LUKAS 4
4
Iblis nen Yesus endawimo kagaligeluk oba waga lagaikhe wene
(Mat. 4:1-11; Mrk. 1:12-13)
1At Yesus i Yordan ima pugunem, Allah Areagun endawimo peterogo kwisikhemo wulibi wagaikhesik lagunem, at Allah Areagun en ebe waluk he, o leimo afuni le'ma andoma lagaikhe. 2Lagaikhesik andoma were'ma enggi 40 hari Iblis nen endawimo kagaligeluk oba waga lagaikhe. Wagu kwelek, enggi 40 hari andem sumburu mondok ninggi'lek welagaikhe andi nen he, sumburu mondok nele agaikhemo, 3hobuk at Iblis oba wagaikhesik he, mel yagatikhe: ”Hat eberogoat Allah amlogo halok he, helep yi sumburu roti mene hilinglasuagen yagasin o,” iluk yagatikhemo, 4at Yesus nen he, mel yagatikhe: ”Allah nen he,
Afuni sumburu nek ninggi logolik, ineluk mondok welagaikharek lego,
iluk isikhemo lisu palogo fesukwama werego,” iluk yagatikhe.#Ul. 8:3
5A'nogo yagatikhemo, hobuk Iblis nen Yesus waluk tom uan meneba fei lagasikhesik he, andoma nen o kweangma yi awi ti awi kaindek inenupogot welagaikharekwe mondogat yegekhogo weinamet fesikhesik misigam faget eilenggen yethoageluk yagatikhe. 6Yagati logolik, mel yagatikhe: ”Kaindek inenupogot welagaikhare'ma inane hologo logolik fogerinafarek andi mondogat an eise logouwageluk wo'netukwama re, an nendawimo nen ebet fulugen, ap yi wogosigin, iluk wogisigiresi'mo re, 7hat heindep awi yagaisogo nawe a'ma kwi wesimbik fogetnabigin halok he, mondogat hat eise logoinogeluk wokhesigin o,” iluk yagatikhemo, 8at Yesus nen he, mel yagatikhe: ”Allah nen ikhi logolik,
Hineisena Tuhan Allah anat hineindep awi yagaisogo
nawe a'ma kwi wesimbik fogetnafi logolik he,
an faget enek hilingiti logoino o,
iluk isikhemo lisu palogo fesukwama werego,” iluk, a'nogo yagatikhemo re,#Ul. 6:13
9-11hobuk Iblis nen Yesus waluk o Yerusalem lagaikhesik he, Yesus ebe o Allah awi uanhogo wurogo liabe'ma tum oba waluk lagasikhesik he, mel yagatikhe: ”At Allah nen,
An nagoromi malaikat yonggo pelakfisa wagirek mene
omanogo nen fetharek logouwageluk inayonggo fagain o,
iluk isikhemo werek. Nen, ekhe mel isikhemo werek:
Hat heisok helep oba waranogo iluk he,
it malaikat andi inenggi talek oba wokhabugun o,
iluk lisu palek weregat anggigi. Halok he, hat eberogoat Allah amlogo halok he,
ya nen pok harogo maroma pin o,” iluk yagatikhemo,#Mzm. 91:11 #Mzm. 91:12
12at Yesus nen he, mel yagatikhe: ”Allah nen ikhi logolik he,
Hiren, an faget,
Nineisena Tuhan Allah anini werega?
Lega, iluk, nobabut palugun mondok lego,
iluk isikhemo lisu palogo fesukwama werek,”
iluk yagatikhe.#Ul. 6:16
13A'nogo yagatikhemo, at Iblis nen Yesus obabut paligeluk yi walhigik, ti walhigik, isikhe menere elo'lek agaikhemo re, hobuk yagatunem elok asigin he a, iluk, herakfisaluk lagaikhe.
Yesus ambotkwe o Galilea lagai wagaikhe wene
(Mat. 4:12-17; Mrk. 1:14-15)
14At Iblis a'nogo arat lagaikhemo nen he, at Yesus Allah Areagun omamerogo endawimo werek kwelek, ambotkwe o Galilea tonggwe lagai wagaikhe. Lagai wagaikhemo re, at abok o andoma mondok sak-pak isikhe. 15A'nogo sak-pak ugu kwelek, at ebe andoma logolik, o samban agarek oba kwisikhesik wene yagaisugunem afuni andoma mene mondogaren fogerati lagaukwa.
Afuni o Nasaret mene nen, Yesus ninabit iluk inendawimo anggasukwa wene
(Mat. 13:53-58; Mrk. 6:1-6)
16A'nogo fogeratu kwelek, at Yesus o Nasaret ebe alue agaikheba lagaikhe. Lagaikhesik, at hilingiti lagaikhe hagat, inenggi sabit oba Allah faget weat logolik, samban uogeluk o afuni Yahudi mene samban agarek oba kwisikhesik, Allah ane lisu palek mene enu salhi logolik yagaisageluk menlagaikhe. 17Menlagaikhemo re, ap ekhe nen Allah ane ap Yesaya nen lisu palogo fesikhe mene a'nogo Yesus wogetikhe. Wogetikhemo funggulogo eilenggen kwelakhasikhe re, wene mel isikhe mene lisu palek were'ma enu salogo yagaisasikhe:
18”It afuni inagarek mondok lek inelagaik mene
andi fano wene yi yagaisikhi logouwageluk mennobagaikhemo a'luk he,
neisena Enupogot Areagun pelakfei wagama an noba louksek werego.
Nen, nayonggo fikhi logolik mel yaganetikhe:
It afuni inenggi hele homago mene hele fikhalinabigin wene inom,
ineilenggen mum mene fano asuageluk hilinginabigin wene inom, yagaisigik,
it afuni inawe a'ma hak sebelogo hebisili'lagwi mene telogo sele'ma fisigik,#Yes. 61:1-2
19nineisena Tuhan nen fanotninabigin mene arat horok asi waga o,
iluk yagaisigik, ikhi logoino,
iluk laknobagai wagama wagi yi o,”
iluk isikhemo, lisu palek mene a'nogo enu salhi logolik yagaisasikhe.
20Arat yagaisasikhesik he, lisu palek a'nogo yinggilogo re, ap eisewerek mene a'nogo wogisasikhesik he, ebe hu'lagaikhe. Hu'lagaikhemo, it afuni mondogat samban uogeluk inom kwisukwa mene omanogo ineilenggen at oba mondok lourogo yethasukwa. 21A'nogo yethugu were'ma, at Yesus nen he, ”Allah ane lisu palek mene yiba, Yi'nogo hilinglasigin, iluk isukwa mene a'nogo yogondak yagahisugunem hinesanggo holhu kwelek yaat emberek higit aga o,” iluk isikhemo, 22it afuni omanogo nen he, mel isukwa: ”At yi ap Yusuf amlogo a'nogo lek nogo? Araro. Meneat he, aren wene fano mondok yaganisikhe andi nailo e,” iluk fogeratukwa. 23A'nogo fogeratukwama, at Yesus nen he, mel yagaisasikhe: ”Afuni nen, hundik-handigat ikhi logolik, hat hebe ap dokter hangge andoma re, hoba ou andi honggwaregen higiran o, iluk agarek mene, hiren lagokhogo an yaganesugun higi. A'nogo yaganesimbik he, o Kapernaum hilingiti lagen mene holhi lago andi hak he, yogondak honggwarek haiba yoma a'nogoat ekhe hilingisin o, iluk yaganesuogeluk ikhi lagep higi,” iluk a'nogo yagaisasikhesik ekhe mel yagaisasikhe: 24”It ap Allah ane yagaisagarek mene andi re, inonggwarek inaiba andoma inogogwi, inagoromi nen he agaukhogo woginafarek lego, iluk, eberogoat yagahisigi.#Yoh. 4:44 25Nen, ap Elia welagaikhe andem higit he, meiso wagi'lek 3 tahun agaikhesik he, hobuk tugi 6 en folelhikhemo re, o andoma yi awi ti awi sumburu mondok ouwak agaikhe. Andem higit he, afuni Israel mene were'ma hemi sogwe mene hokhorogo welagaukwa meneat he.#1Raj. 17:1 26Allah nen Elia hemi sogwe mene andoma ekhe isa loageluk inoba lakfesikhe fuk. Lego. We, he sogwe mene misigat ekhe o ale'ma Sidon sili enu Sarfat andoma were'ma oba lakfesikhe o.#1Raj. 17:8-16 27Nen, ap Elisa nen Allah ane yagaisikhi lagaikhe andem higit he, o afuni Israel mene were'ma andoma ou henanggo hangge a'nogo mene hokhorogo welagaukwa meneat he, ekhe higirinafi lagaikhe mondok lek. We, ap Naaman aiba Siria mene andi amu nek higitikhe o, iluk, eberogoat yagahisigi,” iluk a'nogo yagaisasikhemo,#2Raj. 5:1-14 28it Yahudi mene samban agarek oba welagaukwa mene omanogo inesanggo holhukwasik he, ina'mage hokho lagasukwa. 29Ina'mage hokhorogo lagasukwasik, inebe menlagaukwasik, at ebe inenggi fagaisogo enda'ma wulakfesukwasik he, o Nasaret era'lu tom oba wutukwa omanogo waluk lagasukwasik, tamakhogo pile pelakfisa louwogeluk isukwa. 30A'nogo isukwa meneat he, at Yesus it omanogo herakfisaluk inanggele'ma nen siakhogo lagaikhe.
At Yesus nen ap ekhe munggwarengge obabut weak mene endawimo kwisikhemo wulakfesikhe wene
(Mrk. 1:21-28)
31Inanggele'ma nen siakhogo lagaikhesik he, o Galilea tonggwe o sili enu Kapernaum kwisikhe. Kwisikhesik he, inenggi sabit oba Allah faget weat logolik, wene yagaisasikhe. 32Yagaisikhi logolik, wene ebe eisewerek mene nen agarek hak ugunem en, it omanogo nen he, ”Nailo e!” iluk fogerati lagaukwa.#Mat. 7:28-29 33O samban agarek oba omanogo were'ma, ap ekhe munggwarengge obabut weak mene endawimo kwisikhemo logolik ane hokhorogo mel yagatikhe: 34”Yesus Nasaret mene yei! Haren ninggi'nogo hilingnabigeluk wagen! Nit weaget ninabigeluk wagen a? Hat hebe re, Allah onggwarek faget menhobagaikhesik lakhobagai wagama wagen andi, an nen futhobagagi,” iluk ane hokhorogo yagatikhemo, 35at Yesus nen wenageti logolik he, ”Hane. Ap yi endawimo nen henogo wulibi lan o,” iluk yagatikhemo re, munggwarengge obabut weak mene a'nogo nen ap a'nogo ebe talorogo afuni hokhorogo omanogo inanggele'ma lakfisasikhesik he, ap ebe weaget figi'lek wulifikhe. 36A'nogo wulifunem he, afuni hokhorogo omanogo inailo agaukwasik he, it-it ikhi logolik mel isukwa: ”At ane ikhe andi ninggi'nogo mene? At ebe kainat logolik ane omamerogo munggwarengge inobabut weak mene, wulibi lani, iluk ugunem ane hologo wulifarek andi nailo e,” iluk fogeratukwa. 37A'nogo fogeratukwasik, at Yesus abok fakhogo o yi awi ti awi waluk wulifukwa.
Yesus nen Simon eamalhe inom, afuni fena inom, ou higirinafikhe wene
(Mat. 8:14-17; Mrk. 1:29-34)
38Abok a'nogo waluk wulifukwama, at Yesus o samban agarek oba a'nogo hebisaluk he, ap Simon aiba lagaikhe. Lagaikhemo, at Simon andi eamalhe ou oba aganhan hokhorogo weregen Yesus nen higisuageluk he, ayonggo fesukwama, 39aren, he a'nogo era'lu lagaikhesik mendek logolik he, ”Ou yi legame o,” iluk, yagatu kwelek aremnogoat he, ou a'nogo lek agaikhe. Lek agaikhemo, he a'nogo menlagaikhesik he, it leberisikhi lagaikhe.
40Leberisugu were'ma, o mo eil kobokhogo kugu kwelek, afuni nen it ekhe inoba yi ou ti ou werek mene mondogat woginarek Yesus oba wagaukwama, aren inebe lombok enggi fakfisilik lagaikhesik higirinafikhe. 41A'nogo higirinafikhemo, it fena inebe hokhorogoat, munggwarengge obabut weak mene inendawimo kwisukwasik welagaukwa mene nen mel yagatukwa: ”Allah amlogo hararo,” iluk inane ngai ilik-ilik wulifukwa meneat he, it inendawimo nen he, ”Kristus Allah nen, telninabuageluk menfuluk lakfei wesigin isikhe a'nogo ebe yi aro,” iluk, inelumo andi nen he, Yesus nen inane legat wulibuageluk wenagisasikhe.
Yesus nen Allah awi wurikwe o yi awi ti awi wene yagaisilik lagaikhe wene
(Mrk. 1:35-39)
42A'nogo wenagisaluk he, nogo iluk ohealek o arat wei isikhemo re, at Yesus o afuni le'ma andoma lagaikhe. Lagaikhemo, afuni mondok hokhorogoat, at herarik lagaukwasik ebe arat inom ambi agaukwasik he, ekhema lanogo iluk enggi fakfesukwa. 43Fakfesukwama, at Yesus nen he, ”Fano wene Allah awe a'ma fisikherek wene a'nogo o sili fena andoma inomat yagaisilik nikhi logouwageluk laknobagai wagaikhemo wagagimo re, an o andomaat yagaisilik nikhi logogin o,” iluk yagaisasikhe.
44A'nogo yagaisasikhesik he, o Yudea tonggwe mondogat afuni Yahudi mene samban agarekwe kwilik lagaikhesik, wene andi yagaisilik lagaikhe.
Currently Selected:
LUKAS 4: inohap
Highlight
Share
Copy
Want to have your highlights saved across all your devices? Sign up or sign in
