhi logombiga, oan kwi wagu kwelegat he, hamburu weak-weak name o, iluk yagasugun anggegep? Lego. 8We, yi'nogo ikhi lagep anggigi: An namburu tak isagaisogo fembik, sumburu sumburisikhi logolik su labetarek mene a'nogo laberogo re, an tak noageluk wo'netunem en, an arat ninggi halok he, hat nagain o, iluk ikhi lagep a'nogo lek? 9Oe a'nogo nen amingmingengge mene a'nogo, yi'nogo hilingi'no, ti'nogo hilingi'no, iluk yagasigin mene a'nogo nek hilingite halok he, oe nen hai wasigin nogo? Lego. 10Hit he andi higiraro: Yi'nogo hilingi'no, ti'nogo hilingi'no, iluk yagahisamo andi arat hilingfuluk he, mel ikhi logoino: Lego. Nit oba loukhogo hilingisumo hai wa'ninabigin mene hilingiti'lek. We, hamingmingengge mene logolik hilingisu mene nek hilingisigin, iluk ikhi logoino,” iluk yagaisasikhe.
Ap inebe 10 nen inoumo henanggo inailo mene higirinafikhe wene
11Hobuk inenggi ekhe sambul he, at Yesus o Yerusalem pikhi logolik, o Samaria pelakhigik, o Galilea liakhigik, tulemkwe pisikhe. 12Pikhi logolik, o sili ekhe kwi lagunem he, ap inebe 10 nen inoumo henanggo inailo mene inebene welagaikhe mene nen ineilenggen Yesus yethasukwasik he, inebe yatma andem menlasi wagaukwasik logolik, mel yagatukwa, 13”Yesus noe e! Hendawi nisan o,” iluk inane hokhorogo isukwa. 14A'nogo isukwama, at Yesus nen eilenggen yerisasikhesik he, mel yagaisasikhe: ”Hit he, ap Allah eisewerek mene omanogo nen hinebene ineilenggen hisoagen he, inugisa lani o,” iluk yagaisasikhe. A'nogo yagaisasikhemo, it omanogo ebekwe lagu kwelegat, inoumo henanggo inebene omanogo mondogat lek agaikhe.#Im. 14:1-32 15A'nogo lek agaikhemo re, ap omanogo mene ekhe misigat enek eilenggen agap oba kwelakhasikhe re, oumo omanogo arat lek agaikhemo hasikhesik he, ambotkwe sugulogo waga logolik, ane hokhorogoat, Allah fogerarik wagaikhe. 16Wagaikhesik, Yesus awe a'ma eindep awi yagaisogo ot lumbuk hai watikhe. Ap andi awi o Samaria mene. 17A'nogo hai watikhemo, at Yesus nen he, mel yagatikhe: ”Ap inebe 10 nen omanogo inoba fano agaikha meneat he, inebe 9 en aremnogo koma lagaikhama? 18It ap inebe Yahudi mene inambotkwe wagi'lek kamo ugu kwelegat he, ap pok mene yi nek he, Allah fogerasigeluk ambotkwe sugulogo waga yi,” iluk yagaisasikhesik he, 19at ap wagaikhe a'nogo oba mel yagatikhe: ”Eberogoat hilingnabigin, iluk hendawinggen noba himbiret fegen andiba arat fano agen o. Halok, hebe menla'luk haiba lan o,” iluk lakfesikhe.
Allah awe a'ma fisikherek wene
(Mat. 24:23-28,37-41)
20A'nogo lakfesikhemo hobuk he, it ap Farisi mene nen, mel isukwa: ”At Allah nen o mera nen awe a'ma ninobagai wesigin,” iluk heinok wanhukwama, at Yesus nen he, mel yagaisasikhe: ”At Allah awe a'ma hinobagaigeluk wesigin andi re, afuni nen futfouwageluk elalin mene ekhe ineil oba hilingiti'lek werek kwelegat wesigin o. 21At Allah nen awe a'ma hinobagagin andi, arat hinanggele'ma asi waga andi nen he, it afuni nen, at ebe eberogoat yoma werek yi ha we'ni! igik, andoma werek a'li ha lani! igik, oan igi'lek werek kwelegat wesigin o,” iluk yagaisasikhe.
22A'nogo yagaisasikhesik, at agoromi ane wanhi lagaukwa mene omanogo yagaisikhi logolik he, mel yagaisasikhe: ”An abat ta'lasi wagagi a'nogo hundik-handik hobuk ninom mondok logogun mene re, oan werek kwelek, hit hinendawimo nen he, ninenggi misigam faget nineilenggen helo e, iluk a'nogo anggogoin meneat he, hineilenggen niigi'lek logogun oba weregaro. 23It afuni nen he, at a'nogo ebe yoma werek. Yetha we'ni, igik, andoma werek a'naga yetha lani, igik, ugu halok he, hinendawimo nen he, eberogoat anggaluk hineilenggen yetha lagik, inombo'ne lagik, ugubo. 24An abat ta'lasi wagagi a'nogo wesigin he, o eilabut yegelhikhi logolik pogot erokwe a'lima mondok selek arik lagarek andi hak, wesigin o. 25Nen, a'nogo hilingisigin meneat he, andi oan hilinglagi'lek werek kwelek he, afuni yogondak werek mene yoma nen wo'nafi'lek heraknobagaluk he, yi enggin ti enggin hilingnabugun o. 26It afuni ap Nuh werek oba andem hilingiti lagaukwa higirat he, an abat ta'lasi wagagi a'nogo hobuk a'nogoat hilingitunem wesigin o.#Kej. 6:5-8 27Nuh werek kwelek, it afuni andoma inamburu ninggik, enggen amusu ninggik, aben hemi ikhigik, it ekhe igisigik, ugu kwelek, ap Nuh a'nogo e so elema kwisikhemo, i nabung-habung ikhi logolik, it afuni omanogo felelenghogo inoatikhe.#Kej. 7:6-24 28Andi hak he, ap Lot werek kwelek hilingiti lagaukwa andi hak hilingisugun o. Andem higit he, it afuni andoma inamburu ninggik, enggen amusu ninggik, yi mene ti mene onggo palhik, wanhik, ineabu heligik, inawi wurigik, ugu kwelek,#Kej. 18:20–19:25 29ap Lot a'nogo o Sodom herakfisaluk wulibi lagaikhemo re, Allah pogoroba nen meiso endu mene inom, hendali hangge mene inom, pelakfei wagaikhemo re, it afuni omanogo inebe felelenghogo inoatikhe. 30Andi hak he, an abat ta'lasi wagagi a'nogo hobuk weinamhogo wesigin andi sambul he, a'nogoat hilinglasigin o.
31Andem higit he, an wagunem, sa nen agarek oloba fuluk he, ebe o tum oba lagaluk were'ma, ebe pi wesimbik agarek oloba werek mene andi wani kwigin elo'lego. Pikhirat loak. Nen, sa nen ebe yabumo were'ma an wagunem hobuk ambotkwe oloba wesigin elo'lek aro. Pikhirat loak.#Mat. 24:17-18; Mrk. 13:15-16 32Ap Lot agwe hilinglagaikhe mene andi hinendawimo ebe'ni o.#Kej. 19:26 33Sa nen onggwarek ebe elele helagain halok, hobuk ebe nong asigin o. Meneat he, sa nen ebe elele heligi'lek halok he, ebe telagain o.#Mat. 10:39, 16:25; Mrk. 8:35; Luk. 9:24; Yoh. 12:25 34Andi sambul he, ap inebe pire hubanggo henambo nogo misi'mo ugunem, ekhe wanhi logolik, ekhe herakfisagain o. 35Nen, hemi inebe pire sumburu werasuogeluk gandum enggen sagalhunem ekhe wanhi logolik, ekhe herakfisagain aro. 36[Nen, ap inebe pire yabumo were'ma, ekhe wanhik, ekhe herakfigik, igin aro, iluk yagahisigi,]” iluk ikhi lagaikhemo, 37at agoromi ane wanhi lagaukwa mene omanogo nen he, mel yagatukwa: ”Noe! Hat egen andi o koma nen hilingisugun mene faget egen,” iluk yagatukwama, at Yesus nen he, mel yagaisasikhe: ”Warek mene werek halok he, sue warek fili ninggerek mene oba andoma andogosi lagarego,” iluk yagaisasikhe.
Currently Selected:
LUKAS 17: inohap
Highlight
Share
Copy
Want to have your highlights saved across all your devices? Sign up or sign in
