LUKAS 2
2
Yesus ta'lagaikhe wene
(Mat. 1:18-25)
1Andem higit he, ap kain Kaisar Agustus andi nen afuni o yi awi ti awi inenu lisu paluageluk wene yonggo wulakfisasikhe. 2Inenu attagat lisu palhukwa andi, ap enu Kirenius andi, o Propinsi Siria andoma kain gubernur werek kwelek palhukwa. 3A'nogo inenu lisu paluageluk he, afuni inawi sili lombok kwilik lagaukwa.
4-5Nen, at Yusuf ogo re, Daud en tagongge mene andi nen he, o Galilea tonggwe o sili enu Nazaret andi nen he, o Yudea ap Daud ta'lagaikheba o sili enu Betlehem pigeluk, at Maria emberek wenago welagaukwa a'nogo eak a'ma were'ma emberegat inenu lisu paluageluk pisukwa.
6Pisukwasik andoma were'ma eak a'nogo takhagain higit agaikhemo, 7eak manggusa abat takhasikhe. Takhasikhesik he, o afuni pok mene nogo agarek oba mondok peteregen he, su kain meneba yinggilogo, e sang tale'ma wam amburu ninggerek oba ebe fesukwa.
It ap wam domba konhu were'ma, malaikat inoba pi wagaukwa wene
8Andem higit he, o Betlehem era'lukwe andoma, it ap wam konhu welagaikharek mene ekhe hubanggo inanggo konhu welagaukwa. 9A'nogo were'ma aremnogo, Tuhan nen malaikat pogoroba nen yonggo pelakfisa wagarek mene ekhe ka nen waga heat wagaikhesik inera'lu menlagunem he, nineisena Tuhan ombak-bak hokho mene a'nogo inoba selegaphogo fisasikhemo, it inailo mondok hokho agaukwa. 10Inailo agaukwama re, at malaikat a'nogo nen he, mel yagaisasikhe: ”Hinailo agubo. Yethani, fano wene yi afuni ti afuni o kweangma welagaikharek mene mondogat inendawimo inagaiyek hokhorogo hogoin mene yagahisa wagi o. 11Yogondak telhinabigin mene kain Enupogot Kristus a'nogo, o ap Daud awi sili welagaikheba a'nogo ta'lagasik werego. 12Ebe enegat hineilenggen hambik, futfobagaigen he, omalik ketago mene su kain meneba yinggilogo e sang tale'ma wam amburu ninggerek oba fagasik werek a'naga ha lani o,” yagaisasikhe.
13A'nogo yagaisugu kwelek aremnogoat he, malaikat pogoroba nen yonggo pelakfisa wagarek mene inebe mondok hokhorogo ka nen heat weinam agaukwasik he, at malaikat ekhe a'nogo inomat Allah fogerati logolik, mel isukwa:
14”It pogot abel ponggweba welagaikharek mene nen he,
nineisena Allah andiat fogerati logouwogo.
Nen, it afuni kweangma yoma inebe Allah oba
liok ikherek mene re inendawinggen hambukhogo logouwago,” iluk isukwa.
15A'nogo yagaisasikhesik he, it omanogo fisaluk inambotkwe pogoroba lagagu kwelek he, it ap wam konharek mene omanogo it-it ikhi logolik he, ”Yi'nogo hilinglagama o, iluk nineisena Tuhan nen yaganisikhe andi, o Betlehem ha louwogo,” iluk isukwasik, 16weak-weak lagaukwa re, Maria Yusuf emberek omalik ketago a'nogo e sang tale'ma wam amburu ninggerek oba weing fesukwasik were'ma ha lagaukwa. 17Ha lagaukwasik ineilenggen hikhi logolik he, wene omalik a'nogo faget malaikat en yagaisasikhe mene omanogo pilingisogo yagaisasukwa. 18A'nogo yagaisasukwama, it afuni andoma inesanggo holhukwa mene mondogaren, mel isukwa: ”Egi! Nailo e,” iluk fogeratukwa. 19Meneat he, at he Maria a'nogo nek he, wene isukwa mene omanogo endawinggenma wanhikhesik he, menenei ebeti lagaikhe. 20Nen, it ap wam konhu welagaikharek mene omanogo ineilenggen hasukwasik hobuk inambotkwe waga logolik he, ”Wene malaikat en yaganisaga a'nogo higithogoat hilinglagama nineilenggen higik, ninesanggo holhik, ogo o,” iluk, Allah fogeratik, hai watik, ilik wagaukwa.
Yesus enu salhukwa wene
21A'nogo wagaukwama welagaukwasigen, nogo inenggi 7 nen iluk ohealekwe re, omalik a'nogo agap enggalimo mene palugun oba higit agaikhemo palhukwasik he, ebe oan agaisa a'ma agi'lek werek kwelek malaikat en isikhe higithogoat he, enu Yesus salhukwa.#Im. 12:3; Luk. 1:31
Yesus ket tagoba ebe Allah wogetukwa wene
22Enu arat salhukwasik he, Allah nen attagat Musa yagatikhemo, aren ikhi logolik he, ”Hemi ineagwi taginapluk he, nogo inenggi a'nogo ilugen kwe wulibugun o,” iluk isikhe mene higithogoat, nogo a'nogo iluk he, omalik ketago a'nogo nineisena Tuhan Allah wogosuogeluk waluk o Yerusalem wagaukwa.#Im. 12:6-8 23A'nogo waluk wagaukwa andi re, nineisena Tuhan nen attagat komotninafikhe wene a'nogoba ikhi logolik he, mel isikhe:
”Omalik manggusa mene ap halok he,
an hineisena nobaget feino o,” iluk isikhe.#Kel. 13:2, 12
24Nen, ”Sue abiang hangge mene,
ap mene ekhe he mene ekhe emberek wuthogo,
athe, sue pel hangge ebe oan mene pire haloga,
an hineisena Tuhan nobaget wa'nesugun o,”
iluk isikhe a'nogo higithogo wogosuogeluk waluk wagaukwa.
25Andi sambul ap o Yerusalem mene ekhe enu Simeon. At obabut he, fano, Allah ailorogo logolik, mondok higithogo hilingiti lagaikhe. A'nogo hilingiti logolik, afuni Israel mene inendawimo fanorinabi wesigin mene andi nenangorogo were'ma, Allah Areagun oba louk isikhemo welagaikhe. 26A'nogo oba louk i wagaikhesik, mel yagatikhe: ”Hat hebe wa'lagi'lek werek kwelek, ap kain Kristus ninebe telninabigin mene nineisena Tuhan nen menfuluk lakfei wesigin isikhe a'nogo wagunem heilenggen halugen wa'lasigin o,” iluk, abok yagatikhesik he, 27at Simeon a'nogo Allah Areagun oba mondok logolik, Allah awi wuri'mo kwisikhesik were'ma, Yesus agaisa eisena emberek Allah nen isikhe mene lisu palek welagaikhe mene higithogoat hilingisuogeluk he, Yesus tago a'nogo waluk kwisukwa. 28Kwisukwama, Yesus tago a'nogo Simeon agoba wanhikhesik he, Allah enu fogerati logolik mel isikhe:
29-32”Neisena a. Afuni yi awi ti awi inebe
mondogat ineilenggen hoageluk,
telninabigin mene arat lakfei wagenma higi.
Aren he, it endakwe mene hoba wesuageluk selegerinafik,
hat hagainafuri Israel mene fogerinabuageluk selekhogo welagik,
igin mene neilenggen arat higi o.
Halok he, haren yaganeten higithogoat,
yogondak an hamingmingengge nendawinggen hambukhogo
yoma herakfisaluk hoba wesigen wo'nabumo fano o,”
iluk, Allah fogeratikhe.#Yes. 42:6, 49:6, 52:10
33Omalik andi abok a'nogo isikhemo re, agaisa inom, eisena inom, inesanggo holhukwasik he, ”Egi!” iluk, fogeratukwa. 34Nen, at Simeon a'nogo nen, ”Allah nen fanothinabuak,” iluk, ane agaukhogo yagaisasikhesik he, omalik a'nogo agaisa Maria yagatikhesik he, mel isikhe: ”Allah nen he, yenggerek yiba, it ap Israel mene inebe hokhorogoat ekhe telinafik, ekhe weagerinafik, hilingisuageluk menfesikhe o. At yi afuni mondogat futfouwageluk menfesikhe meneat he, it afuni mondogaren, ninabiro, iluk ili'lagwi a'nogo, 35inendawimo anggili'lagwi mene andi enegat asigin o. Nen, hat ogo re, karok enggat mago mene nen hendawinggenma talukhogo hoasu hagat, hendawimo mondok heiseligin o,” iluk yagatikhe.
36Nen, o andoma he ekhe enu Hana. Ap Fanuel unggulenu Asyer mene a'logo, Allah ane yagaisikherek mene welagaikhe. At agun wanhikhesik oba nen 7 tahun emberek welagaukwasik, 37sogwe fesikhesik oba nen, at ebe umur 84 tahun mondok yaman agaikhesik welagaikhe. Logolik enggi ekhe sumburu ninggi'lek ambe heang fakhasikhesik Allah awi wuri'mo andoma linggene hubanggo abit agi'lek samban mondok ikhi lagaikhe. 38A'nogo ugu were'ma, at Yesus agaisa eisena inom kwisukwasik welagaukwa andi sambul inoba wagaikhesik he, mel isikhe: ”Allah neisena a,” iluk hai watikhesik he, it afuni o Yerusalem mene inanggele'ma nen, Allah nen hobuk telninabigin iluk nenangorogo welagaukwa mene mondogat yagaisikhi logolik, ”Ebe waga yi,” iluk, yenggerek a'nogo abok yagaisikhi lagaikhe.
Yesus waluk o Nasaret wagaukwa wene
39Nineisena Tuhan Allah nen komotninafikhe mene lisu palhukwa a'nogo higithogo a'nogo arat hilingitukwasik he, at Yesus agaisa eisena inaiba i Galilea ima o sili enu Nazaret a'nogo lagai wagaukwa.#Mat. 2:23 40Lagai wagaukwasik logolik, yenggerek a'nogo alue aga logolik, ebe omame agik, endawinggen mondok kagalek mene hilinglagik ikhi lagaikhemo, Allah nen agaugwerati lagaikhe.
Yesus yenggerek oba Allah awi wuri'mo kwisikhesik hilingitikhe wene
41 Tahun ebe lombok mo lagagik pigik ugu kwelek, Yesus agaisa eisena emberek domba wam warogo seni Paskah hokhoba isago nouwogeluk he, o Yerusalem pikhi lagaukwa.#Kel. 12:1-27; Ul. 16:1-8 42A'nogo pagaresi'mo andi nen he, At Yesus a'nogo ebe umur 12 tahun arat hilingfuluk, seni hokho isago a'nogo nouwogeluk waluk pisukwa. 43Pisukwasik isago arat nasukwasik he, Yesus agaisa eisena emberegat Yesus o Yerusalem andoma kamo isikhemo it inonggorat inambotkwe inaiba lagai wagaukwa. 44It agaisa eisena inendawimo nen he, Yesus a'nogo afuni fena ninom wago mene omanogo inom weri'lagwi anggilik waga lagaukwasigen, nogo uogelugen ineilenggen kwelakhasukwa re, ebe legen he, ”Oe agot inom werega, i a, athe, agaila'lak inom werega,” iluk inoba heinok wanhukwa. 45Heinok wanhukwa mene ebe legen he, hobuk inambotkwe o Yerusalem at herasi pisukwa. 46Pisukwasik, herarik inenggi pire nikhi lagaukwasigen, hobuk inenggi ekheba kwelakhasukwa re, at ebe Allah awi wuri'mo kwisikhesik, it ap Allah ane yagaisagarek mene inom inanggele'ma hurek logolik, it omanogo inane ugunem esanggo holhik, iren ugunem aren onggo igik, heinok wanhik, ugunem heratukwa. 47A'nogo ikhi logolik, iren heinok wanhunem, at wene mondok elu logolik onggo yagaisasikhe andi nen he, it ap andogorek welagaukwa mene omanogo mondogat ane inesanggo holhukwasik he, ”Eigi, nailo e!” iluk fogeratukwa. 48A'nogo fogeratunem, it at agaisa eisena emberegen ebe arat heratukwasik he, ”Nailo e!” iluk fogeratukwa. Fogeratukwasik agaisa nen he, mel yagatikhe: ”Neak, hat yi'nogo hilingninafen nenahalok Heisena nemberek ninendawinggen firik herakhabik nikhi lago yi heilenggen nisan?” iluk a'nogo isikhemo, 49at Yesus nen he: ”Hit an hera'nabik nikhi lagep nenahalok. An neisena awi wuri'mo werek iluk hinonggot nogo?” iluk yagaisasikhe meneat he, 50it emberek futfigi'lek wonget fesukwasik welagaukwa. 51A'nogo iluk he, at Yesus agaisa eisena inom o Nasaret lagai wagaukwa. Lagai wagaukwasik logolik, at agaisa eisena inane fanorogo hologo hilingiti lagaikhe. Nen, agaisa re, wene omanogo mondogat endawinggenma wanhikhesik eberek mondok welagaikhe. 52Nen, at Yesus a'nogo logolik, ebe alue agik, endawimo kagalek mondok hilinglagik, ugu kwelek, eisena Allah inom, afuni inom, at faget inoba liok ikhi lagaikhe.#1Sam. 2:26; Ams. 3:4
Currently Selected:
LUKAS 2: inohap
Highlight
Share
Copy
Want to have your highlights saved across all your devices? Sign up or sign in
